جاري فريك من تبسة==مساعدة==

[أم عروة]

السلام عليكم ورحمة الله وبركاته

كيف احوالكن اخواتي

عساكن بخير

اخواتي حبيت نطلب منكن معروف بخصوص وصفة جاري فريك الحار الخاص بمنطقة تبسة لحدادة مع تونس

شكون لي تعرف طيبها تقولنا على سر البنة

زوجي اثناء سفره للعمل في عدة مناطق جزائرية لاول مرة يقولي انو اعجب كثيرا بشوربتهم وقالي لذيذة لابعد الحدود حتى ما تقدريش تحبسي الماكله هههههههه
حتى غرت منهم

الحمد لله حنا منطقة اشمال لوسط معروفين بالشوربة فريك خاصة العاصميات وبنينة بزاف والحمد لله

ولكن راهو يقول ياااااو هااااربة بزااااف هههههههههه

المهم لي تعرفها تجيبنا الوصفة قلت بالاك نتعلمها ونفاجؤوا بيها في رمضان المبارك بحول الله
ويلا كاين خير منها غير جيبو باش ينساها هههههههههههههه

امزح فقط

وربي يحفظ حراير تبسة وحراير الجزائر كاااامل

بالتوفيق

[أم عروة]

اين انتن اخواتي

158 مشاهدة ولا رد!!!!!!!!!!!!!!!!!!!!!

زعما وحدة فيكم ما تعرفش؟؟؟؟

[ام ظافر]

اهم سر في جاري الفريك تاع تبسة هو التوابل تاع تونس
خاصة الفلفل العكري وراس الحانوت يشريو تاع تونس يعطيو مذاق هايل للشربة
وسر اخر يخلطو شوي مرمز مع الفريك يفرق في الذوق كثير
هذا لاني عشت في تبسة سنين
نتمنى نكون افدتك

[ام ظافر]

نسيت رشة نعناع ناشف في الاخير

[أم ياسين الزهراء]

والاهم عندي وهو الرسمي اللحم تاع جيهة تبسة سبيسيال هو اللي زادها بنة انت قوليلي يشري اللحم من ثمى ومنبعد نورولك راهي ساهلة اختي

[نهلةن]

يا اختي قلي اللحم مع البصل بزاف والدبشة والكسبر والفلفل اسود وطماطم حب معاها المصبرة وديري مرة وحدة الفريك قليهم كامل على نار قليلة واذا اللحم مافيهش الشحمة ديري شويا زيت متكثريش المهم بكون لحم اخروف ومن باعد امرقي بماء سخون والبرمة تكون تاع الفخار هذا السر التاني وكي طيب اختي طفي وزيديلها النعناع اوراق طاجزة ولا مرحي يابس وزيدي زوج سنات ثوم مرحيين مع دبشة وقرن حار والله متشبعيها جربيها كيما قلت وان شلء الله تعجبك وتعجب راجلك وبالصحة والهناء

[أم عروة]

اهم سر في جاري الفريك تاع تبسة هو التوابل تاع تونس
خاصة الفلفل العكري وراس الحانوت يشريو تاع تونس يعطيو مذاق هايل للشربة
وسر اخر يخلطو شوي مرمز مع الفريك يفرق في الذوق كثير
هذا لاني عشت في تبسة سنين
نتمنى نكون افدتك

اها يعني التوابل هوما سر البنة
وتاني المرمز
انا موالفة نديرها بالدشيشة ولا لفريك ولكن حر يجيبهولي زوجي
بارك الله فيك اختي

نسيت رشة نعناع ناشف في الاخير
بارك الله فيك يعني كيما حنا نديرولها

والاهم عندي وهو الرسمي اللحم تاع جيهة تبسة سبيسيال هو اللي زادها بنة انت قوليلي يشري اللحم من ثمى ومنبعد نورولك راهي ساهلة اختي
اها يعني اللحم عندو دور في البنة ان شاء الله نظن قبل رمضان بيوم او يومين يروح نشوف بالاك يجيبلي من لتما
بارك الله فيك ام ياسو

يا اختي قلي اللحم مع البصل بزاف والدبشة والكسبر والفلفل اسود وطماطم حب معاها المصبرة وديري مرة وحدة الفريك قليهم كامل على نار قليلة واذا اللحم مافيهش الشحمة ديري شويا زيت متكثريش المهم بكون لحم اخروف ومن باعد امرقي بماء سخون والبرمة تكون تاع الفخار هذا السر التاني وكي طيب اختي طفي وزيديلها النعناع اوراق طاجزة ولا مرحي يابس وزيدي زوج سنات ثوم مرحيين مع دبشة وقرن حار والله متشبعيها جربيها كيما قلت وان شلء الله تعجبك وتعجب راجلك وبالصحة والهناء

باااااارك الله فيك اختي نهلة
يعني على حساب ما راني نشوف نفس طريقتنا حنا
الاختلاف يكون في التوابل والفريك واللحم
وصح الفخار يمد لذة خاصة للاكل

اختي ولكن لاحظت ما يدوش الزرودية والقرعة والحمص او الجلبانة
انا نسكرفج زرودية وقرعة وندير حفنة جلبانة احسن من لحمص

ارجو الاجابة



جزاكم الله خيرا اخواتي
قدها وقدود الله يبارك ما خذلتونيش
شكككككرا

[aum]

أهلا بك أختي العزيزة ضيفة عندنا في تبسة وأهلا بكل بنات وطننا الجزائر الحبيبة
لا زرودية ولا قرعة ولا جلبانة نضيف الحمص فقط

[أم عروة]

أهلا بك أختي العزيزة ضيفة عندنا في تبسة وأهلا بكل بنات وطننا الجزائر الحبيبة
لا زرودية ولا قرعة ولا جلبانة نضيف الحمص فقط

الله يسلمك اختي الحبيبة
اها يعني غير حمص
الله يبارك بسيطة ولذيذة
جزاك الله خيرا

[ام ظافر]

اذا اضفتي الخضرة من زرودية وجلبان وحمض وووووتولي حريرة ماشي شربة فريك

[أم ياسين الزهراء]

اختي المصرين يقول الفريك مايحبش الشريك وعندهم الحق القريك يمشي وحدة الخضرة تفسد الطعمة

[أم عروة]

اذا اضفتي الخضرة من زرودية وجلبان وحمض وووووتولي حريرة ماشي شربة فريك

اها اختي يعني نتوما واحنا مشي كيفكيف

احنا عندنا شوربة فريك العاصمية جي كالآتي

في قدرة قلي اللحم والبصل والزيت وشوية سمن
كي يتقلاو شوية ضيفي الثوم مهروس والقصبر اخضر على حساب الكمية ووريقات نعناع اخضر وحبة زرودية مسكرفجة رقيقة ونصف حبة قرعة مسكرفجة صغيرة وشوية حمص او جلبانة وقلي
اضيفي فلفل اسود وشوية قرفة راس الحانوت عكري وشوية فلفل دريس باش جي حارة وشوية قصبر وثوم
قليهم على نار هااااااادية

بعدها اضيفي كمية من الطماطم مرحية ومرقي بالماء الساخن وخليها طيب على نار متوسطة
كي تشوفي اللحم دخلو الطياب اضيفي الفريك او الدشيشة بعدما تشليها فالماء اي تشمخيها اضيفيها حسب الكمية مايلزمش جي خاثرة بزاف
وخليها طيب في غرضها
كي تلاح؟يها طابت اضيفي شوية طماطم معلبة وشوية ثوم وقصبر وخليها على نار هادية تحكم روحها بعدها ديريلها نعناع يابس وقدميها

حنا هكدا نديروها ونسموها شوربة فريك

اما لحريرة تكون عبارة عن خضار يعني مشي حبة وحدة برك ومانديرولهاش لفريك

اما خضار فقط

او خضار وفارميسال

او خضار وارز

ولكن لفريك نديرو بيه الشربة فقط

بارك الله فيك

سبحان الله بلادنا قاااارة وين تروحي تلقاي وصفة مختلفة

الحمد لله

[أم عروة]

اختي المصرين يقول الفريك مايحبش الشريك وعندهم الحق القريك يمشي وحدة الخضرة تفسد الطعمة

اهاااا مديتيلي معلومة جديدة

فالحق حتى حنا شوربتنا بنينة بزاااف ومعروفة جدا

ولكن رايحة نجربها بلا خضار ونشوف

بوركت

[اغادير]

مرحبا سيدتي......................انا شفت جميع الردود وكل عضو قدم وصفة مختلفة ,,,,,,,,,,,,,,,,,,,,,,,,,,,,,,,,,,,,,,,,,,,,,,,, ولكن نأكدلك باللي السر كلو في التوابل فقط ....... التوابل ركزي جيدا .. التوابل ..... وعن قريب جدا راح نوضع سر طبخة جاري الفريك التبسي بالصور انشاء الله....... اصبري قليلا فقط سيدتي..... لأني لحد الآن لا أعرف كيفية وضع الصور في هذا القسم ..... راكي في بالي..

[اغادير]

نسيت ما قدمتش ملاحظة سيدي أم عروة,,,,,,, نحن في ولاية تبسة لا نضع أبدا الخضر في شربة الفريك..... أول مرة نسمع بيها هادي,,,,,,, نحن نركز على التوابل والحشيش ( الدبشة سر الذوق البنين)

[القرارة]

اختي ثاني حنا جماعة الصحراء مانديروش الخضرة والتوابل اللي درتيها جيبي كسبر حب ودقيه فالمهراس طازج وحداري القرفة والعود الاصفر اما حريرتنا اما فريك صافي ولا مزيج من فريك وقمح وشعير

[Noussa_82]

صح كيما قالوا الأخوات الكريمات
سر البنة كله في التوابل .. جربي وان شاء الله تنجحي فيها

[أم عروة]

اختي ثاني حنا جماعة الصحراء مانديروش الخضرة والتوابل اللي درتيها جيبي كسبر حب ودقيه فالمهراس طازج وحداري القرفة والعود الاصفر اما حريرتنا اما فريك صافي ولا مزيج من فريك وقمح وشعير

بارك الله فيك اختي على المعلومات والافادة
جزاك الله خيرا

[أم عروة]

صح كيما قالوا الأخوات الكريمات
سر البنة كله في التوابل .. جربي وان شاء الله تنجحي فيها

اميييين
بارك الله فيك اختي
رايحة ندبر توابل اصلية
شككككرا

[أم عروة]

مرحبا سيدتي......................انا شفت جميع الردود وكل عضو قدم وصفة مختلفة ,,,,,,,,,,,,,,,,,,,,,,,,,,,,,,,,,,,,,,,,,,,,,,,, ولكن نأكدلك باللي السر كلو في التوابل فقط ....... التوابل ركزي جيدا .. التوابل ..... وعن قريب جدا راح نوضع سر طبخة جاري الفريك التبسي بالصور انشاء الله....... اصبري قليلا فقط سيدتي..... لأني لحد الآن لا أعرف كيفية وضع الصور في هذا القسم ..... راكي في بالي..


اهلا بيك اختي الحبيبة
ان شاء الله اختي
راني نستنى فيك اختي
جزاك الله خيرا

وعلى فكرة طريقة وضع الصور سهلة جدا

http://www.djelfa.info/vb/images/editor/insertimage.gif
اضغطي على هادي الايقونة وحطي رابط الصورة تاعك طبعا احذفي اولا الكتابة لي تلقايها في هاديك الايقونة ومنبعد ديري لصق للرابط وديري اوكي

موفقة

[أم عروة]

نسيت ما قدمتش ملاحظة سيدي أم عروة,,,,,,, نحن في ولاية تبسة لا نضع أبدا الخضر في شربة الفريك..... أول مرة نسمع بيها هادي,,,,,,, نحن نركز على التوابل والحشيش ( الدبشة سر الذوق البنين)

اه بارك الله فيك اختي
راكم حفزتوني باش نجربها بلا خضار

شككككرا

[االمحبة للسلام]

كيما قالوا الاخوات نضيفلك حاجة ماتكثريلهاش البصل حبة صغيييرة وكثري الثوم وانا مانديرلهاش طماطم كعب نديرلها غير المصبرة والعكري جربيها وشوفي وكيما قالوا الاخوات ركزي على التوابل والدبشة(الحشيش)

[ام ظافر]

حتى حريرة الغرب تجي بالخضرة ومن بعد لما يرحيوها يضيفولها الدشيشة
اما شربة فريك او ما يعرف عندنا بالجاري مافيهش الخضرة ابدا عدى البصل والثوم والطماطم حب
اختي ادا حبيتي تجربيه بلا خضرة ننصحك انك تثقلي المرقة تاعك في الاخيرة بالغبرة تاع الفريك الي تسقط من الغربال ونستعملوها في الكفتة يعني هديك الغبرة في الاخير حلي منها ملعقة في ضوي ماء وضيفيه للقدرة تثقال المرقة تاعك مثل الفرينة تماما ولكن ابن لانك ماراحش تستعملي الخضرة
اما اذا نزعتي اللحم ورحيتي المرق بالبصل والطماطم حب بلا قشور هنا راح تجيك المرقة ثقيلة وممكن ما تحتاجيش للغبر فريك في الاخير

[hayette82]

انا عجوزتي اهل زوجي يسكنو في سوق اهراس صح الفريك بنة السر في الحشيش وقطعي الكرافس والفريك يطيب مع اللحم يعني تعملي الفريك وتمرقي والله بنة

[دائمة الحمد]

اختي الكريمة هذي وصفة تاع جاري فريك تبسي حر مع بعض التقنيات الخاصة بيا جربيه على ضمانتي
العديد من الاخوات جربوه وعجبهم وانا ديما نقول الجاري راهو الطبق السهل الممتنع نتمنى يعجب زوجك
ومن اساسيات
الجاري تاعنا لحم الغنمي والنوعية الجيدة تاع الفريك والتوابل تابل وكروية والحشيش دبشة وكرافس ونعناع واهم شيء يطيب في البرمة ماشي الكوكوط وعلى نار قليلة
مع الاسف الصور راحوا
ان شاءالله ممكن نعاود نصور المراحل ونرفقها بالموضوع

http://www.djelfa.info/vb/showthread.php?t=1527466

[sonia32]

رايحة نقولك اختي على شربة تاع عجوزتي كيفاش تعملها وتجي هايلة اول شي طيبي في قدرة ضعي الزيت و قلي البصل مع الدجاج او اللحم مع البصل وفلفل اسود مهرس مع الثوم اعملي ثلاث فصوص ودبشة انتم تقوللها الحشيش زيدي الطماطم مصبرة ما تكثريش لانك رايحة تعملي حبة مبعد مرقي بالماء ما تكثريش لازم يكون فريك اخضر وريحتو مليحة لان اذا عملتي مثلا مرمز او شي اخر رايحة تروح البنة حطي فوق الكسكاس حبة طماطم او اكثر كيما تحبي بعد ما تذوب ارحيها وضيفيها للقدر ومن حين الى اخر تفقدي الجاري ضيفي الماء سخون بعد ما يطيب كل شي اعملي قرن فلفل حار وزيدي الدبشة
جربي ورجعيلي الخبر مع العلم عجوزتي عندها خبرة كبيرة في الاكل التبسي و صحة رمضانك

[sonia32]

مرحبا سيدتي......................انا شفت جميع الردود وكل عضو قدم وصفة مختلفة ,,,,,,,,,,,,,,,,,,,,,,,,,,,,,,,,,,,,,,,,,,,,,,,, ولكن نأكدلك باللي السر كلو في التوابل فقط ....... التوابل ركزي جيدا .. التوابل ..... وعن قريب جدا راح نوضع سر طبخة جاري الفريك التبسي بالصور انشاء الله....... اصبري قليلا فقط سيدتي..... لأني لحد الآن لا أعرف كيفية وضع الصور في هذا القسم ..... راكي في بالي..

والسر الثاني في الفريك الاصلي تاع تبسة مش بالمرمز

[ام قسوم]

السلام عليكم ورحمة اللله وبركاته


أختي ام عروة حفظك الله انت وكل الاخوات انا اصلي تبسية وعندنا اللى جاريها ما هوش بنبن نقولوا عليها ماتعرفش الطيب لانو هوالعنوان لطياب عندنا
نحط في قدر ثقيل شويه زيت يتبلل به قاع القدر ثم راس بصل متوسط مقطع رقيق وفوقوا اللحم والدبشة مقطعة رقيق جدا تتقلى معاهم باش ما تقعدش من بعد الطياب فوق السطح ولونها اسود واذا في مستطاعتك يكون زايد شوية اللحم يتقلوا وحدهم مع التحريك حتى يتبدل اللون نضيف مغرفة صغيرة معمرة ثوم ونحرك نزيد مغرفة صغيرة فلفل اسود
+مغرفة صغيرة ونصف فواح متكون هذا الفواح من عدة توابل الا العرق الاصفر باه يجيك الجاري احمر + نصف مغرفة صغيرة فلفل احمر حلو مرحى يتباع عند العطار+ملح+حبة طماطم صغيرة مسكرفجة +نصف مغرفة صغيرة هريسة
+مغرفة كبيرة طماطم مصبرة ويريت تكون تاع عمر بن عمر لانو ماهيش قارصة ونحرك مليح +كاس ماء سخون
واتركيها تتقلى على نار جد قليلة ممكن تكون حتى اكثر من نصف ساعة قليان با يطيب اللحم نصف طباب حتى يخرج الزيت من فوق في هذا الوقت
نوضع الفريك بمقدار فنجال ونصف واذا كان الفريك مشري مرحي اغسليه مليح حتى يصفى ماه لانو في بعض الاحيان كي كون ماشي مغسول يبدل طعم الجاري ومرقيي بالما سخون حتى يتغطى اللحم ما تكثريش الماء لانو يسمطهولك كما تقولوا اخواتي عندكم نحن نقولوا يمسطهولك كي يغلى القدر نضع اقل من نصف ربطة كرافس مربوطة ما نقطعوهاش نقصي على النار و نخليه حتى يخثارو عينيك ميزانك نضيف عليه نصف مغرفة صغيرة
نعناع مرحى +قرن فلفل حار ثم الدبشة
بالصحة والهنا وان شاء الله يعجبواراجلك

هذا اصل الجاري التبسي ما فيهش الخضرة وخاصة الفلفل الاسودأساسي و القليان
في الاكلةو مانخلطوشوا مع المرمز الا من ارا د ذلك
واذا اردت تعوضي الفريك بالمرمز اوالشعير اوالدويدة

[DIDA34]

سلام على كل الاخوات كيما قالو الاخوات حنا الفريك مانضيفولو والو لا خضر ولا حمص السر في التوابل و اهم شيئ نوعية الفريك تعمل فرق رهيب (يكون اخضر طبيعي مش مغشوش وريحته تفحفح و مرحي مليح مش خشين مش دقيق)حنا قبل رمضان تبدا حملة البحث عن الفريك الجيد و الاحسن تعرفي ناس يخدموه بالبيت ههههههههههههه معرفة حتى في الفريك اضافة الى دوزين باهي وتقلية الله الله في برمة الفخار مع دبشة ورشة النعناع هدا بالنسبة لمنطقة الوسط اما تبسة الاخوات يفيدوك ان شاء الله

[rodaina mimi]

مساء الخير هذي اول مشاركة ليا انا من تبسة وذرك نقدم ليكم سر طياب الجاري التبسي اول حاجة هيا في التوابل واهمهم راس الحانوت مرثوخ مع الثوم في المهراس وثاني حاجة ديري ثوم وحدو مرذوخ والسر الخير تقلي مليحالجاري قبل المرقان على نار هادية وتمرقي بماء سخون
طريقة: لحم غنمي هبرة تقليه مع شوية بصل زيديلو راس لحانوت لمرذوخ مع الثوم وخليه يتقلي وزديلو ثوم +فلفل اكحل+شوية حمص مرنخ من قبل+ ورقة كرافس +شوية دبشة مقطعة +طماطم مصبرة+فلفل عكري حار مغرفة صغيرةوقلي مليح +لفريك +نص حبة لفت مربية وقلي مليح على نار هادية وامرقي بماء سخون وخلي يطيب لين تشوفيه قريب يخثار في الاخر ارمي فيه قرن فلفل حار +شوية دبشة وخليه 10دقايق واطفي النار وبالصحة جربيه ورجعيلي لخبر

[أم عروة]

يعـــطيـــكم الصحــة أخواتي

أكيـــد أفدتموني
بارك الله فيكم ، تعلمت الكثير منكم

أكيـــد نجربها ونصورهالكم بإذن الله

شكر الله لكم صنيعكم

[رحمة تقوى]

اختي السر هو اللحم لان حتى الطباخ الشاطر في الاعراس يطلب الا لحم الغنم اي الخروف ولحم الخروف في جهة تبسة رائع لان الغنم تاكل الاعشاب لحمها ايجي بنين بزاف هذا اول سر السر الثاني التوابل احنا منشروش التوابل الي تتباع مخلطة نشروا التوابل الي تخدمها النساء في البيوت تجي روعة نسموها افاح السر الثالث في اخر الطياب تضعي الفليوا مع قليل من الدبشة ماشي المعدنوس السر الرابع تكون بدون اي نوع من الخضرة لان غير لحريرة الي طيب بالخضرة جربيها وشوفي النتيجة

[أم عروة]

بارك الله فيك اختي رحمة
افدتيني اكيد نجربها في هادا رمضان
بوركتن

[soumia mkrc]

بارك الله فيكم

[lwiza2000]

فعلا نحن نديرها بالفريك اللحم غنمي زيت طماطم كرافس دبشة بصل ملح فلفل اكحل وفالاخير قرن فلفل حار و نعناع يابس بدون اي توابل تجي عسل
كل وصفة عندها نكهتها

[sasou123]

اخواتي ما تنسوش تبسة منطقة حدودية و سر بنة الجاري كيما نسموه حنا طماطم تونس المصبرة و نكثرو منها ما تجيش حامضة و حاجة اخرى كي تقلي اللحم مع البصل و التوابل حطي رشة نعناع غبرة و الفريك يكون جديد و مرحي شوية رقيق و مالح و بالصحة و الهنا .