مشكلتي

[مشكلتي]

السلام عليك ورحمة الله وبركاته

شاب يسأل : هل ما تطلبه بنات اليوم طبيعي ومعقول؟ تروح تخطبها وتتفاهمو على المهر والذهب والعشاء والصوف والفاليزا ، قلنا معليش
من بعد تولي احنا عندنا الاونسوبل تع العقد يجيبو الراجل بيه بالصاك والصباط والخيمار
زيد احنا عندنا فالحنة يجيبو الطارطة والقشقشة
زيد احنا عندنا فالعرس لاغوب على العريس و دارهم الحلاقة ثان عليه
وما تنساوش الخواتم ، اضعف الايمان زوج

يا ناس اليس عيبا ان تطلب البنت كل هذا ، والحجة احنا عادتنا
هل من الطبيعي اختي ان تتنازلي عن كرامتك الى هذه الدرجة وتطلبي هذه الطلبات؟
يا اخي قولي كون جيت في بلاصتي كيفاش تتصرف، راني حرت وما فهمت والو

[زبدة ذايبة]

علاه تحير

إذا كنت راجل انت صاحب المشكلة

ماتكلفش روحك فوق طاقتها

قوللهم هذا واش راني قادر ندير

رضاو أهلها وهي الله يبارك

مارضاوش شوف الشي اللي تقدر عليه وإلا بنات الفاميليا بزاف علاه تجيب امرأة تقطعلك رقبتك مقبل ماتدخل لدارك

وإذا كنت امرأة صاحبة المشكلة

نقولك اتق الله في الراجل

إذا راك حابة تديري دار ماشي هكذا

المال والشيفون يروح ويجي

إذا كان الراجل متدين ومتخلق الرجال يزيدو الدراهم باش يدي بنتهم

بعدنا على ديننا على بيها تخلط الحابل بالنابل

تخلو بنات الفاميليا وتروحو للنسا اللي مايرحموكمش ينحيولكم العضم قبل اللحم وامنتوما عاجبكم الحال

وبعد شهر ولا عام

تجو تبكو في المنتدى

[melissa lola]

لايكلف الله نفسا الا وسعها خويا على حساب اللهجة انتاعك انت من الشرق وللاسف مازال عندكم في الشرق شروط تعجيزية للزواج ربي يطيحك في بنت الحلال

[ايمان نور الجزائر]

هاذو شروط كارثية مليح الواحد يتمسك بعاداتو وتقاليدو لكن الجيدة منها
وللي ترحم الناس وليس مثل هذه شروط
صراحة نقولك احنا في الوسط ما عندناش هك اظن المنطقة نتاعك هوما يشرطو
وهنا الواحد يتحط في مواقف لا يحسد عليها يديرلهم رايهم يولي فقير وعنده ديون
ما يديرش عليهم يولي بخيل واناني وما يعرفش الاصول
ربي يكون في عونك
حنا في الوسط عندنا خاتم والمهر والمهر يا اما يكون ذهب لوحده اما يكون مبلغ مال وفاليزة وفقط
ماكانش الباقي

[عين الصقر]

مليح نحافظوا على العادات والتقاليد ولكن بنات اليوم أو عائلات اليوم راهم يبدعو بزاف
ماتكلفش روحك فوق طاقتك أخي فالعرس يفوت في نهار وربي مايحبش التبذير

[بنت الرّحّل]

9 رجب 1436 من الهجرة النبوية



السلام عليكم ورحمة الله وبركاته

علاه تجيب امرأة تقطعلك رقبتك مقبل ماتدخل لدارك

تخلو بنات الفاميليا وتروحو للنسا اللي مايرحموكمش ينحيولكم العضم قبل اللحم وامنتوما عاجبكم الحال




أوه أعجبتني هذه قطع الرقبة وتنحية العظم
أخفتني أختي :sdf:

أنا لا أرى الهجوم على كل الفتيات بهذه الطريقة خاصة وأن مفهوم المخالفة يعني أنها ليست ( بنت فاميليا) فنحن لا نعرف الفتاة ولا ظروفها هذا أولا وثانيا : الجملة لها الكثير من المفاهيم فلا تطلق عشوائيا حتى لا نقع في البهتان أو القدح في الناس فحبّذا لو غيّرتها من فضلك !

ثم الأولياء وخاصة الأم يريدون المفاخرة والمباهاة فهم الذين يتحملون الجزء الأكبر من المشكل
وعندي استفسار لصاحب المشكل : أنت لا تطلب مثل هذه الأشياء لأختك أو لابنتك؟ أو والديك لا يشترطون مثل هذه الأشياء ؟
هناك شيء غير معقول منتشر في المجتمع الجزائري الجميع يشتكي لكنهم جميعا يفعلون هذا الفعل مع غيرهم :confused::confused::confused:

ومثل هذه العادات يجب أن تُرفض وتُحارَب ولا يكفي إلقاء اللّوم على الناس لمجرد أننا تألّمنا في فترة من الفترات ثم إن وُضعنا في أماكنهم فعلنا فعلتهم ولا نبالي !
كما يجب عدم الاستسلام والإذعان بسهولة
المهـــــــــــــم : قل لهم يا أخي الفاضل أنا لن آتي بهذه الأشياء الإضافية (الصاك والصباط والخيمار .. والخاتم رقم 2.....إلخ ) ليس كأنها لا تملك حذاء أو خمارا أو ثوبا ..!!!
وهم سيتدبرون الأمر، فقد وصل ببعض الأمهات -هداهن الله - تشتري الأشياء من عندها وتكذب على صويحباتها بأن زوج بنتها أتى بها !!!
هكذا هم يعيشون !
لكني لأول مرة أسمع أن الخاتم أصبح خاتمين ..معلومة جديدة هذه !
إذا بدأنا العد من رقم (2) فسنصير كما قال الرافعي رحمه الله :
(( فلا يقال حينئذ إن رغيف أكثر من رغيف واحد كما هي طبيعة العدد ، بل يقال : إن رغيفين أشرف من رغيف كما هي طبيعة النفاق ....فإذا عظمت الأمة الدّينار والدّرهم فإنما عظمت النفاق والطمع والكذب والقسوة والاستعباد ...وبهذا تقيم الدنانير حدودا فاصلة بين أهلها ))
فاللّهمّ سلّم !
أتمنى للجميع التوفيق

[Seif La Fiesta]

اقلهن مهورا اكثرهن بركة .. تربح

[محمد جديدي التبسي]

الخواتم ثلاثة مش اثنين واحد للشوفة وواحد للخطبة وواحد للعقد وربما رابع للحنة او حاجة تاع ذهب للحنة راك تولي في محنة أخي
لو تبع كلام النساء وطلباتهم والله ما تفرى
لازم عليك تكون حاسم مع والد الفتاة وقولوا هذي إمكانياتي وما نزيد والو وفكونا من العادات والتقاليد البالية
لأنك في أسبوع الزفاف راح تولي الملاين تخرج كأنها بقشيش ولا صرف ولا تستفيق إلا والديون قد أثقلت كاهلك هذا ان كان لديك أقرباء وأصدقاء رجال يعاونوك ..أعرف من صرف ثلاثين مليون وأكثر في يومين أو ثلاثة وهذا كله خوفا من عدم تطبيق العادات والتقاليد!!
ربي يفتح عليك ....كن حاسما من الأول وكلمتك ما لازمش تتبدل...

[0ibtissam]

يا أخي كل متطلب منك طلب قلها نسقي الا يدره ندرو وزيد أمشي على مقدروك

[naamane3]

[quote=زبدة ذايبة;3993299370]علاه تحير

إذا كنت راجل انت صاحب المشكلة

ماتكلفش روحك فوق طاقتها

قوللهم هذا واش راني قادر ندير

رضاو أهلها وهي الله يبارك

مارضاوش شوف الشي اللي تقدر عليه وإلا بنات الفاميليا بزاف علاه تجيب امرأة تقطعلك رقبتك مقبل ماتدخل لدارك

وإذا كنت امرأة صاحبة المشكلة

نقولك اتق الله في الراجل

إذا راك حابة تديري دار ماشي هكذا

المال والشيفون يروح ويجي

إذا كان الراجل متدين ومتخلق الرجال يزيدو الدراهم باش يدي بنتهم

بعدنا على ديننا على بيها تخلط الحابل بالنابل

تخلو بنات الفاميليا وتروحو للنسا اللي مايرحموكمش ينحيولكم العضم قبل اللحم وامنتوما عاجبكم الحال

وبعد شهر ولا عام

تجو تبكو في المنتدى

[/quote
يعطيك الصحة يامواطن
بارك الله فيك

[روح مراد]

نحمد ربي كي جيت نسكن في الوسط
ماكان صوف ماكان حوايج العقد ماكان والو المهر و الخاتم و الكبش و ربي يسهل
اصلا انا راني مدهوشة هنا في المنتدى نهار العقد يروحو يعقدو بلياس معين
و نهار الخاتم الروبة الزرقة
يا إخواني ربي يدير لكم التاويل خاصة اللي يخطب من الشرق و الغرب واش من محزمة واش من فراش واش ..... و كل شيء يذهب مهب الريح بعد الشهر يبداول المشاكل و الواحد يندم على النهار اللي تزوج
الذهب و الصوف و الحوايج عمرهم ما يعمرو الدار و عمرهم ما يخلقو السعادة

[غير هام]

السلام عليكم

اذا كات ن عرشك شوف امك تفهم امك تعرف عاداتكم واذا كانت من غير ممكن عاداتهم هكاك

[أم مبين]

لا يكلف الله نفسا الا وسعها وهدي شروط عمري ماسمعت بيها على الاقل الواحدة تشرط حاجات معقولة مش اي حاجة ماتقدرش عليها تقوالو احنا عندنا هاكا يعملو

[sarl02]

حقيقة الزواج في الولايات الشرقية اصبح براكاج وليس مارياج....صوف ..وحديد ونحاس وفحم ..ذهب .....رمل ...خص غير اقولولك جيب برميل تاع بترول واش هذا؟هذه ليست عادات وتقاليد بل تخلف وتصلب ...حنا فالوسط رحمة ربي 15 او 20 مليون على الكثر فيها كل شيء ومشي الحالة ...وفق الله الجميع.

[ام نهوله]

يا اخي ما تسال ما تشوف الناس ايلا دير هكذا قادر دير ماشي قادرقوللها تربحي يا بنت الناس يا خويا الدين التاعنا ماراناش حاكمين فيه كيما التقاليد هادي

[ام رضوان]

اقلهن مهورا اكثرهن بركة .. تربح

هايلة هذه كون جاو يطبقوها

بارك الله فيك

[ام رضوان]

حقيقة الزواج في الولايات الشرقية اصبح براكاج وليس مارياج....صوف ..وحديد ونحاس وفحم ..ذهب .....رمل ...خص غير اقولولك جيب برميل تاع بترول واش هذا؟هذه ليست عادات وتقاليد بل تخلف وتصلب ...حنا فالوسط رحمة ربي 15 او 20 مليون على الكثر فيها كل شيء ومشي الحالة ...وفق الله الجميع.

يااخي فوق هذه المتطلبات الغير معقولة نهار العرس:والله وتشوف حوايج راسك يحبس هاذ ا باختصار بركد

لازم ديرلها عرس كيما نتاع فلانة وكيما نتاع فلان لازم 5 او 6 اكلات ولازم اابارود ولازم الخيول ولازم انواع المفرقعات الغالية والله المفرقعة الرخيسة دير 10000 دج ولازم تدي شورة خير من بنت فلان ولازم الكورتاج خير من تاع فلان الخ يعني حاجة ما تدخلش الراس
والله نعرف عايلة نهار عرس وليدها دارو حوالي 12 اكلة بلا الحلويات يعني عرس يستقام في زوج ملاير او ثلاث وفي الاخير يطلقها وكي تعنس الطفلة ترجع الام تاعها الي تلقاها تقولها ارواحي نمدلك بنتي احنا ناس ما نشرطوش!!!!!
وكي يقول الامام ادو الزكاة يقولو ماعندناش لا احنا لقينا الدراهم؟

للفوخ والزوخ كاين الدراهم ولزكاة ماكانش
ربي يهدي ما خلق .

[imi02i]

الله المستعان ...

[ابتسام smile &hope]

في عائئلتي ا
المهر: 10ملاين
الذهب : خاتم الخطبة فقط
التبق: غير ضروري
هدية العيد :غير ضروري
نحن من الوسط

[ام ريتاج الجزائرية]

انا المهر انتاعي كتاب القران وخاتم وجلباب والحمد لله و نهار العرس صرف عليا مليون ونصف مابين اللحم والزيت والطعام ماشرطنا عليه ماوالو كنا مقتنعين بقول الرسول عليه وسلم اذا جاءكم من ترضون دينه وخلقه فزوجوه المهم جابلي الاخلاق والدين انا راضية عليه وهو راضي عليا ولله الحمد ربي يحفظو ويرزقو بالفردوس الاعلى

[لحن الحياة.]

انا المهر انتاعي كتاب القران وخاتم وجلباب والحمد لله و نهار العرس صرف عليا مليون ونصف مابين اللحم والزيت والطعام ماشرطنا عليه ماوالو كنا مقتنعين بقول الرسول عليه وسلم اذا جاءكم من ترضون دينه وخلقه فزوجوه المهم جابلي الاخلاق والدين انا راضية عليه وهو راضي عليا ولله الحمد ربي يحفظو ويرزقو بالفردوس الاعلى
في دزاير تاعنا ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
او رحتي لفرانسا لأن الأمر يختلف كي تروحي للخارج ما تحتاجيش الجهاز و الخرطي بصح هنا يحسن العون تع الطرفين
كل واحد حليلو

[ام ريتاج الجزائرية]

في دزاير تاعنا ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
او رحتي لفرانسا لأن الأمر يختلف كي تروحي للخارج ما تحتاجيش الجهاز و الخرطي بصح هنا يحسن العون تع الطرفين
كل واحد حليلو

لالا اختي فادزاير انتاعنا وانا وزوجي كنا متفقين نسكنو فالبلاد على طول:) لكن بعد10 سنين بدون اولاد قررنا نروحو باه نداوو