ربي يهنيكم دبرو عليا

[ام النجمين]

راني نتعلم في نبات النول بما انهم حاجة جديدة وكي شافوهم الي نعرفهم كامل عجبوهم وطلبو مني نخدملهم واش تقولو كون نبدا نخدم ونبيع بقداه نبيع وكاش افكار للتسويق ضرك نحط المودالات الي راح نخدمهم وجدت اللوح وسلعة بمبلغ بسيط مية الف راني حابة نعاون راجلي وروحي عارفين الضروف راح يبني الدار على الاقل نهني من روحي وولادي متبخلوش عليا

[اماني العمر111]

رايعين يعطيك الصحة

[kala11]

يا أختي يهبلو الله يبارك على خدمتك ابداي وربي يوفق

[osamavaich]

فووووووووور بزاف

[fati blidya]

يعطيك الصحة هايلين شبين بزاف اختي احسبي حق اللوازم وزيدي قدهم حق يدك او زيادة شوية نعرفو بلي خدمة اليد صعيبة ونسقسيك منين نتي

[مرام 1987]

مليح الفكرة يا أختي وابداي تخدمي وقولي لمعارفة يزيدو يجيبولك لي كليونت وشوفي في المحلات بالاك يخدمو ويبيعو أنت اخدميلهم وبيعلهم وديري publicité في الفايس ولا في النت وربي يعينك
أنا عندي قاعدة
مشوار الألف ميل يبدأ بخطوة

[youcefas07]

افتحي صفحة تكون اسمها مع المنطقة نتاع باه الجيرا وااقربون يجك
ربي يعينك

[bent assahra]

الله يبارك اختي وربي يعاونك هيلين يعطيك الصحة بالنسبة للثمن حسبي المستلزمات وزيدي حق شغلك على حسب الوقت لي تشدوليك الخدمة

[وردة الشمس]

اختي انا نشجعك على العمل هدا وعجبني بزاف اخدمي واحسبي السلعة وحق يديك وبيعيم لحوانت ولا لناس .

[ام الطيب]

ننصحك نصيحة اخدمي قطعة او ثنين وعرضيهم علي الزبائن
او اصحاب المحلات وجربي اذا تربحي ام لا وخدمي حسب الطلب
اصحاب المحلات يحبوا يطيحو السومة لصناع باش يربحون هم
ومن الأحسن تحطيهم عند واحد تعرفيه باه ما يحقركش في السومة

أنا جربت المكرامي والكريات السحرية تعب في تعب وخسارة الوقت
من بعد تضطري تبيعي على الاقل باش تردي راس المال*