مشكلتي

[مشكلتي]

مشكلتي هي أمي و ابي اللي ما نقدرش نسامحهم طول ما انا عاشة . و ما نقدرش ننسى العذاب و الميزيريا .
والله سامحوني مي الله غالب الانسان يتحكم في أفعالو و أقوالو و لكن ما في قلبو ابداااااا ما يقدرش يتحكم فيه
انا بنت عندي 25 سنة و راني ندرس مجال تربية الطفولة عازبة و في حالة نفسية سيئة و محطمة . علابالي تقولولي ما تحشميش تهدري على أمك و ابوك بهذه الطريقة و يحبوك ووووو . بصح ظليت نقنع روحي منذ سنين بلي والديا مكانش خير منهم . و لكن لا .
انا المشكل نتاعي الحقرة و الذل في الدار . علما أني الأخت الكبرى في البيت و عندي 2 أخوات و اخي الصغير . بسبب والديا اخواتي يحقروني و ما يحترمونيش . حاسة روحي اصغر منهم . و المشكلة نتاعي بدات كي كنت صغيرة 5 سنوات . كي نهدر مع خوالاتي و اخوالي قبل ما نتكلم يضحكو عليا و كنت مسخرة قدام ابنائهم .ما علاباليش وعلاش . صرات فيا عقدة و الخوف الشديد من الهدرة مع الناس و ضعف الشخصية و عدم الثقة في النفسي . يما ما كانتش تعيط عليهم و ما قيمتنيش . كي نغلط في الدار تحكي للعائلة كامل و تبهدلني . و على هاذ الاساس تربيني احسن تربية . و كي كبرت كملوا معايا نفس التعامل قريت في مجال الحجامة و الأعشاب الطبية و راني نعالج الناس بيها .كل شيء مليح و الناس يحبوني بصح خوالاتي و ابنائهم يعيطولي باش يسألوني على وصفة عشبية . نفرح و كي نبدا نجاوب يضحكو و يقولولي تعلمتي كل هذوا ؟ بسخرية و الله ما سمعوش اصلا الوصفة و يبداو يتغامزوا و يتهامزوا بيناتهم .

الأن عندي سنتين قطعت الصلة . ما نروحش ليهم ا في العيد و لا في الجنازة و لا في الفرح زواج . والو و ابداو يشتكون لأمي .أنا فرغت قلبي لأمي باش تفهم و طلبت منها تهدر معاهم و تحبس هاذ الاستهتار و الاستهزاء نتاعهم , وليت مسخرة و لعبية في أيديهم بصح لاااااااا حياة لمن تنادي . غاضبة و زادت حكرتني يا جماعة و جرحتني و قالتلي ما دارو وااااالو . المهم قاطعت أهل أمي كرها .

اليوم دور أخواتي واحدة في الجامعة و الأخرى في الليسي . تديروا واش تحبوا , انا لابسة جلباب و ملتزمة و نحب نوجه أخواتي و ننصح و بالاك نعيط عليهم في مصلحتهم بصح يما ما تحبش . تقولي ما تدخليش روحك . جرحتني و ذلتني . . اختي اللي في الثانوية لقاها عمي في الفيس بوك و مواقع غير اخلاقية. يما قريب هبلت . صرات حرب في الدار و بابا كسر كلش و قريب اهبل . ما ننساش هاذيك الليلة . انا اللي صباح و مساء نهدر مع يما و نقول لها ما تشريش ثياب التبرج و حددي أوقات خروج أختي .... لا حياة لمن تنادي و ايوم كوارث في الدار.

يما و بابا ما داروليش قيمة و ما يحبوش نعطي رايي أبدا . شوية بشوية قطعت الصلة مع بابا . راه عام و نصف ما تكلمناش لا في العيد و لا غيره
و الاسبوع الاخر صرات مشاكل في الدار عاجال خويا . عيطت عليه و قلتلو ما تاكلشفي صحن واحد اخر . كول في صحنك يما عارفة اللي درتو حاجة تبية بصح بهدلتني كيما العادة حتى خويا ما يحترمنيش .

قلت لامي خلاص انا و اياك لا كلام و لا هدرة بيناتنا و ما نسامحكش اى يوم الدين و نوكلك لربي العالمين . دخلت غرفتها و بكات . ثم خرجت و خزرتني بحقارة و قوة الغضب و الحقد . انا ما ناكلش معاهم في رمضان . ناكل كي ياكلو الكل . ولا ناكل في غرفتي

ما نسامحش يا ناس و الله والوكان تقوم الدنيا . اللي دارتلي بزااااف . و علا جالها قطعت بززاااف صلة رحمي .
حابة نتزوج و نروح لبعيييييد باش يتفكرو شوية و بالاك يندموا .
انا هاذ العيد ما نعيدش معاهم . و ما نكلمهمش ابدااااااا . علا خاطر الاعياد الاخرى كسرتي نفسيتي و رحت ليهم و اليوم ما تبل حتى حاجة .
فقط حابو نفرغ اللي في قلبي و سامحوني و صح فطوركم . ادعولي نتزوج قريبا

[ابتسام smile &hope]

يااختي حلك عند طبيبة نفسية
روحي باش تفرغي قلبك

[قدوتي رسولي]

والله غير حاسة بيك اختي
ربي يهديهم برك
بصح واش راح الديري هادم راهم والديك مهما كانو ملاح ولا حايرين لازم تسامحيهم وطيعيهم باه تدي دعوة صالحة وتدي رضايتهم خاطر رضاية ربي برضاية الوالدين
والله كون يكون باباك غاضب منك ولا يماك ماتربحي ماتشوفي الربح صدقيني فوتي وعقبي ياما راح تشوفي
ربي يكون معاك
والله عجزت مالقيت واش نقول باه نصبرك

[houssem zizou]

يا أختي أقول لك
نحن ماذا لاقينا من الأذى الذي لاقاه رسول الله صلى الله عليه و سلم
قالوا عليه ساحر و شاعر و مجنون و غير ذلك من الاقوال لكنه صبر صلى الله عليه و سلم و فاق أولي العزم من الرسل
أنت الحمد لله من الله عليك بلبس الجلباب و التستر فلو أرفقته بالعفو عن الناس لكان خيرا و أفضل
و من عفا عن أخيه انقلبت العداوة بينه و بين أخيه إلى محبة و ولاية قال تعالى: (فإذا الذي بينك و بينه عداوة كأنه ولي حميم و ما يلقاها إلا الذين صبروا و ما يلقاها إلا ذو حظ عظيم)

ثم مادام الإنسان يعيش مع الناس لابد أن يتعرض لأذاهم لا سيما إن كان على الحق فالناس يكرهون من يحول بينهم و بين شهواتهم فعليك بالصبر ثم الصبر

و نصيحة: لا تتعرضي أبدا لوالديك برفع الصوت عليهما أو بإدخال الحزن عليهما أو ما شابه ذلك و إن أخطأوا في حقك فكما قلنا عليك بلزوم العفو و الصفح
و احذري من العقوق فالأمر خطير

قال تعالى: (إما يبلغن عندك الكبر أحدهما أو كلاهما فلا تقل لهما اف ولا تنهرهما و قل لهما قولا كريما و خفض لهما جناح الذل من الرحمة و قل رب ارحمهما كما ربياني صغيرا)

أسأل الله أن يردنا إليه ردا جميلا و يهدينا غليه صراطا مستقيما
و أن لا يجعل بعد رمضان هذا ذنبا إلا غفره و لا ضالا إلا هداه و لا مريضا إلا شفاه و لا حاجة من حوائج الدنيا و الآخرة إلا قضاها

[kingwil]

السلام عليكم
انا في رأيي اذ عائلتك و اخوتك مستحملتيهمش مراكيش قادرة تستحملي زوج و عائلته غرباء عليك

عليك الصبر وخاصتا على الوالدين

[مجرّد إنسان]

قطيعتك لوالديك لا يجيزها الشرع ولا العقل ولا الفطرة السليمة وأنت هي الخاسر الوحيد في الدنيا والآخرة والله تألّمتُ لقولك بأنك لم تكلمي والدك أكثر من سنة وأنّك لا تكلمين أمّك ولا تأكلين معهما في هذا الشهر الفضيل والله أنا مشفق عليك وأنصحك أن تسارعي اليوم قبل الغد بتقبيل رأس والديك وأن تطلبي منهما السماح قبل أن يموت أحدهما وتندمين ندما عظيما مهما كان خطأ والديك فلا يجوز لك أن تقطعي الصلة بهما ويجب عليك أن تعامليهما بالحسنى وتبرّهيما بل إنّك مطالبة شرعًا بأن تحسني لولديك حتّى لو كانوا كفارا لا يؤمنون بالله فكيف وهم مسلمون ؟ فاتقي الله واعلمي أنّك ترتكبين إثما عظيما وأذكّرك بأنّ دعوة الوالدين على أبنائهم مستجابة وقد يكون ما أصابك من تعاسة في نفسك ومن مرارة في حياتك هو بسبب عقوقك لوالديك فراجعي حسابتك وتضرّعي إلى الله بالدعاء واسأليه سبحانه وتعالى بذلّ وانكسار وصدق وإخلاص بأن يهدي قلبك إلى الحق وبادري بإصلاح علاقتك مع والديك في هذه الأيام المباركة وستتحسن حالتك النفسية وستعود السعادة إلى الأسرة بإذن الله وأنصحك أن تتعاملي باللين والحسنى في نصيحتك لإخوتك ولا حول ولا قوّة إلاّ بالله

[Cadena]

واقعك مرّ بنت مثلك يُفعَل بها كذا بدل أن يتربّى أخوك وأختك على طاعتك لتعليمهم الأخلاق والدين
نصيحتي لك رغم كل هذا أعفسي على قلبك وكلّمني والديك، اجعلي علاقتك معهمآ سطحية ومع عائلتك كذلك وأتمنى أن لا تحدث هذه الأمور مرة أخرى.
بالنسبة لأختك ربي يهديهآ.وأمك وأبوك لن تجدي عنهمآ بديلًا فلذلك أكرر نصيحتي لا تبتعدي عنهمآ ولو كانت العلاقة سطحية.

[اخت الرجل]

اختي ربي يهديهم
لاكن عليك الان ان تذهبي وتقبلي راسيهما وراكي رايحة تشوفي الفرق ففي ذلك رضى الرب ورضاهما
يا اختي مادخليش روحك في قوم داير هكا وقيلينا منهم

[صفاء الروح]

فرج الله كربك اختي وتنسايش بلي هادوك والديك هوما لي يدخلووووك للجننة وهوما اللي يدخلوك للنار

[رهف هبة الرحمان]

مهما كان هدو واليدك سامحيهم وكلي امرك لربي وربي يرزقك بالزوج الصالح

[خالد عنابي2]

مقاطعة الوالدين ليست بالحل لانك تخسرين دنيا واخرة

الحل في عدم مقاطعتهما ولكن لي يغلط اعطيه الحس وما تسكتيش على حقك

ولا تلتقتي لمعاتبة الوالدة كي تبدا احقريها ببساطة وخليها تغلي هههه

[يسمينة البجائية]

يااختي حلك عند طبيبة نفسية
روحي باش تفرغي قلبك



لا حول و لا قوة الا بالله العلي العظيم

[abdelka22]

على حساب كلامك أرى بأنك تعانين من تربية صغرك و لكن يمكنك التغلب على ذلك ..و أعلم بأن عائلتك تعودوا عليك بتصرفاتك و أنت صغيرة ..أرى بأن الحل لذلك هو عكس ما تقومين به و هو بزيارة أقاربك و مقابلتهم كأن شيئ لم يحدث و تكلميهم بطبيعتك و وحدهم سوف يلاحظون التغبر و يعود إحترامهم لك ..أما عائلتك إنصحي أخوتك بالنصيحة الحسنة و لكن لاتفرطي في ذلك
و ربي معاك

[تيمَهـ]

السلام عليكم

آلمني حديثك أختي و لكن بر الوالدين هو السكوت و الخضوع عندما يخطآن بحقك و ليس العكس
قااع الناس ساهلة يبرو والديهم مين يكون غي الضحك و الفرحه و لكن كي تقساح الحالة يبان الصح
متشوفيش في هذا الامر أنه حاجه ماشي مليحه العكس فكري قولي هادا امتحان الله لي
ربي حطك في هذا الموقف متقوليش والديا ناس ماهمش ملاح و يحقروني العكس
اعلمي ان اي موقف في الحياة هو امتحان لك لا غير لذا لا تحقدي على اي احد لانه سبب في ذاك الامتحان فقط
و هادو والديك اختي كيفاش متعيديش معاهم و باباك متهدريش معاه و أمك معاديتها
هادو ماشي ناس عاديين تقولي حقروني نحقرهم و نعاملهم بالمثل
لو كان شخصا اخر غير قريب نعذرك نقولك تسامحو بيناتكم و تخاطاو عادي
و لكن تقطعي الصلة مع امك و أبيك سمحيلي هذا لا منطق و لا فطره سليمه

شوفي قصة سيدنا ابو هريرة رضي الله عنه كانت أمه مشركه و كان شديد البر بها قصة الصحابي أويس القرني و خليهم قدوة لك
يقول الله تعالى فلا تقل لهما أف و لا تنهرهما و قل لهما قولا كريما صدق الله العظيم
قالك أف متقوليهاش و متنهريهمش و فوقها واش ؟ قل لهما قولا كريما يعني فوق التأدب و عدم الرد عليهم تزيدي تهدري معاهم ملييح
مقالكش هاد شي على الوالدين الملااح حتى لي ظلموك
و يقول ربي سبحانه أن اشكر لي و لوالديك
معناه من لم يشكر والديه لا يقبل منه شكره لله
و يقول حبيبي رسول الله رضا الرب في رضا الوالدين و سخطه في سخطهما

يا أختي حنا مسلموووون حنا منفيسوش والدينا في ديار العجزة حنايا نتمنو يبلغو معانا آلاف السنين و حنايا نرعوهم و نونسوهم
هادي حياة و فانية الانسان كي يصراله مشكل تسود أفكاره غي كيلي راح يعيش آلاف السنين مع المشكلة هاذي معلابالهش بلي صايي راح يموت غدوة و لا لي عليه
هادي دنيا و تفوت و الخلود في الآخره العكس احمدي ربي على هاد الوضع لي مراهش عاجبك و اشكريه انه اهداك هاد الوضع لي بيه لو شاء الله تدخلي الجنه متزيدي والو
نحن نفرح بالبلاء يا اختي اي شيء يضرك حتى معنويا راه ليك أجر عليه
نعلي الشيطان و مديريش في بالك ان طلب السماح من والديك ذل ابدااااااااااا هو العزة و هو الكرامة و ان شاء الله تكوني في مقام الاحسان و تكوني من الذين قال الله عنهم
و الكاظمين الغيظ و العافين عن الناس و الله يحب المحسنين
حاجه ماشي ساهلة راني عارفه و لكن دعي ربي يوفقك ليها و تذكريو ما خلقت الجن و الانس الا ليعبدون
الناس في مختلف العالم حايرين علاش تخلقو و انتي ربي خبرك علاش نفذي و طيعيه و هو يجبرلك هاذ الكسر لي في قلبك و هو يحنن قلوبهم عليك
و الله الدنيا ماكان والو كاين غي ربي عرفيه هو يونسك و هوا ينسيك و هو يقويك و هاد العباد لي باينيلك يحقروك عباااد ضعفااااااء غي يزلق واحد من دروج و لا يطيح على فرشيطه تمشيله عين ههههه المهم فهمي يبانولك جبابره و لكن هوما غي ناس ضعفاء تاني معندهم ما يديرو

سمحيلي طولت عليك و لكن ان شاء الله يكون قلبك زين و تقبلي نصيحه من أختك الصغيره رووحي على طول طلبي السماح جلسي معاهم تحاكاو و ردي المياه الى مجاريها و والله ستتحسن نفسيتك و تنفتح ليك الابواب تحيري و تعرفي بلي الدنيا ماكان والووو

ان شاء الله تكتبي موضوع و تفرحينا انك تصالحتي مع والديك و ربي يهدينا جميع ان شاء الله دعواتي لك

[KARIO]

والديك مشي ميحبوكش و لكن هذه عقليتهم مقصدهمش يؤذوك، عندك مشكلة نقص الليونة فالتعامل، كيما نقولو فالدارجة "ظنفة"، صدقيني لوكان تغيري اسلوب تعاملك معهم كلشي يتغير، مثلا خالاتكم يتمسخرو نتي تاني تمسخري و عرفي كي تجاوبيهم دون انفعال، صدقيني رح يولو يعملولك حساب، و نقطة مهمة راكي دايرتها كحلة مع ربي قطع صلة الرحم من الكبائر، الدين اختي مشي جلباب الدين معاملة، و نصيحتك لاخواتك لازم تكون باسلوب مليح مشي بصيغة الامر مراهش نظام عسكري
و زيدي اهتمي بصحتك النفسية و نمي ذاتك و وفقك الله

[أمَةُ الرحمان]

إياكْ يا أختي إياكِ و والديك مهما صار و مهما كان ان لم يرضيا عنكِ ظالمة او مظلزمة لن تشُمِّي رائحة الجنة
ربي يهديهم و يصبٍَّ قلبك الحمد لله مادُمتِ متديِّنة ارجعي لوالديك لانك تعرفي مليح معنى الوالدين
أنتؤ حاولي انك لاتتدخَّلي في أمور أخواتك مادام النُّصح يأتيكِ بالسَّ[و الجرح و لكن والديكِ و أخواتك لاتقاطعين
و بادري في العيد بالصُّلح و الله ما تجري ربي سُبحانو مُقلِّ[ القلوب
ننصحك أدعيلهم و لا تدعي عليهم ماكانش كيما الوالدين

[غير هام]

السلام عليكم

انعلي الشيطان ما تلقايش خير من العائلة تاعك ما تقاطعيهمش هادو امك وبوك ادعي هدا الدعاء "اللهم الف بين قلوبنا واصلح ذات بيننا"وربي يصلح الاحوال

[intissar98]

ربي يفرجها عليك

[imane mon]

bacherina besseleh ya akheti ti3i waledik wessili rahim neta3ek , wematezidi tenassehi hata wahed khali ta3amel me3ahom satehi

[امينة 1991]

سبحان الله وكانك تتكلمين عني لكن انا حياتي مع اهلي ووالديا اقسى من حياتك بكثير لكن رغم ذلك لازلت اتكلم معهما واتحمل مالا يحتمل فقط لاني لا اريد الدنيا لانها فانية اريد ان افوز في الاخرة .ولا تنسي الاية الكريمة " فان مع العسر يسرا , ان مع العسر يسرا" واكثري من الدعاء والاستغفار وقراءة القران وسترتاحين باذن الله .

[shams7]

ta3rfi
nsihom kamel
w deri shabat w 3ichi hyatek comme il faux
w rohi hawsi


la famille est pas tt f had denya
madamki ta3rfi rabi matesmich bihom w sem3ihom


ki tweli b drahmek tchri hlawethom


nti solution ta3ek twe bkhir 3lik molat drahem
bach ykaymoook