ريحولي قلبي ربي يجازيكم متبخلونيش و أدخلو

[oprah]

السلام علكم
أنا وليدي كان يزيد في المزان الحمد لله
مي ملي كبر شويه راهو في خمسة أشهر دوكا و يوزن 7 و ثلثميات غرام ولحد الان راني نمدلو صدري برك نورمال؟ ماهوش يزيد كيما كان صغير مع العلم مفياش الحليب بزاف على حساب ماني نحس يعني ماهوش يسيل مني غير كي يجبد
و محبيتش نوكلو مالغري قاتلي الطبيبه وكليه بصح خفت كي قلتولي حتى يقفل 6 اشهر
مي ميبكيش على الماكله و كي يرضع يتقرع نورمال
مي لي مقلقني أنو ماهوش يوسخ بزاف حشاكم كيما كان يعني كميه قليله بزاف و تدخل في ليكوش يبان برك اللون من برا
نورمال؟
أرجوكم راني بزاف مقلقه و لي يشوفو يقولي وليدك مازادش و الطبيبه قاتلي ميزيدش بويسك راهو يطوال
راني مقلقه
مع العلم كانت حاكماتو لادياري أيم ٌبل و حبست نورمالمو
نمدلو أملاح؟
لي تكتبلي حرف ربي يجازيها

[ام نهوله]

ما تتقلقيش اختي راه هايل الحمد لله تشوفي بنتي عندها 8شهور كي كانت 7شهور وزنت 6كيلو و800 كامل يقولولي قليوله مافيها والو بصح الطبيب قالي كي رضعت من صدرك ما تتقلقيش راهي تديها صحه الله يبارك ماشي سمانه و اذا ديتيها للطبيب و طمنك خلاص ما تتوسوسيش بزاف ان شاء الله كي تبدايلو الماكله يجيب روحو
ونزيد نقولك 5شهور و نصف بدايلو ما تخافيش انا بنتي هكذا درتلها ربي يكبرو على الطاعه و الدين و اسمحيلي طولت

[ام مريم الجزائرية]

شوفي باينة بلي وليدك الاول يعني تولي غير تخزر فيه وخرج فيه وقليل ومايوقفش ووو
المهم راه بصحتو الحمد لله ماعندوش مرض ولادياري باينة لسنان مرة اخرى شريلو سميكتا ولا روز ولا الماء تاع الجزر راح تحبسلو ان شاء الله
بالنسبة للوزن راه عادي روحي شوفي في كارني دسونتي في الهرم يبانلك بلي راه عادي وانا ننصحك بداي وكليه راني خبرة 6 اولاد الله يبارك ويصلحهم بداي غير الفطور برك ومبعد كي يوالف ديريلو العشاء فان وماتربيهش بلابلامين انا مانبغيهاش غير للضرورة برك خرجة ولا حاجة ولادي مرات مايديروش حتى 10 ايام اكرمك الله ومبعد يخرجو عادي
ماتتقلقي ماوالو انا ولادي حتى يولو ياكلو وحدهم باش يسمانو من قبل يولو كيما تاع اثيوبيا اللي يشوفهم يقولولي كيفاه هدو يعيشولك والحمد لله
ربي يسرلك اختي

[*عائشة*]

ربي يعيشلك وليدك شوفي اختي اوبرا الطفل كي يكون صغير يعني في الشهورة اللولين من 1 حتى 5 اشهر الزيادة تاعو تكون كبيرة تتعدى 1 كلغ في شهر واحد ولكن بعد 6 اشهر يعود الوزن تاعو ما يفوتش 0.5 كلغ للشهر و بالتالي ولدك راهو عاااادي ماتخفييييش

[oprah]

يعطيكم الصحه خياتي و ربي يجعلها في ميزان حسناتكم
أنا راني حابه نبدالو البيبرون على الاقل يولي يشبع بويسك حاسه حليبي مولاش يكفيه كي راهو يكبر
واش رايكم؟

[ام مريم الجزائرية]

اللهم امين شوفي بلاكييييييي تحبسيله صدرك والى راكي شايفة بلي ماراهوش يشبع وتعرفي من كثرة بكاؤه يولي يبكي بزاف حتى وترضعيه ديريلو بيبرون وختاري حليب يوالمو انا نربي ولادي بيوميل هايل وانت شوفي واش يوالم وليدك

[فرح حياتي]

انا من رايي تبدايلو لماكلة احسن وخليه يجبد من صدرك
ولا دخليلو لحليب عاونيه بيه على الاقل مرتين يوميا وديري فقط 120 او 150
راكي محيرة كيماراهش يزيد كيما قاتلك الاخت في الاشهر الاولى تكون الزيادة تاعهم اكبر نت لما يوصلو للشهر الخامس
وماتنسايش راه في وقت يسنن يعني عادي الا شيان ونقص لماكلة

[amani38]

نحكيلك على تجربتي مع ابني منصف خاطر راني حاسة بيك
ابني تاني كان يرضع صدري فقط و وزنو قليل رغم انو عادي في الدفتر الصحي و الكل يقولولي راهو ضعيف و ما فيه والو و تغيظني كي يقارنوه مع اولاد وحدخرين مبطبطين بصح يا ختي الحمد لله ضرك راه عندو عام ما شاء الله جامي ضربو ريح و للا مرضلي و كيدخلتلو الاطعمة تدريجيا على 5 اشهر راه بدا يرفد روحو في الوزن مع انو طولو ماشاء الله و تاني نبهي و فطن و كل مؤشراتو مليحة
يسما كيما تقول عجوزتي متحوسيش عليه بابا عجينة منفوخ بلا صحة المهم صحتو مليحة و بعدي عنك الخوف و الوسواس متديريش بحالي كنت نظل لاسقة في قوقل نبحث على ادوات زيادة الوزن و فتح الشهية
اما على البيبرون فنصيحتي انك تدخليلو رضاعة واحدة من الاحسن ليلا منها يشبع و منها تولفيه يتغذى بطريق اخر غيرك يعني مشي كيما تكونيش مثلا متفرغة ليه او مريضة يبقى بالجوع ، يكون على الاقل بديل و ابدايلوالتنويع الغذائي راه كلش في الانترنت ابحثي مليح على قائمة الاطعمة و ترجعي خبيرة تغذية ان شاء الله
اسمحيلي طولت عليك بصح انا كنت في بلاصتك و تمنيت نلقى اللي ينصحني و يطمني
ربي يحفظلك وليدك و يقدرك على حسن تربيتو

[maya 25]

matkhafi mawalou mais abday twaklilo ana dork benti hatkamel 7chhor wmatakoli walou thawes ghir 3la sedri walfet bih w bibron w makla mathabech 3iyatni wali ychofha ygoli oh machyana khal3oni hata ditha tbib gali labes 3liha matwasawsich gali hlib ta3ak y3awad kolchi mais ana habitha takol bah tachba3 wrabi yahfadhomlna