يا الرجال الزوالية جاوبوني

[مشكلتي]

السلام عليكم انا فتاة مخطوبة منذ عام ونصف وكنت قد اشترطت ان لا تطول الخطبة ولكن ظروفه المادية لم تساعده وبعد ان وافقت على تمديد الخطبة حددنا هاد الصيف نشالله تاريخ العرس وكيما اي شاب راكو عارفين الزواج يكسر ظهر الرجال مالا راني نساعف فيه قدما نقدر بصح المشكل السيد دراهم الصداق راهو يسلف فيهم وراح يشري بورتابل جديد مع العلم انو عندو واحد عادي وجديد انا ماعجبنيش الحال كيفاش الصائغ حتى لدوكا مازال ماجبناش من عندو الخواتم رانا نخلصو فيه بلعقل وهو يبدل فالبورتابل وكي قتلتو هذا تصرف غير مسؤول قالي ياخي ماراني مقصر معاك في والو انا معجبنيش الحال لانو راهو حاصل في كلش وانا شفت خويا كي كان راح يتزوج والله ماخلا تيليفون ولا ميكرو بورتايل كلش باعو غير باش اكمل دارو ويجهزها وهذاك الشح كامل وزاد سلف وهذا لي خاطبني راهو حاصل تاع الصح مافهمتش اذا كي شايفني خدامة تاكل انا نعاونو ولا تصرف غير مسؤول وغاضني الحال خاطر مام خطيبي اللول هفاتو الدنيا دراهم العرس راح جاب بيهم طونوبيل لانو كيما قال عيب جيت من فرنسا ندور ب اتوز وراح شرا وحدة جديدة وبقا بلا دراهم فكانت هادي هي القطرة اللي اسالت الكاس وفسخت وخطيبي الثاني يعلم بسبب فسخ خطوبتي الاولى وعلاه دار هكا مانيش فاهمة ولا بالاك المشكل فيا قتلو يا خويا دير اللي عليك واذا بقاولك اشري بيام ماشي غير تيليفون بصح فهاذ الحالة والله غير حكمتني القنطة حاسة ماعنديش الزهر كامل زعما قلت هذا اللي فرج بي عليا بيه انسان عاقل وقاري ويفهم عليا في دقيقة قيمتو كامل نقصت عندي قولولي اذا انا اللي غالطة اتقبل النقد

[nasser26]

منطقيا عندك الحق كفاش حاصل في مصاريف الزواج ويحوس على تلفون ... مي لازم تفهمي الجواب من عندو

[ابتسام smile &hope]

tbanli marletich

[سلواان]

لكن لاأفهم أمرك ..
هو ليس زوجك بعد وأنت تتعاطين معه وكأنكما في منزل واحد يجمعكما ..خليه في حالوا ويبقى الأمر بينك وبينه اتفاقات حول خوات برنامج تتمة الزواج ..وخلاص وإذا قالك اعطيلي دراهم ارفضي ..والسلام ختام ..

[عابد لله]

صراحة المفروض ما دخليش روحك وكي عرفت تلمفروض تنهي الموضوع مدام راكي مش مستعدة تتحملي معاه الحلاة المزرية تاعه

[محمد جديدي التبسي]

يا أخي سلوان أغلب الخطاب عندنا راهم يعرفو الصغيرة والكبيرة عن بعضهم البعض
حتى الفطور والعشاء فما بالك بأمور تخص تجهيز البيت وشراء الخواتم ...
لنحسن الظن بصاحبة المشكلة ونقول إنهم دايرين عقد شرعي
الرجل المفروض هو الذي يستعجل على الزواج ويجهز نفسه بأسرع ما يمكن
لكن بما أنه وجدك مستعجلة أكثر فيما يظهر فراهو يدلل وربما ظنك في محله أنه اختارك خدامة
وهذا يدل على طمع لديه إن لم نقل شيء آخر
أختي يظهر من كلامك أنك تريدين السترة والعفاف لكن اعلمي أن ذلك لا يخول لك الحديث مع الرجال والتساهل في ذلك
حتى لو خطبك أحدهم ودرتو العقد يبنغي أن تبقى بينكم حدود لأن المداصرة تفسد العلاقات وتتسبب في فسخ الخطبة في كثير من الأحيان
لذلك خلي الأمور للوقت ولا تضغطي على الرجل خاصة اذا اخترتيته على أساس حسن الخلق ولم يظهر لك العكس
ربي يفتح عليك

[mino 19]

تصرف غريب؟
اعتقد هاذي شحال وهو خاصو يشرى هاتف ذكي وكي جاوه دراهم شرا واحد
راني متاكد يبيعو كي يشوف روحو مزير

[سلواان]

يا أخي سلوان أغلب الخطاب عندنا راهم يعرفو الصغيرة والكبيرة عن بعضهم البعض
حتى الفطور والعشاء فما بالك بأمور تخص تجهيز البيت وشراء الخواتم ...
لنحسن الظن بصاحبة المشكلة ونقول إنهم دايرين عقد شرعي


يا محمد التبسي ..
أنا أحسن الظن بها ..ولنفترض من بابه أنه لهما عقد اداري أو شرعي لايهم ..
ما لمسته في موضوعها أنه يحملها عبئا ليست مجبرة على تحمله .أردت لها أن يقتصر الأمر على ما يتوجب تحضيره من جهته وفقط ولاتذهب الأخت في تفصيل أنه يبذر كذا ويشتري كذا ..
هما لازالا في وضع لايفرض على احدهما فرض رؤيته على الآخر عدا ما يقع على عاتق كل منهما من واجب توفيره رغما عنه ..
بكل صدق خشيت أن يتمادى وذلك لمسته أن يتمادى في الإتكالية ويجعلها تتحرك هي لتغطية النقص والفراغ ..هذا ما قصدته وأقول اللهم يسر أمرهما وهيئ لهما ما لاينضب من خير وبركة ..

[الصديق قروف]

واش عندو . دراهمو وين يروحو
كاين ناس تحب تعيش على حساب ناس اخرين
عندك خوك يبحث عليه مليح
افهمي ضروفو و احكمي عليه

[dahmane42]

عندك الحق أختي لكن تصرفي بالتي هي أحسن فهميه بالهدوء الله يهديه

["راجية الجنة"]

سلام عليكم
منظقيا عندك الحق
وامر مقلق بصح انت صغيري الامر يصغار
يخي تاريخ العرس صايي متفقين عليه
املا اضبر راسوا
لازم كلش يوجد في وقتوا
خليه بينوا و بين مولاه
واذا كشما طلبك في دراهم ارفضي رفض تام
قولوا انا ثاني الشهرية تجي منا نصرفها من لهيه نشور في روحي
وحلاص
ربي يكمللكم و متكثروش الهدرة مع بعضاكم بزاف هذي الي تجيب المشاكل
سلامي

[bessaim fatima]

امر مقلق المفروض هو الذي يستعجل على الزواج ,
ربي يفتح عليك

[أم شروفة]

قبل الزواج ما تدخليش روحك فيه ولو يشتري الجزائر بحالها.المهم إذا كان حابك راه هو أحرص منك على الزواج .وإذا كنتي فارضة روحك عليه فرض.لابأس أنك تعطيه حتى حق المهر .وكذلك بعد الزواج فأغلب المشاكل بين الزوجين هو أن أحدهما قد يتخطى حدوده

[النجمة القطبية]

يا اختى لدي سؤال هل كانت لك مع خطيبك هذا معرفة مسبقة يعنى عرفتيه قبل الزواج لانو يبانلى مداصرك ويتكلم معاك بدون كلفة
لان بصراحة الوضع يبدو لي غريب
فان اردتى الحقيقة غالبا الخطيب هو من يستعجل الزواج هذى اولا
والاتفاقات تتم عن طريق الاهل هذى ثانيا
لكن في حالتك انا مستغربة من الوضع وكانه يتكسل
شوفي يا اختى اذا معندوش اكيد راح تسمعو هذا الخبر من الام ديالو وهاذى ما فيها والوا تصبرو اما ان يكون الحديث بينكما فقط يبانلى اصبح لعب اطفال
يا اختى اعطو للكبير حقه باش متتعبوش وصدقينى الرجل لا يعجزه اشئ لما يختار امراة صالحة ويخاف تطير من يدو لانه يتوكل على الله
سؤال هل خطيبك هذا خدام لانو ان كان خدام فلا شئ اهم من انو يكمل نصف دينو عند الشخص العاقل السوي
اما اذا كان بدون عمل فذاك امر اخر
ربي يصلحلك الحال

[أمة الله 12]

تبانلي اللي كاين اختلاف في العقلية و طريقة التفكير مابينك و بين خطيبك
كيما قالولك الاعضاء من قبل ما تدخليش فامورو بالطريقة هاذي، المهم انت أكدي على تاريخ العرس و خليه يدبر راسو،
ربي يسهلك

[ام نهوله]

بدل تليفون درتي مشكل ما فيها والو وعلاش راكي انت اللي مقلقه على العرس و التكاليف و الخواتم يدبر راسو هاد الامور كامل جابلي ربي ما دخلك فيهم واكل تلعبي في دور الام ماشي الخطيبه ردي بالك التدخلات هادي تقدر تكرهو فيك تمعززي شويه ماشي كل مشكل تحاولي انت تحليه واسمحيلي ايلا قسيت عليك و الله نيتي خير

[عابد لله]

يا الاخت تصوري تزوجيه ومن بعد يقطع عليك كلشي بحجة عندة الديون؟ وانت مش ملزمة بالديون تاعه. اعرف شخص اقترض اموالا طائلة وبعد العرس اراد بيع غرفة النوم بعد اقل من اسوع فتشاجر مع زوجته وضربها باحدى لوحات السرير وتم الطلاق. اختصري الطريق وريحثي روحك

[سماحة الاسلام]

السلام عليكم
من خلال تصرفه يبدو لي انه مبذر او لا يحسن وزن الامور
انت محقة في التفكير في هذه المشكلة الان قبل الغد
لانك الان مازلت على بر الامان اما غدا فستكونين بين خيارين احلاهما مر
عليك ان تتاكدي من رزانة عقله بسؤالك لاهله عنه و عن تصرفاته المعتادة
فربما سيتركك غدا انت و اولادك من غير طعام و يذهب ليشتري الكماليات

[أناييس الربيع]

مازال ما كبرش في عقلو

[امينة 1991]

وانتي واش يهمك المهم نهار الي يلحق العرس بسيف عليه يكون واجد ياك حددتو الموعد واذا قالك نأجلوا الموعد هنا ماعندوش الحق ارفضي وقوليلو اعطيتلك وقت كافي . ربي ييسرلك

[عائشة07]

((شيء عادي داره بغى يقلش روحه في وسط هدا الكم من الظغط منك ومن الاهل والمصاريف
راه غضته عمره وبغى ينتقم من الظروف ادا غي هدا الشيء حاولي تفهميه وفوتيهاله ))
لكن لاحظت بلي قلتي((( رانا نخلصو ))) يعني انتما الاثنين تقصدي بلي راك تخلصي معاه فالخواتم ؟
فادا راك تصرفي معاه ومستعجلة اكثر منه في اتمام كل شيء فان دالك مايطمئنه
وبتالي نورمال يتكسل عليك ويشري على مهله لانك راح تساعديه ادا ما لحقش اقول يمكن
او عندو وداير حسابو وما مبينلكش وانتي راك تقلقي في روحك
وزيد حنا النساء نحبو نلبسو اللبسة الغالية ونشرو ذهب واكسيسوارات و و و
والاكسيسوارات تاع الرجال هي تاكتيل وساعة ماركة وسيارة
حبيت نقول مشي حاجة كبيرة دارها خليه يزهي روحه مسكين حتى هو راه غادي يكون عريس ماتكونيش انانية