الكريدي ..

[DOllARMaN]

السلام عليكم
انا املك محل خدماتي-تجاري اعاني يوميا مع اصحاب الكريدي بحيث افقدوني السيطرة على نفسي -_-
اصبحت سريع النرفزة و لا اتحكم في غضبي
المشكلة انني حشام واغلبية زبائني من جراني ومعارفي وفي كل مرة ننشعهم بصح وجههم صحيح وما يحشموش
وضعت لافتات السب والشتم على الجدران لاكن لا حياة لمن تنادي
منهم من يملك سيارة ومنزل ومنهم من له اولاد ومنهم ومنهم .. اما انا فلا املك سوى الله والوالدين
ومع ذلك يطمعوا فيا وياكلوني في حقي
الان انا على وشك الافلاس
هل من تجار في نفس حالتي !!

[ايمان نور الجزائر]

ربي يكون معاك يا اخي
سيي مع الاول تنقص مبلغ الكريدي
مثلا يجيك واحد يشري قيس خمسين الف مثلا اليوم
المرة الجاية كي يجي قولو لازم تخلص المرة الاولى قبل والا ما نبيعلكش
خلص اللهم بارك ما خلصش ما تزيدش تبيعلو وهكذاا
وما تدريش كريدي بزاف دير مثلا ماكانش كريدي فوق 60 الف او 40 الف
ما تنساش يا خويا نتا تاني خدام وتخدمك على روحك تاني ويلزمك مدخول للسلعة ومصريفة ليك
كون واعر معاهم ومولا كلمة وتشوف كيفاش يتبدلو ويبدلو العقلية
انا صراحة والله جامي لا درت كريدي في حياتي عندي نشري ما عنديش ما نروحش ندير كريدي
ومثلا مرات ما يكونش عندي الرصف والا مول المحل ما يكونش عندو يقولي ما تخلصيش في غرضك
انا والله ما نرقد نخاف نموت وما نوفيش ياو نروح ندبر صرف ونرجع ليهم نجري نخلص
وانا نفهم واش راك تحكي بابا تاني تاجر والغاشي يظل يهبل فيهم
كاين لي راه يسالهم بالملاين ولدوك ما رجعو الدراهم ما طلبو السماح

[ba10dz]

ربي معاك خويا اللي يحشم في الوقت هادا ياكلوه
لكن لالصبر حدود اخي والا فسوف تفلس ربي يهدينا

[أم سلوى]

اعطيهم كلش بالنقص ...حتى الكمية تاع المشتريات ليست كاملة
قولهم هات دراهم تدي السلعة الكل

[DOllARMaN]

والله مقدرت نزيد نصبر اكثر
راني نخمم نبيع المحل بيه بصوالحه ونهجر
هاذا والله ما شعب الا من رحم ربي
الحكومة من جيهة والشعب من جيهة ويقولك علاه تكرهو البلاد

[zaahra]

ربي يفرج علييك

[DOllARMaN]

ربي يفرج علييك

اميين اجمعيين
شكرا اختي :)

[zahra souf]

ربي يعينك خووويا .. انا تاني عندي والدي تاجر وراهوا يعاني كيفك من الغاشي .. بصح بابا داير مبلغ محدد للي يكردوا عندوا المهم يكرديلهوم وكي يلحقوا للمبلغ اللي محدوا يحبس مايزيدش يكرديلهم لييين يخلصوا .. وكاين عيباد ميكرديلهومش خلاص لخاطرش ميفهموش

[ام رضوان]

السلام عليكم ورحمة الله.
اياك اخي ان تبيع محلك راك تندم رانا في وقت صعيب تزيد تكسب حاجة.
اقوللهم وبنبرة شديدة ماكانش لكريدي ما تبيعش خير من تبيع وترجع تصرف في راس مالك.
نقولك اخي واقسم لك بالله اني صادقة.
والدي كان تاجر لاباس بيه وكان يخدم مع بعض الناس البعض فقط بالكريدي ونصحوه ناس بزاف قالولو اخطيك منهم راهم عنهم المال وراهم قاعدين غير يكذبو عليك ومصدقهمش وقعد يتعامل معاهم بنفس الطريقة ولقا روحو يصرف في راس مالو وذرك واش نقلك
ابي فلس واصبح لا يقدر على توفير حتى مبلغ العيش العادي .
وهذوك الناس اللي كانو ياكلو في حق ابي والله والله والله وربي شاهد علي ما اقول دخلو مشاريع وواحد منهم في مشروع واحد كانت فايدتو برك 2ملاير في ذرف شهرين.والاخر قام ببناية عدة منازل والاخر كسب الاراضي وخلى وخلي.
يا اخي نقلك واحد لمثل نقولوه : حرش نابك تلقي الناس تهابك.
وربي يوفقك.امين

[سميرة10]

السلام عليكم
كان الله في عونك اخي ان شاء الله يلهمك وتجد الحل
ونصيحتي لاتبع المحل لانك سوف تندم ساعة لا ينفع الندم

[ادرة مكنونة]

كان الله في عونك اخي زمن صعيب ياسر العاقل يروح بين الرجلين متكرديش هذا هو الحل والرزق بيد الله انهض باكرا وقت يقسم الله الارزاق

[TOFNINE]

ماتزيدش تكردي مدة شهر وجرب وربي يوفقك اخي

[bourayou]

دير خدام مايحشمش وجرب وقولو لهم بعت الحانوتتتتتتتتتتتتتتت

[smahi_hb]

يا أخي انت شجعت الظاهرة بحيائك ونيتك البريئة وكأنك تتعامل مع ملائكة ..... انت يا أخي تتعامل مع شعب من نوع خاص ,,,, انت مع شعب يسمى جهازا هضميا لا أكثر .... شعب يأكل مما لا ينتج ..... الأنانية عندنا وصلت حدا لا يطاق بحيث أصبح الشعار السائد هو : أنا وبعدي الطوفان ..... لسوء حظك أنك مع جنس بشري يعيش بهذا الشعار ..... الحياء في هكذا أمور نسميه عندنا بالقبايلية (تيهوديث) وعذرا للتعبير ، بمعنى استعمال الحياء في غير محله والذي ينجر عنه ضررا للمستحي وهذا للاسف الشديد ما ينطبق عليك ..... كيف تفكر أن تبيع المحل بسبب ظاهرة أنت شجعتها؟؟؟ فرضا بعت المحل ، ماذا سوف تعمل بعدئذ ؟؟ تشتري محلا آخرا في مكان آخر مثلا ؟ ما دمت تستحي فسوف يبقى الأمر على حاله ..... اتمنى أن أكون قد أوصلتك فكرتي وتقبل تدخلي بصدر واسع .... تحياتي.

[الحزين المبتسم]

السلام عليكم

أخي الكريم

يلزمك بعض الصرامة في التعامل خاصة إذا كنت قديم في ميدان التجارة في منطقتك فبذلك أنت تعرف المخلص من غير المخلص

صحيح أن بعض الزبائن لايستطعيون أن يسددوا فوريا فلابأس باستدانتهم لاجل مسمى ومن لا تثق به فاشرط عليه النقود مقابل السلعة وهذا ليس بعيب

لأنك في النهاية أنت عامل وتحتاج للمال للتسوق ومصاريفك الخاصة

ربي يوفق أخي

[oum abderhmane]

السلام عليكم
ربي يفتحها عليك و يا اخي متزيدش تكردي غير الي اجره زهيد و بمبلغ بسيط و لن الوم احد الوم دولتنا تخلي الزوالي على سعدو يطلب

[دودش صدام]

انا ايضا اعاني مما ذركته اخي تورطت مع ناس في الكريدي لدرجة المخاصمة والكلام البذيء منهم من قال لي والله ما تخلص ودز معاهم والكثير من الاقوال .. بعد تجربتي وتورطي مع الكثير كاين اللي خلصني وكاين الى يومنا هذا ..

بالصح اتخذت قرار صارم وهو منع الكريدي على الجميع مهما كان الشخص محتاجا لا يهمني امره لانهم لا اقول كلهم بل اكثرهم لا يسددون الدين والمشكل يزيد ينرفزك ويقلك راك تسال ولا يقلك روح بعدني ما نخلصكش روح اشكي .. انا مرات نقول نرفد موس ونضربو حتى الموت لا حول ولا قوة الا بالله ...

المهم جلست مع نفسي احاورها .. وماكان علي الا لوم نفسي لاني انا من اعطيت الكريدي في الاول ومنذ ذلك الحين الذي ادركت فيه انا الناس لا يهمها امر تسديد الدين اتخذت القرار الرسمي لا تغيير فيه ولا تراجع ...

ما نمدش الكريدي يا لوكان يكون ابي او اخي ... كيما نقولو .. ((( اللي بيدو حاجة يقطعها )))


في الاخير احذر جميع اصحاب المحلات من الكريدي حذاري حذاري حذاري يا لوكان تخسر الشخص اللي يكريدي وما تمدش الكريدي نصيحة عن تجربتي في المحلات ... الناس ما فيهاش الخير ..

والسلام عليكم ورحمة الله وبركاته ..

اعتذر اذا بالغت في الكلام او اسئت التعبير .. خرجت واش في قلبي برك

[التشلساوية]

صح عندك الحق والموضوع مشوق للنقاش لانو يحدث كثيرا و بشكل يومي

[DOllARMaN]

شكرا على الردود
مع العلم اني بدلت العقلية ومازالني نعاني
الان اللي يجي يكردي نسلفلو دراهم ونقولو روح اشري من جيهة اخرى
الحمدلله تهنيت شوية في راسي

[kamal luisnazario]

والله مقدرت نزيد نصبر اكثر
راني نخمم نبيع المحل بيه بصوالحه ونهجر
هاذا والله ما شعب الا من رحم ربي
الحكومة من جيهة والشعب من جيهة ويقولك علاه تكرهو البلاد

لازم نقطة فصل
قال اسف حبست
خلص اللي عليك
لازملها الحزم هما ماشافوش فيك وخافو ربي الله يهديهم
لازملك تحبسلهم نهائيا
حتى يخلصو واللي يخلص كرديلو ولي ما يخلص حبس معاه نهائيا
ودير وقت للخلاص مثلا شهر وصايي تحبسلو لازم يخلصو
هذا اما باش تخلييها تتراكم السيد اكيد ما يخلصكش الا من رحم ربي
لخاطر ما خلصش شوي يخلص ياسر مكانش منها
وربي يكون في عونك والله يهدي الناس هذ سماها انانية وظلم الناس حرام والله

[Zahra 30]

ربي يفرج عليك أخي

[ahmed saja]

تبا لهم

نــفس قصة اخي
لند كــيوسك