افيدوني الطلاق او البقاء

[مشكلتي]

انا متزوجة منذ سنتين، عمري 26 سنة، مهندسة دولة في البيولوجيا، زوجي اشترط علي عدم العمل او الدراسة، و انا وافقت بحسرة كبيرة بسبب حبي الكبير له رغم ان طموحاتي كبيرة، قلت نتلهى بتربية اطفالي، تزوجت و تأخر الحمل، و بدأت التلطيشات من أهله، عملت كافة الفحوصات و كان كلشي سليم و الحمد لله،و بعد 7 اشهر كانت الصدمة لدى زوجي عقم ثانوي، و مشكلته كبير من المستحيل ان يلد، حتى بالحقن المجهري الاحتمال ضئيل جدا، جربنا كل شيء يخطر بالبال، و لا يوجد اي تحسن لان السبب جيني، عييت نستغفر و ندعي ولله منجمت، معندي لا اخ و لا اخت، انا وحيدة أمي، كي نجبدله على الخدمة يقولي يالخدمة يالتفركيت، بديت نخمم فالطلاق بصح راني خايفة من المجتمع، خصوصا ان امي امرأة مطلقة، زوجها ابوها بالغصب من ابن اخيه و من بعد ندم و راح جابها و طلب منهم يطلقوها، و انا كنت الضحية الاكبر، الحمد لله امي استاذة و متدينة و الكل يشهد باخلاقها، اريد ان اضع طفلي في حضنها كي اعوضها بالقليل، هي رفضت بزاف الخطاب الي تقدمولها، باباها كي كان يزعف عليها تقولو" نموت و منجيبش راجل يشوف في بنتي شوفة مشي مليحة"، طبعا ابي عاود حياته و ولد ونسى اصلا انه عنده بنت، دخلت أمي فالموضوع لانها جزء من معاناتي، معنديش حتى الراجل اللي يهدر معاه، جدي اللي مربيني متوفي و اخوالي مازالهم صغار، المهم ديرو رواحكم في بلاصتي واش هو الطريق اللي نديه، راهي غايضتني انا صابرة على على العقم تاعه و العصبية تاعه، هذا غير المستوى التعليمي اللي بيناتنا، و هو محبش يتنازل على حاجة ساهلة، نصحوني الله يجازيكم بخير

[* الحلم سكر *]

سامحيني اختي على صراحتي انتي مشكلتك الوحيدة الاولاد و دخلتي رفضه للعمل و عصبيته كحجة باه تقنعي روحك لانك كنتي راضية في الاول
انا نقلك اصبري شوفي مع الحقن المجهري زيدو شوفو مع اطباء خلاف و اذا استحال الامر هذا حقك اذا بقيتي او طلبتي الطلاق غير انتي تعرفي روحك و مدى تحملك ماكلاه تبحثي على اعذار انتي و كانك ملتي لقىار الطلاق و قاعدة تيرري لروحك قبل للناس
ارتاحي شوية ادي وقت بعدي و روحي عند ماماك و خمي بلا ضغط المهم يكون قرارك على فناعة اتخبيري و استشيري امك هي اقرب واحدة ليك
و ربي يوفقكم و يهديك للطريق لي فيها الخيير

[lina23]

Zidi osbri chwiya ahkmi fi rabbi w ma tenseyech belli yomhil wa la yohmil.zidi okhti nahhi fekret ma khallanich nakhdem, hedi lehkeya tetfehmo fiha 9bel zwej w keyene yesser li3eni menha.elmohim i chofi ommek wchawraha ndhon rayha howa essah

[رفيق الروح]

عندي صديقتي صرالها كيما انتي وبعد ١٤ سنة زواج كرهت وملت لان المراة فرص الحمل لديها تكون كبيرة مين تكون صغيرة خيراتو بين العمل والطلاق فوافق راهي مسكينة تبدا من جديد نجحت في مسابقة التعليم ارجو منك ان تفكري جيدا حتى لا تندمي من بعد كيما قلتلك المراة عندها فترة للحمل والله يكون معاك

[رفيق الروح]

عندي صديقتي صرالها كيما انتي وبعد 14 سنة زواج كرهت وملت لان المراة فرص الحمل لديها تكون كبيرة مين تكون صغيرة خيراتو بين العمل والطلاق فوافق راهي مسكينة تبدا من جديد نجحت في مسابقة التعليم ارجو منك ان تفكري جيدا حتى لا تندمي من بعد كيما قلتلك المراة عندها فترة للحمل والله يكون معاك

[أم تيم الله]

السلام عليكم و رحمة الله تعالى و بركاته

اولا اختي ربي يكون في عونك و يرزقك من حيث لا تحتسبين و علمي ان ابغض الحلال عند الله الطلاق

ثانيا اختي كيما قالولك الاعضاء قبلي مدخليش الخدمة نتاعك و عصبيتو و اي حاجة اخرى في هذا الموضوع الحساس انا نقولهم لا كلشي مرتبط مع بعض

ثالثا اختي بعدي على الضغوطات و خممي بالعقل مكانش حاجة مستحيلة في الدنيا هاذي مع ربي سبحانو

انتي تربيتي بلا اخوة و انتي الوحيدة نتاع امك و لولا رغبتك في الولاد مكنتيش ضحيتي بالخدمة نتاعك و لا بمستقبلك

صبرتي روحك بالولاد قلتي معليش نربي ولادي ينسيوني في الخدمة و الامور الباقية

زوجك شوفيه بعيدا عن الحب نتاعك لانو الحب يعمي و ميخليكش تشوفيه بنظرة واقعية شوفيه من ناحية حبو ليك من ناحية القدر لي بيناتكم من ناحية

المعاملة قبل و بعد معرفة خبر العقم و قبل هذا الكل انو معندوش ذنب في الشي لي راه فيه و حتى انتي معندك ذنب الله غالب

نتي تعرفي روحك الا تقدري تستمري ولا لا و متقوليش المجتمع لانو كلام الناس ميزيد مينقص و دري في بالك بلي رغبتك في الولاد راه تزيد تكبر

مع الوقت و نتي تكبري معاها و تعود فرصك في الزواج و الانجاب اقل و كلشي مكتوب ربي سبحانو قادر تتطلقي ضرك و ميجيكش مكتوب اخر و تبقي

عزباء يعني الشي الي راح تنفصلي على زوجك بسبتو يعني الولاد ميكونوش و صدقيني انك تكوني في الموقف هذا هو اكبر اختبار ليك في الدنيا

و القرار راجع ليك اخيتي ديري جلسة مع زوجك و صارحيه بالشي لي في قلبك و توقعي منو ردة الفعل مهما كانت و اصبري ان الله مع الصابرين

و زيدي شاوري امك و اطلبي منها النصيحة مكانش واحد في الدنيا هذي يحس بيك قدها

اسمحيلي طولت عليك حبيت نعاونك و نقص عليك و نشوف معاك الموضوع من كل الجوانب لانو ماشي حاجة ساهلة

و ربي يكون في عونك و يعطيك القوة على اتخاذ القرار لي متندميش عليه طول حياتك ان شاء الله بالتوفيق اختي

[محمد جديدي التبسي]

يسمى البقاء في مقابل العمل؟!
تريدين شيء يشغلك ويلهيك عن التفكير في الأبناء لكنك مخطئة وتبحثين عن مبرر للطلاق غير المبرر المنطقي الموجود
أنا نشوف إنو لازمك جلسة مصارحة مع زوجك تقوليلو أريد ابناء وما نحبش نظلمك ونديرلك مشاكل..
والله سبحانه وتعالى يقول: "فإمساك بمعروف أو تسريح بإحسان"
ربي يفتح عليك

[doba]

ربي معاك اختي

[ام اماسي]

ماقدرت نقلك والو ربي يفرج عليك ويكون معاك

[أم شروفة]

صارحي نفسك اولا.من كلامك تريدين اطفالا لانك عشت وحيدة وهذا من حقك .وحتى إن عملت ستبقين تحسين ذلك الفراغ .وإن قلت هذا الكلام بعد زواج سنتين فقط.فماذا ستقولين بعد30 سنة .اتخذي القرار من الان .لان المراة عندها سن معينة ويتوقف الإنجاب عندها..إن كان لا ينجب فمن حقك طلب الطلاق وربي هو يجيبلو بنت الحلال

[كتائب القسام]

الله يفرج عليك وان شاء الله حمل السيدة مريم
باذن المولى عز و جل جيش وتتهناي بيه.

[anfal10]

خمي مليح يا اختي الطلاق ماشي ساهل اذا شفت بلي راكي هابا الدراري ماكاش امراة ما تحبش تكون ام حلم كل فتاة وليدها و لا بنتها تقوللها ماما راني حاسة بيك راكي تتوجعي من الداخل او ساكتة ما راكيش قادرة تدي اي قرار اذا هاد الانسان مليح معاك او ما يخصك والوا زيدي ريحي معاه او شوفوا اطباء في ولايات اخرى بلاك ربي يفتح شكون شاف و لا مل راكيش قادرة تعيشي معاه او تبدل عليك بزاف او بزيادا راكي حابة الاولاد هادي ما فيهاش عيب و لا حرام كل وحدة و درجة التحمل تاحا وعلاش الرجال اطلقوا على جال الاولاد من حقك انتي تاني اجيبي الله غالب الامومة تغلب الحب و كيما قالولك الاعضاء المراة عندها سن معين مع الوقت الفرص تنقص
كاينة واحدة نفس المشكل طلبت الطلاق وشنو راجلها ما شي مليح يشرب الخمر و يخونها مرضها مسكينة قاللها ما نطلقش زكارة
وحدة اخرى راهي صابرة قالت وين نولي لدارنا ؟؟؟ زيد العائلة تاحا رافضين الفكرة قالولها ما تطلقيش ها دا مكتوبك ارضاي بيه وشن نقولك زيدي شاوري الام تاعك واش رايها ان شاء الله يفتح عليك ..........
اما العمل قبلت بشرطوا من البداية يعني ما عندك واش تقولي ولا ادوري في رايك هاد الشيئ مفروغ منوا يعني في الاول واحد يكون صريح و المفاهمة هي الصح و لا اصريتي على الاولاد اطلبي الطلاق و العمل تاني باش ما اطحيش في مشكل آخر
رغم اني ما نحبش كلمة طلاق و لكن الله غالب كل واحد او ظروفوا خمي على روحك .

[النجمة القطبية]

اختى لا املك الا انى ندعيلك وانا اسمع الاذان الان
ندعيلك الله الواحد الاحد القادر على كل شئ انو يرزقك بالذرية الصالحة السليمة من زوجك هذا عاجلا غير اجل وكل من قال امين
ولا تقولي مستحيل لا مستحيل امام قدرة الله
هذا ما استطيع ان افعله لك
ونقولك فقط استعيني بالذكر والاستغفار
وان شاء الله تجي تبشرينا

[naamane3]

سمعت درسا لعبد الحميد كشك يقول فيه
من يريد الذرية فليقل في كل سجود صلاته
رب لا تذرني فردا وانت خير الوارثين
وباذن الله سيرزقه الله الذرية الصالحة

[ذكائي ايماني]

ربي يفرج عليك اختي
زيدي اصبري و استخيري الله و خصوصا انه يعامل فيك مليح ..العمل و العصبية مدخليهمش في المشكل الحقيقي لي راه محيرك و هو انجاب الاولاد
ربي يرزقكم الذرية الصالحة اميييين

[ام نهوله]

انت يا اختي الان في حاله ياس لذلك تفكرين بهذه الطريقه و انا متفهمه لشغفك بالاولاد فهم زينه الحياه الدنيا لكن ان تجدي رجلا طيب ايضا ليس بالامر الهين و لا تنسي ان حلمه بان يكون والد يعذبه تعالجا ثم ان استعصى عليك امر البقاء فلا يستطيع احد ان يجبرك على المواصله

[amel03l]

يا اختي المرض و العقم من عند ربي ..صح هو راه مريض كيما نتي كان قادر ربي تكوني مريضة هذا قدركم في زوج و الله على كل شئ قدير ..انا في رائي لا تطلبي الطلاق .خاصة و راهو يعاملك جيدا .الطلاق ماشي ساهل و راكي تخمي في الذرية من ضمن لك انك ستتزوجين بعدها و سترزقين الاولاد ...قليل لي يتزوج بالمطلقة و ممكن تبقي غزباء بعد الزواج و بعد موت والدتك ماذا ستفعلين ..وقتها ماراح ديري والو بخدتك و ماراحش تنفعك ...من رائي ابقي مع زوجك . اصبري و ممكن مع اوقت يخليك تخدمي باش تلهي روحك ...على الاقل كي تكبرو واحد يرفد الثاني ..و من يدري لعل الله يجازي صبركما خيرا..او ربو يتيم ..و ماتتخلايش على زوجك مسكين مم هو راهو يتعذب و ماشي ذنبه هم المرض و هم مرتو تخمم تتخلى عليه ...لاتكوني اننية وكوني واقعية ليس من السهل ان تعيدي الزواج ..فحتى المطلق و المعدد في مجتمعنا يفكر بالزواج بالفتاة التي لم يسبق لها الزواج....

[شهد حنان]

السلام عليكم

استخير الله اختي

وان كانت رغبتك في الاولاد فلا تحرمي نفسك وامك من هذا الامر وهو ربي يجيبلو الي تقبل بيه في الاخير هو قرارك اختاري ما تريه مناسب
وربي معاك

[hodahodahoda]

صراحة انت الغالطة مادمت مقتنعة بالعمل لمادا قبلت

العقم امر من عند الله

و الله صراحة النصيحة صعبة
انقلك تخلاي على خدمتك و لا قدر الله تلاقي نفسك عالة على الناس
تمسكي بعملك و تمسكي بزوجك لانه امر تاع ربي

[كتائب القسام]

سؤال: ولو ربي رزقك بالاولاد تنحي فكرة العمل؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

[nilly]

كيما قاتلك الاخت الولى عصبيته وعدم تقبله للعمل هي حجج دارتها باه تقنعينا بلي ماشي بسسب العقم يااختي كوني صريحة بينك وبين نفسك اولا
باينة حابة تطلقيه من اجل العقم وهدل جقك على كل حال
العمل ياك انتي لقبلتي ولا هدرة نتاع دراري قبلتي خلاص مكنش هدرة فوقها
والعقم ديري روحك فبلاصته وانتي لقيك البلاء وهو طلقك راح يغيضك عمرك وتكتبي مشكلة تقولي لا وفاء لرجال والكل راح يساندك كفاكم انانية ناس نتاع بكري يتحملوا كل شيئ نعرفهم قاعدوا مع رجال كيما رجلك كل عمرهم .وحتى رجال دركا ماشي كيما بركي يساندوا زوجاتهم حتى لو بهم بلاء طول حياتهم ويبقون بدون اولاد .
انا مرانيش نقولك ماتطلقيش انتي حرة لتشوفيه بصح نهدرلك على مشاعر دياله اكيد راحتئذيه بزاف وتصوري انك تطلقي وتتزوجي مرة ثانية زوجك ثاني ايضا عقيممادا تفعلين حينها؟
خصوصا المطلقة حظها في زواج بمجتمعنا سيئ فربما سوف يكون حظك رجل كبير بسن او من به اختلالات ويعيشك بالجحيم
انت ادرى بمصلحتك سلام