ألزامية الانجاب في اول سنتين للزواج

[السي محمد]

السلام عليكم ورحمة الله و بركاته

لم يكتب لي الله عز و جل ان اتزوج لحد الآن ... و لكن اصحابي اغلبهم متزوج ... و لهُم اولاد ... و كلهم انجبت زوجاتهم في اول سنة او اول سنتين للزواج على اقصى تقدير



في البداية استغربت ولكن لما سألتهم ببساطة اجابوني : بان المجتمع لا يرحم...يجب ان تنجب..حتى تثبت لهلك انك رجُل ( ذكر) و تثبت الزوجة بانها ولود ( غير عقيم )


سبحان الله...كيف ان مجتمعنا تافه و معاييره مغلوطة ... و الكارثة ان حتى الشباب المثقف و المتعلم و المتدين يرضخ لهذه المعايير...فتراه ينجب طفل واحد ( ليُسكت كل الافواه التي تتكلم عنه) ثم يتوقف عن الانجاب بضع سنين ..هذا في حال كان اول الاولاد وَلد ذَكر...اما إن كان بنت...فسيبقى الجميع يطالب الزوجين بالانجاب حتى يأتي الوَلد الذي يحمل اسم والده

و الويل كل الويل لمن يتاخر حملها و انجابها...اكثر من سنتين...إما الانجاب او التطليق و المشاكل او الزوجة الثانية ( الولود الودود)


دون اي اعتبار لحقيقة ان الانجاب من عدمه ..و جِنس المولود ...هو بيد الله وحده


؟؟؟؟ غريب كيف يفكر هذا المجتمع...

[إكليل]

السلام عليك و رحمة الله تعالى و بركاته.

كثيرة هي تدخلات الغير في الأسرة الحديثة النشأة و ربما تكون هذه التدخلات هي سبب الخصام و المشاكل بين الزوجين .
معك حق أن البعض يستجيب لهذه الضغوطات دون أن يراعي حاله و حال زوجه . فقد لا يستمر الزواج بضع أشهر حتى تطلق الزوجة وفي بطنها جنين فتنجبه في بيت أهلها.

البعض يرغب في تأخير الإنجاب حتى يتعرف كل طرف على الأخر فإذا تفاهما و إستقرت حياتهما إتفقا على الإنجاب لكن و بسبب التدخلات تتغير الخطة و يرضخ كلا الطرفين للأمر الواقع .

وكثير من النساء من قد تجهض لسبب ما و لكن لضغوط أهل الزوج غير مبالين تظطر للحمل من جديد أو مع رحلة العلاج و تناول الأدوية و حتى الأعشاب للحمل مجددا غير مبالين بصحة تلك الأم

[noor_ab4]

السلام عليكم
الامر راجع لزوجين وهما ليقروو اما كلام الناس فمهما فعلت لن تسكت افواه المتحدثين في مالا يعنيهم والامر يرجع لتربية
مثلا هناك حادثة بسيطة جعلتني ادرك ان الرجال ليسو كلهم كيف كيف رغم اني كنت قد تمسكت كثيرا بهذه العبارة ادركت انها عبارة خاطئة
هناك من الاقارب فتاة تزوجت ابشاب ليس له اي مستوى تعليمي بينما الفتاة متعلمة ولم يكتب الله لهما الخلفة والكل توقعو ان الطلاق امر اكيد او ان الزوج سيتزوج ورغم الحاح الوالدة وحتى الاسرة والجيران ومن له دخل ومن ليس له دخل لكنه تمسك بزوجته ويعاملها بكل طيبة مااشاء الله لا اريد ان اعينهما
اي ان الاصل والاخلاق والدين هو كل شي وهذا عامهم الخامس ومازالا يحبان بعضهما كاول يوم وبدون اي اولاد ودون اكتراث لكلام الناس

[ام نهوله]

و الله يا اخي تطورنا في كل شيئ الا هذا الموضوع بقي راسخا فينا و يرفض المغادرة و انتقل من كبار السن الى الشباب بحكم غالبية الازواج يعيش مع الاهل
اتكلم عن تجربتي الشخصية بعد اذنك طبعا
انا و الحمد لله عائلة زوجي من الطبقة المثقفة لكن بعد مرور على زواجي 3اشهر سئلت لما لا اذهب الى الطبيبة و استفسر عن سبب التاخير طبعا للامانة طلب مني هذا بكل احترام
لكنه يبقى تدخل في امور شخصية تتعلق بالزوجين فقط و انا حينها لسذاجتي افتكرت انني تاخرت كثيرا و صدفة بعد الظزاج بسنوات لما حسبت المدة وجدتها 3اشهر فقط و انجبت و الحمد لله بنتا ثم بقيت قرابة 4سنوات و اصبحو ينتظرون الولد و دخلت في متاهة و الحمد لله رزقت بولد
هكذا نحن لا نرضى ابدا يوجد من العائلات من وصل الى 8بنات فقط بحثا عن الولد و يوجد العكس طبعا

[nina1616]

في الحقيقة كلشي بيد ربي سبحانو

[عبدالرحيم75]

مجتمعنا تفككه تجمعات النسوة في المناسبات وجلوس أشباه الرجال على طاولات المقاهي
حيث أصبحت المقاهي بمثابة برلمان الاحياء والشعبية والأسر
ربي يستر

[ويناروز]

لماذا لا نرى الموضوع من زواية اخرى هي
حرص الاسرة
خوف
رغبة الوالدين في رؤية الاحفاد
وزيد حالات العقم ....ربما هو خوف اكثر من هو تدخل في حياة الزوجين
والله اعلم

[nesrinwarda]

السلام عليكم ، بصراحة أنا تحطيت في هذا الموقف بعد شهرين زواج ، بدأت الأسئلة من أمي و أم زوجي ، لكن أنا مازعفتش و قلتلهم مازال شوي باش نتقلقو، ولكن صراحة من تم بديت نتقلق، و الحمد لله رب إرزقنا إنشاء الله رب يرزق كامل الناس،

[batit18]

يا سي محمد نهار تجرب احكينا هذه الحكاية ما دام مازلت أعزب راك تشعل .

[السي محمد]

يا سي محمد نهار تجرب احكينا هذه الحكاية ما دام مازلت أعزب راك تشعل .


هههه ان شاء الله

( مارانيش نشعل) :1:

[هبة الوهاب]

صح هادي عقلية مجتمعنا ما عندك مادير
ادعولي انا

[staifia]

الناس شوي جاهلة هذا ماكان

[dark star]

هذه حقيقة في المجتمع .انا عندي عامين بدون انجاب لا مشاكل على مستوى العائلة .لكن الناس الله اكبر ! الاشاعة ورا الاشاعة حتى وصل الامر انهم طلقوني وانا لا خبر زعما عاقر ههه
الله يهدي ما خلق

[سهيلة21]

انا عانيت من المشكل منتمناهش لاي احد في البداية قعدت قريب عام باش رحت للطبيب طبعا من الشهر الاول تبدا الاسئلة بصح الضغط يبدا بعد العام الاول خصوصا اهل الزوج الطبيب طمنا قاللنا تقدرو تنجبو لي كان مصبرني زوجي قاع متقلقش كان يقولي مكتوب ربي الله يخليهلي ولد حلال بعد العام بديت نحس بالقهر خصوصا اغلبية لي تزوجو معايا ولدو كنت كي نروح عند دار راجلي يبداو في الاسئلة لي كنت نكرها متلا كانو يقولولي فلانة راهي قريب تولد هي تزوجت قبلك ولا انتي وافهمي يا الفاهمة قليت من الخرجة للمناسبات غير باش ميسقسونيش شحال بكيت بصح امنت بربي وصليت وقريت القران وكترت من الاستغفار كنت كي نروح نخدم نرو نستغفر المشكل كان فيا انا تعالجت بعد عامين حملت بصح ربي مكتبش وطاح بعد شهرين تاوع راجلي مانوش مع اني درت تاست وعندي الايكو زدت قعدت حوالي 6 اشهر وحملت الحمد لله بابني الاول ربي يحفضولي بفضل الله وكنت نرقي نفسي بنفسي والطبيب لي ننصح بيه اي وحدة هو موجود في غليزان يدعى بن دحمان والله رحت لوهران عند طبيب كبير معرفليش المشكل هو لي قالي رجعي لطبيبك بن دحمان بروفسور كبير المهم بعد ولدي مقعدش بزاف زدت بنتي الله يحفضها بدون اي علاج بيناتهم عامين بغيت نضحكم كي طولت في الاول قالو علاه وكي زدت بنتي قالتلي حماتي علاه تقلقتي كون كبرتي ولدك.............سمحولي طولت عليكم بصح حبيت نفتح لكم فلبي خصوصا واني مريت بالمرحلة ادعولي الله يحفضلي عائلتي

[loubna 91]

السلام عليكم مبروك سهيلة الحمد الله لي رزقك انا تاني داخله في العام التاني و مازال ماكتبش ربي الضغط ييجي من عيلتي و عيلتو روح عند الطبيب شرب هادي العشبه دير هادي الحجه يحكولى على الي حملو و الي ولدو الحمد لله الزوج تاعي راه واقف معاي ان شاء الله يرزق الجميع

[سهيلة21]

السلام عليكم مبروك سهيلة الحمد الله لي رزقك انا تاني داخله في العام التاني و مازال ماكتبش ربي الضغط ييجي من عيلتي و عيلتو روح عند الطبيب شرب هادي العشبه دير هادي الحجه يحكولى على الي حملو و الي ولدو الحمد لله الزوج تاعي راه واقف معاي ان شاء الله يرزق الجميع

انشاء الله ربي يفرحك بالدرية الصالحة السليمة المعافاة اكثري من هدا الدعاء *ربي لا تدرني فردا وانت خير الوارثين*

[loubna 91]

انشاء الله ربي يفرحك بالدرية الصالحة السليمة المعافاة اكثري من هدا الدعاء *ربي لا تدرني فردا وانت خير الوارثين*
امين اختي شكرا على النصيحه

[* الرحيق المختوم *]

بارك الله فيك ,,,

جاري التجربة ,,,ههه

[* الرحيق المختوم *]

انشاء الله ربي يفرحك بالدرية الصالحة السليمة المعافاة اكثري من هدا الدعاء *ربي لا تدرني فردا وانت خير الوارثين*


اللهم آمين ,,,

اختنا الفاضلة ,,, تفبلي مني هذا التنبيه ...

في كتابة كلمة ان شاء الله ..انشاء = تشييد = بناء ,,,,ان شاء الله = باذن الله ,,,


ومعذرة مسبقة اختنا ...

[سهيلة21]

اللهم آمين ,,,

اختنا الفاضلة ,,, تفبلي مني هذا التنبيه ...

في كتابة كلمة ان شاء الله ..انشاء = تشييد = بناء ,,,,ان شاء الله = باذن الله ,,,


ومعذرة مسبقة اختنا ...

شكرا اخي الفاضل وليكن في علمك انه ليس جهلا وانما خطا في الطباعة

[moonlight19]

هذا صحيح كثير المشاكل تاتي من اهل الزوج
كل شهر يسالوك كيف حالك كاشما كاين حمل ولا ......
وكانو انت رايحة تخدمي حاجة بيديك
ربي يهديهم

[أم أماني أريج]

الناس لا ترحم
و الله تعبنا من هذا المجتمع الذكوري
و المشكلة أن الزوجة هي الملامة دائما حتى و إن كانت المشكلة من الزوج
لكن يبقى على المتأخرين في الإنجاب إغلاق آذانهم عن ضوضاء المجتمع و عدم السماح أبدا لأي كان التدخل في أمورهم الشخصية و رمي كل الكلام الزائد خلفهم و إكمال حياتهم كما كتبها الله لهم بحلوها و بمرها .

[mohamed mahi]

التخمام في هذا الموضوع يمرض القلب اكثر مما يداوي الحال ، الانسان يخليها على ربي ويدير كل الاسباب ولا يسنى الشباب ممارسة الرياضة لانها تزيد في هرمون الذكورة وربي هو الرزاق

[besboussa]

Oui hada takhallof

[اسيل زمزم]

الله يبارك فيك شكرا

[gazelle03]

الله يهديييي

[mimicha1988]

صحيح وعن تجربة انا مازلت عروسة جديدة ما تميتش 4 اشهر وبدات الهدرة
ربي يهدي

[السي محمد]

ربي يرزق كل زوجة ماتتمنى و كل زوج ما يتمنى من قرة الاعين

[فراس2022]

المضحكات المبكيات في هذا المجتمع المريض : اتحدث عن تجربتي مع هذا الموضوع تخيلوا بعد زواجي بأيام فقط ذهبت في رحلة سياحية لمدة اسبوع مع زوجتي وبعد العودة اتقيت بأحد الاصدقاء ................لأصدم بسؤاله : واش كاش جديد كاش بيبي..............ولكم ان تتصوروا موقفي ...........ربي يهدي ما خلق ا

[وردة21]

وهذا الطبيب بن دحمان يدير التلقيح ولا لا

[كاميلا]

حتى الكلاب حاشاكم تولد ؟ ميكسروش راسهم في التخمام على التربية والقدرة على تحمل المسؤولية لا يخموا المهم انجاب اولاد مش مهم يولدوا حمير واغبياء ومجرمين وعاهات فكرية للمجتمع المهم اسمها ولدت لوليدها ولاد وخلاص جهل وتعفن فكري
انا كنت واضحة في هاد الخصوص في اول زواجي اللي يسقسيني نقوله شي يخصني انا وزوجي وقبل كل هذا رزق من ربي

[solinne]

!!!!!!!واش فيها يعني كي مور الزواج ترفد العروسة ديراكت لالا هاذا مش تخلف بالعكس
ولا نروحو نقولو للعروسة ديري موانع الحمل وعيشي حياتك؟انا ما نوافقش الي يفكر هكا خاصة من غير متزوج
بزاف بنات يقولوو كي نتزوجو ما نجيبوش بيبي في العام الاول بصح مور الزواج يتبدل التفكير تاعهم كامل وانا وحدة منهم اي بنت تحب تعيش احساس الحمل والامومة الي هو امر غريب عليها. واي زوجة تحب زوجها تحب يربطها بيه طفل ولا طفلة كيف كيف الراجل يحب يشوف قطعة منو في هاذ الحياة وهاذي سنة الحياة الله غالب ربي خلقنا هكذا

[sasou2013]

ياو انا بعد سمانة من كترت المشاكل اللي داروهملي سلافاتي و سيرتو لوست الكبيرة بعد عرسي بيومين مرضت مور عرسي را فيا الويل وليت الماء كي نشربو نرجعو حشاكم حاجة متشدلي في كرشي من الخلعة الي خديتها كي شافتني سلفتي نتقيا بعد سمانة زواج ههههه قاتلي سور راكي تتوحمي قتلها بووووووووووووووووه مور 15 يوم قاتلي راي تقول مرت بابا المراة اليي مترفدش الكرش من ليلتها مهيش فحلة و مشي مرا مع العلم مرت باباه متضنيش بالرغم من انو مشكيتش تكون قالتها و مور اها بايام فقط زادت قاتلي المراة متشدش بلاستها عند راجلها غير كي تولد تواااااااااام ههههههه و انا الحمد لله بعد شهرين زواج رزقني ربي و نهار سمعو بيا حامل جاو يتحاماو فيا باه يضربوني و عايروني قالو بلي مرت لوسي تولد سبوع و الغزلان و انا نولد ضبوعا و ضرك مشء الله بنتي قمر ربي يحفضهالي و كي شفوها ولاو يقولو شابة كما احنا و هوما حشا الخلقة تع ربي من فعايلهم ربي سودلهم وجهم و الخمد لله و نزيدكم لوستس الي كانت تقولي هديك الهدرة تزوجت عندها 9 شهور معندهاش دراري راهي من طبيب لطبيب تجري
الناس ربي يهديهم نساو بلي هدو امور ربي الي يعطيهم حسبنا الله و نعم الوكيل و ربي يهديهم و انما الاعمال بالنيات

[الأستاذة نفيسة]

ظاهرة عدم إنجاب الأولاد ربما نقول عنها أنها انتشرت كواقع بعض الشيء

[دكتورة حبيبة]

عجبتني كلمة الويل و كل الويل خاصة المرا هي لي تعاني منها أكثر انا تأخرت عام 3 أشهر شفت الويل بداو لوساتي بوحدخرين هذيك تزوجت معاك راه جابت ولخري تزوجت وراك ....ولخرى ....الجهل بأبي عينه وأمها

[nadine0159]

انا من وجهة نظري عادي لوكان من اول يوم كي تتزوج المراة دير نية تاسيس اسرة شيئ طبيعيىلازم اولاد انا انسانة مثقفة و زوجي كذلك و حتى لو لم ارزق بطفل في بداية الزواج لكنت ذهبت للطبيب لايهم متى شهر شهرين عام عامين المهم اذهب لانني احب الاطفال اما لو حدث طلاق او شئ من هاذا القبيل هاذي مشيئة الله سبحان الله انا مقتنعة الزواج يساوي تاسيس اسرة و الاسرة تعني اطفال اما كلام الناس كل المجتمعات العربية لها نفس الافطار صحيح هناك تفاوت من ناحية التشدد لكن كلها تنطوي تحت هدف مشترك مصلحة الاسرة و مهما كان الامر لازم مانسمحوش للناس يتدخلو في حياتنا الخاصة حتى لو كانت امي او امه الحياة الزوجية لها اسرارها و راكم فاهميم

[ام احمد اياد]

في بداية الزواج يقولو المتزوجين خلينا نعيشو شويا ولكن من بعد وحدهم يتقلقو وحب يزبدو حاجه في زواجهم ويوليو حوسوعلى الانجاب واحلى حاجه يكون عندك اولاد

[ام جبير]

ربي يرزق كل المتزوجين بالذرية الصالحة و يصلح حال الناس

[نور الصباح]

دايما زوجة اخ الزوج تكون حسودة حتى وتعود والدا عشرة

[المانجيكيو]

أنا لا أبالي بهاته السخافات و الأقاويل مطلقا ، فحياتي و مسؤولياتي أنا من يديرها و فقط

[de alger sheryfa]

نعم هي حقيقة مرة بدلتلنا المجرى تاع حياتنا

[ابو سليمان10]

الزواج و الاسرة و ما تعلق بها من اكثر مظاهر التخلف في مجتمعنا

الزواج غالبا مرتب سلفا بين رجل و مراة من طرف الاهل
الزواج يكلف غاليا استجابة لعادات عقيمة وضعها اغنياء و حملها الفقراء
ثم بعد كل هدا التعب لا يسمح لك بالتعرف على الطرف الاخر و قضاء وقت ممتع...يجب ان تنجب فورا و تاتي تربية الاطغال و التعب ...
لاكن اكثر من يتحمل المسؤولية هم النساء من ام الزوج و الزوجة و حتى الزوجة.....المراة هدفها من الزواج هو الانجاب اولا و اخيرا...لاشباع غريزنها اولا و لتثبيت اقدامها و اسماع كلمتها عندما تصبح ام الولد

لدي قريب تزوج من اجنبية...يعيش حياة رائعة...قضى معها عدة سنوات ...اولا حسنوا من وضعيتهم الاقتصادية ثبتوا انفسهم بالنسبة للسكن...قاموا بالسياحة...عاشوا علاقة غرامية حلال...ثم بعدها انجبوا طفلين قاموا بتربيتهم على اكمل وجه

اما نحن هنا...من العزوبية مباشرة...في اليوم الموالي للعرس تجد نفسك مع امراة حامل...و مزال ناس يسالوك دراهم تكاليف عرس باهظ...السكن ربما وضعية صعبة....المراة ربما لا زالت طالبة في الجامعة يجب ان تتوقف عن الدراسة...ثم ياتي الطفل..و يا ليتهم يربونه احسن تربية...نحن نراهم يطلقون ابنائهم في الشارع و هم بالكاد يحسنون المشي

النتيجة اطفال و شباب دوي تربية ضعيفة
و ازواج لا يجمع بينهم سوى الاطفال و دفتر العائلة....

[dounia el amani]

هدا مكتوب ادا ربي كتب للطفل ينزاد فالعام اللول واحد مايقدر يمنع الشيء هدا .و كي يكون الزوجان متفاهميين واحد مايسالهم

[الفارس النبيل 93]

وعلاه أصلا يمنعوا الإنجاب !!

فتحديد النسل ممنوع شرعا

وما دمت عازب يا أخي فأبقى مع شؤون العزاب ولا تتدخل في ما لا يعنيك أفضل لأنه ما يحس بالجمرة غي لي كواتو