موضوع مميز قالتلي جدة، وصاتني أمي، كلام زمان! [الأرشيف] - منتديات الجلفة لكل الجزائريين و العرب

وفاء الياسمين

2015-04-18, 15:14

السلام عليكم
كلام الأولين يبقى حكم و نتائج لتجارب عديدة مرً بها سلفنا و اجدادنا و من هو اكبر سن منا

الي فايتك بليلة فايتك بحيلة

مرات كثيرة نتفكر نصائح سمعتها من ناس زمان نستعجب من حككمتهم رغم جهلهم بالعلوم االحديثةونحن من نحسب انفسنا مثقفين.
لكن عبر الزمن اثبتو بالتجربةمدرسة الحياة هي الثقافة بعينها

دعونا نتذكر معًا. ما كانوا يوصوننا به

لا تظنو ان ذلك مجرد تسلية او مضيعة وقت بل هو تذكير عسى ينفعنا في حياتنا اليومية

وفاء الياسمين

2015-04-18, 15:28

***الحديث والمغزل***

جملة كانت تقولها جدة ما كنتش نهتم لمعناها
لكن لما كبرت ومولاشش يكفيني الوقت عرفت قيمتها
كي نكونوا نتكلموا او نشوفو تلفاز ما نربطوش يدينا لازم نغتنمو الفرصة
ونعملو شي بيدينا ، نقيو الخضرة مثلا ، نخيطو حاجة مقطعه و غيرها من الغزل اي العمل اليدوي

وفاء الياسمين

2015-04-18, 15:37

حيـاء

2015-04-18, 15:46

السلام عليكم و رحمة البارئ
بارك الله فيكـ أختي الغاليـة على ما طرحت من امثال و معانيها
جزاك الله خيرا عنها

بعيدة المنال

2015-04-18, 15:48

حبيبتي أم نسيبة موضوع رائع خاصة أن الكثيرات من بنات اليوم يعتقدن أن سيرة الأمهات والجدات وكلامهن وحرفهن كلها ولات دي مودي تجاوزها الزمن يعطيك الصحة على التذكير وقد قال المصريون الي ما عندوش كبير يشريلو كبير

بصيرة2

2015-04-18, 17:02

اخت نسيبة عندك الحق مئة بالمئة
انا امي زمان لما تعلمني حاجة انا نتقلق ونحب نخلص هيك الحاجة في ساع كانت ديمة تقولى المعلم ما يكون زنتار وتعلم واترك يعني الى حاب يتعلم حاجة لازم يوسع بالو ويعطيها كل الوقت باه يتعلمها مليح ما يكونش مزروب او متقلق واتعلم واترك يعني اتعلم حاجة وانساها يجي نهار تحتاجها تلقى روحك تعرفها
بالتوفيييييييييييق

وفاء الياسمين

2015-04-18, 17:12

وعليكم السلام عاشقة الاقصى ، نتكنى تعودي لينا بحاجة تعلمتيها من ناس زمان ولقيتيها في حياتك

وفاء الياسمين

2015-04-18, 17:13

بعيدة المنال عندك الحق ، بصح انتي واش قالتلك جداك راك شافية شوي، شاركينا!

وفاء الياسمين

2015-04-18, 17:16

شكرا بصيرة على لكلام الزين
كل ما تتفكري حاججة فيدينا بيها

وفاء الياسمين

2015-04-18, 17:21

يحكيو بكري طفلة اتزوجت و ماكلنتش تسمع لكلام امها
جا النهار تقطعت ججبتها قعدت عريانه و معرفتش تخيطها

كي كانت امها تنصحها ماككانتشش تسمعها
بقاو كل النسى يضحكو عليها
هنا فاقت و قالت

***لوكان ااتعلمت عند يما لبره ما نصير للنسا عبره***

face moon

2015-04-18, 17:24

شكرا جزيلا على الموضوع المميز في انتظار الجديد

دُرة بيتي

2015-04-18, 17:42

شكرا لك على طرح الموضوع
يقولو نسا بكري على المراة الوحيدة وما عندها مساعدة
ادا غلبوك بالكثرة اغلبيهم بالبكرة

غزالة1

2015-04-18, 18:23

السلام عليكم
موضوع أكثر من رائع كروعتك
سلمت عليك اليوم صباحا ما رديتي مالا نعاودلك يا الزينة راهي عيني عليك بلاكي تقولي نساتني
أما الحكم للأسف نحبهم بصح ننسى ( الأولاد ربي يحفظهم قريب ينسوني أسمي:sdf::sdf::sdf:)
سلام:mh31::mh31::mh31:

غزالة1

2015-04-18, 18:25

أم باسط مشكورة على المثل هدا واش لازمني بلاك نلقى روحي:19::19::19:

وفاء الياسمين

2015-04-18, 18:45

شكرا جزيلا على الموضوع المميز في انتظار الجديد
العفو حبيبتي شكرا انت على مرورك في انتظار جديد منك

وفاء الياسمين

2015-04-18, 19:03

شكرا لك على طرح الموضوع
يقولو نسا بكري على المراة الوحيدة وما عندها مساعدة
ادا غلبوك بالكثرة اغلبيهم بالبكرة
شكرا لك على مرورك، اختيار جميل ، صح
كل ما تتفكري حاجة جوزي، مرحبا

rosa lin

2015-04-18, 19:07

قال القدماء

ناس من ناس و الناس اجناس
ناس فضة وننا نحاس ناس ذهب و ناس الماس
ناس تنداس
وناس يجريو موراها بالفاس

وفاء الياسمين

2015-04-18, 19:12

[QUOTE=غزالة1;3993235237]السلام عليكم
موضوع أكثر من رائع كروعتك
سلمت عليك اليوم صباحا ما رديتي مالا نعاودلك يا الزينة راهي عيني عليك بلاكي تقولي نساتني
أما الحكم للأسف نحبهم بصح ننسى ( الأولاد ربي يحفظهم قريب ينسوني أسمي:sdf::sdf::sdf:)
سلام:mh31::mh31::mh31:[/QU

اهلا اهلا. بشريكتي ، سلامك على العين و الراس ،
عندي تيليفون صغير منقدرش نشوف كلش
ربي يحفظك،
ربي يجفظلك ولادك ، بصح ماعليش كي تتفكري البيبان دايما مفتوحين
سلام

YASMINE SILA

2015-04-18, 19:24

موضوع هااايل ام نسيبة
الحديث و المغزل كل يوم نسمعو من chef service فالخدمة هههه
اذا تفكرت كاش مثل راني نجي نكتبولك هنا باذن الله
شكرا ليك يا الفحلة

راية الاسلام1

2015-04-18, 20:57

دلوعة أبيها

2015-04-18, 21:05

جداتي كانت تقولنا
اغسل وجهك انقيه ماتدري من تلاقي بيه

وفاء الياسمين

2015-04-18, 21:44

موضوع هااايل ام نسيبة
الحديث و المغزل كل يوم نسمعو من chef service فالخدمة هههه
اذا تفكرت كاش مثل راني نجي نكتبولك هنا باذن الله
شكرا ليك يا الفحلة

راني نستنا فيك حنونة. و شكرا على المرور يا الفحلة

وفاء الياسمين

2015-04-18, 21:53

السلاام عليكم ورحمة الله وبركاته
موضوعك أعجبني اختي ام نسيبة
كنت صغيرة وكانت جدتي رحمها الله حين تراني أضحك تقول لي: ( اضحكي اضحكي يا بنتي مادام الضحك رخيس قبل ما يغلى)
مافهمتهاش قلت يعني كاينة حاجة تمنع الانسان من الضحك؟؟ بصح كي كبرت فهمت
تحياااتي اختي

كي كبرنا كبر همنا
تمنينا يرجع صغرنا
ضحكنا حتى بانو سنينا
و بكينا كي كبرنا و ما بان علينا
توحشنا ايامات زمان لوكان تولي لينا

حياكِ الله و بيّاكِ
اهلا بكِ حبيبتي

وفاء الياسمين

2015-04-18, 21:56

جداتي كانت تقولنا
اغسل وجهك انقيه ماتدري من تلاقي بيه

صح هادي يما تقولها تاني
شكرا

وفاء الياسمين

2015-04-18, 21:59

قال القدماء

ناس من ناس و الناس اجناس
ناس فضة وننا نحاس ناس ذهب و ناس الماس
ناس تنداس
وناس يجريو موراها بالفاس

اختيار رائع ، نتمنى تزيدي ثثفيديني

حيـاء

2015-04-19, 09:01

وعليكم السلام عاشقة الاقصى ، نتكنى تعودي لينا بحاجة تعلمتيها من ناس زمان ولقيتيها في حياتك

السلام عليك
حسنـا أختي ، سأشارككن متى تسنى لي الوقت
وفقك الله

وفاء الياسمين

2015-04-19, 12:54

كانت جدتي كي تشوفنا نهدرو بزاف. تقولنا
**الفم المزموم ما تدخلو ذبانه**
مع الوقت عرفنا بلي الي يهدر بزاف يغلط بزاف و الي يغلق فمو يستر روحو

وفاء الياسمين

2015-04-19, 20:52

السلام عليكم
تفكرت حاجة ، كانت جدتي و من بعدها يما يقولونا بالاكو تدخلو للكوزينة بلا فولارة ، انا كنت نقول في قلبي يعني لمرا نهار كامل معصبة فولارا بزاف عليها .

و في يوم من الايام سقسانا الاستاذ بعد انتهاء الدرس في الاستراحه . لوكان اطيحلكم شعره في العجينة كبفاش تنحيها؟

كل وحدة واش تفلسفت... تقدروا تقولو ضحك علينا حتى شبع . و تكلمت وحده قالتلو يا الشيخ. مانخلي راسي عريان. ما نحير في الشعره ... بهتنا جميعنا من ذكائها.

بقات عبره في راسي دايما الفولارا حاضرا

الله يرحمك يا جده و يحفظك يا يما.

وفاء الياسمين

2015-04-19, 21:01

نزيدلكم حاجه تفكرتها حكاتهالي يما...

كان راجل يحكي. في جماعه على البصل. و. قيمته. علاش دايما حاضر في الماكله يعني لو كان يخطي. ما تجيش الماكله مليحه؟

المهم
هو بدا يزوخ بزوجته وقاللهم يدها بنينة اليوم. نشريلها. فخد. لحم خروف و نقوللها ديريلننا طعام بصح بلا بصل و نشوفو خونا البصل هذا واش دعوته!!!!!

كيما كان الحال طيباتو مرتو. و. عرضهم للعشى و. تعشاو و هو فرحان بالزوجه و. يقوللهم. شفتو المرا هي. الصح ماشي. البصلِ

لكن تعرفو المغزى في لحكايه وين!!!
الزوجه. طيبت اللحم بالبصل بلا ما. قالتلو. علابالها ما. يجيش مليح، لكن محبتش تخسر العزيمه و. العشا و دراهم. زوجها على جال قسره و مخاطرا بين الجماعه. .

ماشي غير ارواح و قول درت مرا....

magister

2015-04-19, 21:10

نتدكر حاجة من جدتي الله يرحمها قالت بمرة كنت نحكي لها على صحباتي ونيتهم السيئة معايا ..فقالت لي يا ابنتي ديري الخير في نفسك وادا فضل عندك زيادة ديريها في جيبك ..............يقولو تاع بكري دير الخير وانساه لكن الوقت الحالي الي يدير الخير هو الي يولي مهوش مليح

ربي يرحمنا ويرحم امواتنا

وفاء الياسمين

2015-04-20, 07:11

شكرا ماجيستار. فكرتني حكايتك الزينة في كلام جدتي كانت تقولو ،

دير حبابك في صيار ،
لحرايميا يزلقو ، يبقاو غير لخيار،

تقصد جربهوم. في يوم. الضيق. يهربو و يبقى معاك. غير الي فيهم الخير

oumhana

2015-04-21, 11:34

يعطيك الصحة يا أختي موضوع شيق و مفيد أنا من الحكم لي تعلتها من والديا الله يرحمهم يقول :ماتسرج حتى تلجم و تعقد عقده صحيحة
و ما تتكلم حتى تخمم لتعود في فضيحة
قالوا ناس زمان و كلامهم كلو حكمة
لي عودة إن شاء الله عندي بزاف في راسي شويه هكدا نولي لإثراء الموضوع

وفاء الياسمين

2015-04-21, 12:07

الله يسلم داك الفم يا أم هناء
مرحبا بيمرو رانا نستناوك دايما انا نحب بزاف كلام زمان

ربي يرحم واليرحم و كل المؤمنين و أبي .

أريج لرجام

2015-04-21, 12:42

oumhana

2015-04-21, 14:09

شكرا حبيبي وهذا مثل آخر يقولو ناس زمان :هذا على الناس لي نساو كفاه كانو وولو يزوخو على لخرين :جينا لداركم و شفنا حالكم لقمر مصباحكم و لبصل تفاحكم
وهذا نقولوه كنتكل على كاش واحد و ميقضيش الحاجة على كل حال الإتكال على الله بصح ساعات نكلفو ناس باه ينوبو عينا و يبقاو يتماطلو نقوللهم "نهار سحقيتك يا وجهي خبشوك لقطوط"

وفاء الياسمين

2015-04-21, 20:34

ماشاء الله أم هنا ذاكرتك ماشاء الله
زيدي اتفكرينا حكايات زمان شحال نحبهم. مرات تكون لحكاية احلى من المثل نفسه ر
ربي يبارك فيك

oumhana

2015-04-23, 11:50

صباح الخير و الرباح على احلى لمه وأغلى صداقة
هذا المثل قالوه على الي يكثر الخلطة بلا فايده
خالــــــــط العطار تنال الشموم و خالط الفحام تنال لحموم "مع إحترامنا لكل المهن"

mool-man

2015-04-29, 19:27

شكرا جزيلا على الموضوع المميز

maissa1999

2015-04-30, 18:00

شكرا جزيلا على الموضوع المميز

وفاء الياسمين

2015-05-01, 05:55

شكرا جزيلا على الموضوع المميز

شكرا. لك على المرور الممبز حبيبتي لكن وين كلام زكان نسيتيه

وفاء الياسمين

2015-05-01, 05:58

شكرا جزيلا على الموضوع المميز

شكرا على المرور المميز و لكن اين كلام زمان نسيتيه

وفاء الياسمين

2015-05-01, 06:06

السلام عليكم
اليوم عندي زوج مثال قراب لبعضاهم

أولهما
يحكو ناس زمان ، كانت في الدشرة صبية شابا بزاف يثماتلو بزينها
بصح اخلاقها كانو شوي شوي
يعني كانت تروح تعمر الماء لكن ما توليش مع لبنات
تولي وحدها من الطريق الفوقاني باش يشوفوها اهل الدشرة و تتباها بزينها
جا واحد النهار. اندربت يعني تعكلت في حوايجها و طاحت و نجرحت و فسد زينها
بقات عبره
محلاها صابا لوكان ما ندربت

و المثل الثاني

لا يغرك نوار الدفلى في الوديان داير ضلايل
ولا يعجبك زين الطفله حتى نتشوف لفعايل

وفاء الياسمين

2015-05-01, 06:08

صباح الخير و الرباح على احلى لمه وأغلى صداقة
هذا المثل قالوه على الي يكثر الخلطة بلا فايده
خالــــــــط العطار تنال الشموم و خالط الفحام تنال لحموم "مع إحترامنا لكل المهن"

صباحك نور و افراح

وين هذ الغيله يا لحبيبه

وفاء الياسمين

2015-05-25, 08:50

السلام عليكم
يما دايما كانت و مازالت تقولي
الفم المزموم ما تدخلو ذبانة

و في ما يقابله من كثر لغطه كثر غلطه
و ايضا العود بلا سراج يطيح مولاه في لمراج

و اليوم حسيت كثير بأثر هذا المعنى و كاين أشياء يندم الانسان كي قالها لكن ما فائدة الندم

لهذا قيل نتعلم الكلام في صغرنا لنتعلم الصمت في كبرنا

رحم الله امرء عرف قدر نفسه
يا ليتني عرفت قدر نفسي قبل الاكثار في الكلام

اللهم لا تؤاخذنا ان اخطأنا أو نسينا و اغفر زلاتنا مهما حكينا يارب يا غفور يا رحيم

وفاء الياسمين

2015-05-25, 08:53

قصي عبد الرحيم

2015-05-26, 15:25

أنا كانت جدتي ربي يرحمها دايما تقولي يسترك بنتي تدعيلي دايما بالستر و نقول واش بيها هادي حتان كبرت و عرفت السترة ربي يسترنا فوق الأرض و تحت الأرض و يوم العرض قولو أمين

وفاء الياسمين

2015-05-27, 19:17

أنا كانت جدتي ربي يرحمها دايما تقولي يسترك بنتي تدعيلي دايما بالستر و نقول واش بيها هادي حتان كبرت و عرفت السترة ربي يسترنا فوق الأرض و تحت الأرض و يوم العرض قولو أمين

السلام عليكم
آمين أختي

الآن أول مرة قرأت بأنكِ أنثى حسبتك رجل
أعتذر حبيبتي
و الله انا خجلة منكِ تشرفت بمرورك العطر
لكن لما هذا الاسم

أريج لرجام

2015-05-27, 21:36

آمين يارحمان

وفاء الياسمين

2015-07-24, 13:24

آمين يارحمان
بارك الله فيكِ
نسينا الموضوع

المجتهدة nisso

2015-08-02, 21:16

يَعَطَيَكَ اَلَصَحَةٍ عَلَىَّ اَلَتَذكَيَرَ
اَحَبَبَتَ اَلَمَوًَّضَوًّعَ وًّوًّدَدَتَ اَلَمَشَاَرَكَةٍ .
اَلَيَ مَاَ شَبَعَ مَنَ اَلَقَصَعَةٍ مَاَ يَشَبَعَ مَنَ لَحَيَسَهَاَ
جَاَ يَسَعَىَّ وًّدَرَ تَسَعَةٍ
اَجَاَ يَكَحَلَهَاَ عَمَاَهَاَ
خَرَجَ مَنَ اَلَحَبَسَ طَاَحَ فَيَ بَاَبَهَ
اَلَجَاَرَ قَبَلَ اَلَدَاَرَ
هَمَ يََضَحَكَ وًّهَمَ يَبَكَيَ

وفاء الياسمين

2015-08-02, 22:00

السلام عليكم
مرحبا بكِ
شكرا على المرور الجميل

قالك ناس بكري

كاين ناس طبايعها جوهر ** وناس أخلاقها معدومة
وناس فقرها على ظهرها ** وناس كنوزها مردومة
وناس بسكاتها تفهمها ** وناس بكلامها موش مفهومة
وناس هوما هوما ** وناس كي لعسل في القرجومة

أم عروة

2015-08-02, 22:28

السلام عليكم ورحمة الله وبركاته،،

بـــارك الله فيكِ أختي أم نسيبة العامرية على هذا الموضوع الطيب
فعلا كلام ناس زمان كان فيه معنى كبير وعبر كثيرة

وهادو بعض الكلام لي راني متفكراتو كانت ماني الله يرحمها تقولو وامي ربي يحفظهالي

لي تربات على يدين الرجال لا يغرها لا زين ولامال

الهدرة عليا والمعنى على جاري

ازرع ينبت

بغيت الدنيا تعطيك قيمة تهلى فلميمة

لي حبني ما يبنيلي قصر ولي يكرهني ما يحفرلي قبر

أم عروة

2015-08-02, 22:30

خود الراي لي يبكيك اوما لي يضحكلك يلعب بيك

أم عروة

2015-08-02, 22:40

يفنى مال الجدين وتبقى حرفة اليدين

دير لخير ونساه

دير لخير ولوحو في بحر جاري ايلا ضاع عند العبد ما يضيعش عند الباري

ما يقى فالواد غير حجارو

فوت على الواد الهايج وما تفوتش على الواد الساكت

النار تحت التبن

الزعاف يخرج السر

يا لمشبح من برا واش حالك ملداخل

من برا الله الله ومن داخل يعلم الله

اقلب القدرة على فمها تخرج الطفلة لمها

ما تقطع الواد حتى تبان حجارو وما تمشي فالليل حتى يطلع نهارو وما تصاحب صديق حتى تعرف خبارو

وفاء الياسمين

2015-08-02, 22:54

فكرتيني في مثل

ضرسي و دير في الخالفة اذا ما جا حبل يجي طارفا
ضرسي = فتل الحبال
دير = ضعه
الخالفة = هو بيت صغير تابع للغرفة يستعمل لجمع الاغراض
حبل= هو حبل كبير
طارفة = حبل صغير

وهنا يقال هذا المثل للحث على العمل و لو حتى كانت النتيجة شيء صغير
و الله أعلم

وفاء الياسمين

2015-08-02, 22:56

حريق بطني و لا فراق وطني
كناية عن فقد الاولاد ولا هجر الاوطان

وفاء الياسمين

2015-08-02, 23:01

الي عينه في المال يصرح وليدو و الي عينو في القمح يحرث بيدو

هناك اعمال لايثق المرء فيها الا بإبنه
و هناك اعمال لابد ان يقوم بها المرء بنفسه

وفاء الياسمين

2015-08-02, 23:06

الي شرالك مكحلة اشريلو مرحلة

المكحلة هي البندقية
المرحلة هي الهجرة
فمن اشارى لك بندقية فاترك له المكان

وفاء الياسمين

2015-08-02, 23:08

قلتلها ليما فاتوني بالكثرة قالتلي فوتيهم بالبكرة

يعني كاين الي عندها المساعدة في البيت
والي ماعندهاش مساعدة تنوض بكري باش تكمل شغلها

منال100

2015-08-03, 22:34

قالك :أجمل مني خلقها ربي وأشطر مني تليقلي حسرة
الي ماكلة بيدو مايشبع
قالك :شبعةليلة مابرات الي مهزول
قالك:ما تقنط يالوكان في قلب الحبة وماتفرح يالوكان في لعقاب تزير
جات تشتكيلو من هم زواج قالها نتزوج بيك
الي في البرمة يجبدو الغراف
ضربة بالفاس ولا عشرة بالقادوم
سال مجرب لا تسال طبيب
لماجات مع العروس ما جي مع مها
الي عينو في عشيرو يحرش كلبو ولا يشيرو

وفاء الياسمين

2015-08-04, 08:07

ماشاء الله
شكرا على مرورك منال

MANO55

2015-08-09, 21:13

أم نُسيبة العامرية انا ماما كل يوم تقولي وا ش قاتلك جداتك

وفاء الياسمين

2015-08-09, 22:55

حافظي على كلام الوالدين واشفاي عليه مليح مايفيدك غير النصائح نتاعهم

NassriKaita

2015-08-10, 15:48

بارك الله فيك شكرا ;)بارك الله فيك شكرا ;)v

salema-

2015-08-12, 22:41

بارك الله فيك اختي

وفاء الياسمين

2015-08-13, 06:52

و فيك بارك الله

رَكان

2015-08-13, 08:37

***الي ما خلا من عشاتو لغداتو موتو خير من حياتو***

حكمة والله ..فأين النساء من العمل بها .......
أحيانا أسرق من المطبخ علب كبريت .اخبيها في مكان بعيد عن الأنظار ..ويحدث ..وفي ساعة متأخرة ..حين أطلع بذكل عليهم فكانما هو عادل الذهب قيمة ...
يقول والدي رحمه الله ..
حجر البلا يتلقطوا في العافية ...
موضوع مفيد حقا فهل من مستفيد ؟؟؟؟..

أم عروة

2015-08-13, 14:52

السلام عليكم ورحمة الله وبركاته

حياك الله ام نسيبة عساكِ بخير؟؟

هدا بعض لمتول لي تفكرتهم

لي يحب الزين يصبر لعدابو

لي يحب الشباح ما يقول اح

خير مرا وشر مرا

مرا اتعليك ومرا تعييك

مول التاج او يحتاج

السامط يغلب لقبيح

الزين زين لفعايل

علمناهم الصلاة سبقونا للحصيرة

مول الفول يقول طياب

كل خنفوس عند مو غزال

اللي يعرف عزو كلام الناس ما يهزو

وفاء الياسمين

2015-08-13, 17:16

بارك الله فيك سرني جدا مرورك و كلامك
شكرا جزيلا على المشاركة دمت بود

وفاء الياسمين

2015-08-23, 22:03

قالتلي جدة
كون مع ربي مليح و العبد كيف الريح

رَكان

2015-08-23, 22:25

ومن القوال في باديتنا قديما ...
فالصّيف .لاتسامي القربة وفالشتاء ...لاتسامي الرْواق ..حرف القاف ينطق g
والمراد بالقول ..
أنه صيفا لما يجتمع القوم .فلايحسن أن تجلس بمحاذاة القربة ..فالناس يأخذها العطش وما إن تسقي هذا الا ناداك ذاك ..
أما في الشتاء فلا تجلس محاذيا ..الرْواق ....وهو ما تم جمعه من حطب للتدفئة ..فكلما قاربت النار خبْوا ..طولبت تزويدها عودا ...
لايجب أن تخمد نار مثل هذه المواضيع فهي ..فهي كماالمنبه لذاكرتنا غفوتها ..

abedalkader

2015-08-23, 22:28

السلام عليكم
فعلا كلام الجدات فيه من العبر الكثير

وفاء الياسمين

2015-08-23, 22:40

قالتلي جدة
اغلق باب دارك ... لا تخوَّن جارك
يعني خذ احتياطك كي لا تتهم الغير

abedalkader

2015-08-23, 22:46

وقالت
الفم المصموت ما تخشوا ذبانة
......

وفاء الياسمين

2015-08-23, 22:52

وصاتني يما
نقيس قبل ما نغيس

رَكان

2015-08-23, 23:04

عبد القادر ..ليتك تضيف شرحا مختصرا مبسطا لأنه البعض قد يكون من اللفظ الدارج صعب عليه فهمه ..لتعميم الفائدة ..اقول ذلك بالرغم أنني فهمت ما طرحته ..

abedalkader

2015-08-23, 23:54

وقالت
الفم المصموت ما تخشوا ذبانة
......

ونزولا عند طلب الاخ عمر
يقصد ان الفم المغلق لا يستطيع ان يدخله الذباب
والمعنى من المثل هذا انه يضرب لنفهم ان الكلام الزائد يجلب المضرة وكثرة الكلام تضر ولا تنفع
حسب فهمي للمعنى والله اعلم

وفاء الياسمين

2015-08-24, 06:38

ــ يعجبني كثيرا هذا المثل

خالط العطار تنال الشموم، و خالط الحداد تنال الحموم، و خالط السلطان تنال الهموم.

و كأنَّه يشبه في معناه

قُولِّي معَ مَنْ تدُوْر نقُولك شكُون انتَ

abedalkader

2015-08-24, 06:55

السلام عليكم
من كلام الجدات وحكمهم
الي فيه عادة ما ينساها غير الا مات وخلاها

Zahra 30

2015-08-24, 21:18

قالو ناس زمان قلل ناسك يرتاح راسك

Zahra 30

2015-08-24, 21:20

لي حبك ما بنالك قصر ولي كرهك ما بنالك قبر ،الله يرزقنا طول العمر و الصحة

Zahra 30

2015-08-24, 21:22

إمرة تعييك و إمرة تعليك، الخير إمرة و الشر إمرة

Zahra 30

2015-08-24, 21:25

بات مع الدجاج ناض يقاقي

Zahra 30

2015-08-24, 21:26

يدور عليك الزمان يا ناكر خيري و تعرف قيمتي كي تعاشر غيري

Zahra 30

2015-08-24, 21:27

الجرب حكاك و الخائن شكاك

Zahra 30

2015-08-24, 21:28

هو فالموت و عينيه فالحوت مثل عن الطمع في الإرث

Zahra 30

2015-08-24, 21:30

هم العرس و لا هم الضرس

Zahra 30

2015-08-24, 21:31

دعوة زوج 2 ولا دعوة عجوز

Zahra 30

2015-08-24, 21:32

انا نوصيك يا سعيد و نتا في عماك تزيد

Zahra 30

2015-08-24, 21:33

حتى يزيد و نسموه سعيد

أثيلة

2015-08-24, 21:36

قالو ناس زمان
كون ذيب لا ياكلوك الذيابة

وفاء الياسمين

2015-08-24, 21:41

السلام عليكم
شكرا لإثرائكم الموضوع
بارك الله فيكم

وفاء الياسمين

2015-08-29, 17:16

السلام عليكم و رحمة الله و بركاته
اليوم و انا أتكلم عن يتيم تذكرت مثلا كان يُقال قديما

يقولون لليتيم
زيد أعمى و اطلاس باش يكرهوك الناس
لان اليتيم من قلة الاهتمام يكون قبيح قليلا و بقيت الصفة ملصوقة به
سبحان الله

وفاء الياسمين

2015-08-29, 17:19

يقولو بكري للمرأة التي تترك شغل بيتها و تعمل لبيت آخر

خلات دارها و راحت تمسح الجامع

بشـرى

2015-08-30, 16:00

شكرا على الموضوع الجميل
عجبوني الأمثال بزاف :)
نزيدلكم من عندي

يقولو ناس بكري:
اذا عجبك رخصو فالدار طيش نصو : يعني السلع الرخيصة ديما تفسد وتترمى

اللي فاتو الطعام يقول شبعت واللي فاتو الكلام يقول سمعت : يعني اللي فاتو الطعام والكلام طفرت فيه ميتعاودش ههه

الباب اللي يجيك منو الريح سدو واستريح : يعني اقفل عليك ابواب المشاكل ووالاشياء اللي تعبك وتكسرلك راسك

ويعجبني تاني مثل تقولهولنا الأم تاعي ، مثلا كي تكون الماكلة بزاف واحد ما يحب ياكل، وكي تكون قليلة تحلالنا كامل ناكلو ومنشبعوش ، تقولنا كما يقولو ناس بكري ؛ المترد لبنين لواحد واتنين ؛ وصح عندنا الحق كلما كانت الماكلة قليلة تزيد تحلا ههه

ومثل تاع بكري يقول سال المجرب ومتسالش الطبيب ، كامل نعرفو معناه ،واحنا نقولو سال المجرب وما تسالش الطبيب مابالك اذا كان لمجرب طبيب ههه

كاين تاني مثل تقولهولي صحبتي يعجبني بصح منيش متأكدة من المعنى تاعو مليح ، يقولو عينو فاللبن ومدرق الطاس ، بلاك معناه حاب حاجة وميحاولش يوصل ليها والله اعلم

كي نزيد نتفكر نولي للموضوع عجبني ونحب بزاف الأمثال الشعبية :)

وفاء الياسمين

2015-08-30, 21:26

جزاكِ الله خيرا أختي
نوَّرتي الموضوع ننتظر عودتك

أسية24

2015-09-08, 12:12

***الي ما خلا من عشاتو لغداتو موتو خير من حياتو***
كانت توصينا جدة كي نجو نطيبو ما نديروش كامل الخضرة أو السميد أو اللحم أو أي مكون آخر
و نخبيو دايما شويا للغد أو الطوارئ كحضور ضيف مفاجئ
ولقيتها. صح مرات نجي نخبز ندير كامل السميد و تجيني لعجينة جارية
مانلقاش باش نرقعها نتفكر كلامها
ولا يجي ضيف غفلة ما نلقاش واش نحطلو
خاصة السكر القهوة ابدا ما نديروشش كل الكمية قبل ما نزيدو نشروا

عندك الصح أنا يما تقولي من كل خميرة خبي خميرة وجداتي الله يرحمها كان عندها صندوق تخبي فيه مصروف الضيف حتى إذا احتاجت للدار ما تجبدش منو ويما قاتلي احنا كنا الضيف نحطولو دجاجة كاملة عيب نقصو منها وإذا ما حبش يتعشى وراح يدي معاه الدجاجة او اللحم والفاكهة

وفاء الياسمين

2015-09-08, 14:56

عندك الصح أنا يما تقولي من كل خميرة خبي خميرة وجداتي الله يرحمها كان عندها صندوق تخبي فيه مصروف الضيف حتى إذا احتاجت للدار ما تجبدش منو ويما قاتلي احنا كنا الضيف نحطولو دجاجة كاملة عيب نقصو منها وإذا ما حبش يتعشى وراح يدي معاه الدجاجة او اللحم والفاكهة

هاذو ناس زمان و كرمهم و نيتهم الصافية أما الان تبدلت الاحوال
ربي يلطف بينا ولا كل واحد يخمم على روحو برك
جزاك الله خيرا

ayoub67

2015-09-11, 21:08

كلام رزين تبارك الله

djihan jojo

2015-10-02, 17:30

اسمع للكلام الي بكيك ومتسمعش للكلام الي ضحكك

mariana1

2015-10-03, 14:32

شكرا لك أم نسيبة العامرية لإثرائك هذا الموضوع ، أما أنا وصاتني أمي ربي يشفيها وقالت لي : تعلمي خديمة وخبيها يحوجك الزمان وتصيبيها

وفاء الياسمين

2015-10-03, 17:11

شكرا لك أم نسيبة العامرية لإثرائك هذا الموضوع ، أما أنا وصاتني أمي ربي يشفيها وقالت لي : تعلمي خديمة وخبيها يحوجك الزمان وتصيبيها

أسأل الله الشفاء العاجل للأم الكريمة

و خيرًا ما وصاتك

ربي يبارك فيك

sanadz

2015-10-15, 16:42

جزاك الله خيرا اختي العزيزة عما دكرت لنا من امتال وحكم من زمن اجدادنا

عشور ابتسام

2015-10-16, 19:11

جزاكم الله خيرا على هذا الموضوع

زهرة القدس 05

2015-11-06, 17:19

عجوزي ربي يحفظها تقول
لعروسة في المركب ماعرف لمن تكتب
يعني لعروسة راهي داوها وراكبا مع عريسها مي مانعرف تكتب ليه ولا ماتكتبش

وفاء الياسمين

2015-11-06, 18:00

جزاكم الله خيرا على المرور الطيب

maghi

2015-11-30, 13:29

السلام عليكم ...
جزاك الله خيرا اختي الفاضلة على الموضوع الرائع ...
في جعبتي بعض الامثال اتمنى ان تكون مفيدة ...

شيب الوجه غمرات ..
وشيب الراس حشمات ..
وشيب الزندة لكبر بالذات.

ياللي فطورك كذب واش تتعشى.

لابسة لبسة الملوك ..
وعقلها عقل السردوك.

اللي يضرب يوجع ..
واللي يوكل يشبع.

لي عودة ان شاء المولى....

وفاء الياسمين

2015-12-01, 07:04

وعليكم السلام ورحمة الله وبركاته
هي جميلة جدا أول مرة أسمع بها

بوركتِ

maghi

2015-12-02, 22:09

السلام عليكم ...
هاقد عمت مجددا ...

اللي تطوف ... ماتنسج الصوف.

من طاسو ادهنلو راسو.

واش تبيع فالصيف ياللي سلعتك مراوح.

طب وماينطب ..
كي جلد الكلب ..
ماينباع مايتكل.

ساعود قريبا ان شاء الله.

وفاء الياسمين

2015-12-03, 06:31

وعليكم السلام ورحمة الله وبركاته

ماشاء الله فعلا اضافة قيمة جدا بارك الله فيك

فقط في المثل الاخير
على ما أظن

ماينباع مايتكب
ربما

كنزة88

2015-12-18, 14:51

موضوع قمة في الروعة

وفاء الياسمين

2015-12-21, 07:18

موضوع قمة في الروعة

شكرا بارك الله فيك

و الاروع لو تقولينا بعض الامثال عندكم

كوثر أم لجين

2016-01-22, 14:55

موضوووع شبااب بزااف يعطيك الصحه

وفاء الياسمين

2016-02-02, 07:35

شكرا ......

♥لَيْلَىّ♥

2016-02-07, 17:09

السلام عليكم
جزاك الله خيرا على هذه الحكم ومعانيها فعلا ناس زمان كان عندهم الخبرة ،،

أبو عاصم مصطفى السُّلمي

2016-02-23, 10:34

السلام عليكم و رحمة الله و بركاته

اللِّي قلَّش ولدو يفضخو و اللّي قلّش بنتو تفضحو

و نحن في زمان صدقت فيه هذه المقالة

وفاء الياسمين

2016-02-23, 13:48

جزاكم الله خيرا

nana47

2016-02-27, 15:30

السلام عليكم
اراكم هنا تقريبا حصرتم نصح الاجداد في الحكم و الامثال
انا ان قلتي لي نصح الكبارات اقول لك تربية الاولاد معاملة الزوج كيفية التصرف في الحياة و العديد من الاشياء التي لا تحضرني الان و بعض المواقف منها ما كلّل بمثل شعبي او حكمة
انا شخصيا اتلقى النصائح من اشخاص غير جداتي و اكثر ما يحضرني الان استعمالات لاعشاب بسيطة و نصائح لتعلم بعض الحرف التي يكللها المثل:
يفنى مال الجدين و تبقى حرفة اليدين

أم اسحاق

2016-03-25, 07:40

موضووووع رااااائع

أم اسحاق

2016-03-25, 07:42

والله راحولي قاع الامثال لي عندي من قبيل وانا نتفكر
مشكوووورة

صبرينة لوتس

2016-04-29, 18:42

السلام عليكم

يقول الكاتب محمد فتحي :

" تعلمت أن محادثة بسيطة أو حوارا قصيرا مع إنسان حكيم يساوي شهرا دراسة."

حنان امة الرحمان

2016-04-30, 00:47

:dj_17:تقول نانا ربي يرحمها لو كان جيتي قادرة راكي هاربة يعني لوكان جيتيدتعرفي الشغل راكي تهربي متخدميهش:D :19::D

وفاء الياسمين

2016-05-04, 18:48

وعليكم السلام ، أهلا بالجميع

شكرا لمشاركتكم

وكيما قالو ناس زمان

شارك مع الناس ولو حتى بتحريك الراس

~عيون القلب~

2016-06-23, 02:38

قاتلي جدة؛ لي فاتو العيش يقول كليت ويسكت؛

عابرة سبيلها

2018-08-24, 09:44

الجديد حبو و القديم لا تفرط فيه،
رحمك الله يا غالية

عابرة سبيلها

2018-08-24, 09:45

رحمة الله عليك

وعليكم السلام ، أهلا بالجميع

شكرا لمشاركتكم

وكيما قالو ناس زمان

شارك مع الناس ولو حتى بتحريك الراس

رحمك الله

ابن الجزائر11

2018-09-01, 23:28

بارك الله فيك على الموضوع المميز
نعم أجدادنا كلماتهم تنير الدروب فكثير من كلامهم حكمة بنوها على التجارب وكيف لا وهم من عاركتهم الحياة بحلوها ومرها وعاركوها
فهم أهل التجربة والمراس .

تقبلي مروري