انصحوني

[مشكلتي]

السلام عليكم ورحمة الله تعالى وبركاته اخوتي في الله
اختكم متزوجة ولدي بنت اعاني الامرين من زوجي لا اعلم يكون يكون ولما يتغير يتغير الحكاية وما فيها انو زوجي هدا خطبني بعد ما اكملت دراستي مباشرة وبعد الخطبة بثلاث اشهر تزوجنا انا ماكنتش نحسب روحي نتزوج بهادي السرعة كنت نقول على الاقل نخدم شوي ولكن مكتوب وماكنتش مخبية حتى حاجة يعني ماني دايرة والو لا دهب لا قش وابي خدام حالنا قد رواحنا خمس اولاد عايشين والحمد لله دارولي لي قدرو عليه وكثر المهم بعد شهر من العرس قاتلي العجوز راكي مادرتيش المحزمة وما جبتيش القش بزاف والديك طلقوك عريانة في هداك النهار بكيت بكاء عمري ما بكيتو في حياتي وفرغت قلبي لراجلي وقتلو انا ماقدرش بابا يديرلي محزمة وماما ماعندهاش الدهب لي تخليهلي والقش درت كيما ناس وخير من ناس وعر من ناس فاتت الايام وولى هو يعايرني بهادي الهدرة اخر مرة داها ثلاثة ايام وهو يهدرلي فيها تجاهلتو تماما ومبعد قتلو حابة نهدرلك حاجة قتلو ادا تخاف ربي مازيدش تقولي هكدا هادي الهدرة توجعني ومانيش سامحتلك لا دنا لا اخرة انت وامك زاد عاودهالي في هديك العشية تعصبت ورفعت صوتي عليه قتلو اسكت عليا ناض ماهوش في عقلو حكمني حية طلقني ميتة هزيت قشي وبنتي وقتلو راني رايحة وجيب بنت ملياردير تعمرلك الدار ول تدارك نفسو راح للمسجد صلى وقالي قلت انا وش درت وقالي مافقتش لروحي كي درت وش درت وقالي اسمحيلي ومانزيدش نعاود للعلم هو لاباس بيه موظف وراتبو محترم جدا قادر يدير لعجب دك هو سافر وانا جيت لدا رنا وراني مانيش حابة نولي ليه حابة من هادي نطلب الطلاق وخايفة نندم ونيتم بنتي هو صح يكون وش يكون اما احيانا يولي يجرح ويعاير حتى نعود انا مانقدرش نتحمل قتلو انا هادي اخر مرة نسكت على هدرتك وعلى الضرب تاعك مانزيدش نسامحك خلاص
نتمنى نصيحة صادقة راني في حيرة حاسة حياتي ضايعة

[NIGHTINGALE]

للأسف ما كان عليك أن تقبحي نفسك في عينيه عندما أعدت كلام أمه في حقك عليه
يعني في ذلك الوقت كان عليك أن تقلبي الكلام جيدا في رأسك وتنظري في الأثر الذي قد يتركه فيه
فهمك كان فضح أمه لكن افتضحت بدلا منها وكنت أنت من فضحت نفسها!
ولا تؤاخذي زوجك كثيرا لأنك أنت من أعطاه الذريعة لمعايرتك
الآن عليك أن تتحملي مسؤولية ما حدث وتتقبلي أن تسمعي من الناس - بما فيهم زوجك - بعض الأمور التي تزعجك
ولا تسعي في كل مرة إلى الشكوى وترديد ما يقولون فمن يدري في المرة القادمة أي مجرى سيأخذه الكلام
وتوجهي بدل ذلك إلى المولى عز وجل بالاستغفار والتوبة واصبري فكلام الناس كنباح الكلاب لا سلطة لأحد عليه

والله أعلم

[sanax]

انا ضد فكرة الطلاق صح جرحك لازم تتفاهمو لانوا هناك خطوط حمرا لا انتي تتحطيها ولا هو عيب انكم تقعدوا تسبوا بعضكم لانوا الكلام الجارح مايبراش الاثر نتاعوا الاحترام هو اساس كل علاقة

[ضفاف الإبداع]

بعد سنين زواج مازالهم يذكرونك بالجهاز واش جبتي واش ماجبتيش الا يعلمون ان المهر من حق المرأة وحدها ليس عليها شراء الفراش والذهب وماإلى ذلك إن اشترت فهو تكرما منها فقط وتشري على حساب قيمة المهر ليس اكثر من ذلك
يا اختي ربي معاك ولا أنصحك بالطلاق بل سأدعو لك بالصلح

[الصديق قروف]

اسلام عليكم
‏ انتي غلتطي كي قلتي مالية معندهمش
‏ ماشي لازم يديرولك حتى وكان عندهم
‏ اصبري وحتسبي اجرك عند الله
حلي مشاكلك بلين ارجل لايقبل ان تفرضي نفسك بلقوة

ربي هدينا

[mounyabiskra]

ماتتسرعيش اختي ماتطلقيش و خمي في بنتك، اغلبيه بحاجات اخرى كيما الاخلاق و الطيبة و الضحكة قولو صح دارنا مدروليش واش راكم تحوسو نتوما بصح رباوني خير من الاف... و هو ذرك يقعد مع روحو و يسكت وحدو . قولو هاي عندك طفلة فحجرك و نشوفوك غدوة واش ديرلها وا ذا تقبل راجلها يديرلها واش راك دير نتا و ربي يفرج عليك اختي ، تقربي من ربي وادعي.

[mounyabiskra]

و ما تطيحيش بقيمتك قولو لوكان خليتني نخدم لوكان راني درت لعجب ماشي غير محزمة

[ibtihal18]

اولا اختي اسال الله ان يفرج همك عاجلا ليس اجلا و يصلح لك امورك و يحفظلك بنتك من كل سوء
ثانيا اختي الطلاق مش ساهل و مش مجرد كلمة يهدرها الانسان و انت و بنتك برك اللي رح تخسرو .............ما تيتميش بنتك ......و زيد الشي لي صرا بينك و بين زوجك اهون من اية مشاكل اخرى و انا نظن انها مجرد هبة راهي مارة عليكم و تروح و لازم تتحملي شوية و تكوني قوية شوية ............اختي لازم تبينيلهم بلي راكي راضية و قانعة و معتزة بالشي اللي دارولك اهلك و اصلا من التفاهة انو في 2015 مازالت ناس تحاسب على الشورى و المحزمة و الذهب و كانو بلا بيهم ما يعيشش الانسان والله امر تافه جدا ...انا نقولك مرة اخرى كي يجبدولك الهدرة عليهم هوما ولا راجلك ديري بروحك ما سمعتيش و طيشي كلامهم ورا ظهرك باش تربحي صحتك و راحة بالك و تربحي دارك و اسرتك و كي يلقاوك ماش مقيمتهم رح يسكتو وحدهم صدقيني
انساي فكرة الطلاق و شوفي لبنتك و خلي اللي يهدر يهدر حتى يشبع الهدرة راهي باطل

[رميسة الجزائرية]

وعليكم والسلام ورحمة الله تعالى وبركاته
اختاه اياكي ان تطلبي الطلاق ليس لاجلك لاجل ابنتك حاولي ان تصبري
وتصبري حتى يتيقن انك الافضل حاولي بالسياسة معاه برك كيما يحكي معاك حاولي تبدلي الموضوع ماشي تقلقي خاتر الرجال يعجبهم الحال كي تقلق المرة بصح نقولك اقتليه بالبارد تربحي هو يقولك انتي فقيرة قولي الحمد لله ربي ماخلانيش وبعثك ليا هكا بالسياسة تكسبيه والكلمة الحلوة ترديه لصفك
تروحي تطلبي الطلاق ومبعد تندمي والله تندمي هو يروح يزيد يزوج وانتي تبقاي في الدار كي مانعرف واشيه
المهم خلي ربي في قلبك وصبري حتى يفرج ربي
انا عندي مرت خالي كان راجلها نهار طول يعايرها يحاوزها يضربها هي تروح وتوليلو وديما تقول والله مانخليه باه يديوهولي بقات 10 سنين تحت الدل واليوم راهو يعيش فيها كي السلطانه قبل ماتقول اه يحس بيها والله كيما نحكيلك والنسا كامل عادو يتمناو يعيشو كيما هي شوفي لوكان طلبت الطلاق راهي طفرت فيها بصح هيا حكمت عقلها وزادت حكمت فيه حتى ولالها خاتم في يدها
شوفي اتحملي وزيدي اتحملي وماتتقلقيش ديجا هادي حاجة ربي هكا خلقنا واحد عندوو مال الدنيا وواحد ماعندوش فالدنيا بصح رابح فالاخرة
...فرضا طلبتي الطلاق خممتي واش يصرا فيك انتي وبنتك تعيشي مانعرف كي واشيه الطلاق ماشي ساهل زيد الشيطان هادا على واش يحوس قالك كان واحد الشيطان يحاول يفرق بين الازواج وديما منو راهم حتى يفرقهم وهو سايي عرف نقطة الضعف نتاعك انتي وزوجك دونك لازم تتفارقو بصح علاه هكا ربي كاين لوكان تحكمي فيه يفتحلك كامل البيبان والله

[رميسة الجزائرية]

شوفي حتى لوكان كترت عليك بصح مانيش حابا بنتك تعيش يتيمة وباباها حي
على جال واشيه جبتي الجهاز وماجبتيش
والله والله والله لوكان تتعاملي معاه بالسياسة والكلمة الحلوة ترديه ليك ويرجع كي الخاتم
يااااااااو الراجل على واش يحوس يحاوس على المرة الي كيما هو يغلط هي تكون معاه مليحة بصح هو يغلط وانتي تزيدي تغلطي وترجعي الهدرة وتبقاي تتنارفاي وحدك هادا مستحيل يخليك مهنية
شوفي اتعاملي معاه على قد عقلوو
تعيشي ماكالاه تيتمي بنتك مانيش حابا تعيش فالدل
مهما قدمتيلها ومهما عيشتيها ديما تبقى ناقصة حاجة الي هي حنانة الاب
كوني خير منو وارجعي لدارك وقولي نبداو صفحة جديدة انا ننسى وانت تنسى ونربيو هاديك الطفلة وهكا تكوني انتي خير منووو
صح راني صغيرة وانتي اكبر مني بصح نقولك راني حاسة بكل شي خاتر عشت واش ماعاشو حتى واحد
ماكالاه تخلي بنتك بدون اب
وديري في بالك بلي طلقيه منا يروح يدبر فيها وحدة اخرى غير هني روحك وصبري شوية مادام ساعات يكون فيه الخير حتى يرجع مليح ودبري راسك هادا واش عندي

[رميسة الجزائرية]

ممكن راني مكتر عليك وممكن راني نقلق فيك بصح راني خايفة عليك وعلى بنتك ونزيد نقولك هادا
أفضل ما يسعى اليه الشيطان هو التفريق بين زوجين والحديث الشريف يبين ذلك يقول صلى الله عليه وسلم ” ان ابليس يضع عرشه على الماء ، ثم يبعث سراياه ، فأدناهم منه منزلة أعظمهم فتنة ، يجىء أحدهم ، فيقول ما تركته حتى فرقت بينه وبين أهله قال: فيدنيه منه أو قال : فيلتزمه _ ويقول : نعم أنت أنت “لأن الشيطان يريد هدم الأسرة المسلمة وللشيطان فى ذلك أساليب ومداخل
شوفي راني لقيت هادا بلاك يعاونك

منهج التعامل مع المشكلات الزوجية:
إذا ترك الزوجان المشكلات التي تواجههما دون اتفاق على منهج محدد للتغلب عليها، فقد تعصف أمواج هذه المشكلات بحياتهما، ويمكن للزوجين أن يتخذا بعضًا من الأسس والمبادئ كدستور حتى يسهل عليهما التعامل مع الخلافات الزوجية، ومنها:
1- اللجوء إلى جوهر الإسلام فيما يتعلق بالمشكلة والأخذ بما جاء في القرآن والسنة، ثم عرض المشاكل على هذا المنهج والخضوع لرأي الدين فيها.
2- السرية، فليس لأحدهما أن يخبر أحدًا آخر بما دار بينهما من خلاف.
3- خير الزوجين من يبدأ بالسلام، ويقبل على الطرف الآخر ولا يهجره، ويصالحه ويصفح عنه.
4- التناصح والتواصي بالحق، والموعظة الحسنة من قبل الزوجين.
5- الاقتناع والتفاهم والتحاور الهادئ والاعتراف بالأخطاء هو السبيل لحل الخلافات.
6- الاختلاف لا يعني -أبدًا- التشاجر أو التخاصم.
7- التحلي بالصبر والأناة، وترك الغضب والثورة.
8- على الزوجة أن تتسم باللين والطاعة.
9- الاعتذار؛ فعلى من يشعر بالخطأ أن يبادر بالاعتذار للطرف الآخر.
10- لا يجوز الاختلاف على أمر ديني ثابت.
11- لا يجوز الاختلاف على حق يجب لأحدهما على الآخر، كأن يترك الزوج الإنفاق على زوجته، أو تأبى الزوجة طاعة زوجها.
12- تفادي الحرام في الخلافات، فلا يجوز السب أو الحلف بالطلاق، أو ما شابه ذلك.
13- تذكر إيجابيات الطرف الآخر، والمواقف الطيبة بين الزوجين خلال فترة الخلاف، وعند مناقشتها.
14- الانتباه، لأن الرابح الوحيد من الخلافات الزوجية هو عدو الله وعدوهما: الشيطان.
15- لا هجر إلا في البيت، فلا يجوز للزوج ترك البيت والذهاب إلى أحد الأصدقاء أو غيره، إلا أن يظن أن الخير في ذلك فيجوز، فإن تيقن منه، وجب عليه الخروج.
16- لا تترك الزوجة بيت زوجها، وتذهب إلى بيت أهلها مهما كانت المشكلة.
17- إبعاد الأبناء عن المشكلات، فلا يختلف الزوجان أمامهم.
18- السرعة في الحل، فلا يجوز ترك المشكلة وقتًا طويلا قبل المبادرة لحلها.
19- تقليل المدى الزمني للخلافات، فعلى الزوجين أن يتفقا على مدة زمنية، ينتهي الخلاف عندها مهما كان.
20- لا يجوز للزوج أن يضرب زوجته ضربًا مُبَرِّحًا، أو أن يسيء إليها في بدنها، كما لا يجوز أن يضرب الوجه أو يقبح.
21- إذا لم يتفق الزوجان، فعليهما أن يخبرا طرفًا ثالثًا، يُعرف بالصلاح والأمانة؛ ليسعى بالإصلاح بينهما، ويستحب أن يكون من الأقارب.
22- إذا تفاقمت الخلافات بين الزوجين فعليهما أن يبعثا برجل من قبل كل منهما؛ للتشاور والسعي لحل المشكلة.اللهم ادعوك بكل اسم لك ان تصلح بينهما ياااااااااااااااااااااااااااااااااااارب
احبك في الله يااختي لهدا اهتممت بامرك

[match1_dz]

السلام عليكم....شوفي اختي... انا نحكيلك قصة صرات لأمي...ضربها ابي بسبب شجار في 1990... لحقت القضية حتى للطلاق و كنا في 4 اولاد... قالت جتي بلي لازم تطلق وولادو يديهم ...جاء وحد الشيخ الله يذكرو على خير و قالهم رجعوهالو و انا نضمن بلي ميزيدش يمسها...دركا رانا رجال و بديارنا....في المقابل...صرات قصة في نفس الوقت و تطلقت وحدة افامي و الصدفة انو عندها طفلة....الام كان مصيرها انو خرجت تخدم باش تعول بنها و في النهاية الطفلة خرجت فاسدة اخلاقيا لانو مترباتش في اسرة..... اختي ربي يهديك مكانش راجل ميتعافرش مع مرتو و لكن ردي بالك تجرحي راجلك لان الوقت يفوت و راح ترجعو سمن على عسل انشاء الله و تربو اولادكم في دفء الاسرة

[match1_dz]

شوفي عندي منقلك على اليوتوب باش تعرفي "عندي ما نقلك الموسم 07 الحلقة 18, 12-02-2015 جزء 01" و شوفي "عندي ما نقلك الموسم 07 الحلقة 15, 22-01-2015 جزء 03" في اليوتوب...باش تعرفي قيمة الاسرة..تسامحي نتي و راجلك و ابني اسرتك

[اخت امين]

لا حول ولا قوة الا بالله وكلي ربي عليهم

[0ibtissam]

لا حول ولا قوة الا بالله ربي يفرج عليك وان شاء الله ترجعي راجل مكانش لي ريح يحب بنتك ويحن عليها قد بباه مكانش مراءة معقبتش ربي يهدي النفوس

[سحابة مسافرة]

اولا الله يكون في عونك
ثانيا و الله انا نحير في وحد النوع تاع الرجال يعاير مرتو بالجهاز و هو لو طلبو فيه المهريقولك غالي و كيفاه و علاه ...
و هذا النوع موجود بكثرة ..اذا حب تتعمر دار يشمر على يديه و يخدم
نصيحتي ليك انك متفكريش في الطلاق ابدا مهما كان و حاولي ترجعيه للطريق باي طريقة و متعانديهش المهم انت نتخربيش على روحك

[*ام بثينة*]

السلام عليكم اختي
اولا اسمحيلي اختي نقولك شيء و متزعفيش مني نتي غالطة غالطة غالطة منقولكش اطلبي طلاق و لا متطلبيش هذا قرارك بصح تمعني مليح وش رايحة نقولك و خذيها من تجربة سيدة عندها 10 سنوات زواج و يقولو شقسي لمجرب و متسقسيش طبيب

المشكلة تاعك انك متعرفيش راجلك يعني مقريتيهش
في الدنيا هذي مطلعي حساب لحتى وحد و ميهمك حتى واحد الا زوجك هو مفتاح سعادتك اذا عرفتي تمشي معاه و الله و الله كل الابواب تفتحلك و يبانلي زوجك مهوش انسان سيء لدرجة تنفصلي عليه و ربما هو فقط يتاثر بالكلام تع اهلو و بما انو اعتذر نهار ضاربتو هذا انسان فيه خير كاين رجال ميعتذروش ابدا من نساءهم و حتى و هوما غلطانين
و بما انك راكي قارية و فاهمة نتخيلك ذكية كفاية باه ترجعي راجلك ميقلقكش و ما يحاولش يزعفك في موضوع بالنسبة لي ثانوي و ميستهلش تنخرب اسرة بسببو فلو كان موضوع كيما هذا يؤدي للطلاق امالا لي اكثر منو كالخيانة و الزنى اعوذ بالله وش خلينالو
حبيبتي تحلي بالصبر ثم الصبر ثم الصبر الزوج تقدري تبدليه و تبدلي عقليتو معاك بالوقت و بهدوء و اياك اياك اياك ترفعي صوتك عليه و الا تعايريه الرجل مهوش كيما المراة حبيبتي المراة تنجرح و يبرالها الجرح و الرجل جرحو ميبراش و ياثر فيما بعد على علاقتكم
معلوماتك ناقصة اختي كاين شيء مهم بزاف ملقيتوش في موضوعك و هو مشاعركم تجاه بعضة تحبيه و يحبك و الا مكنش حب بينلتكم ؟؟؟
هل صحيح تقدري تستغناي عليه في حياتك ؟؟ منيش نهدر على الامور المادية راني نهدر على الانسان و وجوده بجنبك و هل انتي قادرة تتخيلي نفسك مع شخص اخر غير زوجك ؟؟ هذو اسئاة جاوبي نفسك عليها باش تعاونك في اتحاذ القرار
و نزيدلك حاجة متخلي حتى وحد يعلم بمشاكلكم انت و زوجك لا اهلك و لا اهلو لانو كل عايلة يديها النيف على و ليدها و الا بنتها و يخربو حياتهم بدون قصد و دايما فهمي زوجك انو العالم كلو كوم و هو كوم تاني و فهميه لنو الكلام السيء على زوجته (نت بالطبع) راهو كلام سيء عليه لانو المراة ملك لزوجها و اذا اذاوك انتي معناتها راهم ياذو فيه هو سواء الكلام هذا من اهلو او من اهلك و كوني صادقة في مشاعرك معه و متناقشيش معاه الا عندما يكون هادئ

تابعينا باخبارك و ربي يوفقك و انا ندعيلك في ظهر الغيب "اللهم من اراد التفريق بينك و بين زوجك فاشغله بنفسه" امين


سلام

[النجمة القطبية]

يا اختى الله يهديك انتى بسرعة خممتى في الطلاق
هذا مش امر الناس تتطلق عليه والبيوت متبناش بالساهل باش يكون امر الطلاق بهذه السهولة
يا صديقتي هذا موضوع بسيط كل ما في الامر وسوسة شيطان حب يفرق بيناتكم لا اكثر ولا اقل
شوفي يا حبيبتي اولا انتى عرفتي اول مفتاح من مفاتيح زوجك وهو انه من النوع اللي يتاثر ويسمع كلام الناس وخاصة كلام الوالدة
وهذا الامر ممكن تحويله لصالحك بشرط تكوني انسانة ذكية وتعرفي تتكلمي
متخليهش يعرف نقاط ضعفك يعني متقعديش تبكي وتندبي قدامو امك قالتلي امك عملت ومتخليش امو ند لك بالعكس عامليها باحترام وابتغي بذلك وجه الله سبحانه وتعالى حتى في يوم من الايام لما تكبري ييسرلك من تتحملك وترفدك
ولازم تعرفي ان الكبير عقولو ينقص ويولي في سن معين يتصرف مثل الاولاد يعني ياختصار متديريش عليها وخلي عندك اذم من طين واخرى من عجين
بالنسبة لزوجك مدام يتاثر بالكلام وانتى اقرب واحدة ليه عمريلو راسو بالكلام المليح لانو المليح يمحي القبيح
كمثال ذكريه بان ابنة الرسول عليه الصلاة والسلام وهو سيد الخلق ولم تتفاخر وتبذر فكيف تتفاخري انتى وقوليلو اذا كان اعطاك مهر قليل انك مباركة لان ايسرهن مهراا اكثرهن بركة
ومن ناحية اخرى ذكريه انو عندو بنت وقوليلو كيما انت رجل صالح لم تتشرط ربي اكيد راح يرزق بنتك بالزوج الصالح مستقبلا اللي يتزوجها لذاتها وليس لمالها
كونى مبتسمة وودودة معاه اديعيلو كي يدخل وكي يخرج واحمدي ربي دايما قدامو ان الله سبحانه وتعالى رزقك بزوج صالح مثله
باختصار كوني سباقة ومتخليش مكان للشيطان للوسوسة
وانتى انعلي بليس وصلي زوج ركعات وارجعي لدارك
الموضوع بسيط متكبريهش
وربي يرزقكم البركة في هذا الزواج والتوفيق

["" عماد الدين ""]

ولا أنصحك بالطلاق .ربي يفرج عليك .تدكري بان لديكما بنت***ما ذنب بنت عمرها سنتين !!! *** حسبنا الله و نعم الوكيل امور بيزنطية لا معنى لها قد تؤدي الى الطلاق -الجهاز و المحزمة-الصح في التربية و الاخلاق
ربي يخفف عليك اختي
ربي يهنيكم

[kouk23a]

نحي فكرة الطلاق من بالك وتعودي من ابليس
والمرة الجاية كون يقلك هاد لكلام قولو
اهلي ماداروليش ديرلي انت خليني نتباها قدام اهلي
وربي يهديه
والغلطه تيعك كي رجعتيلو كلام تاع أمو
المهم فكرة الطلاق نحيها من بالك اختي وربي يهدي سرك

[na.dodo]

اصبر ياختي واتمنى لكي كل الخير