طالب جامعي

[مشكلتي]

السلام عليكم
أولا نشكركم على هذه المساحة والله نحيتو على خاطري ساعة الواحد مايلقاش مع من يحكي خاصة ان مشكلتي وحتى وان بدت بسيطة بصح راها دايرتني في غمة أنا كبير والداي والذكر الوحيد لهما وزيد انا طالب جامعي وخدام في نفس الوقت يعني عندي ثلث ايام نقراهم والاربع الاخريين نخدم فيهم نزوفر يعني بالة وبيوش كيما يقولوا مصروف قرايتي في ذراعي والي تصحلي من الخدمة راني نصرفها في حق النقل باه نروح للجامعة والقراية راكم عارفيين والباقية نعطيها لامي لاني اعيل مع ابي 6اخوات بنات وفيهم توام مازوزيات يقراو سنة ثانية وطفلة معاقة قعيدة الي مش تقرى والباقي كامل يقرو
مشكلتي انني مش عايش وقتي شبابي رايح خسارة صدقوني منيش عايشوا خاصة في الصيف نروح في افجار اليوم ونجي في مغاربو نهاري قع نعديه في الخدمة وراكم عارفين شمس الصيف قع تجي في وجهي والله راني مدخن بشرة تاعي غليظة ياسر ومعمرة بالحب والاثار تاعو وزيد تاع الشمس راه داير في حالة حتى يدي لوكان تشوفو يدي ما اغلظها ندس فيها دراهم نورمال بورتفاي
كي نجي من الخدمة قريب المغرب تعود الوقفة رايحة عليا منعرف وش ندير ندوش ولانصلي ولا ناكل ولا نرقد تذهبلي خلاص ظهري يساطر عليا وركبي وذراعي وبعد تقولي امي روح جيب المصروف باباك شيخ كبير مايقدرش يصرف حتى وان فعل فهو ثاني يخدم وما يقدرش يصرف
راني نلحق ريقي ناشف مانصدق انو يجي الليل و نطيح في فراشي نرقد
رغم اني مانتكيف مانشم مانفليكسي م ندير الجال بصح دراهمي ما يكفونيش يدوهملي الدار وخواتتي يضلو عقابي الدورو الي يطيح يدوه والي يبقى تديه امي ... راني مانلبس ما ننفليكسي ما ناكل ما نحوس كل دراهمي رايحة في مصاريف دارنا راني ندس الدراهم في الدار وفي الصباح نلقاهم راحو داوهملي ...
راني في ضيق شديد في العام نلبس لبسة وحدة ومانبدلهاش طول حتى تركو للحم ومش لاقي نبدلو .. عندي اختي جامعية تقوللنا والله مني رايحة للجامعة الا اذا كسيتوني مالا امي تضطر تطلبني في الدراهم تقولي انتا ماعليهش راك طفل وهي طفلة لازم تلبس الي كنت رايح نشريها سروال نعطيها لاختي
تصوروا عندي تلفون حازمو بسكوتش واختي الي تقر في اللسي عندها تابلات لانها جابت عام كامل وهي تبكي عليه
انا والله ميهومني الدراهم انا تهمني نعيش حياة الشباب منيش لاقي لوقت كل وقتي رايح ف الخدمة واذا رحت للجامعة نبات في الاقامة نلقى صحابي تع اشومبرة كل واحد يهدر مع صاحبتو في لتفون اما انا ندير راسي تحت المخدة مانحبش نسمع خطر نغااار انا معنديش...... وكي نعود في الجامعة نمشي حاشاكم مع الحيوط كما تفعل العنزة حاشم من العالم كامل خاطر سروالي وتريكو تاعي منيش نبدل فيهم ياسر ماعنديييييش نحب نهدر مع البنات عادي بصح والو نحشم كي نبدا نهدر... مهزوزة ثقتي في نفسي لاني منيش ندير في الجال ولا في الشومبوا خطر شعري حرش من الشمس تاع الصيف وبشرتي سمرا مع انها في الاصل بيضاء بيها الشمس ولات فيها خرائط معمرة حب صدقوني والله هادي بالنسبة ليا مشكلة كبيرة حاب برك نتخلص من خجلي ومن اسبابو
رحت شريت كريم لقيتو في السوق ومبعد حكمتو ونحيتلو البواطة تعو خايف اخواتي يضحكو عليا كي يعرفوه بلي تاع اثار حب الشباب والله حاب نبرا منو وخلاص حاب تروحلي هدا العقدة والله بلاكم اقصى اماني نبرا من الحب ومن الدخنة تاع وجهي ويعاود شعري كما كان في الاصل
تلفوني والله مرات ننساه خطر مكان الي يسقسي عليا ولا حتى لمن نهدر بيه انا راني كبير وهدا العام نتخرج ستما راحتلي حياتي الجامعية خسارة الناس عاشت حياتها وانا عشتها في الظلمة كي نعود في الجامعة نفكر وقتاه نروح لدارنا خطر عندي التزامات واجبة عليا من دارنا عندي اختي مريضة محتاجة عمليه اختي معاقة داوء ووووو دارنا لازمها بناء
شبابي راح خسارة اختي الي في الجامعة مخطوبة كي نتفكر جهازها علبالكم تجيني لسطر في كرشي منين نلقطلها جهازها وزايد كاين طفلة حبيت نهدر مع اختي قللها تروح تشوفهالي بصح خايف لا ترفضني لانني ببساطة وجهي مبهدل بيا

[*سندوسة*]

السلام عليكم اخي

اولا ربي يكون في عونك اخي نتا راك متحمل مسؤولية نتاع رجال ونتا تبارك الله راجل يعني هاد الامور نورمامو تخليك مفتخر بروحك مدامك تفرح والديك وخواتاتك وراك مضحي وصابر تأكد ربي راح يجازيك بالخير والصابر ينال
ونقولك حاجة اخي الراجل عيبه ماشي في زينه عيبه في اخلاقه يلا كان واحد شباب والاخلاق معندهش حتى وحدة ماتقبل تعيش معاه
ونتا قاع مايغيروكش صحابك لي يهدرو مع لبنات والله مايدوم غي الصح وهادوك صوالح والله مايدومو غير راهم يجمعو فالذنوب

نتا لازم توثق في روحك وتكون مقيم روحك اما عن اللبس المهم يكون نظيف نتا لي تخلي ناس تحكي على اخلاقك الزينة ماشي لبسة هي لي تخليهم يهدرو عليك

ولي ماعجبهش لحال يشوف غير فالعيوب نتاعه وحتى واحد مكامل الكمال للهسبحانه نتا توكل على ربي وعيش حياتك عادي ويجي نهار لي يفرج ربي وتبقى غير ذكريات وربي يعوض ويرزقك من فضله

[ابتسام smile &hope]

السلام عليكم ياخويا والله العظيم غير فرحتني الله يبارك انت راك سيد الرجال والله يكثر من امثالك ربي يحفظك ويقدرك
نبداو بمشكلة حب الشباب دير في بالك لازم تروح لطبيب الجلد هو اللي يمدلك دواء +واقي شمسي + ومرطب ليديك وبالاك يديرلك بيلينغ لوجهك باش تتهنى من اثار حب الشباب وتولي بشرتك مراية باذن الله وقولو على شعرك باش ييمدك شومبوان+ماسك
بصح دير في بالك بلي هاذ الدوا يستقاملك فوق المليون
وبالنسبة لدراهمك روح حل كونت فالبونكا وتهنى هكذا يتلايمولك وتقدر الداوي روحك وتلبس كيما الناس وثاني لايم دراهم للعملية تاع ختك ربي يشافيها
وحكاية الطابلات جاتني جياحة كيفاش نت حاصل فالمصروف تروح تشري طابلات روح بيعو وعاون بيه ختك المخطوبة
والجهاز ياخويا كل واحد يدي على قيسو يعني دفوعها تشريه فراش+حوايج كل يوم ونت عاونها بواش تقدر
كاين وحدة معندهاش مالا صحاباتها سلفولها حوايج التصديرة والصياغة وضرك راهي في دارها
وختك اللي تقرا فالجاميعة قوللها مراكيش صغيرة باش تخلي الناس يضحكو على حوايجك وزيد كاينة حاجة واسمها لابورس كل مرة تشري حاجة كيما انا :)
وبالنسبة لحياتك وصغرك نقولك راك درت فيه حوايج كبار صرفت على عايلة كاملة ووالديك راهم راضيين تليك
وفي رايي ماتخطبش حتى يتحسن وجهك باش كي تروح لدار الناس تكون واثق من نفسك
وماتنساش دايمن اجري باش تصيب خدمة بالديبلوم التاعك ودايمن ادعي ربي يفرج عليك
وقول ليماك بلي راك حاب تتزوج باش تعرف وين راك دير دراهمك
ان شاء الله يعاونوك بعنواان طبيب امراض جلدية

[عين الصقر]

السلام عليكم

من واجبك اخي توقف مع أهلك وتساعدهم في المصروف مايغيضكش الحال وباباك شيخ كبيير ومايقدرش على المسؤولية وحده
مثلما يقول الله : اخفض لهما جناح الذل من الرحمة

اصرف على اهلك في الاكل وتسديد الفواتير يعني الاساسيات ولكن ماتهملش روحك وتحملها فوق طاقتها
وأختك الصغيرة عندكم حتى تشرولها طابلات؟
الجمال جمال الروح والأخلاق ولكن الشخص مالازمش يهمل مظهره أيضا , اذا في قلبك دير الجال دير .. ثمنه في المتناول وأصرف على روحك كل مرة اشري حاجة ونحيها من الطريق . مرة سروال . مرة تريكو .. الخ

وين المشكل وممكن تتدخر اموالك في حساب بريدي او ينكي اذا عادو يأخدوهملك من غرفتك
إن شاء الله بعد التخرج تلقى وظيفة
ربي يكون معاك ويوفقك ويرزقك على حساب تعبك وشقاك

[عين الصقر]

بالنسبة لحبوب الوجه داوم على إستخدم صابون الكبريت تجده يباع عند الصيدليات بثمن معقول جدا . رايح يخفف من الحالة إن شاء الله

[*سندوسة*]

اخي بخصوص الملابس تقدر تشري ملابس الشيفون والله ناس بزاف تلبس منه تجيب 4 تريكويات ب 200 وزوج سراويل ب200 ونتا كسيت روحك

اما بخصوص خشونة اليدين تقدر دير كريم فازلين راه ينفع بزاف لتشقق اليدين وماشي غالي بزاف يعني 1000دج تشريلك ملابس وفازلين وصابون للوجه
كل مرة نحي 1000 شري بيها لوازم نتاعك

وكثر من الدعاء والاستغفار باش ربي يفرج عليك

وبخصوص عملية الاخت نتاعك تقدر تروح عند ائمة المساجد وتحكيلهم حالتك بلاك يقدرو يعاونوك ويجمعولك مبلغ العملية او جزء منه

[عائشة 88]

ربي يفرج عليك اخي ويرزقك على حساب افعالك فمن يعمل مثقالة ذرة خيرا يره صدقني لي يخدم والديه عمرو ما يندم دراهمك تروح ف الحلال احسن من اصحابك لي يهدرو ف التلفون......المؤمن مصاب وبعد الشدة يأتي الفرج.....

[محمد جديدي التبسي]

وعليكم السلام ورحمة الله وبركاته
أخي الكريم تستحق تحية احترام وتقدير على ما تقدمه لعائلتك
أريد أن أنصحك بشيء واحد وهو أمر النية لابد أن تجعل نيتك خالصة لوجه الله في مساعدة أهلك
لابد أن لا تتذمر وتنزعج من مساعدة أهلك لأنك بهذا ستضيع الأجر العظيم في الدنيا والآخرة
صحيح أنك تعيش في معاناة وتعب لكني أكيد بأنك سعيد لأنك عايش في الحلال بذراعك ومكاش اللي متمزي عليك
لابد عليك أن تسعى لاتقان حرفتك ما دمت إنسان خدام ونشيط تعلم البناء وتخصص في شيء معين كالخرسانة أو "الفينيسيو" لأن الشهادة الجامعية في الغالب لن تجني منها شيء ومدخولها ضعيف مقارنة بالحرف وأنت أدرى
نقطة أخرى لاحظتها في كلامك وكأنك متحسر لأنك لم تعش حياة جامعية كغيرك من الشباب في مصاحبة الفتيات والاستمتاع بحياتك!!
المفروض أن تكون شاكرا لله على أن نجّاك من ذلك الوحل وشغلك بخدمة عائلتك وتعلم معنى المسؤولية في سن مبكرة وتأكد أن ما مررت به سيجعل منك رجلا فأحسن استغلاله وابتعد عن التذمر فمن رحم المعاناة يظهر الرجال
أخلص النية لله واشكره على نعمه وسيكون النجاح حليفك بالنظر للتعب والمعاناة التي عشتها ومازلت ...ربي يوفقك ويفتح عليك أبواب الخير

[salim 97]

اقسم بالله عجبتني خاااطر انت راااجل تخدم على داركم زيد فوق هاذا ماتتكيف ماتشم ............

نعرف ناااس خرووجوو من القراية بسبب لمعيشة انتاعهم ومشاااو في طريق الغلطة سرقة وحباس وزطلة ........... وكاين اللي راح قاااج وتمرمد

المهم نرجعو الموضوع .........

كااان على وجهك و الحب شباب ديرلووو الفازلين كي تعووود رح ترقد و وكي تنووض اغسلووا بصاابون دوف راه يد بعشرة لاف

وعلى مشكلة معندكش لبسة ...... بيع طابلات انتاع اختك الصغيرة واشري سرووال مايكونش غالي بزااف و تريكو عادي المهم في النظافة ماشي في لبسة

وزيد انت تقووول معنديش صحوووبة الفايدة ماشي تم خويا امهم تكووون راضيين اعيك والديك دنيا واخرة و صاحب اخلاق رفيعة و تكوون اجتماعي

وعلالا جهااز اختك ...........منيش عااارف واش نقولك ...

المهم ربي يكووون في عونك وخلالالاص

وكيماا يقولو ناس بكري

الراجل بدراعوو ماشي بمتاعووو

ا

[لحن الحياة.]

الله يفرج عليك
وكيما قالك الاخ سليم بيع طابلات تع اختك و اشري منها على الاقل سروال و يديك ديرلهم كل يوم فالليل الفازلين
و الاثار تع الحبوب ما ننصحكش بالطبيب لانو يستقام غالي و النتيجة فالشك برك اهي صحبتي كانت تشري فالدوا من فرانسا و ما كانش نتيجة بالعكس زاد هاج .....ننصحك بصابون الجيراف تغسل بيه او تع الكبريت وعادي الكريمة تستخدمها علاه يضحكو خياتك ؟؟؟ انا اخوتي انا نشريلهم لحوايج هاذو تع الترطيب الشعر و المنضفات ما نضحك ماوالو

ربي يفرج عليك اخي اهم كاين بنات الفاميليا يقبلوك كيما راك لانك ماشاء الله قادر على شقاك خير من الأنانيش لي يخافو من خنفوس

[malek firdaouss]

ماشاءالله لا قوة الا بالله

والله غير انت راجل وعليك لكلام عجبتني بزاف بزاف

درت حوايج مليحة سورتو كي خدمت على والديك وتحملت مسئولية نتاعهم

ربي يعاونك و متخافش راك مادي دعوة الخير من والديك دنيا وما فيها

بالنسبة لحب الشباب دير القارص يعني تحك القارص في وجهك كل يوم قبل ما ترقد فالليل تخليه 15دقيقة بعد تغسل و ترقد

بصح داوم كل يوم دير والله مجربة و انشاء اللّٰه تخرج بنتيجة

وبالنسبة لتشقق اليدين اشري كاش فرمادة من الفرماسي خير

وكاين هذي الفرمادة ممكن تلقاهة خاصة بتشقق اليدين (réparation intense)

ربي معاك وربي يسهلك

[rose de sable s]

ربي يجازيك واكيد ربي يسهلك في امورك
لكن لازم تلبس انت تاني كيما يلبسو خوتتك
كيما قالولك كاين شفون فيه لبسة مليح و اقل سعر
اختك كي تكمل لقراي تحوس علي خدمة
دعوات والديك يخلو حوايج ساهل و ربي يسهلك و الطقلة تقبل

[naamane3]

الاستغفار داوم عليه
وردلي الخبر

[رميسة الجزائرية]

كان الله في عونك اخي انت تعمل عملا عظيماااا فهدا هو الرجل حقا ابقى هكدا وستفلح في الدنيا والاخرة فالعمل عبادة ومساندة اهلك فيها اجر وثواب لاتجعل الشيطان يشتت افكارك ولايهمك فلان وفلان ولا تفعل كما يفعلون اطلاقا فانت الافضل

[مُحمد رازي]

السلام عليكم
أهلا أخي الكريم
رحمة الله واسعة فلا تقنط
و أرجو أن تراسلني على الخاص حتى أقدر أن أساعدك أكثر

[bravo1]

السلام عليكم و رحمة الله تعالى و بركاته

من هدا المنبر احييك بارك الله فيك و كل هده الامور لي تقدمها
ربي يجعلها لك في ميزان الحسنات و يعوضك خير ان شاء الله
الان انت عندك خبرة في المسوولية و مجارات الصعاب

لك كل تقدير و احترام اخي الكريم

[aminazy]

السلام عليكم
الله يبارك عليك خويااقسم بالله عجبتني بزاف خاااطر انت راااجل تخدم على داركم و هذا قليل في هذا الزمان .......
هذا كل شيء

[tayeb@@@@@]

الله يكون في عونك يا اخي . أنا ما عندي ما نزيد على كلام إخواني . ممكن انك تسجل هذه النصائح في ورقة وتبقى كل يوم تتطلع عليهم هكذا ربما يفيدوك وتقدر تتغلب على بعض المشاكل إن شاء الله تعالى

[smahi_hb]

السلام عليكم
أولا نشكركم على هذه المساحة والله نحيتو على خاطري ساعة الواحد مايلقاش مع من يحكي خاصة ان مشكلتي وحتى وان بدت بسيطة بصح راها دايرتني في غمة أنا كبير والداي والذكر الوحيد لهما وزيد انا طالب جامعي وخدام في نفس الوقت يعني عندي ثلث ايام نقراهم والاربع الاخريين نخدم فيهم نزوفر يعني بالة وبيوش كيما يقولوا مصروف قرايتي في ذراعي والي تصحلي من الخدمة راني نصرفها في حق النقل باه نروح للجامعة والقراية راكم عارفيين والباقية نعطيها لامي لاني اعيل مع ابي 6اخوات بنات وفيهم توام مازوزيات يقراو سنة ثانية وطفلة معاقة قعيدة الي مش تقرى والباقي كامل يقرو
مشكلتي انني مش عايش وقتي شبابي رايح خسارة صدقوني منيش عايشوا خاصة في الصيف نروح في افجار اليوم ونجي في مغاربو نهاري قع نعديه في الخدمة وراكم عارفين شمس الصيف قع تجي في وجهي والله راني مدخن بشرة تاعي غليظة ياسر ومعمرة بالحب والاثار تاعو وزيد تاع الشمس راه داير في حالة حتى يدي لوكان تشوفو يدي ما اغلظها ندس فيها دراهم نورمال بورتفاي
كي نجي من الخدمة قريب المغرب تعود الوقفة رايحة عليا منعرف وش ندير ندوش ولانصلي ولا ناكل ولا نرقد تذهبلي خلاص ظهري يساطر عليا وركبي وذراعي وبعد تقولي امي روح جيب المصروف باباك شيخ كبير مايقدرش يصرف حتى وان فعل فهو ثاني يخدم وما يقدرش يصرف
راني نلحق ريقي ناشف مانصدق انو يجي الليل و نطيح في فراشي نرقد
رغم اني مانتكيف مانشم مانفليكسي م ندير الجال بصح دراهمي ما يكفونيش يدوهملي الدار وخواتتي يضلو عقابي الدورو الي يطيح يدوه والي يبقى تديه امي ... راني مانلبس ما ننفليكسي ما ناكل ما نحوس كل دراهمي رايحة في مصاريف دارنا راني ندس الدراهم في الدار وفي الصباح نلقاهم راحو داوهملي ...
راني في ضيق شديد في العام نلبس لبسة وحدة ومانبدلهاش طول حتى تركو للحم ومش لاقي نبدلو .. عندي اختي جامعية تقوللنا والله مني رايحة للجامعة الا اذا كسيتوني مالا امي تضطر تطلبني في الدراهم تقولي انتا ماعليهش راك طفل وهي طفلة لازم تلبس الي كنت رايح نشريها سروال نعطيها لاختي
تصوروا عندي تلفون حازمو بسكوتش واختي الي تقر في اللسي عندها تابلات لانها جابت عام كامل وهي تبكي عليه
انا والله ميهومني الدراهم انا تهمني نعيش حياة الشباب منيش لاقي لوقت كل وقتي رايح ف الخدمة واذا رحت للجامعة نبات في الاقامة نلقى صحابي تع اشومبرة كل واحد يهدر مع صاحبتو في لتفون اما انا ندير راسي تحت المخدة مانحبش نسمع خطر نغااار انا معنديش...... وكي نعود في الجامعة نمشي حاشاكم مع الحيوط كما تفعل العنزة حاشم من العالم كامل خاطر سروالي وتريكو تاعي منيش نبدل فيهم ياسر ماعنديييييش نحب نهدر مع البنات عادي بصح والو نحشم كي نبدا نهدر... مهزوزة ثقتي في نفسي لاني منيش ندير في الجال ولا في الشومبوا خطر شعري حرش من الشمس تاع الصيف وبشرتي سمرا مع انها في الاصل بيضاء بيها الشمس ولات فيها خرائط معمرة حب صدقوني والله هادي بالنسبة ليا مشكلة كبيرة حاب برك نتخلص من خجلي ومن اسبابو
رحت شريت كريم لقيتو في السوق ومبعد حكمتو ونحيتلو البواطة تعو خايف اخواتي يضحكو عليا كي يعرفوه بلي تاع اثار حب الشباب والله حاب نبرا منو وخلاص حاب تروحلي هدا العقدة والله بلاكم اقصى اماني نبرا من الحب ومن الدخنة تاع وجهي ويعاود شعري كما كان في الاصل
تلفوني والله مرات ننساه خطر مكان الي يسقسي عليا ولا حتى لمن نهدر بيه انا راني كبير وهدا العام نتخرج ستما راحتلي حياتي الجامعية خسارة الناس عاشت حياتها وانا عشتها في الظلمة كي نعود في الجامعة نفكر وقتاه نروح لدارنا خطر عندي التزامات واجبة عليا من دارنا عندي اختي مريضة محتاجة عمليه اختي معاقة داوء ووووو دارنا لازمها بناء
شبابي راح خسارة اختي الي في الجامعة مخطوبة كي نتفكر جهازها علبالكم تجيني لسطر في كرشي منين نلقطلها جهازها وزايد كاين طفلة حبيت نهدر مع اختي قللها تروح تشوفهالي بصح خايف لا ترفضني لانني ببساطة وجهي مبهدل بيا


أخي الكريم سلام الله عليك وبعد :
ما هو مؤسف في موضوعك الجميل هذا أنك جامعي ولا تدري بأنك رجل من ذهب يصعب في هذا الزمان ايجاد امثالك وانت لا تدري بنفسك لدرجة انك تتحدث وكأنك ضعيف لا قيمة لك في الوقت الذي أثبتت رجولتك التي يفترض ان تفتخر بها بل أكثر من ذلك انت في مرتبة تحسد عليها كثيرا ولا تعلم بوزن شخصيتك حسب ما ورد في موضوعك .... انت يا اخي الكريم من الرجال الذين يصعب مصادفتهم في هذا الزمان ... انت يا أخي لست من الشباب الذين يلبسون سراويل تحت السرة ، ألا تعلم بذلك؟ أنت في نظر المجتمع أكبر مما تتصور وتجهل وزنك الذهبي أمام جيلك ... هؤلاء الذين تتحدث عنهم اصحاب الجال والتلفون والسيارات ووووو....مثلهم كمثل السمك اذا خرج من الماء انقطع نفسه ، عليك أيها الاخ الكريم ان تفهم وتعلم بأن ماهو اغلى من المال هما شيئين ... النيف والرجولة وانت أهلا لذلك ولا تدري...صدّقني لو كنت أنا مكانك لكان ذلك بالنسبة لي الشرف الذي أفتخر به طول حياتي لسبب واحد وهو انني تكفلت بعائلتي وفي نفس الوقت أكمل دراستي ، فاحذر من احتقار نفسك وانت بهذه العظمة ولا تدري....أنت قهرت الحياة ولم تعط لها الفرصة لتقهرك عكس الذين يتباهون بالصبغات والماكياج وتأنثوا بسراويل تحت السرة .
تحياتي الخالصة لك ولامثالك وربي يوفقك.

[ام رضوان]

الله يبارك فيك اخي ويفرج عليك والله راك راجل وسيد الرجال واللي كيما انت قلال راك تخدم وتتعب باه تعاون والديك وترضيهم واعرف بلي ربي ما يضيعش تعبك انشاء الله يجى النهار اللى تشوف فيه الضوء .
اما بالنسبة لاختك صاحبة العملية ديرنداء في الجامع وراح يساعدوك ناس الخير باذن الله.
بصح كاين حوايج نلومك عليهم اولا خواتاتك لاه اللي تنجح لازم تشري تابلات هاذا والله دلال والاخرى الجامعية كي تقولك كون ما نتكساش ما نروحش نقرا قول لها الله لا قريتى اخدمى واكسي روحك هاذي والله صمطتها وانت نقص شوية من الشهرية واكسي روحك واشرى لحوايج اللى ناقصينك قول لامك بلى راك تتعب باه جيب الدراهم ماهمش يمدولك فيهم .


ربي يفرج كربك ويوسعها عليك ويارب تتخرج وتلقى الخدمة اللى تساعدك والزوجة اللى متمنيها ويجيك الخير معاها امين.

[mazigh+chaoui]

و الله إنك لمجاهد

إخواني نقدرو نعاونوه و لو ب 1000 DA

من فضلك اعطينا ccp

salam

MAZIGH DES AURES