الكل يشتكي من ابني

[بنت ابوها~]

السلام عليكم ورحمة الله وبركاته مشكلتي مع ابني عمره ثمان سنوات انه الجميع يشكي منه في المدرسة كل يوم تبعثلي تقرير في هاو ما يقعدش هاو يثرثر هاو يحكي بالصوت العالي عرضتو على مستشارة نفسية قاتلي عندو نسبة من فرط الحركة و حولتني على مختصة اجتماعية عملتلو جلسات تقويم السلوك مرة في الاسبوع لكن النتجة مش حاجة كبيرة نستعمل معاه طريقة الثواب و العقاب كيف كيف مش مأثرة فيه حتى كي يروح للرياضة كل المدربين يتشكاو بل راه ما يحبش يسمع لكلام و الله ساعات نبخل روحي من عرضة غير باه نتفادى الاحراج ساعات يحطني في مواقف لا احسد عليها لكن انا عاد يغيضني حالو لانه ولى يحس بلي كامل الناس تعس فيه وما يحبوهش راني دائما نحكي معاه و نبينلو اني نحبو نحضنو و نبوسو و نقولو راك مليح لكن قولولي كيفاه نعمل باه نخليه يسمع لكلام و تان كيفاه نعمل للناس لدايرة بينا باه يغيرو نظرتهم عليه و اطلب منكم الدعاء له بالصلاح راني ننتظر ارائكم

[B.R.I]

و الله نحب اطفال اللي مثل ابنك

راح يكبر و يخرج شخصية هامة في المجتمع

اصبري عليه شوية

و ربي ينجحو في حياتو ان شاء الله و راح يستعقل بإذن الله

[سفيان31]

السلام عليكم

اختاه لا تعقدي ابنك بالضرب فكلنا نعاني من نفس مشكل:19:



https://www. youtube. com/ watch?v=dzdqVJoHJhE

[ندى الصبح]

السلام عليكم
لدي قريب مثله
حقيقة امره ازعج الجميع فلا يتواجد في مكان الا وعمته الفوضى والبكاء والامتعاض من الكبار !!!!
لكن الان بعد ان اصبح في الثالثه عشر خفت حركته وصار سلوكه يسير الى الاعتدال تدريجيا ..... فصبر جميل
لكن نصيحه مني يجب ان يكون الوالد حازما معه ،، لان هذا النوع من الصغار لا تستطيع الام التحكم فيه ( يحقرها) كما يفعل قريبي لامه
وحاولي تسشغليه باشياء تستهويه وتخفف من حركته
ربي يوفقك اختي ويحفظ وليدك

[nesrinwarda]

لسلام عليكم ورحمة الله وبركاته
حاولي تبحث في إنترنات عن حلول ، دخليه يعمل رياضه.

[ام امجد14]

شوفى اختى ديرى يوتيوب الدكتور ايهاب عيد يحكى عليهم بزاااااف وعلى حساب كلامو الوالدين كى يكونو واعين ينجحو مع هدا نوع من الامراض النفسية الى قال انها ماهيش خطيرة و سهل جدا علاجها بصح حاولى تسمعى لانصائحو راهو هايل يكبر و تفرحى بيه ان شاء الله

[بنت ابوها~]

شكرا للجميع ان شاء الله يكبر و يتصلح حاله بالنسبة للضرب منضربوش خلاص لانه يزيد عليه و بالنسبة للحزم انا و الاب حازمين معاه لكن احيانا تفلت الامور و بالنسبة للرياضة راه مسجل في دروس السباحة و الكراتي و احاول قدر استطاعتي باه نعمرو وقتو بالانشطة ربي يقدرني على تربيتو ويعطيني الصبر و القوة حتى نشوفو في اعلى المراتب راح نبقى نحاول معاه بكل جهدي شكرا لكم جميعا على الاهتمام بارك الله فيكم

[الفقير المغامر]

يقول أحد الرجال واسمحولي إن نسيت إسمه :(( من عاش بلا أولاد لم يعرف الهم ومن مات بلا أولاد لم يعرف السعادة))

[نخله.]

يا اختي اذا كانت اخلاقو حسنه يعني لا كلام سوء ولا.......ولا...............

خليه على راحتو

اولادي الذكور كلهم هاك حركيين و اصواتهم عاليه وثرثارين وو.......و........... صح الامر متعبني لكن للي يهمني انهم مطيعين و كلامهم طيب

اما الناس ما تهتميش بيهم و فهميه و علميه انو ملاحظات الناس تعبر عن آراءهم فقط

بسبب حركيه اولادي انقطعت زياراتي لعائلتي حتى اهلي اذارحت لهم نديهم نادرا هذا وش لقيت حل

اما المدرسه حاولي معه وفهميه انو لما يتكلم مش رح يسمع مليح و لا راح يفهم ومنه النتائج راه تكون غير مرضيه و برمجي افكارو انو في تحسن والمعلم يمدح فيه و يقول انو نقص الثرثرة و درجة درجه رح يتحسن باذن الله

وفقك الله في تربيته

[عثمان الجزائري.]

لست متزوج و لكني أظن أن هذا النوع من الأولاد يكون سلوكه نتيجة الدلال المفرط، و سيتحسن عندما يكبر إن شاء الله...يجب أن يكون توافق بينك و بين زوجك فالأب دائما يكون حازما كي يخافه الطفل و الأم تكون معتدلة بين اللين و الشدة هكذا عشت شخصيا و الحمد لله.

[ام ياسمين10]

ربى يكون معاك اختى والله انا تانى رانى نعانى ابنى عمره 5سنوات
كيما قاتلك اختى نخلة اذا كان ميقولش الكلام الفاحش .......خليه براحتو الحركة والثرثرة راهم قع هاك
اما الزيارات قللتها بزاف حتى عند اهلى يسببلى احراج واش نديرو ربى يعاونا فى تربيتهم ويكبرو ونفرحوبيهم وبنجاحاتهم

[موح دادي]

السلام عليكم

لدى هذا الولد طاقة يجب عليكِ استغلالها في تحفيظه القرآن
فلا تضييعها وإن شاء الله يتغيير للأحسن

[بنت ابوها~]

شكرا للجميع على الاهتمام و الرد كلامكم طمني شكرا لكم

[salim.salim]

و الله وسوستيني ايتها الاخت
الحمد لله على نعمة العزوبية.

[maram.espoir]

ساعات يحطني في مواقف لا احسد عليها لكن انا عاد يغيضني حالو لانه ولى يحس بلي كامل الناس تعس فيه وما يحبوهش راني دائما نحكي معاه و نبينلو اني نحبو نحضنو و نبوسو و نقولو راك مليح



هذا هو المشكل تاعك: دلالك الزائد لأنه ماشاء الله الولد واعي بللي الناس ماهيش تحبو بسبب سوء اخلاقه و هنا كان لازم تستغلي هاد النقطة و تلعبي دورك ماشي تبوسيه و تفرحي بيه ، كان لازم توضحيله بأنه على خطأ و تحاولي تستغلي هاد النقطة لصالحك بانه فوضويته هي لي خلاتك ما تخرجيش و خلات الناس تنفر منه و لازم عليه يتبدل و يسمع الكلام حتى يقولو عليه الناس و المعلمة أنه متربي و تفرح بيك و لازم دير كذا و كذا و متحشمنيش قدام الناس و اذا فرحتني بتصرفاتك نشريلك كذا و كذا

[بنت ابوها~]

هذا هو المشكل تاعك: دلالك الزائد لأنه ماشاء الله الولد واعي بللي الناس ماهيش تحبو بسبب سوء اخلاقه و هنا كان لازم تستغلي هاد النقطة و تلعبي دورك ماشي تبوسيه و تفرحي بيه ، كان لازم توضحيله بأنه على خطأ و تحاولي تستغلي هاد النقطة لصالحك بانه فوضويته هي لي خلاتك ما تخرجيش و خلات الناس تنفر منه و لازم عليه يتبدل و يسمع الكلام حتى يقولو عليه الناس و المعلمة أنه متربي و تفرح بيك و لازم دير كذا و كذا و متحشمنيش قدام الناس و اذا فرحتني بتصرفاتك نشريلك كذا و كذا

و الله لا دلال و لاشيء و كان على الكلام هذاك مانملك غير نوجه فيه و كيما يغلط مباشرة نتخذ معاه موقف و نعملو عقوبة و مش ضرب طبعا كاني نحرمو من حاجة يحبها و انا كي قلت نحضنو و نبوسو ليس كي يعمل خطأ لكن كي يرجع من المدرسة حزين لانه اصدقائه ما لاعبوش معاعه بسبب موقف عندو ايام كيفاه هو في هذيك الحالة و انا نزيد ننهرو لازم نحتويه مبعد كي يهدى نفهمو سبب نفور اصدقائه عنو و كيما قلت هو عندو نسبة من فرط الحركة متجلية اكثر في التسرع و تحديدا اللفظي يعني يفعل ثم يفكر حتى اقترحت الطبيبة الدواء لكن رفضت نظرا للاثار الجانبية لهذا الدواء ـ الريتالين ـ المشكل حتى كي نفهمو و يوعدني ماعادش يعاود كي يروح للمدرسة يلقى زملائه نافرين منه بسبب خطأ عملو مع احدهم فكل يجو ضدو و الخطأ مش حاجة كبيرة ممكن كلمة عادية لكن المجتمع تاع هنا كلش عيب حتى المعلمة كي حكيت معاها قتلي راهم صغار ما نقدرش نفرض عليهم حاجة على فكرة رانا في الغربة على العموم شكرا لك اختي اسعدني مرورك

[بنت ابوها~]

فقط حبيت نوضح كي قلت كلمة عادية بالنسبة لينا و عيب عندهم مثل كلمة degage هاذي صرا م صرا عليها هي كلمة غير لائقة لكن ليس بالحجم لتعطاتلو في المدرسة لا انكر ساعات ينعت صحابو بال le gros ou le petit ou bébé لكن يتعذر ليهم و يقدم ليهم رسم اعتذار هوما هنا هك ليغلط في زميلو يرسملو رسمة لكن بعد كل هذا يبقو شادين هالو و ما ينسوش هذاك اليوم في البارك تلاقى مع زميلتو راح يحيها مباشرة قتلو راك مزلت تقول في السبان les insultes رحت حكيت معاها قتلها هل سبك ذرك قاتلي لا لكن في المدرسة سب زميلنا قالو grand burk قتلها راه اعتذر منو و خلاص الحكاية انتهت وذرك كيفاه نروحلهم بالواحد نفهمهم حتي المعلمة قالت هذه مانقدوش ندخلو فيها صبر جميل و الله المستعان حتى نرجعو لبلادنا مع العلم انه في المدرسة العربية متفوق و علاقتو جيدة بزملائه عدى الحركة الزائدة في القسم لكن المعلمة مطولة بالها معاه و متفهمة حالتو

[bibicha]

وليدك لازمو العاب العقل des jeux d'intelligence تخليه يخدم راسو و يرزن روحو باش يلقا الحل كيما les puzzle sو دخليه يدير jeux dd'échecs
و اختي ماتنسايش بلي هما عندهم la disciplines passe avant tout