حكايتي مع السرااق .....في رمضاان ....

[شهيناز13]

السلام عليكم ورحمة الله وبركاته
سلام خاوتي
في هاد المنتدى فيه كلش غني ويتناول مواضيع في كل الميادين سواء سياسية اجتماعية اقتصادية ثقافية او تربوية

شفنا مواضيع تع نقاش وموضيع تع اغاثة ومواضيع تع ظحك ومواضيع صور يعني من كل نوع

والاكثر شي مواضيع دات طابع كتابي داتي ممكن تكون مظحكة وممكن العكس

يخلي الواحد يفرغ واش كاين في قلبو ويتشارك احداث ومواقف صراتلو في حياتو مع اعز الناس

كيما تعرفو في الحياة الانسان يمر ب بزاف مواقف منها الحزينة ومنها المفرحة ومنها المظحكة ومهما كانت طبيعتها يحب يشاركها مع الغير

فهذه طبيعة الحياة لا تخلو من العوائق والصعاب
والتي تبعث الإثارة والمتعة في حياتنا

" فهي ملح الحياة"
نتعلم منها الدروس والعبر ونعلم الآخرين أيضا
نولو للدارجة هه

في الحقسقة مروا عليا بزاف مواقف متنوعين
مي ايوم خيرتلكم حكايتي مع السراق
لي حب يسرقنا في رمضان

أي وي رمضاااان شهر الرحمة الناس لاتية بالصلاة وقراءة القٍرآن وناس اخرى لاتيا بالسريقــة

المهم نبدالكم دوك تفاصيل حكايتي
في الثامن عشر من رمضان عام 2014 أي العام لي فات
كان نهار عادي شويا حاار
لحق وقت الافطار
فطرنا والحمد الله بدينا نتجادبوا في اطراف الحديث وكل افراد العائلة تشارك
ها اليوم السخانة ها اليوم ع طشنا ...ها غدوا نخرجوا نشرو كسوة العيد ووو المهم هدرة وماكلة ...

كملنا الفطاري وغسلت لمواعن لحق وقت صلاة التراويح
راح خويا لكبير وبابا للجامع يصلوا
وبقيت انا وماما وختي لكبيرة وختي الصغيرة في الداار
قاعدين نتفرجو وباعد ناضو كامل كل واحد راح يدير في حاجة
قعدت نتفرج وحدي ونسمع في صوت االسيشواار
رحت نقرعج لقيت ختي تسشور لماما وختي الصغيرة شاعلة الميكرو وتلعب في العاب فلة
رحت للكوزينة ودرت الشاي يسخن نقصت عليه الناار ورجعت
للصالون قاعدة نتفرج
فقدت تريكيزي مع التلفزيون بديـــت نغنــي اغنية نتي باغية واحد كانت ثمة غير كيما خرجت جديدة
انا نغني ومتاكية
وتفكرت ال لاتاي لي راه يسخن
نضت باش نروح نجيبو وغير نضت يجي مورايا واحد يحكمني

تشفاو في الافلام كي يحكم الشرير كاش واحد ويقولهم ارموا السلاح ولا نقتلو
صاشي
وبيا اول مرة يصرالي هاد الموقف وما توقعتوش يصرالي
بديت نتبسم ومش مصدقة الموقف حسبت كاش واحد من لافامي جا وقاعد يتمسخر بيا
باسكو عندي ولاد خالتي دمهم خفيف كل ما يجيونا
يديروا موقف يظحك
انا قلت هاد كاش وحدة من خرايبهم
حتى لقيت الحالة سيريو شاد الموس في يد وحاكمني من رقبتي باليد لخرا
مالقيتش وش نقول في ديك اللحظة نسيت الهدرة
مي تصدقو ولالا
حكمتني الظحكة كي شفت الموس لي شادو
قلت في قلبي هاد موس ولا قطنة ههه
موس من النوع صغير تع معلاباليش لواش يصلح
قلت شكيت تخلاصو عليه لامواس
وقاعدة نخمم في لاتااي لي راه يسخن دوك تخلا الحالة في الكوزينة
لي صونصياال
في ديك اللحظة شدني وقالي تهدري تموتي
انا ديجا نسيت الهدرة كفاش
قعدت ساكتة
حتى ترتقت قتلو منين طحت عليااا ؟؟ وش راك حاااب
قالي جيت نسقهوا معااك ... روحي جيبيلي درااااهم سي نون اليوم تموتوا كاامل
ويجي شريكو كان طلع للسطح وهبط
جاو في زوج واحد حاكمني وبدا لاخر يهدر معايا
وين راكم دايرين دراهم ؟
هو قال دراهم وانا تلمحت تيليفون تع ختي شارياتو جديد وغالي فوق التلفزيون
وندعي ياا ربي وما يشوفووش
قعدت نلهي فيه بالهدرة
وش جايين تديروا وقت الصلاة ورمضان خافوا ربي والله تندموا
ويجبد الموس هو تاني
لالا هاد المرة مووس موووس تع المافيا ماكااش تمسخيـــر
ماما وخواتي في الجهة لوخرا مش جايبين لخبر فلم الاكشن لي راه صاااري معايا
ماحبيتش نعيط باسكو خفت تتقلب الحالة يبعجني ولا كاش ما يصرا مع ماما باسكو تتخلع بالخف خفت عليها
كاش ما يصرالها ونندم

قعدت شادة روحي وحاولت نتصرف بعثلانية وننقد الموقف
سقساوني شكون لي راه في الداار

محبيتش نقوللهم رانا غير نساا
قتلهم راه بابا وخاوتي كباار كامل هناا خلاات عليكم لوكاان يشوفوكم
بقا واحد يهدر معايا ولاخر راح يدور في الصالون و يشوف
انا قلبي غير مع التليفون فيه فوطوات خفت يديه
لعبتهالهم حيلة
رفعت شويا صوتي وقلت يا خلاااكم دوك يجوكم وتتفر فيكم شاف فيا لاخر وجااا ليااا
بلعي ولا نقطعلك لسانك ايا روحي جيبي الدراااهم
قتلو والله ماكاي ن دراهم جيتو في وقت الزلطة
قتلو صحا قولي منين جيت قالي ما يهمكش

وحنا عندنا زوج بيبان واحد كما كنت قاعدة نتفرج واحد كيما كانوا ماما وخواتاتي مش بعيد منهم جابلي ربي من تم سوطاو باسكو الحيط جاي هابط شوياا خلاو ناس راحت تصلي ونطو
ومع السيشواار واحد ما انتبهلهم

المهم انا لي كنت وحدي اضطريت انا لي نتعامل معاهم

مي غاضوني مساكن حسيتهم مازال مبتدئين و اول مرة يسرقوا
باسكو قاعدين غير يحوموا ورايا ومرة على مرة يقولولي هاتي دراهم ولا ما داروا والو هههه
ملثمين وجوهم بالصاشي
خفت لا يجي كاش واحد يشوفهم
وسوغتو ماما تجي تشوفهم تطيح تتغاشى ايا قلت ندير حد للموضوع
قتلهم شوفوا والله يجي بابا ولا واحد من خاوتي خلااات على بركم
انا نمدلكم راااي لا حنا نخسروا ولا نتوما تخسروا
نفتحلكم الباب هادا لي كان مش بعيد عليا
قتلهم نفتحولكم واخرجو بلا سمـــير و ننساو الحكاية
شافوا في بعضاهم وقالو يا لاا
ايا انا حكمني وحد الانفعااال والحمااس
حسيت الاندرينالين يتدفـــق كي شغل راني درت حاااجة كبيييرة
قالولي صحيتي
وهوما خارجين قالي واحد تهلااي في روحك وصح صحوركـ ههه قتلهم ياه اكم عارفين رواحكم في رمضان خخخ
المهم خرجوا
والمفآجأة غير خرجو جات ماما وختي
وهاهي ختيي تعيط عليااا
وش ناسيا روحك مخليا لاتااااي وقاعدة راكي خليتيها

قتلهم في بالي لوكان تعرفوا وش صرا معااياا

حسيتهم كيما هادوك في الافلام غير من لتالي يجو لابوليس
هاكدا هوما كي خرجوا السراقة جااو يتبختروا
ايا كي رحت للكوزينة ونقيتها
ووليت ليهم وقعدت مشووكياا
اهه زعما صح وش صرالي ولا كنت غير نتخيل ؟؟
اوااه لالا كنت نتخيل برك
و رجعت للاغنية
نتي باغية واحد يكون دمو باارد اهخهه يا الدم مزيا ما صرا والوو
وشادة الوسادة ونخمم وباعد طرطقت
Thaaat was cool !
ختي قاتلي شبيك اكي تهدري وحدك
وانا في بالي قاعدة نخمم
كنت محتاجة شويا اكشن في حياتــي وتصرا حاجة بهاد الحمااس
وبقيت نحاور في نفسي
نقوللهم مانقولش ؟ نقوللهم منقولش ؟
لااازم نقووللهم
اوااه لالا لوكان نقوول ماما تولي توجوغ موسوسة ونمرضها برك
ايا خليتها في قلبي
كاين لي حكيتها لاصدقائي في النت
كاين لي جا معايا وكاين لي عاتبني كفاش ما حكيتش ولا عجباتك الفصرة معاهم المرة جاية وجديلهم لاتاي واقعدي اسنايهم

المهم في التالي ما زادوش ولاو حمد لله
بعدها بأشهر رحلنا من داك الحوش
وهادي دكرى من الدكريات لي فوتتها فيه

ونقول لاي واحد ادا مر بتجربة في يوم من الايام كيما هادي ما تتسرعوش
وحاولوا تتصرفوا بهدوء وايجابية
راح تبقى دكرى في حياتكم مع الوقت تولوا تضحكوا عليها وتضحوا الناس معاكم هه

طولت عليكمـ تحياتي لكل من قرأ هاد الموضوع

والله يصلح مجتمعنا ويهدينا لفعل الخيـــــر




أختكـــــم /شهيــــــناز

[..بسمة أمل ..]

السلام عليكم

اختي انا نقولك الصحة مصدقتش ولا كلمة من هدرتك لانو

طريقتك في الحديث غير منطقية زعما جاو السراقة وقعدتي مقصرة معاهم

وفتحتيلهم الباب اييه وانتي كي دارلك الموس على رقبتك قعدتي تخمي على الاتاي و الكوزينة

وفينالموا مقلتهاش لداركم سيبا نوغمال هذي ليستواغ تبانلي صح راكي كنتي تاماجيني برك

المهم تقبلي مروري وهذا مجرد رأيي فقط

[شهيناز13]

السلام عليكم

اختي انا نقولك الصحة مصدقتش ولا كلمة من هدرتك لانو

طريقتك في الحديث غير منطقية زعما جاو السراقة وقعدتي مقصرة معاهم

وفتحتيلهم الباب اييه وانتي كي دارلك الموس على رقبتك قعدتي تخمي على الاتاي و الكوزينة

وفينالموا مقلتهاش لداركم سيبا نوغمال هذي ليستواغ تبانلي صح راكي كنتي تاماجيني برك

المهم تقبلي مروري وهذا مجرد رأيي فقط

محترمة رايك ولو كان مكدب للحقيقة
انا مانيش كاتبة لقصص خيال و انما صرات معايا واقعة حبيت نشارككم فيها
سواء صدقت ام لا هداك يبقى رايك الشخصي
سلامي ليك

[الاسد الابيض]

كي محكيتيش للفميلية مش مليحة لان السراقين كانو قادرين يولو من نفس الطريقة و لوكان حكيتي يرقعو الحالة(ريسكيتي بالفاميلية) و ثاني لوكان عيتو للبوليسية خير بلاك سرقو دار واحد اخر.
تقبلي مروري وهذا مجرد رأيي فقط

[الفقير المغامر]

ربي حفظك والسلام

[جمعي البشاري]

شكرا على القصة
ربي حفظك والسلام

[رندة نهاد]

ما عيطتي ما خفتي:rolleyes::rolleyes: وبقيتي تحكي وتفسري ؟:confused::confused::confused: منك بالصح حبيبتنا:confused::confused::confused::confused:

[imenemalak]

ما عيطتي ما خفتي:rolleyes::rolleyes: وبقيتي تحكي وتفسري ؟:confused::confused::confused: منك بالصح حبيبتنا:confused::confused::confused::confused:

وي شوية هاد لقصة كيفاش ما عيطيتيش وحاجة لي حيرتني تحلي لباب وتقولهم روحو؟؟؟؟ ههههه بلاك راكي مشاركة في هاد الشيء ههه مووووووووس ومخافتيش والله حتى كون جا راجل في مكانك راه خاااف ودار حرب ,,, حتى في الافلام ينفعلو ...:1::1::sdf:

[شهيناز13]

هخخخخ ردود فعلكم منطقية مي هاد وش صرا وش راح ندير ههه

انا محبيتش نكبرها ولوكان كشما درت وباعد هربوا
ماشي لوكان كاش نهار شافوني براا كشما يديرولي؟؟
انا سايست الحالة باش يعم السلام و صح فتحتلهم الباب وخرجتهم كاين لي تشوكا من هاد الشي مام انا كي خرجتهم تشوكيت في روحي

مي الواحد لازم يسيي يشوف كفاش يتصرف

[imenemalak]

نستعرف بيك امالا باسكو كون جيت مكانك اني دخلت بعض ,,,,,,, اول شيء نديرو الصراخ هههه

[رندة نهاد]

صراحة ما غاضنيش البورتابل الي كانو رح يدوه غاضتني كي كسرو عليكم الحرمة ودخلو شافوك هكاك فهمتيني حبيبتنا ؟

[شهيناز13]

ي حبيبتي اني فاهماتك مي ماتكدبينيش انا هاك صرالي وحبيت نفرغلكم قلبي مش نولي نفسرلكم ونقسملكم بلي مانيش نكدب
تحياتي ليك

[شهيناز13]

نستعرف بيك امالا باسكو كون جيت مكانك اني دخلت بعض ,,,,,,, اول شيء نديرو الصراخ هههه

مررسي لييك امونة
انا ما عيطتش هه معلاباليش وش صرالي حكمت روحي
نضن بيا من صغري نتفرج في هاد لي جاست ف الافلام
تالمون نتفرجهم بزاااف كي صرا معايا هاد شي جاتني عادي هه الله ستر الحمد لله
تحياتي ليك

[~رآقية بأخلآقي~]

ههههه قصة مش نورمال....

[شهيناز13]

ههههه قصة مش نورمال....


هههههههههه كل حياتكم تسمعوا قصص نورمال
جا الوقت تبدلوا شويا خخ
تحياتي ليك

[~رآقية بأخلآقي~]

هههههههههه كل حياتكم تسمعوا قصص نورمال
جا الوقت تبدلوا شويا خخ
تحياتي ليك


ههههههه:D:D

[sonia32]

احييك على شجاعتك لانه النادر من يتصرف مثل تصرفك ربما رويتي قصتك بدعابة فظن الكثيرون انك لست صادقة بالعكس عجبني كثيرا روايتك قصتك بهذه الطريقة المسلية واحيي فيك انك عاقلة وذكية وخممتي بعقلك خممتي في امك واخواتك اشكرك انك تركت هذا السر ولم تخبري به احد من عائلتك وضحكتيني والله السراق جو يخوفوك خوفتيهم تجربة ما تتنساش صح

[بعيدة المنال]

خيال واسع والقصة مدايرة كي قصص جدة مين تحب ترقدنا برك لو دخلت فيها الغول تجي فوووووووووووووووووور

[imenemalak]

خيال واسع والقصة مدايرة كي قصص جدة مين تحب ترقدنا برك لو دخلت فيها الغول تجي فوووووووووووووووووور

ههههههههههه :d:d:d:d;)

[عيدة نور الهداية]

هههههههههههههههههههههههههههههه حكايتك قتلتني بالضحك
بغض النظر عن القصة حقيقية او غير حقيقية نقولك عندك اسلوب يهيأك تكوني روائية واصلي
المهم سلامت ريسانكم
هههههههههههههههههههههههههههه

[شهيناز13]

احييك على شجاعتك لانه النادر من يتصرف مثل تصرفك ربما رويتي قصتك بدعابة فظن الكثيرون انك لست صادقة بالعكس عجبني كثيرا روايتك قصتك بهذه الطريقة المسلية واحيي فيك انك عاقلة وذكية وخممتي بعقلك خممتي في امك واخواتك اشكرك انك تركت هذا السر ولم تخبري به احد من عائلتك وضحكتيني والله السراق جو يخوفوك خوفتيهم تجربة ما تتنساش صح


هه مرسي ليك صونيا نتي الوحيدة لي فهمتيني الكل دايريني نتمسخر مي حكيت وش صرالي لي حب يصدق يصدق ولي محبش هاديك حاجتو
انا حكيتها بشكل مسلي لانو والله هاد لي صرا معايا متوقعتش يجي نهار ويصرالي تسما
كي صراتي اخدتها بدم خفيف و حبيت نتجاوب مع هاد القضية لي عمري ما رح ننساها
وكل منتفكرها نظحك عليها
الحمد الله لي فاتت بشكل ايجابي وعلى خير
مسرورة اني ظحكتك ههه
منورة الموضوع بمرورك تحياتي ليك

[maitre_man]

جزاك الله خيرا

[sonia32]

هه مرسي ليك صونيا نتي الوحيدة لي فهمتيني الكل دايريني نتمسخر مي حكيت وش صرالي لي حب يصدق يصدق ولي محبش هاديك حاجتو
انا حكيتها بشكل مسلي لانو والله هاد لي صرا معايا متوقعتش يجي نهار ويصرالي تسما
كي صراتي اخدتها بدم خفيف و حبيت نتجاوب مع هاد القضية لي عمري ما رح ننساها
وكل منتفكرها نظحك عليها
الحمد الله لي فاتت بشكل ايجابي وعلى خير
مسرورة اني ظحكتك ههه
منورة الموضوع بمرورك تحياتي ليك
شكرا لك عزيزتي وانت التي نورت المنتدى بمشاركتك قصة من قصص حياتك

[*همسات المطر*]

ههههه قصة مش نورمال.....

[يوسف الجزائري 313]

قصة تودر الوقت معليش

[يوسف الجزائري 313]

كي منعت برك

[شهيناز13]

شكر لكل من قرا القصة

[سامية الاخلاق]

والله غير عجبتني القصة
هههههههههه
احييك على شجاعتك
ولي ماصدقش هاذيك حاجتو كيما قلتي

[شهيناز13]

والله غير عجبتني القصة
هههههههههه
احييك على شجاعتك
ولي ماصدقش هاذيك حاجتو كيما قلتي

ههه مسرورة انها عجباتك اختي سامية الاخلاق
ومسرورة كدلك بمرورك العطر تحياتي ليك
وصح عيدك مسبقا

[fixe44]

الله يبارك مشاء الله

[صدى الأقصى]

'-'
Aw
Mnek bsh hbibtna
Esamhili mais HD lahkaya
Mada5latch fi rasi

[إنشراح ^_^]

ههههه حاجة متدخلش للراس وكي مقلتيش لداركم مخفتيش يعاود يدخل ليكم مرة اخرى او بالاحرى قادر يقول بلي تفاهمتي معاه و هربتيه على كل حال شكرا لمجهوداتك

[رقة قلب]

السلام عليكم
هي صح تبان قصة من نسج الخيال لكن و لله غير يصراولنا حكايات في الواقع اغرب من الخيال
مين داك تكدب واش قاعد يصرا المهم انا بانتلي انهم صغار هادا وين دخلو في هاد الميليو مازال ما يعرفوش التفاوض و انت كنت شوية ذكية معهم و تبان عليك خفيفة دم و روح على هادي امنتك كاين بزاف ناس كيما انت لي يكونو على طول مدينها ضحك كي يصراولهم مواقف كيما هادو يغلب حس الفكاهة عندهم الخوف المهم سترك ربي لكن منبعد غلطتي لوكان قلتي لداركم

[Amani Madridista]

قصتك اكشن و الله .....
و ما حكيتيش لامك و خواتاتك ؟؟؟؟؟؟!!!!!!!

[شهيناز13]

السلام عليكم
هي صح تبان قصة من نسج الخيال لكن و لله غير يصراولنا حكايات في الواقع اغرب من الخيال
مين داك تكدب واش قاعد يصرا المهم انا بانتلي انهم صغار هادا وين دخلو في هاد الميليو مازال ما يعرفوش التفاوض و انت كنت شوية ذكية معهم و تبان عليك خفيفة دم و روح على هادي امنتك كاين بزاف ناس كيما انت لي يكونو على طول مدينها ضحك كي يصراولهم مواقف كيما هادو يغلب حس الفكاهة عندهم الخوف المهم سترك ربي لكن منبعد غلطتي لوكان قلتي لداركم

حفطك ختي....كلامك سكر تعيشي نتي صح تفهمي العقلية هههههه

[❀ حسآم ❀]

ههههههههههه قصة غريبة

[zineeb]

هههههههه والله بطلة

[mirikholyo]

Normal met ydirouha caméra cache ta3ramadhan o k khrjo than mghatyin wjohom o la kifah o mhawstich t3arfihom ou moins mra khra k tchofihom tba3di 3lihom o lyom djw zouk mra ljaya yjouk jma3a o slki rouhk