شجعوني

[مريمار]

لبنات راني حابة نتشجع و ندير الهومبورغر بصح معلاباليش كيفاه و شحال القيس نتاع القرصة قبل ما تطلع و بعد و شحال نبقا نعلن المهم بالتفصيل الممل و سؤال ثاني جربت خبز الشاورمات بصح مطلعش جاءتني مسطحة مش منفوخة و شكرًا حبوباتي

[إلهام07]

مافهمتش مليح سؤالك على الهمبرغر بصح نجاوبك ونعطي نصائح واسرار الهامبورغر عموما :
* العجينة تعجنيها مليح وتكون جارية ماشي يابسة باش تطلع وتنتفخ وجيك خفيفة
* لازم تخلي العجينة تختمر مليح حتى يتضاعف حجمها لازم
* الكريات نتاع العجينة كي تكوريهم ديريهم صغار قد حبة البيض أو قليلا اكبر المهم قد مايكونو صغار يجيو اخف وماتخافيش من بعد يكبرو بزاف
* كي تكملي كل الكريات وتحطيهم في الصينية ماتخليهم على شكل كرة قرصيهم شوية هبطيهم لأانو من بعد العجينة تنتفخ وترجع على شكل دائري ماتخافيش بصح لازم تهبطيهم باش مايجيوش معجنين من داخل
* خليهم يخمرو مليح مليح مليح حتى يتضاعف الحجم نتاعهم باش دخليهم للفرن
* درجة الحرارة 180° طيبيهم في فرن مسخن مسبقا وطبعا كي يطيبو من تحت شعليلهم من فوق وطبعا كي تشعلي من فوق لازم تهبيطهم للرف السفلي باش مايتحرقوش



ضرك نجيو للخبز العربي كاين بزاف يشكيو انه لا ينتفخ لانو مايعرفوش الأسرار نتاعو :

* اولا لازم يتعجن مليح ولازم العجينة تكون رخوة جارية ماشي يابسة
* لازم تخلي العجينة تخمر مليح قبل ماتقرصيها قرصات
* كي تقرصيه غطيه وخليه يخمر مليح
* في هذا الوقت تسخني الفرن نتاعك بحيث تحطي الصينية اللي رايحة طيبي فيها الخبز تسخن في الفرن ماتنحيهاش لازم تكون سخووووووووووونة
* الصينية تتحط في الرف السفلي وتشعلي من تحت على أقصى درجة حرارة ( وإذا فرنك يشعل من تحت وفوق في نفس الوقت هايل خليه شاعل لازم يكون سخووووووووووون)
* كي يخمر الخبز طفي من تحت وشعلي الفرن من فوق فقط ( وإذا فرنك يشعل من تحت ومن فوق خليه شاعل من تحت ومن فوق ) ولوحي بالقرصة في هذيك الصينية واغلقي الفرن واتفرجي وقولي إلهام قالت في 1د تلقايها بدات تنتفخ حتان ترجع فارغة من داخل كي تتحمر قلبيها باش تتحمر على الجهتين

* نصيحة أخيرة منين طيب القرصة خرجيها من الفرن وغطيها مليح بالمنديل نتاع القماش باش تبقى طرية


أي أسئلة انا في الخدمة :mh31:

[أم أمة الله الجزائرية]

بارك الله فيكما

[عطر الياسمين الاصلي]

شكرا لك يا الهام والله استفدت منك بزاف ربي يرزقك بالزوج الصالح والدرية الصالحة وان شاء الله الاخت اللي سالت تكون استفادت

[أم ياسين الزهراء]

ونزيدلك مصيحة لاني موالفة ندير الهمبرجر والحمد لله يصلحلي ادا الفور انتاعك مافيهش المروحة ديري طاس فيه الماء وحطيه في الفور باش يدير الرطوبة وهدا راح يخلي العجين طري وحظ موفق

طبعا طاس حديد ههههههههههههههههه

[مرتلة القرآن رتيل]

بارك الله فيكنّ