كيفاش ندير

[مشكلتي]

السلام عليكم
أول مرة نكتب في قسم مشكلتي لي عمري ما خممت نكتب فيها لكن ضاق صدري و ما لقيت ليمن نشكي
أنا إمرأة متزوجة من مدة و ما عنديش أطفال و السبب من زوجي ربي يحفظو و يشفيه و الحمد لله علاقتنا الزوجية مليحة لكن معاناتي هي مع دارهم لي يكرهوني إلى درجة ما يعلم بيها غير ربي و شوهولي كامل سمعتي عند الأقارب يعني عجوزتي و لواساتي شغلهم الشاغل التقطاع عليا عند الناس و يصوروني و كأني وحش ديتلهم وليدهم و هربت و يقولو راني ساحراتو باش مايطلقنيش على خاطر أنا عاقر و ما نولدش بالرغم من أن المشكلة ماهيش مني .
و صدقوني إخواني من نهار تزوجت إلى يومنا هذا عمري ما واجهتهم و إلا كشرت في وجوهم و إلا قلتلهم و علاش راكم تقولو هكذا بالعكس نرجع روحي كي شغل ما نفهمش .و دايما نقول واش دخلني فيهم المهم أنا متفاهمة مع زوجي و نسكن وحدي و هوما ربي وكيلهم .
لكن لي وجعني أكثر هو أنهم يخبيو عليا دايما موضوع حملهم حتى يرجعوا في الشهر السادس يعني حتى تبان كرشهم و يخبيو عليا أنا برك يعني العرايس لخرين لالا و مرة قلتلها لسلفتي و علاش خبيتي قالتلي في وجهي خفت من العين .
المهم هذو الحوايج كامل خليتهم في قلبي ساعات نتفكرهم و ساعات نتجاوز عليهم لكن الحاجة لي راهي دايما منغصة عليا هي يماه أتخيلو في وجه وليدها ما تقولو والو وهي تضل تشكي للناس بلي وليدها راهو ناسيها و ناسي خواتاتو و لاتي غير بمرتو والله العظيم أن زوجي ملتزم و ديما يدير الشي لي قدر عليه باش يرضيها هو يخلص 3 ملاين و نص يعاون دارهم ب 500 ألف شهريا و خلي كل ما يروح يدي معاه حاجة و بلا ما نذكرو الخدمات و خواتاتو نروحولهم في كل مناسبة و في الأعياد مي هوما يقولو وعلاش ما يقضيلناش مليح .
أنا هذا هو إستفساري إخواني أم زوجي ديما ساخطة عليه على جال علاقتو الحسنة معايا
هل لازم يطلقني باش ترضى عليه ؟
و اسمحولي راني طولت لكن و الله قلبي راهو معمر .

[ryma la cool]

شوفي اختي
اولا ربي يفرج عليك
ثانيا انا من رايي مادام زوجك يحبك وراكي هانية معاه
في هذا الموقف دوره لي ينهي هذا النوع من النقاشات
مادام المشكل منو يخبر اهلو انو المشكل منو
المشاكل مع اهل الزوج دائما تكون وخاصة في موضوع عدم الانجاب
ربما حاطين في بالهم انو المشكل منك وهو راه صابر عليك
ربما لو تاكدوا انو العكس انتي لي راكي صابرة عليه وتحبيه راح تتغير نظرتهم ليك

[نور الرحمة]

ربي يسرلك امرك ان شاء الله اختي ما عليك الا بدعاء لام زوجك واهله وربي يفرج عليك ان شاء الله

[أم شروفة]

مادام ما غلطتيش معاها .خليها بينها وبين وليدها راها غير تدير هاك وتأكدي الأم مستحيل تكره ابنها .لكنه دلال الأم على ابنها ............واخبريه يخبر أهله بأن المشكل منه.وربي يفرج علينا أجمعين

[لحن الحياة.]

و نتي علاه تسقسي على الناس ؟؟؟؟؟؟؟ خليهم يروحو في ستين داهية ....+++++++++ كون أنا داري وحدي ما نخرج العيب ما نسقسي على حتى عربي ونعيش بسعادة .و الذراري مكتوب ربي

[lydiareve]

يااختي صراحة لي تحب تتهني تخمم قبل يعني تطلب تعيش وحدها وتخدم ووو الشروط هادو انا طلبتهم لخطيبي وقبل بيهم رغم انو امو واختو ضغطو عليه ولكنو قرر يعيش وحدو معايا اتهنيت

[baybos_dadi]

ما يلفظ من قول الا لديه رقيب عتيد
يا اختي وكلي عليهم ربي و ربي يفرج عليك

[doba]

يا اختي وكلي عليهم ربي و ربي يفرج عليك

[أم رحمة وإياد]

اختي خليهظ يهدرو كيما يجبو الكلاب تنبح والقافلة تسير المهم راجلك يكون واقف معاك الدنيا وما فيها
وكي يخبو عليك صح توجعك بصح انسايهم والله يجي وقت وتندمي انك اعطيتيهم اهمية
والله عن تجربة انا مريت بمشااكل كبيرة وكنت دايما نبكي ودرك ندمت اني عطيتهم اهمية ديجا الهم لي فينا يكفينا مشكلة العقم راهي الجبال وما تتحملها ماتزيدي على روحك تحاسبك
انا وليت مانزيد عل روحي ماشي مشكل العقم ونزيد مشاكل الراجل واهلو الراجل وليت لي يقول نقولو ايه مام يكون غالط اما اهلو مانيش سامعة بيهم

[aminazy]

السلام عليكم
اختي قولي راجلك يخبر امه فقط
ودعيلهم ربي يهديهم ويرزقك من حيث لا تحتسب
انشاء الله

[ابتسام smile &hope]

يجب ان يخبر زوجك امه

[naamane3]

عليك باذكار الصباح والمساء اولا
ثم عليك بكثرة الاستغفار ثانيا
ثم تابعي الحلقة الكاملة لعلي منصور الكيلاني
في سلسلة القرآن علم وبيان
تحت عنوان سورة مريم وطاقة الصمت
والله الموفق

[زبدة ذايبة]

علاش تعمري راسك بيهم

هوما ساكنين في دارهم وانت مسكنتهم في راسك

يعني ماراكيش ساكنة وحدك

كل عروسة وبلاستها وانت ظروفك مختلفة عليهم

مايهمك حتى واحد في هذي الدنيا

زوجك جنتك ونارك

أمرك رب العالمين تطيعيه حاضر وغايب

تحافظيلوا على سمعتو وعلى مالو

هذا المطلوب منك.

العجوزة عمرها ماترضى على زوجة الإبن إلا من رحم الله

جابو معاهم الأولاد ومارضاوش عليهم ياوين انت ماعندكش الأولاد. سبة وقابلتها حدورة.

نتفهم مليح مشكلة أن الأولاد ماعنكش وهذا من رب العالمين قادر سبحانه وتعالى على كلشي

في لمح البصر يعطيك ويعطي غيرك والكريم إذا أعطى أدهش.

عمرت راسك بيهم على خاطر راك فارغة

أشغلي نفسك بما يرضي الله ثم مايرضي زوجك

أكثري من الدعاء فالله عزوجل رزق إبراهيم على كبره ورزق زكريا على كبره وعقم زوجته وأنجبوا أنبياء.

ماتقوليش هاذوك أنبياء. صح هوما أنبياء لكن رب العالمين هو هو الواحد الأحد الفرد الصمد كيما اعطى للأنبياء يعطي للمؤمنين وفضله واسع.

أكثري من الاستغفار أنت وزوجك وسيبرئك الله من هذه الاتهامات.

وزيد هذا التقطاع اللي راهم يديروا فيه نقصان ذنوب ليك

[oum souhaib]

ربي يفرج عليك ياختى

[*عاشق الحياة*]

السلام عليكم ورحمة الله وبركته

والله حاولت أفهم مشكلتكي كويس بس للاسف مكتوبة بالجزائري وانا عندي مشكلة شوي مع الكتابة الجزائرية

وحاولت أسعدكي ولكن للاسف ....

نصيحة فقط لاتفكري الطلاق ابدا ابدا والله تصبح حياتكي تعيسة

والله يوفقكي

[*ام ادم*]

وكلي عليهم ربي لوكان انا في بلاستك مانسيقيسش خلاص عليهم الله يسهل
انسايهم كامل خليك منهم زوجة ابن راهي ثقيلة عند اهل الزوج كما دير ماتسلكش
انا راي زوجك يتكلم مع اهلو
ونتي هني راسك ماتسمعي بهم ما تحوسي عليهم عيشي حياتك وربي قادر على كلش
ربي يفرج عليك اختي

[Hillin]

سلام
ختي نقولك حاجة 'ارضاء الناس غاية لا تدرك "
كتعيشي فرحانة غير طنشي
متعمريش راسك
الله يهدي ما خلق
ياك الدنيا طويلة وتعي
خليها ربي سبحانو

[KARIO]

يا اختي راني حاسة بيك و نعيش نفس الظروف، زوجي قال لامو باللي المشكلة عندو و مستحيل باش يولد، بصح محبتش تفهم، راهي مهبلتني بالمعاني قدام الناس تقولهم راهي تاكل فالدوا و رانا شادينها، حسبي الله و نعم الوكيل فيها، قالك رضينا بالهم و الهم مرضاش بينا، نصيحتي ليك قولي لزوجك يفهمها، و خليهم ينبحو كي الكلاب، عيشي حياتك معلابالكش بيهم و دعي ربي يفرحك

[أم ريتاج زهرة]

شوفي أختي رحمت ربي واسعة و الله يرزق من يشاء بإذنه و هذه حاجة مكتوية عند رب العالمين أنا عندي خالي بعد 18 سنة زواج ربي رزقو ببنت ما شاء الله تبارك الرحمان لعقوبة ليك و للأخت kario تفاألو خيرات تجدوه ربي يوفق الجميع

[أم ريتاج زهرة]

و بالنسبة لعجوزتك مترديش عليها حسني عونها حتى هي مدبيها تشوف ولاد ولدها و الحل الوحيد أنو زوجك يكلمها و يخبرها بلا متوصليها نتي إذا كان الكلام من فضة فالسكوت من ذهب و لازم تقادريها هي مرأة كبيرة و أم زوجك و ربي يكون في عونك سلام

[besboussa]

Rabi yehdi