دبرو عليا راح نهبل

[مشكلتي]

السلام خاوتي،
انا خطبني واحد و بانلي ناس ملاح و صليت استخارة... سمعت بلي كان تع نسا و حرام يعني (زنا) عفانا الله مي كي يهدر معايا يبان عاقل سبحان الله جامي غلط معايا بكلمة خارجة طريق علابيها كملت معاه وما امنتش الناس. معليش قلت منحوسش على الماضي بلاك تاب (ربي يحب العبد لي يغلط و يتوب خير من لي ميغلطش كامل) ؛ البارح في فيسبوك دار صورة تاع مرا و راجل و معاهم livret de famille علقت واحدة و قاتلو انا و انت ان شآلله ...!!!!!! انا تشوكيت كي هدرت معاها قاتلي هذاك حبيبي وراهو خاطبني و ديما يعيطلي!!! قلتلها كذابة اعطيني رقمو باش نامن!! مدتلي 4 ارقام الاولى و كان صحيح تشوكيت وكي واجهتو قالي هذيك فاميلتي ضال تبع فيا تعيشي متخليش الناس يدخلو بيناتنا خلينا نكملو و نعقدو ونفتحو و تزوجوا و نتهناو ...!!! مافهمت والو و بايتة نبكي وماما راهي تقولي هيا تبداي توجدي الجهاز واش ندير نحكيلها و نتهنى ولا نعطيه فرصة ومنامنش الناس بلاك يكذبو وميحبوليش الخير؟
ثاني حاجة نسحق خدمة لي يحب يعاوني هو من الشلف من الشطية لي يسكن فيها على وجه ربي يعاوني نمدلو لقبو و سمو و يسقسيي عليه و يشوفلي وين يسكن (هو قلي رانا نبنو مي الناس قالولي يسكنو ي براكة دارهم رابت فزنزلة تاع لصنام وماعاودوش بناو هو قالي رانا نبنو 2 طوابق!!!) ماشي طمع يا خوتي نعيش براكة ولا فيلا يهمنيش لمهم لكذب لالا... تعيشو عاونوني بابا انسان كبير و ميعرفش شكون يسقسي تعيشو راني مزروبة



************************************************** *********
السلام عليكم ورحمة الله وبركاته
الاتصال يكون عبر الخاص بواسطة الاشراف
لذا من يريد مساعدة الأخت وتقديم يد العون يضع رده في الموضوع
لتقوم الأخت صاحبة الموضوع بمراسلة الاشراف ومن ثمة تحويل الرسائل الى المعنيين
مالم يكن محتواها مخالفا للضوابط الشرعية و لقوانين المنتدى

الاشراف

[*بسمة أمل*]

ربي يفرج عليك

[ام ايمن17]

بعثيلي رسالة على الخاص نسقسيلك عليه اذا قدرت لان الشطية كبيرة بزاف اذا قدرتي اشرحي بالتفصيل مكان الاقامة و اللقب و ربي يجيب الخير

[الحزين المبتسم]

السلام عليكم

أختي الفاضلة

من خلال طرحك أختي يظهر انكم لا تعرفون الخاطب جيدا

قلت سمعت بلي كان .................. البينة مطلوبة خاصة في مثل هكذا أمور

المفروض أختي قبل الخطبة دائما التحري جيدا على حال الشاب والعكس وذلك من أهل الثقة

أراك قد استدركتي ذلك

كنصيحة اسألوا جيدا عن حال الشاب قبل الاقدام على الزواج

نسأل الله لك التوفيق

[فخورة بنقابي]

ربي يفرج عليك أختي الفيسبوك لي يخلط فيه يندم

[خالد عنابي2]

هناك 3 مؤشرات حمراء المفروض توقفك وتتحراي مليح انتي وعايلتك قبل ما يقع الفاس في الراس

المؤشر الاحمر الاول كلام الناس عن ماضيه السيئ
المؤشر الاحمر الثاني حادثة الفيسبوك
المؤشر الاحمر الثالث الكلام انه عايش في براكة ويدعي انه يبني في 2 طوابق

بصراحة لا اريد ان اظلم الناس بدون بينة ولكن لديكي سبب وجيه وقوي جدا لكي تخافي من التعرض لعملية نصب كبيرة

تصوري لو يكون انسان سوء فعلا وعايش في براكة فعلا وكاذب على وحدة اخرى فعلا يدعي انه يخطبها ؟

انا اعرف قصة انسان متزوج وعنده اولاد راح تمسخر بوحدة بنت ناس وادعى خطبتها وكل يوم يجي يتغدى عندهم ومقلشينو وهو يتمسخر بيهم ومبعد كي خرج معاها انتظر حتى طاحت عينها في واحد اخر ودارها سبة لكي يفسخ كل شيئ !

في عالمنا هناك ناس من هذا النوع

مالا سقسيو عليه مليح مليح

ومن جهتك تكلمي مع تلك الفتاة تع الفيسبوك وقولي لها انه خاطبك ومديلها الرقم واي ادلة اخرى وشوفي رد فعلها

[ام رضوان]

ربي يستر اختي اسألي عنه جيدا قبل ما تقومي باي شيء راه زواج مش لعبة

وحطي في بالك راه ماكانش دخان بلا نار

اولا ولد الاصل خيرو يسبق شرو

والشخص الخايب شرو يسبق خيرو

ربي يكتبلك غير الخير يارب

[اريج الامومة]

ربي يفرج عليك اختي بصح ﻻزم تسقسي مليح مليح راه ماكانش دخان بﻻ نار
مدام سمعتي هدرة وارد يكون كاين منها زواج مش لعبة ماترميش روحك ومن بعد تندمي وعلى حسابك باباك راجل كبير مايقدرش يعاونك
تبيني وحرصي قدام الزواج وكثري من الدعاء الدعاء ثم الدعااء

[staifia]

شوفي. يا اختي
اولا كلام ناس حتى مشكلو صادق لكن كاين كلام يكون صح مكانش دخان بلا نار
قبل ما تتزوجي سقسي عليه مليح الخدع واعر

[sarl02]

اذا امكن اتحط المعلومات اللازمة للتقصي عليه عند احد المشرفين ...الاسم.. اللقب...السن...الوظيفة او العمل ومكانه.....وان شاء الله نقدرو انساعدوها
.

[ام ايمن17]

اختي صاحبة المشكلة بعثتلي المشرفة رقم هاتف لكن لا اعرف لمن هو لقد شرحت الامر في رسالة للمشرفة لكن لاادري ان استلمتها ام لا لان رصيدي لا يسمح ببعث الرسائل اشرحي الامر ان امكن

[anissa90]

لعندو ماضي اسود كيما هذا الشخص ايجي يوم و يرجع الى حنين الماضي نصحتي اخطيك منو مضيعيش وقت عندك الادلة كافية بلي هذا الشخص نفسيتوا مريضة متحوليش تقنعي روحك بلي الناس حسدوك عليه ربي افرج عليك ويرزقك زوج صالح

[ابتسام smile &hope]

ان شاء الله يعاونوك الاخوة

[مياسم الصمت]

السلام عليكم ورحمة الله وبركاته

الاخت صاحبة المشكل فرج الله همك ويسر امرك
فضلا يمكنك مراسلتي عبر الخاص بما تريدينه وبمن تودين الاتصال به ممن عرضوا المساعدة

وساتكفل ان شاء الله بتحويل الرسائل مع الحفاظ على خصوصيتك


بالنسبة للتواصل بالرسائل عبر الخاص مع المشرفين
فيجب ان يكون عدد المشاركات 30 مشاركة حتى تتمكن من التواصل معهم
وربي يجب الخير ان شاء الله

[oumhana]

اختي إن شاء الله تلقاي لعاونك بصح انا من جيهتي غير ردي بالك بنت خالي عرفت واحد و مهيش صغيره لتقولي متعرفش تقدم لها و خطبها وكلش وكان قاللها لي راهو يبني وواحد نهار قاللها بلي عندو مشكل تاع دراهم ولازم يكمل البنيان ولا رايح يأخرو العرس وهي مسكينه آمنت ومدتلو سياغة تاعها ومن داك النهار مبانش وكراحو يسقسيوفلبلاصة لوراهالها قالولهم هذامشروع تاع الدوله مسكينه دخلت لصبيطار وصرا فيها لعجب المعجب بلا منقول واش دارو فيها دارهم على السياغة.

[غصن البآن]

سلام حبيبتي

راجلي عندو صحابو من الشطية ممكن نقدر نعاونك..........زمش اكيد لكن تاكدي راح نبذل واش نقدر و نوصي راجلي يسقسيلك عليه

اتصلي بيا و خليلي اسمو و لقبو و كامل واش تعرفي على افراد عائلتو لانو الاسماء قد تتشابه

ربي يحفظك و اذا فيه خير ربي يسهل و اذا ما فيه خير الله يبعدو

حنونة الواحد يعرف الحقيقة درك احسن من يعرفها بعد الزواج
وعلى عائلتك عادي ياك انتي مش مخسرة

قلبي عندك

ربي يوفقك

[saladin17]

الله أكبر
كارثة و الله ...
لكن الأعجب علاه ما سقسيتوش عليه .... علاه ما رحتوش ثم وين يسكن و تسقسو عليه !!!

على كل ...
أنا من الشلف ... و أعرف ناس من الشطية ... سأساعدك بإذن الله

السلام عليكم

[polyma]

شوفي. يا اختي

قبل ما تتزوجي سقسي عليه مليح الخدع واعر صح مكانش دخان بلا نار

[oum imane83]

يقال ان المتهم بريء حتى تثبت ادانته ... يعني لازم تتحراو وتسالو عليه ...يروح واحد من عائلتك للمنطقة الي يسكن فيها ويسقسي عليه ..
وزيدي صلي صلاة الاستخارة ... ماخاب من استخار......

ربي يسهلك

[معتزة باسلامي]

ربي يجيب الي فيه الخير