هل امي على صواب؟

[مشكلتي]

السلام عليكم ورمضانكم كريم ومبارك
اخوتي اريد ان اطرح عليكم هذا الموضوع واخذ ارائكم ان شاء الله
لدي اخ يريد ان يتزوج عمره29 سنة ماديا الحمد لله خدام طلب من امي ان تبحث له عن عروس لا تتعدى 19 لكن امي ترفض هذا السن لانها صغيرة ولاتتحمل المسؤولية فإقترحت بنت 26 لانها واعية وكبيرة وقادرة على تحمل المسؤولية خاصة من ناحية الطبخ وبما انه سيستقر لوحده. فرفض وهو لا يكلمها لأنه في رأيه كبيرة وان اضن ان امي على صواب لان اخي الكبير تزوج من بنت صغيرة في السن ولاتعرف الطبخ وكل اصحابه وضيوفة يأتون لعندنا مع أنه يسكن في بيت مستقل عنا. امي قالت لاخي ابحث لوحدك وانا خائفة ان لايحسن الاختيار وانا من راي امي لان البنت لي متعلمتش الطبخ في بيت ابوها لن تتعلم في بيت زوجها
شكرا لكم واتمنى ان تدعو لاخي ان يرزقه الزوجة الصالحة ولكم بالمثل

[blueangel]

اختي
أولا ,,, الام معها حق ليس لأجل الطبخ فيمكن تكون كبيرة و ما تعرفش تطيخ أو تعرف ولا تطبخ لكن السن مناسب ليه 26 مع 29 راه فرق 3 سنين أما بنت 19 راه فرق 10 سنين و هذا اللي خلا البيوت تنهدم البنت ليست ناضجة و الرجل شارب عقلو غريب الشرط هذا
ثانيا ,,, اذا كان شايف وحدة هذا يفسر رفض اخيك
ثالثا ,,, أحسن شيء تخلوه يختار كيما يحب بلاك فيها خير
و أخيرا ,,, البنت تقدر تتعلم الطبخ في دار زوجها اذا كانت تهمها مصلحتو وعندا القلب و اذا كانت غير مبالية تعرف و ما تطبخش
ههههههههه

[loji]

ياأختي هاذي حياتوا وهو لي رايح يعيش مع هاد الانسانة احترموا الرآي ديالوا و الطبخ ليس هو شرط الزواج كاين شروط اهم بكثير ورانا في وقت السرعة والنت كاين كل شئ الطبخ تتعلموا في نهارها المهم السعادة والهنا وغدوة اذا لاقدر الله متفاهمش مع المرآة لي اخترتوها انتم يحملكم المسؤولية وربي يلاقيه ببنت الحلال لي تسر قلبوا وقلب الوالدة

[ريحانتي]

العندها الصح بنت في عمرها 19 و هو 29 فرق كبير

[~رآقية بأخلآقي~]

في زوج عندهم الحق..وأفضل حل أنكم تخلوه يختار وحده و دكروه نتم بالشروط و ربي يطيحه ببنت الحﻻل..

[samirovich]

هناك بنات عندهم 30 و مايعرفوش يقلو بيض
مع انهم يتفرجو قناة سميرة لمدة لاتقل عن 12 ساعة يوميا
وهناك بنات عندهم 19 يعرفو يطيبو ويتحملو المسؤولية
العيب في اخوك الاول ماعرفش ماعرفش يختار

[رهف هبة الرحمان]

يخلو البنت لكبيرة ويدو الصغيرة لي متعرف والو امك عندها الحق يدي واحدة كبيرة تقوم بيه وبضيوفو وتتحمل المسؤولية خير من وحدة صغيرة ربي يفرج عليه ويرزقو ببنت لحلال ان شاء الله

[يسمينة البجائية]

أنا عندي 25 سنة دورك قلت بسم الله نبدا نتعلم الطبخ ههههههههه و الله درت سنيوة قاطو صابلي و الله جا كارثة ههه و لوكان جيت متزوجة ما نعرف واش تقولي عجوزتي

[أم ريتاج زهرة]

ما يصيبنا إلا ما كتبه الله لنا كل حاجة بمكتوب ربي و جاتش على الطبخ كاين كبيرة و مادير والو و اين صغيرة و طير في الطياب يحوس على بنت الأصل هو الصح و تبانلي 26 سنة توالمو و من رأيي الإختيار الأول و الأخير ليه بما أنو راح يسكن وحده يتحمل مسؤولية إختياره وحده و بالتوفيق

[أم أماني أريج]

السلام عليكم
أختي أنا في رأيي تخليوا خوك يختار على حساب رغبتو لأنو في الأخير هو لي رايح يعيش معاها و إذا كانت رغبتو بنت عمرها 19 سنة فهو حر و لو أمك ربي يحفظها جبراتو على الزواج من صاحبة 26 سنة ممكن ما يرتاحش معاها و تكون مشاكل فيما بعد مع أنه في نظري إبنة 26 سنة ليست كبيرة و مناسبة لأخيك لكن المشكلة في الموضوع أن هذا السن ما يوافقش رغبة أخوك لي هو الكل في الكل .......
و كيما قالوا الأخوات قبلي النضج الفكري و اتقان الطبخ ما يتعلقش أبدا بسن الفتاة قد تكون صغيرة و عقلها يوزن بلاد و قد تكون كبيرة و تصرفاتها مثل المراهقات .....
ربي يوفق خوك و يرزقو ببنت الحلال لي تناسبوا .............آمين ............

[sousourose]

سلام عليكم ...شوفي ختي ماشي بضرورة تكون مولات 19 متعرف والو ختي من لي كانت 16 تدير لعجب ودرك راهي 20 ومتزوجة ودير ضيافات نتاع حراير احنا في دار نتعلمو من لي نكونو نقرو في المتوسط وهكدا تقريب مناطق الصحراء وسن لي قتلوا يماك كبيرة شوي بنسبة ليه على الأكثر 24 psk هو راه 29 يبان صغير ويبقى صغير نتاع 26 لازمها واحد 32 وروح هذا رايي
آه وتفكرت مرة رحنا ضيوف لسطيف وصاحبة المنزل بقات جالسة معنا وبنتها صاحبة 19 هي لي طبخت كلش ...شربة فريك ممم ..وكسكس ...وحميس والله ولا أروع

[مجرّد إنسان]

أخوك حرّ في اختياره
هو يرغب في بنت 19 سنة وأنا أوافقه الرأي
وإن شاء الله الزوجة الثانية تكون 26 سنة : )

[amira1989]

لا تتعلم بسيف عليها ريحي حالك و لا تقلقي هادي مو مشكلة اصلا

[أم شروفة]

أنا عندي 25 سنة دورك قلت بسم الله نبدا نتعلم الطبخ ههههههههه و الله درت سنيوة قاطو صابلي و الله جا كارثة ههه و لوكان جيت متزوجة ما نعرف واش تقولي عجوزتي
تطلقك يا بنتي كل شيئ يحملوه العجايز غير القاطو ما تدوريش بيه هههههه
الان اصبح الشباب يتفاخر انو متزوج واحدة صغيرة ...شوفولو واحدة قاعدة في الدار واسالو عليها

[نورالهدى بيولوجيست]

هناك فرق في العقليات مثلا اخي عندو 26 سنة اول شرط ليه كان انو تكون زوجتو اقل منو بسنة او سنتان و فعلا تحقق ماطلب و راه هاني و لاباس عليه الحمدلله

خلوه يدبر راسو و ربي يسهللو ان شاءالله

[خالد عنابي2]

اولا اخوك رجل وقادر على تحمل اعباء الحياة وتكوين اسرة كما انه ناضج ويعرف صلاحو

ثانيا انتي واش دخلك مع احترامي حتى يكون لكي راي في المسالة ؟ انتي لستي حتى امه واراها وقاحة ان تدخل البنت نفسها في امور اخيها البالغ القادر فهو القوام عليكي وليس العكس وليس لكي اي هيئة او مقام يخولكي الوصاية عليه او ممارسة اي نوع يذكر من انواع السلطات

ثالثا يالها من نظرة متخلفة تلك التي تختصر الزوجة في الطبخ واين المشكل اذا لم تعرف تطبخ ؟ هل سيموت من الجوع ؟ لا اعتقد
يدبر راسو بلاك هو حاب ياكل ميلفاي وكونسارف وانتم واش راحلكم فيه عندكم معدة مشتركة ؟

رابعا
كيف حكمت امك على البنت انها لا تجيد الطبخ من خلال سنها ؟ هل جربتها ؟ ام انها مجرد افكار معلبة وتهم جاهزة للاسقاط

خامسا
ربي يهديكم برك