سؤال حول الحمص

[enar]

السلام عليكم ورحمة الله و بركاته
اخواتي الكريمات بغيت نسقسيكم على الحمص لما نشروه و نجو نطيبوه يكون بزاف يابس نديرو في الكيكوطة و ما يطيبش رغم اني نكون مبيتاتو في الماء ليلة كاملة
ماذابيكم اخواتي اللي عندها شي فكرة و الا حل تسلكنا بيه و ربي يجازيكم عنا كل خير
راني في انتظار ردودكم و مشكورين مسبقا

[fleur I]

اا ول حاجة نوعية الحمص لازم تكون حبة خشينة النوعية الجيدة تغسليه مليح و تندفيه تحطيه في ماءفيه كمية الملح اللي راح طيبي بيها مع ملعقة صغيرة خميرة الحلوى ما لازمش يكون الماء بزاف قيس ما يتشرب و يبقى شوية تخليه ليلة كاملة غدوه من داك خليه يطيب في هداك الماء بلا ما تزيدي الملح و كمية الماء عينك ميزانك و الاضافة المهمة طريقة ام كوثر الله يخليها
سر البنة في حمص المطاعم

[kh1994]

خذي الحمص اغسليه ثم. شمخيه في الما وتضيفي ملعقة ك ملح و خليه ليلة كاملة وفي الغد سخني الما في الكوكوط وضعي الحمص يطيب دون اضافة الملح

[imanaz]

مور ما تشمخيه طيبيه في الماء + بيكاربونات راهو يطيبلك مليح :19:

[ام سكينة]

صح ديري الكربونات عن تجربة

[سميرة10]

اذا كان الحمص نوعيتو مليحة بلا ما ديري لاملح لاحاجة وحدخرا شمخيه ليلة و في الصباح طيبيه عادي في الكوكوطة راه يطيب ما تخافيش

[أم أيوب 11]

انا ننصحك بماء المطر راه مليح للبقوليات الحمص العدس و اللوبيا

[مياسم75]

اختي نعطيك طريقتي انا نحط كيلو حمص في البسينة ونشللو مليح ومن بعد نظيفلو باكي خميرة نوارة وتعمر البسينة ماء وفي الصباح نلقاه طري نصف نخليه في الكونجيلاتور باش نلقاه واجد في اي وقت ولأي وصفة
والنصف الثاني نديرو في الكوكوطة ونطيبو بوصفة ام كوثر:19: ربي يجازيها كل خير ويجي طايب زبدة:19:

[enar]

الله يبارك فيكم فرحتوني بأجوبتكم الوافية الله يكثر من أمثالكم ....رايحة نجرب باذن الله الطرق اللي قلتولي و نتهنى من هذا المشكل ....مرة أخرى بارك الله فيكم

[سهام دوسة]

انا نستعمل الماء الحلو تاع الحاسي الان تاع الحنفية اجي مالح الان الملح اقسيه واذا مكانش عندى الماء لحلو نستعمل الماء العادي المفيد ان بيتو الحمص في الماء ومن الغدوة من ذاك نضيفلو خمارة الحلوة ونضيف شوية زيت باش الكوكوت متفزش ونتيجة مضمونة