مشكلتي في البقلاوة والمقرود

[نورانيات]

السلام عليكم، صح رمضانكم وربي يتقبل من أجمعين أنا عندي مشكلة في البقلاوة مهما بدلت الوصفة تجيني طبقاتها معجنة وأنا حابتها تتقرمش ممكن تعطيوني وصفة مضمونة ماشي بعجينة الفيلو لأني ما نحبهاش تكون مقرمشة والطبقات باينة وقداه تحكم مدة في الطياب والحشو كي نخدمو باللوز والجوز واش نديرلو باش يجي بنين فيها ؟
المقرود صح يجيني مليح بصح هشوش بزاف أنا درت الوصفة نتاع أم رامي وبالتالي الرشمة اللي في المقرود تولي ما تبانش بعد الطياب أنا حابة مقرود مبسس شوي ماشي بزاف وتبان فيه الرشمة والا النقش أفيدوني رجاء .

[محبة رسول الله]

اختي بالنسبة للمقروظ ديري الكيلة المعتادة 3 كيلات دقيق بكيلة سمن وزيدي شوية فرينة تحكملك مليح وحاولي تمحري الخليط بيديك حتان يولي لونو فاتح وبعدها بلي بماء الزهر والماء العادي وكملي باقي الخطوات
اما بالنسبة للبقلاوة 3 كيلات فرينة بكيلة سمن تعجنيها كي العجين وتبليها بالما حتان تولي طرية وديريها كويرات وتخليها
ويلا تحوسيها رقيقة ديري بالماشينة الا عندك تسهل عليك ويجوك الطبقات رقاق والسر تاني انا شفتها في سميرة بين الطقة والطبقة تدهن بالسمن او الزبدة وترشي عليها شوية برك تاع نشا تجيك رقيقة وبنينة نتمنى اختي نكون افدتك ولو بالقليل ونتمنى من الاخوات يزيدو يفيدوك

[نورانيات]

اختي بالنسبة للمقروظ ديري الكيلة المعتادة 3 كيلات دقيق بكيلة سمن وزيدي شوية فرينة تحكملك مليح وحاولي تمحري الخليط بيديك حتان يولي لونو فاتح وبعدها بلي بماء الزهر والماء العادي وكملي باقي الخطوات
اما بالنسبة للبقلاوة 3 كيلات فرينة بكيلة سمن تعجنيها كي العجين وتبليها بالما حتان تولي طرية وديريها كويرات وتخليها
ويلا تحوسيها رقيقة ديري بالماشينة الا عندك تسهل عليك ويجوك الطبقات رقاق والسر تاني انا شفتها في سميرة بين الطقة والطبقة تدهن بالسمن او الزبدة وترشي عليها شوية برك تاع نشا تجيك رقيقة وبنينة نتمنى اختي نكون افدتك ولو بالقليل ونتمنى من الاخوات يزيدو يفيدوك
ربي يبارك فيك أختي شكرا على اهتمامك وصح رمضانك.

[nesrinwarda]

السلام عليكم ورحمة الله وبركاته
عند نفس المشكل كي نحط المقروط يتقلى في الزيت يدوب صراتلي عدة مرت حتى وليت نخافو او ما نطيبوش . ماعرفتش علاه

[شوشو 11]

صح صيامكم
يااخي انا تاني أعاني من نفس المشكلة للمقروط. ...وحد المرة خدمتو وتفتت في المقلى ف حكمت. كاس ماء و ذوبت الفرينة حتى اصبحت كالرايب وغطست فيها الحبات وانقذت الموقف

[دعدع2]

اختي انا ندير 3كيلات سميد وكيلا سمن وقرص ملح ولمي بالماء وماء مزهر
وإدا تفتتلك في المقلا اعرفي روحك بساتو ياسر
بلي حبت المقروط بشويا ماء واقليه مراهاش يتفتت

[hadil48]

السلام عليكم المقروط الا تفتت في المقلاة كاين زوج حوايج درتيهم بستيه بزاف ولاماخبزتيهش مليح بصح كاين الحل تغطسيه في الماء وقلي مباشرة وحداري الزيت

[نورانيات]

صح صيامكم
يااخي انا تاني أعاني من نفس المشكلة للمقروط. ...وحد المرة خدمتو وتفتت في المقلى ف حكمت. كاس ماء و ذوبت الفرينة حتى اصبحت كالرايب وغطست فيها الحبات وانقذت الموقف

أنا مشكلتي في المقرود تاع الكوشة وليس المقلة فهل من حل؟

[noureddine abdelli]

عجينة مضمونة للبقلاوة هاهي ليك مقادير:
4كيلات فرينة
كيلة زبدة
قرصة ملح
حبة بيض
ماء زهر
اذا حبيتي ديري لفاني
طريقة :
فرينة +زبدة ذائبة+قرصة ملح و بسيها مليح ومبعد زيدلها حبة بيض وتلمي عجينة بماء زهر و الماء و مبعد تحلي عجينة بالحلال و تضعي 3 طبقات في اسفل بين كل طبقة و طبقة تثقبي طبقة بالفرشيطة وتدهنيها بالزبدة و خمارة كيميائية و بعد ذلك تضيفي حشوة متكونة من : 3 كيلات كاوكاو+ كيلة سكر عادي + قليل من ماء زهر ثم تضعيها فوق طبقات اخرى ثم تضيفي 3 طبقات اخرى بنفس عملية سابقة و طبقة اخيرة تد هنيها بالزبدة تقطعيها و ترشقي فيها حبات لوز و تدخليها الفرن لمدة 180 درجة وبعد ذلك عسليها مباشرة وتركيها لمدة ساعة و تاكليها بالصحا والهنا
كي ندير قاطو لعيد نرسلك صور بقلاوة:)
ادعلنا برك:19::19:

[nesrinwarda]

السلام عليكم . بارك الله فيكم على الجواب.
انا ندير 3كيلات سميد وكيلا سمن كيما أنت لكن مانعرفش شحال الماء . هل يوجد طريقة

[أم باسم]

أختي انا ندير المقرود يجيني هايل ندير 3كيلات سميد ( بن عمر ) بصح مانغربلوش نخليه كيما راهو نحيلو برك الراس الخشين باش ما يزقزش وندير كيلة سمن +شوية لابال او زبدة تعطيه ذوق نعجنوه مليح حتى يولي أبيض و نخليه يبات غد من ذاك نديرلو شوية ماْْء الزهر ومبعد ندير الماء لانو ماء الزهر يفتتو والشكل لي مايباش مليح نضن أنو المشكل في النقشة تاعوا والله أعلم ربي يوفقك وإنشاء الله نكون افدتك نسيت نقولك بلي أنا ندير فيه شوية خميرة الخبز (رشة) وشكرا

[وفاء الياسمين]

السلام عليكم نصائح قيمة جدا
انا المقروط نديرلو 3كيلات سميد و مغرف ماكلة فرينة و كيلة مخلطة سمن و زبدة و كيلة مخلطة ماء الزهر و ماء و ملح
ولافاني و شوي بيكاربونات و قرصة خميرة حلوة قرصة صغيورة
نخلط كلش حتى كيلة الماء و المازهر و نخليه يبات هكذاك مشمخ يصبح شارب الماء و يبس منو نزيد نشمخو حتى نقدر نلمو يجي بزاف بنين
بكري كانو يقولونا بيتوه غير بالسمن بصح انا تعلمتو في مدرسة نبيتوه شامخ بالماء يجي حاكم روحوا و يذوب في الفم

بصحتكم

[noureddine abdelli]

هل اعجبتكي عجينة البقلاوة جربيها ورديلي الخبر موفقة انشاء الله

[نورانيات]

عجينة مضمونة للبقلاوة هاهي ليك مقادير:
4كيلات فرينة
كيلة زبدة
قرصة ملح
حبة بيض
ماء زهر
اذا حبيتي ديري لفاني
طريقة :
فرينة +زبدة ذائبة+قرصة ملح و بسيها مليح ومبعد زيدلها حبة بيض وتلمي عجينة بماء زهر و الماء و مبعد تحلي عجينة بالحلال و تضعي 3 طبقات في اسفل بين كل طبقة و طبقة تثقبي طبقة بالفرشيطة وتدهنيها بالزبدة و خمارة كيميائية و بعد ذلك تضيفي حشوة متكونة من : 3 كيلات كاوكاو+ كيلة سكر عادي + قليل من ماء زهر ثم تضعيها فوق طبقات اخرى ثم تضيفي 3 طبقات اخرى بنفس عملية سابقة و طبقة اخيرة تد هنيها بالزبدة تقطعيها و ترشقي فيها حبات لوز و تدخليها الفرن لمدة 180 درجة وبعد ذلك عسليها مباشرة وتركيها لمدة ساعة و تاكليها بالصحا والهنا
كي ندير قاطو لعيد نرسلك صور بقلاوة:)
ادعلنا برك:19::19:

ربي يجازيك على الافادة بصح ما فهمتش نثقب كل الطبقات السفلية والا الطبقة الأولى فقط والزبدة اللي نستعملها تاع التوريق والا مارغرين عادية والخميرة قداه نحط ثم نحطها فقط بين الطبقات ما نحطهاش في العجينة؟ اسمحيلي على كثرة الأسئلة وجزاك الله عني خير الجزاء

[نورانيات]

هل اعجبتكي عجينة البقلاوة جربيها ورديلي الخبر موفقة انشاء الله

راه تشبه شوية لعجينة تاع ماما أنا درتها واحد الوقت جاتني العجينة تتقطع وصعيبة في الحلال ما عرفتش علاه تكون مبسسة؟ ربي يعطيك ما تمناي ويفتحلك أبواب الرزق والبركة .