دبرو عليا وش نقدر نغرس

[كلي أمل]

السلام عليكم

عندي بمنزلي حوش كبير نوعا ما المهم عمل بيه زوجي احواض وملئها بالتربة راني حابة نغرس فيهم نباتات ليس للزينة وانما نستعملها في الطبخ

....دبرو عليا وش نقدر نغرس وما هو الوقت المناسب للغرس

بارك الله فيكم

[moslihe29]

تقدرى تغرسى الحبق النعناع الفصبر القصبر والحبق بالبذور اما النعناع بالجذور حتى الطماطم تقدرى تغرسيها فى الاحواض الفراولة كنت وحد العام اشتريتها فى احواض صغيرة ومدتلى عدة فروع واكلنا منها ومديت منها الليمون فى الارض وليس الاصيص

[سمراء الدنيا]

ماشاء الله ... شحال تعجبني جنينة في البيت ... خسارة ما عنديس لوسع و لا كنت زرعت كل خير
لكن نعطيك مثال امي عندها مساحة في بيتها .... غارسة فيها القصبر + النعناع + شجرة ليمون + زعفران + بعض الاعشاب الطبية مثل اكليل الجبل و الشيبة و هي تشيه الشيح و فليو ...اضافة الى الازهار

ان شاء الله تتوفقي و ترجعيها جنة و تاكلي مما غرست يداك

[كلي أمل]

ربي يخليكم اخواتي على تدخلكم ...استفدت من نصائحكم

اختي " سمراء الدنيا " راني بقيت واء زوجي حتى قبل نغرس وش نحب انا ..هوكان حاب نباتات للزينة لكن انا نحب نخرج للحوش ونجني مما غرست يداي حتى استعمله

مباشرة في مطبخي .....ربي يرزقك بالوسع ويعطيك جنان كبير تغرس فيه واش تحبي

[فتيحة تفاحة]

تقدري تغرس الثوم الخس البصل اكليل الجبل النعناع الحبق شجرة ليمون الدالية والتين ولغوز

[Maria dadi]

انا عندي حديقة صغيرة قسمتها الى عدة مستطيلات وملئتهم تراب وراني
زرعت فلفل حار وفلفل حلو وطماطم وخيار وقرعة وسلاطة ومزال بلاك
كاش ما نزيد

[كلي أمل]

الله يبارك اخت مارية دادي.....خضر متنوعة ما شاء الله

[سلمى انا]

اغرسي المعندوس + الدبشة + النعناع

[ام البنتين]

تغرسي شجرة التيزانة .....راهي مليحة رائحة زكية و تستفيدي منها ..وكلك النعناع

[امونة الشاوية]

ننصحك اختي اغرسي شجرة التيزانة
ولقميها بالقارص تستفادي منها
وتربحي اجر مدي منها للعجايز للمريض للنفساء

والباقي لا استطيع الافادة لاني لا عارف الاشجار المفيدة
ان شاء الله لما ندير جنينة اول شجرة نغرسها هي شجرة التيزانة والليمون

[دفى الضياء]

أنا لو منك نغرس الخضروات لي ذكروهملك الإخوة بالإضافة لنباتات الزينة التي تكون في الأصص نحيط جناني بيهم
ربي يسعدك أختي

[fadi02]

انا ما نعرفش نغرس و لكن لبصل الي ينبت لي نغرسو و راني نحي منه و نطيب

[lame]

انجح شي تغرسيه ومردوده كثير ان شاء الله

الدنجال والطماطم والفلفل والكرجيت ( الكوسة )


والنبتات الصغيرة مثل المعدنوس والبقدونس

[malikdz01]

الحديقة للزينة وليست للاكل ...حبيتوديرو كيما بوبقرة مع الباترون نحالو الحشيش والنوار وغرس البصلة والثوم هههه

[djazia87holi]

ماشاء الله حبيت نسقسيكم واش وقت مليح تصلح الزراعة فيه افيدونا

[ikpanda]

النعناع يطلق ريحة مليحة و تحتاجيه

[* دموع الشوق *]

السلام عليكم
عندنا حديقة صغيرة غرسنا فيها مؤخرا الجورجات (قرعة) و الجزر و الكابويا (يبست البذور من الكابويا بعدما غسلتها و صارت جاهزة للزراعة)
جبنا شتلات البصل و الخس لكن الخس للاسف اكلته الطيور
البذور تباع عند المحل المتخصص 20 الف تجيبلك كمية لا باس بها من بذور القرعة و الباذنجان و الجزر و غيرها
و بعضها غالي تشري كمية من 40 الف و اكثر مثل الطماطم
و كاين اكياس معظمها ب 15 الف اعشاب ، فلفل بارد و حار الخ.....
و موجود الشتلات معظمها ب 10 الاف حنا شرينا البصل و الخس و الكرنب البلدي (الورقية ) و النعناع
و بعض البذور تتحصلي عليها من الثمرة مثل الفلفل الحار او البارد . الكابويا .. البطيخ بانواعه... الطماطم...... الفراولةالخ
و ممكن تغرسي فصوص الثوم الصغيرة جدا الي تتعبك في التقشير و كل واحد منها يعطيك راس
و ايضا بعدما تنجحي في الغرس باذن الله تتركي بعض النباتات بدون قطف من اجل البذور مثل البصل و النعناع و القصببر....
عذرا على الاطالة و الاطناب و عدم الترتيب
كتبت بعجالة اتمنى اكون افدتك
ديري في يوتيوب زراعة الاسطح كاين 7 اجزاء راح تستفادي كثييييييير
او اكتبي mos elk
سلااااااااام

[اشراقة منارة]

السلام عليكم الخوات مخلاو والو عطاوك كلش انا عندي النعنا والفلفل حار والرند شجرة صغيرة نديرو في الطياب ريحتو روعة وتنكه بيه اخضر

[Rival1]

اغرسي الخزامة و الكليل