عقلي حيرني

[مشكلتي]

السلام عليكم
من غير مقدمات راح ندخل في الموضوع مباشرة
ياخاوتي راني حايرة في سؤالين
انا بنت عمري 25 سنة تخطبت مرتين لكن ماسهلش ربي
المهم الجديد انو تقدملي شاب كان يقرا معايا في الجامعة ايمات الدراسة و حتى بعدها كان نعم الصديق اخلاق واحترام ماشاء الله وقف معايا في مواقف كثيرة كنت حاسة ان كاين حاجة بينتنا حتى بعد ماكملنا لقراية و حتى كي تخطبت كان شيئ موجود ماعرفتش نفسرو
المهم هو راه خدام ذرك عندو 5 شهور و جا النهار لي اعترفلي انو يحوس يتقدملي و قالي راني درست الموضوع مليح و درت احتمال لكل اجاباتي
كاين مشكل انو مش مستعد يتزوج او يخطبني خطبة رسمية قبل عامين لانو مزال يوجد في امورو لكن قالي يحط عليا الكلمة و طلب اني نصبر معاه
قالي ماحبش يصارحني كي كنا نقراو اقبل مايلقى خدمة لكن ذرك خلاص ولى يخدم كل مافي الامر انو يستعد
انا صليت الاستخارة طبعا ومازلت نصلي و راني نشاور فيكم واش تنصحوني
السؤال الثاني هل جمال الرجل للمرأة شرط مهم اذا وجدت شخص يملك كل المواصفات و يحبها جدا ؟؟؟؟
حتى عقلي و قلبي نحتارين بين اني نوافق او نصبر ممكن يجيني لي احسن منو مع العلم اني ماتخطبتش من نهار لي تفسخت الخطبة تاعي الثانية

[غير هام]

السلام عليكم

راكي تقولي وقف معايا وانسان مليح وما تنسايش الدين ادا كان مدين واش راكي تستناي اقبلي بيه اذا راكي قادرة تصبري عليه سنتين

واش ختي الله يهديك هادي سلعة تصبري حتى يجيك خير منه هدا زواج يا قبول يا رفض المهم تكوني مقتانعة

[*عاشق الحياة*]

السلام عليكم ورحمة الله وبركته

راكي تقضي من أيامكي في حياتكي

وراكي تستني في باطل قوليله

اذا عنده دليل على أنه راح يخطبكي

ثقي فيه مشي بالكلام برك !!

مشيو احد يقولك راح نخطبك ولانتزوجك يقولها لك بالكلام فقط يجب بالأفعال وتقديم الأدلة

ولاهكذا أرواح وصرح

[mazigh+chaoui]

accepte et bon courage

[الناصر لدين الله]

استخارة+استشارة+توكل على الله

[كلنا راحلون]

يحط عليا الكلمة و طلب اني نصبر معاه..........مصير فراق و ندم ادا دخل هاتف

[naamane3]

انا من رايي خير البر عاجله
اقبلي بضروفو
وعيشي معاه على قدو
ونحيلو من دماغو فكرة
الانتضار اكثر من 6او 7 اشهر

[nouna l maghbouna]

عادي اختي ادا هو عاجبك و ارتحتيلو اقبلي وين راه المشكل

[محمد جديدي التبسي]

ما فهمتش كيفاه كان نعم الصديق؟؟!!
ننصحك تقوليلو يجي يخطب والا انهي علاقتك به
لأن الخطبة ما تحتاجش مصاريف كبيرة ومادام بدا الخدمة يقدر يخطب
أما تقعدي عامين وانت تستناي فيه فالأمر صعب وغير مضمون
أما سؤالك عن جمال الرجل فأقولك لابد أن تكوني مقتنعة بشكله ومظهره
وايك أن تنخدعي بتعلقه بك وحبه الكبير لك فهذه أوهام يصورها لك الشيطان لتبقي في هاته العلاقة..ربي يفتح عليك

["راجية الجنة"]

سلام عليكم

احسن شيء يتقدملك مباشرتا بدون اي مقدمات
قلتي تعرفوا بعض من قبل اذا يتقدم و قصي عليك الامر هذا اذا كنت مقتنعة

[G I R L]

بعيدا عن كل التفاصيل الموجودة والتي تعبر عن بعض الخفايا نحب ننصحك ونقولك بلي الخطبة مافيهاش مصاريف بزاف للراجل
خاتم وقاطو وخلاص ...... يعني كي تخطبي ليه راحا تضمني انو ماشي مجرد كلام برك
الجمال ليس مهما بقدر ماتهم الاخلاق العالية ومخافة ربي
انا نقولك وافقي مادام بديتي تحكي معاه وربي يهنيك اختي الكريمة ويرزقك بالزوج الصالح

[رمزي فارس]

كم يطول هذا الصبر؟ ما دام الحب موجود بينكما توكلا على الله تعالى وأقيموا العرس بما حضر لديكما ، لأن من يفرح لكما سيفرح ولو على حصيرة ومن يحسدكما ولو أقمتما عرسا في فندق 5 نجوم، خففي عليه وتزوجا وإني أول من يفرح بكما، فكل يوم يمر يضيع من حياتكما، ما ينقصني أن أجد عملا لأتزوج، فلا تضييعه وفرحونا هذا الصيف.

[knives66]

تخطبتي 2 مراة ورفضتي وسبب هذا الشخص

وضورك حرتي بين تقبلي وترفضي انت رفضتي لي كانوا وجدين

فما بالك بلي موش واجد

والله غير حجر يحير فيكم ربي يسهلك مهم مرة جاية برك ما تقوليش ندمة

لانوا هذي عقليتكم ترحوا غير لي ما يصلحش

[seridz]

مشكلتنا دائما هي اننا منعرفوش واش نبغيو دائما تكون عندنا مشكل في تحديد اهدافنا ساهلة ماهلة اختي حددي اهدافك احكمي ورقة و استيلو و اكتبي اهدافك و متكدبيش على روحك اذا هذا الشي توافق مع اهدافك ففيها و بارك و اذا تنافى خيرو في غيرو و متخمميش عليه و تقولي بلاك غادي نجرحو او شيء من ذا القبيل هذا زواج و مثاق غليظ الله يفتح عليك و يورلك طريق الحق

[لمسة ابداع]

فكري ثم قرري ثم توكلي على الله

[زبدة ذايبة]

استخيري وتوكلي على رب العالمين

بين يوم وليلة يفعل الله مايشاء

احتمال كبير يحوس يجربك باش يشوف مدى موافقتك عليه.

مانضنش يقدر هو يستنى هذ الفترة -قالك عامين!!!!!!!!!!!!!!

ماتضيعيش الفرصة وتوكلي على الله

ماتنسايناش من قاطو العرس يبان بلي قريب

[younes29]

يحط عليا الكلمة و طلب اني نصبر معاه..........مصير فراق و ندم ادا دخل هاتف




+1000000000000000000000

[nibou]

أختي نظن كيما قالو الإخوة الخطبة ما تكلفش بزاف و كاين ناس بزااااااااااف تخطبو وقعدو حتى لربع سنين باه تزوجو،يعني القرار راجع ليك إذا قادرة تصبري و لا لا و زيد ديري في بالك مليح بلي راه عارف بلي كنتي مخطوبة،قادر درك يتقبل الأمر عادي و قادر يجي نهار و يقولك علاه بطلتي؟؟؟؟يعني لازم تحكي كل الإحتمالات باه ما تنصدميش،زيد ما تدري قادر ربي منا لغدوة يفتح عليه و تتزوجو بالساهل،لأنو اللي طالب الحلال ربي عمرو ما يخيبو،كاينة وحدة نعرفها خطبها طبيب هداك وين تخرج و قالها الزواج قادر على تلات سنين و لا ربعة،مزال مادار تخصص ما خدم و حكم خدمتو و كي سهللهم ربي عمها عندو سكنة عطاهالهم بشكل مؤقت وربي سهل عليه و نجح في إمتحان التخصص و ولا يخدم و يقرا وفي ظف عام تزوجو،أما بالنسبة للجمال فهو أمر نسبي،كل واحد كيفاه يشوف و أنا نظن لازم نتقبلوا الشخص،يعني مرات تشوفي واحد زين وملايكاتو تقال و مرات واحد ظلو خفيف و يعجبك،يعني في الأخير هادي خلقة ربي ماش بيدينا،المهم الإرتياح النفسي أولا و قبل كل شيء