تابع تصوروا ما فعلت زوجتي

[مشكلتي]

السلام عليكم

انا هو الشاب صاحب المشكلة


http://www.djelfa.info/vb/showthread.php?t=1771289

راكم عدلتو في موضوعي حتى نقصتو منو حوايج كنت حاب نقولها بصح المهم
انا راني قريت بعض الردود المحذوفة ونقول لمواليها ربي يهديكم وخاصة الي قالي مكش راجل وتستاهل .. والاخت الي تقول راها رواية تاع توفيق الحكيم يسامحك ربي وخلاص والله مراها كيما تصوري وانا اصلا منقراش الروايات.يعني الواحد واقع في مشكلة وانتم تتمسخرو بيه حراااام عليكم هذه مشكلتي يا خاوتي مش حاجة اخرى راني داخل في بعضايا وتفكيري حابس منيش قادر نخمم اصلا
والاخت الي قالت كيفاه عطاك باباها الرقم وهو رجل صالح ايه باباها عطاني النمرو تاعها وزيدي ماتعرفيش باباها بصح لوكان تعرفيه بلاك ما تستغربيش وزيدي هو مخدوم هاك وثقافتو وتفكيرو هاك ولكن هو ثايق فيا ويعزني
وحبيت نشكر الاخت الي دارت موضوع على جالي شكرا اختي وبارك الله فيك

لكن مشكلتنا مش كيف كيف انا دم فوادي دفعتو باه ندير العرس وندفع المهر وكل التكاليف ووقت الخطبة كنت نهدر معاها باه نتعرف عليها ولكن ماحبتش تهدر انا قلت حاشمة برك .
كانت عندها اكثر من فرصة باه تقولي بلي منيش ندور عليك بصح علاه منيش عارف
حتى تم العرس لقيتها بدلت فستناها الابيض وفسدت شعرها ومسحت وجهها من الماكياج ودايرتها على البكي ورافضة الهدرة يخي الليلة التالية حاولت اني نخليها تقولي وشبيها خطر توسوست يمكن فاقدة لشرفها يخي قالتي هذاك الكلام الي قلتلكم
انا غاضني الحال وبعد سقسيتها اذا تعرف واحد ولا قاتلي لالا وبعد كي حاولت معاها اكثر قاتلي ايه كاين واحد وبعد بدات تخلط مرة تقول ايه ومرة تقول لالا .. سقسيتها اذا هذه الشي الي درتيه ديرو مراة عاقلة قاتلي برك باه تفهم بلي منيش قابلاتك وبلي بابا سيف عليا تحب تشد تحب طلق .
قتلها كي عادت هاك راني مطلقك انا خممت نطلقها حالا بصح جاتني ثقيلة الناس راها ماترحمش ومهيش فاهمة الظرف يعني بالعربية راه انتحار اجتماعي لوكان وحدة تطلق من النهارات الاولى.. خممت في بابها في عايلتها في امها حتى فيها هي صغيرة ومش عاملة هذا الحساب وحاسباتها ساهلة وزيد مثلا لا قدر الله تصرالي في بنتي مثلا ها توجعني هذه اللقطة والله منشتيها ..هذا باباها الي فرح بيا ودارني في عينو وبعدها من التالي نرميهالو في وجهو بهذه الطريقة ها ماجاياش حتى لو اردت ننتقم منها مش هاك يكون الانتقام
بعد خممت نطلقها ونخليها في الدار يخي ذهبتلي في الحكم انا قلت راها حرام الواحد يطلق مرتو ويخليها في دارو
ايا بعد قلتلها اقعدي عندي وفوتي على الاقل شهر وراكي تروحي لداركم وبعدها رفدت وسادتي وغطايا ورحت لغرفة الضيوف وهي حتى الساعة غرفة نومي وانا من ذاك النهار مش نكلم فيها ولا حتى نحاول نشوفها كنت نتعمد ندخل في وقت متاخر باه منواجهاش تصدقو بلي نسيت حتى راني متزوج مرة كي خرجت من الخدمة رحت لدار الوالد حتى قاتلي امي راك طولت ها روح لدارك كي قاتهالي تفكرت بلي عندي دار

وفاتت النهارات يعني تقريبا 3اسابيع حوالي 20يوم ولا 21 راحت لدارهم وكي جات منيش عارف وش صارلها قع يعني تبدلت ودخلت حياتها الزوجية ولات تلبس وتتزين وتسقسيني وش نطيب ومرات تقولي وراها الشكولاطة مثلا مرة تقولي يخي راني مرتك ووزيد تضحك وتمازح وتعلق على تصرفاتي وبعد صارحتني قاتلي راني حابة نكملو

المهم انا بين امرين مرين اذا طلقتها عز عليا باباها وامها حتى هوما نساي زينين ومنيش حاب نفرط فيها كامرأة هي تصلي ولاباس بيها وزيد اذا طلقتها يخي راه ماصار والو بيناتنا كزوجين والناس ماترحمنيش
واذا شديتها ايضا هذه توجع انا لحد الساعة مغيوظ ومقنوط يعني علاه تفسدلي في ليلة من المفروض اجمل ليلة بالنسبة ليا يخي لوكان تتزين طول عمرها مش راح نشوفها اجمل من الليلة الاولى وزيد وش خصني انا من دون الناس حتى منعيشش لحظة كيما هاك هذه اكبر حاجة راها غايضتني منها
وزيد حقا خدمتهالي وقاتلي راه عندها ماض بصح لحد الساعة منيش فاهم كيفاه هذا الماضي راها مخبية عليا التفاصيل .....يعني لو كملت معاها راح نكملها موسوس منقدرش نعيش معاها وانا نفكر في طرف ثالث معانا ..لو فرضا كان هو نصيبها رايحة تفرح بلليتها الاولى وتعيشها بينما كي عدت انا لالا دارت وش دارت
انا باختصار راني مزلت ما دخلتش في حياتي الزوجية وصدقوني مرات نقول نكمل معاها وخلاص بصح كي نجي من الخدمة فرحان خلاص نقول زعما راني لداري وزوجتي بصح هي تفتحلي الباب وكي نشوفها نتفكر واش دارت مالا نرجع لعادتي
راها ذهبتلي خلاص

[فرح حياتي]

ربي يكون معاك اخي
انت سالت عليها قبل ماتديها راك تقول كانت جارتكم
انا نقولك كانت قادرة تخبي عليك هذا الامر وتعيش معاك عادي وهي في قلبها شخص اخر بصح قلت مرة تقولك ايه مرة لالا
يعني ربما اخترعت حكاية فقط
حاول تبحث على السبب الحقيقي لي خلاها تتصرف معاك بهذه الطريقة
وماعندك حتى حل غير الاستخارة اما ربي ينزل في قلبك سكينة اتجاهها او انك ماتقدرش تكمل معاها
اذا قررت تكمل معاها ماتفكرش في باباها وانو شخص دار فيك ثقة لازم تكون مقتنع اذا سامحتها لانك مش راح تنسى هذا الشي مهما طال الزمن وجبتو اولاد

[رمزي فارس]

أخي، ما حدث له احتمالات كثيرة ، ويطرح استفهامات أكثر، لكن أعتقد أن خوفها منك دفعها لاختراع القصة، وفرضا أن لديها ماضي، هل هذا نهاية العالم؟ هل تحكم عليها بالطلاق وأنت لديك ماضي أيضا؟ تمسك بها وأعد صياغة اللحظة الأولى ، عد إلى ليلة الدخلة واحجز في فندق راقي واطلب منها أن تتزين عند حلاقة ، وأبدأ معها من جديد ، فهي تستحق كل الخير ، أحسن إليها يحسن الله إليك، ولا تسمع لصوت الوسواس ، وإن شاء الله خير

[زينب 83]

يا اخي ،اولا انت إنسان عاقل و رزين ماشاء الله لانك تعاملت مع الامر بروية

ثانيا انا نظن بلي زوجتك ما عندها لا ماضي لا والو راهي اختارعت.هذه الحكاية فقط باه تقلقك لانو ممكن أهلها اجبروها على الزواج او كانت ، لي عندهم ماضي صح مايهدروش عليه راهي باينة صغيرة و مازال خفيفة ، الدليل انها تغيرت في مدة قليلة بعد ما شافت صبرك و تعاملك الطيب معاها

و اخيراً يا اخي ماتسمعش للشيطان لانو يحب يخرب البيوت ، قدر الله و ماشاء فعل أنسى الماضي و إبدأ صفحة جديدة معاها و توكل على الله و خليك من الطلاق و المشاكل و ربي راح يعوضك خير ان شاء الله

[بلال كريم]

السلام عليكم
ما خاب من استخار و استشار
و عسى ان تكرهوا شيئا و هو خير لكم
انا و حسب ما قرات من قصتك

ارى فيها امرين
الاول و هو الارجح عندي
انها ربما كانت فعلا متعلقه بشخص اخر و تحبه حبا شديدا و تتمناه في حياتها و لكن شاءت الاقدار دون ان ترتبط به فارتعبت الفتاة و التي اعتقد انها صغيرة في السن
و فقدت رشدها بل و قد صارحتك منذ البداية يعني لم تكذب عليك و سبب عدم اخبارك في الهاتف في فترة الخطوبة ربما هو داعي الخوف من مواجهة اهلها في عدم اتمام مراسيم العرس و الخ
و تصرفك يدل على نبلك و رجاحة عقلك
اما سبب تغيرها معك من السئ الى الاحسن بالرغم مما اخبرتها به عما نويته
يدل على انها رات تصرفك معها بانك لست الوحش الذي يريد ان يفترسها و انك لا تريدها الا عن حب و عن طيبة خاطر

فقلبت الامر في راسها و وجدت انه من الصعب في هذا الوقت ان تفرط في رجل مثلك

فغيرت رايها و الت الا ان تكمل معك

و تصرفاتها هذه اعيد اخي تدل على صغر سنها
و الثاني هو ربما تكون كما اشار بعض الاخوة مريضة ربما لذلك اسال اهلها على حالتها النفسية و صحتها ربما يتبين لك شيئا خفيا

اتكل على الله و احزم امرك ما دمت في بداية الطريق خاصة و انك كما اسلفت لم تمسسها و لم تاخذ حقك الشرعي منها
لذلك انت لازلت في بداية الطريق و ايما ستقرره لن يكون به اثر سلبي كبير
اللهم الخسائر المادية و ان كانت لا تقارن بالامور النفسية فهي الاكثر ضررا

و الله و لي التوفيق و السداد

و الله اعلم

[ولد الشاوية]

والله يا اخي غظتني بزاف حسيت فعلا بالجحيم ليراك تعيشو
الاعضاء الاناث ما يقدروش يعرفو حرقة الرجل لما يتقاس في الكرامة و يحس بلي وحدة ميش قابلاتو
يا اخي قصة مثل هذه حدثت لقريبي و لكن قريبي هو لي كان رافض الزوجة لكن من كثرة الحاح العائلة
قبل يكمل الزواج و منذ ذلك الحين طلق زوجته عدة مرات حتى وصل الامر الى الفتاوى خاصة و انهم رزقوا باولاد
و لذلك يا اخي ان كان صعيب عليك باش تكمل حياتك معاها غير افرق السوق خاصة قبل مجئ الاولاد
لان الحياة الزوجية راهي مسؤولية و بعض الاحيان حتى الازواج المتحابين يصلوا لحد الفراق
استخير ربي سبحانه وباذن الله سيهديك لاحسن الحلول

[خالد عنابي2]

ربما كانت خايفة فقط وهذا ما دفعها للتصرف

وربما فعلا والديها سيفو عليها ولكن بعد ذلك عجبتيها وبدلت رايها

ابغض الحلال عند الله هو الطلاق ولهذا ماتروحش ليه وما تسمعش لابواق الشيطان

احب الاعمال عند الشيطان هو التفريق بين زوجين

جند ابليس لما واحد يقول فعلت كذا وفعلت كذا يقول له ما فعلت شيئا ولما واحد يقول له فرقت بين زوجين يقول له نعم انت اقترب

يقربه منه لان ابليس يعظم هذا الفعل

والزواج سمي بالميثاق الغليظ ليس الامر هين

الطلاق تلجئ اليه فقط في الحالات المستعصية التي لا اصلاح فيها

وانت زوجتك الان هي من تريد الاصلاح وتتقرب اليك

[*أم كوثر*]

السلام عليكم
الاخ الكريم اي واحد مكانك سيحس بما تحس به الان وهذا سيؤثر سلبا على قراراتك
بما اني امراة ولي بعض الخبرة سانصحك والله على مااقول شهيد
مستحيل اي بنت عاقلة تصارح زوجها في ول ليلة زواج بانها تحب اخرا
لانو كاين رجال متهورين وممن تثور ثائرته ويطردها من بيته دون مراعاة لكلام الناس وغيره

ممكن جدا الفتاة صغيرة او كانت تخاف منك او ربما لم تتعارفا بشكل يجعلها تراك كما تراك الان
لهذا اختلقت هاته القصة لتبعدك عنها
فمن قلبها متعلق باخر لدرجة ان تصارح زوجها وبكل جرأة لايمكنها ان تتغير في ظرف ايام
لهذا لاتفتح للشيطان بابا واسمع لها واعطها الفرصة وماحدث كان بينكما فلاتفضحها وتفضح نفسك ومن ستر نفسا ستره الله يوما القيامة
وليكن صنيعك هذا ابتغاءا لمرضاة الله
وسوف ترى كيف ان الله سيبدل غضبك وحزنك فرحا وسعادة
الفتاة صغيرة وممكن طائشة لذا امامك فرصة لتقوّم سلوكها وكما نقول بالعامية ...تربيها على يدك...
راك خسرت عليها دم قلبك كما قلت
.........
كما ارجو ان تكون ردود الاخوة داعمة وبناءة وابتعدوا رجاءا عن الكلام الجارح ولاتقذفوا شخصا بما ليس فيه فالله وحده يعلم ماتخفيه الصدور.

[younes29]

السلام عليكم
بدايةاا اقول لك انو الرجال لي كيما نتا راهم قلال في هدا الوقت ما شاء الله عندك عقل يوزن بلاد و سيرت مشكلتك كما يلزم.
و رايي من راي اختنا ام كوثر التي وفت و كفت بارك الله فيها

[dark star]

يلا اخي شحال من يوم وانا نخمم فيك ونقول ياربي فرجها عليه
بارك الله فيك كنت رزين وعاقل وماتسرعتش . قااقصتك وانت اعلم بها لكن من وجهة نظري العن بليس وكمل حياتك اجلس معاها وتحدثو بواقعية حاول تفهم منها وحلو الامر بيناتكم وخليك من سياسة الهروب الى الامام .قد تكون الفتاة مجبرة وما تعرفش شعور الفتاة المجبرة تقدر تقتل روحها من اجل ذلك وكونها ما حكاتش لك قبل الضغوط ما تعرفهاش ! بلاك كذبت في القصة المهم تحاور معاها باش توصل للحل البنت ليست كالرجل عاطفتها تسبق عقلها
اعلم ان القرار صعب لكن هذه القضية ما يحلها لا انا ولا اي واحد في الدنيا ربي فقط هو الذي يعلم الخير استخير كل وقت كل صلاة واسال الله بقلب صادق ان يريك طريق الحق
واعلم انهاله ما ندم من استخار الله وشاور المخلوقين
وتذكر قليل من البيوت يبنى على الحب هذه مقولة عمر ابن الخطاب
ملاحظة اخي قلت لها راني مطلقك المفضل تسال العلماء فلفظ الطلاق يويوقعه فقط لتستبرأ لدينك

[الصديق قروف]

يااخي الله يبارك فيك
ممكن كشما سمعت عليك من كلام اناس ازائد واشاعات وخافت
لان تصرفها غير عادي وتغيرها في ضرف قصير ايضا غير عادي
بلاك راهي حساسة بزاف
يعني ممكن انها اختلقت الحكاية فقط
‏ ولمعرفة ذالك افتح لها مجال لنقاش
متخممش فكلام اناس
ديما دير افعالك على وجه ربي
ممكن تكون لك سبب في دخول الجنة
ربي يهنيك
قادر لم تعلم اسبابها تولي تحبها ويتغير تفكيرك اسلبي

[ام رضوان]

بسم الله الرحمان الرحيم

اولا اخي الحمد لله كي رجعت وعاودت كلمتنا والله انا ملي قريت مشكلتك وانا محيره عليك. لاني حسيت بيك وواش راك تعاني.

حبت نقلك بلي راك راجل وولد فاميليا وخاصة كي ماقلبتهاش في نهارها لانك تخاف ربي وهذا احسبو ابتلاء من عند الله.

وزوجتك راهى طفلة صغيرة وكيما قالو الاخوة مستحيل اي امرأة ليشتا مجنونة تقول لزوجها في ليلة الدخلة نعرف واحد غيرك راهى

معرفتش برك او يمكن كانت هى المدللة في دارهم وحبت تصصغر عليك

المهم اخي استخر الله ولاكان لقيت روحك قابلها عيش معاها وربيها كيما تريد انت وراك صح مجروح بصح مع الوقت راك تنسى وربى

يجمع بيناتكم بالخير . امين.

[ابتسام smile &hope]

السلام عليكم ورحمة الله وبركاته اخي الكريم
بداية ارجو ان تقبل اعتذاري عن تعليقي السابق
يعلم الله انني كنت افكر في مشكلتك صباحا

اضن انك من طينة ندرت في وقت كثرت فيه الانانية والتهور بارك الله فيك
اما عن زوجتك الفاضلة فما قالته لك ليلة الزفاف سببه واحد من ثلاثة :

1- كانت تحب شخصا ولصغر سنها لم تعي بشاعة ماقترفته في حقك

2-كانت خائفة منك فما نسمعه عن تللك الليلة مرعب فهناك من تصاب بالغثيان وهناك من تصاب بالاغماء من شدة الخوف

3-زوجتك تعرضت في طفولتها لتحرش (ليس اغتصاب) جعلها تكره الرجال عموما
مع انني استبعد الاحتمال الاول

اما امر بقائك معها فراجع لجوابها وعليك ان تستحلفها بالله حتى تعلم الحقيقة فانت لن تذوق طعم السعادة في حياتك اذا تاكدت استحالة ان تحبها كما انك اذا ابقيتها على ذمتك وانت كاره لها فهذا ظلم ايضا

كما ان بقولك راني مطلقك فقد وقعت طلقة واحدة والله اعلم فقد كنت غاضبا لكنك كنت تعي ماتقول انصحك بسؤال امام فهو ادرى مني

- إذا كان المرء مؤمناً حقاً فإن كل أمره خير كما قال عليه الصلاة والسلام : " عجباً لأمر المؤمن إن أمره كله خير ، وليس ذاك لأحد إلا للمؤمن ، إن أصابته سراّء شكر فكان خيراً له ، وإن أصابته ضراّء صبر فكان خيراً له " [1]

ارجع واكرر اعتذاري
فرج الله همك
ارجو ان تطمننا عن حالتك قريبا

[loulou88]

السلام عليكم
اخي الكريم انا قريت قبلا مشكلتك و دعيتلك بالخير ربي يفرجها عليك يا اخي

اخي لا احد يستطيع ان يحس بما تشعر به انت
ولكن من المفروض والاصل اننا ندلك على طريق الخير
اخي صلي صلاة الاستخارة بقلب مقبل على فعل الخير واترك امرك بين يدي الله
اخي الكريم لعل في زوجتك خيرا كثيرا
لعلها صغيرة وكانت خائفةوتصرفت بتهور في الليلة الاولي...
اخي ننتظر منك الجديد
وفقك الله لما فيه خيرااا يا اشهم الرجال

[رثاآء]

السلام عليكم
لم أستطع أن أمر مرور الكرام عن هذه القصة
أخي الكريم حسب ما وضح لي أنك إنسان متربي وعلى خلق لذلك قبل أن تتسرع إلتزم بالتالي
بما أنك تقول أنها متربية وتصلي وعلى خلق
جيبها قابلها وقولها يا بنت الناس شوفي نا راني باغي نكمل معاك بصح على شرط احكيلي من الألف إلى الياء على هذا السيد اللي بغيتيه وصارحيني باه نقدرو نبداو من أول وجديد لأن العلاقة الناجحة أساسها الصراحة والثقة وإن انعدم طرف من الطرفان تلاشت وضاعت
ممكن تكون علاقة عابرة عاشتها وممكن ما كانتش عندها أي علاقات المهم انت اسمع منها وشاور عقلك وقلبك
ممكن أن يكون إمتحان من الله عز وجل
انت سألت عن الفتاة؟
يعني هل قالولك بلي شفناها مع فلان وعلان؟
وبالنسبة لليلة الأولى ما وقفتش عليها تفوت الليلة الأولى ليلة الأحلام ومن بعد تعيش في كوشمار معليش الايام راهي جاية
واللي فيها الخير ربي يجيبها
وفي الأول والأخير إستخر الله سبحانه وتعالى باه ما تظلم روحك وما تظلم البنت
مادام انت راك ناوي تطلق جرب أعطي فرصة لعلاقتكم وشوف لكن انوي نية حسنة في الأول
راك تقول بلي تبدلت بالاك احكات للوالدة نتاعها ونصحتها وتكلمت معاها ما تنجمش تعرف لذلك يجب المصارحة والإنفتاح للطرف الثاني
لأن الترهيب والعنف ما رايح يدير والو
موفق
السلام عليكم

[حنين فتـاة]

السلام عليكم
واش نقلك يا اخي ربي يهدي سركم ان شاء الله
من المفروض الطفلة كون تحدثت معاك قبل الزواج وتحلو الالمر ماشي تنغص عليك ليلة فرحك
وتانيا عندك الحق كي قلت راني خايف نعيش مع الوسواس سيرتو كي عطاتلك كلام غاتمض عن ماضيها
انا برأيبي ديرو جلسة صراحة وتحلفو باش تقولو الحق هي تقول لي عندها وانت تقول لعندك وشوفو حل يناسبكم

[سيرين 5]

الحمد لله 99 بالمئة ردود إيجابية و أغلب ردود رجال و ماشي نساء باش ما تقولش رانا نتعاطفو مع البنت ؟ الله يبارك على عقلك أنت باين انسان طيب و متأكدة أنو ربي ما دام سهلك باش تزوجت هاذ البنت معنتها هي إنسانة طيبة ياك ربي قال الطيبون للطيبات ، ان شاء الله المرة الجاية تبشرنا بلي راكم عايشين لاباس و الحمد لله ندعيلكم من كل قلبي ربي يجمعكم في الحلال ان شاء الله، ربي يسهلك ان شاء الله

[milissa21]

اخي احييك على اخلاقك و رزانتك و الناس اللي كيما انت راهم قلال و هادي البنت لوكان كانت نيتها ماشي مليحة ولا غلطت وعندها ماضي سيء ما تحكيلكش و كانت قادرة تخليها في قلبها صدقني نعرف بنات تماداو في ماضيهم الى اقصى الحدود و نهار عرسهم يولو بنات فاميليا و عمرهم ما هدرو مع راجل وزيد كاين الوف تاع بنات عرفو و كانت عندهم علاقات قبل الزواج و لكن كانت مجرد عشق او اعجاب او ممكن تعارف و هادي تالمون مادارت والو صارحاتك و ما خدعاتكش و راك تقول تغيرت معاك الى الاحسن و عرفت غلطتها سامحها و انسى و ما تعطيش فرصة للشيطان يفرق بينكم روحو للفندق و كان اول يوم زواج و لكن قبل كلشي ديرو قعدة تاع صراحة و كل واحد يحكي واش عندو هكدا تتهنى و ما يبقاش في قلبك حتى شي من جيهتها ما راكش الاول ولا الاخير اللي صرالو موقف كيما هكا ولكن الفرق انو زوجتك صارحاتك اخزي الشيطان اخي و نحي الوسواس من راسك و عيشو حياتكم عادي و ربي يجازيك خير لانك ماتسرعتش و رديتها لدارهم و كلام الناس نتمنى يا اخي ماتسمعش للي يقول ماراكش راجل ولا طلقها لانو رجال كثير مزوجين و نساهم كانت عندهم علاقات او حبو قبل الزواج ربي يهدينا

[0ibtissam]

يا أخي باين بادات توالف بيك وبدت تحبك حول تعيد أول ليلةأديها لحفافة تمشط مشط تاع عروسة ويزيد أكريلها لغب بلونش أكيد بعد الريح تنس كلش وان شاء الله ربي يهنيكم زويد صلي صلاة استخارة اذا راك خيف من شرفها تقدر تديها لطبيبة تتأكد ربي يهنيك .... نعرف وحدة مكتش حب رجلها من أول ليلة قلتلهم ليس رجل فضحتو بين الناس ربي يهدي ما خلق

[ماريـام]

مثلما فلت لك اخي

انت في قرارة نفسك حابها و لكن لم تقدر ان تنسى تصرفها

انت كامل واش صرفت تخليها http://www.djelfa.info/vb/images/smilies/biggrin.gif هاذا حلالك اخي و هي حابة واش راك تستنى

نحكيلك حكايتي انا و زوجي قبل كنت مخطوبة و زوجي الحالي التقى بي و حب يخطب في الحقيقة خطيبي الاول مكانش رسمي يعني تكلم مع ابي لكن ابي ممدنيش قعد يخمم

زوجي الحالي حاول و حالو حاول معي و انا دائما نرفضو ههههه هبلتو و في الاخير حلف فيا و قالي غير انتي منزجش بيك هو كان استاذي و حاب يخطب بالذراع يرسل لي و لامي و اهلي ههههههه بالذراع

المهم راح اعتمر اكثر من مرة و يطوف و يدعي ان ربي اصلح فلانة اي انا و ان تكون زوجتي و ارزق منها بنين و بنات

بعدها خطبني عادي و انا قبلت و الان انا زوجته و هو شخص رائع الحمد لله و كنت نكرهو بلا سبب لكن الان علاقتي رائعة معه الحمد لله

قصتي بالملخص هذه قلوب و بيد رب العالمين ادعي الله يصلح حالها و راهي حلالك و مزالك تحج و تفاكي في المنتديات روح لحلالك و اخطي الشيطان

و باش تنسى اعلم انو صعب لكن ماشي مستحيل حاول تجدد ليلة الدخلة مثلا اكري في اوتال محترم او روح رحلة انت و زوجتك في مكان مميز يوم لا ينسى http://www.djelfa.info/vb/images/smilies/19.gif

انا نقولك هاذا الكلام لاني اعلم انك حتى لو طلقت راه تتوسوس من كل فتات تروح تخطلها ناهيك عن انهم يقولك هاذا طلق مور شهر والناس مترحمك لا انت لا هي و رد بالك من صديقات زوجتك ممكن هوما السبب الاساسي عمروها عليك ممكن هي نسة و صحابتها عمروها كي قالتلهم بابا قبل بفلان و انت تعرف , ,, مجرد رءي نعرف شعال من صديقات خربو بيوت صحاباتهم برك مرض نفسي

[ماريـام]

احببت ان اصحح لك معلومة فقط

http://www.binbaz.org.sa/mat/12831

و هنا نجد ما يخص العدة http://islamqa.info/ar/12667

[رندة نهاد]

لسلام عليكم
في رايي اعطيها فرصة ثانية من جهة غلطت معاك يعني صح غلطت بصح فرصة اخرى لربما تتتبدل نظرتك ليها خاصة انها بدات تتعلق بيك وهذا واضح من خلال ما قلته مكانش الي ما يغلطش وانت قلت انه عايلتها ماشاء الله وباباها ما يستاهلش العيب باينة مخها موش في راسها وصغيرة تالي محال تقولك كلام كي هكاك وتكون واعية نظن وحدة ناضجة ما ديرهاش المهم حاول تمد لها فرصة اخرى اتمنى لك حياة زوجية سعيدة ان شاء الله معها ربي يوفق
Randa Nihad

[zalamite]

ياخي ربي بكون معاك ان شاء الله وضعت في موقف و اختبار صعب للغاية الحمد لله انك تجاوزت الصدمة الاولى بحكمة لكن الان الكرة في مرماك اما ان تمسكها او تطلقها لكن شاور عقلك مليح... لانه احس انك تكن بعض الود لهده الفتاة التى لم تراعي شعورك و تضحياتك لاجلها ربما هدا راجع الى صغر عقلها لكن نصيحتى اليك هى.. اعطي لها و قت ما دامت عادت الى رشدها و عاشرها بالمعروف و احكم عليها من خلال تصرفاتها في الفترة المقبلة ..
سامح او متنساش او ربي يهدي ما خلق.

[MuSLiMaN]

السلام عليكم
الاخ الكريم اي واحد مكانك سيحس بما تحس به الان وهذا سيؤثر سلبا على قراراتك
بما اني امراة ولي بعض الخبرة سانصحك والله على مااقول شهيد
مستحيل اي بنت عاقلة تصارح زوجها في ول ليلة زواج بانها تحب اخرا
لانو كاين رجال متهورين وممن تثور ثائرته ويطردها من بيته دون مراعاة لكلام الناس وغيره

ممكن جدا الفتاة صغيرة او كانت تخاف منك او ربما لم تتعارفا بشكل يجعلها تراك كما تراك الان
لهذا اختلقت هاته القصة لتبعدك عنها
فمن قلبها متعلق باخر لدرجة ان تصارح زوجها وبكل جرأة لايمكنها ان تتغير في ظرف ايام
لهذا لاتفتح للشيطان بابا واسمع لها واعطها الفرصة وماحدث كان بينكما فلاتفضحها وتفضح نفسك ومن ستر نفسا ستره الله يوما القيامة
وليكن صنيعك هذا ابتغاءا لمرضاة الله
وسوف ترى كيف ان الله سيبدل غضبك وحزنك فرحا وسعادة
الفتاة صغيرة وممكن طائشة لذا امامك فرصة لتقوّم سلوكها وكما نقول بالعامية ...تربيها على يدك...
راك خسرت عليها دم قلبك كما قلت
.........
كما ارجو ان تكون ردود الاخوة داعمة وبناءة وابتعدوا رجاءا عن الكلام الجارح ولاتقذفوا شخصا بما ليس فيه فالله وحده يعلم ماتخفيه الصدور.


بــآرك الله فيك أختي نعم الرأي هو

فيا أخي لا تسمع لدعاة الفتنة الذين ليس لهم لا بيت و لا أولاد و لا تفتح بابا للشيطان

أسأل الله أن يسعدكما

[إكليل]

والله مشكلتك محيرة و ربي يكون في عونك .

قبل مدة سمعت قصة لرجل حدث له ربما أسوء مما حدث لك تزوج الرجل من إمرأة و في ليلة زفافها إكتشف أنها حامل المسكين صدم و لم يدري ما يفعل . فلم يخبر أحدا و ستر على المرأة و لما ولدت أخذ إبنها إلى المسجد قبل حضور المصلين لأداء صلاة الفجر .
ثم حضر الصلاة و إذا بالمصلين يسمعون صوت بكاء طفل فاندهشوا لما وجدوا طفل رضيعا ملفوفا في قماطه و إحتاروا من فعل هذا و ماذا يفعلون بالرضيع فقام الرجل من مكانه و قال لهم أنا أربيه و بالفعل رباه .
وإذا بيوم من الأيام جاءه إمام المسجد فقال له أخبرني ماذا فعلت في حياتك حتى رأيت الرسول في المنام يبشرك بالجنة فلم يخبره الرجل فألح عليه الإمام فأخبره بالقصة.

يا أخي صحيح أنك مصدوم و أنت أمام إمرأة أقل ما يقال عنها أنها حمقاء بلهاء دمرت حياتها بيديها لم تحسب للأمر عواقبه و ظنت و كأنها في إحدى المسلسلات التركية .

[aymen01]

يا ولدي خليك من هاذو لي راهم يهدرو

كفماه تقولو نحب اخر في يوم دخلتها على جال خايفا يعني حابا تطلق في يومها و لا يضربها و تفسد حياتها و يطلقها

خليكم من التمسخير اذا كانت خايفا تخسر حياتها وعلاه لعبه تقولو نحب راجل غيرك

و حسب التمخميخ نتاعي راهي رجعت تزين لك و تقصر معاك على جال خافت طلقها باسكو عمبالها ماراحش تزوج بعد ما تطلق

بلاكش حاسب روحك عايش وحدك البنات نتاع دركا تبدلو كل طفله عندها حبيبها و لا صديق تهدر معاه

[النجمة القطبية]

يا اخى الكريم
الفتاة حسب كلامك صغيرة في العمر والنساء ناقصات عقل يعنى عقلها خفيف مازال منضجتش
يعنى فكر معايا منطقيا لو كان عندها العقل مكانتش استنات حتى يوم العرس واتصرفت هذاك التصرف كانت تقدر تفسد الامر قبل ما يتم الزفاف
الفكرة ان االبنت احيانا تكون متسرعة ومتعرفش عواقب الامور واكبر دليل على كلامي انها مترددة مرة تقول نكمل ومرة تفسد فرحتها وفرحتك
اعتقد اذا كان والدها سيف عليها الزواج تصرفها الذى حدث شبه طبيعي مقارنة بسنها تصورنفسك مكانها والضغط الدى ربما مرت به واحتمال وارد انها لم تكن تريد الزواج اساسا لصغر سنها وليس لوجود شخص اخر فكبتت الامر فيبيت اهلها ثم انفجرت بعد الزواج
المهم يا اخى الكريم باين عليك عاقل ماشاء الله وناضج انصحك ان تتريث
اصبر يا اخى الوقت كفيل بان يبين لك حقيقتها لانها تبانلي جاهلة شوية وغيرناضجة لانها تعتقد انها بين لحظة واخرى تقدر تبدللك رايك هي لا تعرف بعد عواقب ما فعلته لذلك انصحك ان تعاقبها في البداية حتى تندم على فعلتها وتعرف قيمتك
يعنى بصراحة لا انصحك بالطلاق الزواج نصف الدين والطلاق ابغض الحلال واغلب الظن ان سبب تصرفها تزويجها دون استشارتها لا اكثر فانتقمت من نفسها في الوقت الغير مناسب وهذا غباء
اصبر يا اخي ومتبينلهاش بلى تحبها خليها تندم على فعلتها ندم شديد حتى تنضج شوية وتتعلم تحافظ على بيتها وراح تخليها تتعلق بيك خاصة مع صغر سنها
واذا بقي في قلبك شك زيد سقسيها وسقسي عليها مع انى لا اعتقد ان هناك شئ لو كان هناك حاجة متقولكش اصلا ولن تفضح نفسها
بالاك شافت هذي اللقطة في كاش فيم تركي او هندي :d:d واعتقدت انك ستتصرف مثل البطل صدقني اخى بعضهن يملكن خفة عقل مدمرة للاسف المهم يا اخى انصحك ان تاخذ وقتك وان شاء الله كل خير
ربي معاك اخى الكريم