خطيبي

[مشكلتي]

السلام عليكم
تمت خطبتي من حوالي شهر من رجل مستقيم ولاباس بيه لكن ليس وسيم انا قبلت لاخلاقعه مي كي نشوف خويا و ازواج اخواتي نغير واخته تسمع في الكلام ياسر مش مليح حتى كي يجو يخطبو قاعدين يضحكو عليا رغم انني جميلة واكثر منهم بكثير ,,,,,
وهو ما يحكيش معايا يقول بعد العقد وانا منعرقوش مليح والشرع سمح ليا نحكي معاه في خدود وهو رافض
والشرط تاعي 25 مليون فيها كلش ذهب و كسوة و صوف وووو حسيته حقرني هكا
اعطوني حل ارجووووووووووووووووووووووكم

[* الحلم سكر *]

و عليكم السلام و رحمة الله و بركاته
من الواضح انك مازالتي صغيرة او تفكيرك محدود اسفة لكن هاذا رايي بصراحة اسفة و لكن لمصلحتك

اولا بالنسبة لاختو من حقك توزني كلامها و تعرفي اصلهم واش
بالنسبة للمهر كاين رجال خليوهم يحكمو و يتكلمو علاه نزيدو و نقصو زعما باباك حاب يتهنى منك و الا يبيعك 25 م فيها مليار براكة و لو المهر اغلى واش يقول باباك تبعي و نقطة

بالنسبة للوسامة الشكل من حقك لكن انتبهي الارتياح اهم من الجمال و انتي راح تتزوجيه ليك تعيشي معاه ماشي باه يقولو شوفو واش دات و زعما راجل شكون أجمل الزواج حاجة اخرى يهمك راحتك و اللي صح ترتاحيلو

الحكي بعد العقد انا رايي عقد شرعي فقط -فاتحة- و يصبح زوجك شرعا احكي معاه في حدود و اعرفي كيفاه راه يخمم و شوفي

في الاخير نقلك سقسيـو مليح على السيد و كبري مخك و ترفعي على التفاهات و ما يهمكش الناس

ربي يسهلك لي فيها الخير يا رب

[عبد الله 22]

25 مليون مبلغ كبير وإّذا كان من منظور انه حقر اعتقد انه من المحتقر أكثر أن يطرح عليك أحدهم سؤال ( شحال تسوي)يا خت ربي كرمك والمهر مال الدنيا كامل لا يعادلك ومدمها حسابات مادية أعتقد أنك إن تزوجته ستعيش معها أكثر من 25 سنة إن شاء الله من العشرة و الاخلاق الحسنة كل ( سنة بمليون) وهذه أيضا مقارنة تافهة ، حاولي الدعاء بأن يبارك الله لك في زواج وزوج وذريتك والباقية تاتي بالتوفيق

[abdel02]

السلام عليكم؛
يبدو ان افكارك مشتة بعض الشيء وهذا ما يحدث لغالب الفتيات في هذه المرحلة الحساسة من حياتهن،عليكي ان ترتبي افكارك وتحددي ما تريدينه من هذه الزيجة، اما ان ضحك الناس او بكوا،فهذا لا يهم،لان الوسامة او المال الكثير او الكلام الكثير قد تتسبب لكي في الكثير من المشاكل،والله المعين.

[محمد جديدي التبسي]

وعليكم السلام ورحمة الله وبركاته..
كوني أوعى أختي وترفعي عن هذه التفاهات
أقلهن مهر أكثرهن بركة وزيد 25 مليون مش قليلة كاين اللي تزوجو ب 10 و8 ملاين ولاباس عليهم وطرح ربي في زواجهم البركة والخير
وكاين اللي تزوجوا ب 60 و80 مليون وطلقوا بعد شهرين
قضية الوسامة فالرجل بأخلاقه وأفعاله المهم تكوني تقبلت مظهرو بشكل عام ومع العشرة راح تضحكي على كلامك هذا
ما توسوسيش روحك وما تديريش قيمة لهدرة النساء لأنهم يهدرو في كل الأحوال وما يرضيهم شيء
قضية الهاتف راح يفسد أكثر مما يصلح.. اصبري بعد العقد تشبعوا هدرة ان شاء الله....ربي يفتح عليكم

[hodayena]

انا قلت لازم يكون هناك رخسة للزواج وميمدهالكمش حتى تجوزو على كامل مشاكل الحياة الزوجية ومن بعد الي يتاهل يزوج
ربي يهديك ناس تخمم خممي اذا كان راجل وقادر على شقاه ويعزك وميخلي عيلك حتى حاجة
سالي عيله اذا كان عندو كلمة وماشي حقار وراجل تتكلي عليه ترقدي مهنية كي تكوني معاه
الزين مابنا ديار الدراهم مابنات ديارة
القناعة والرضا هما الاهم
ياختي ادخلي وشوفي مشاكل الناس انتي مشكلتك تافهة

[anfal10]

لسلام عليكم
من حقك رفض الخاطب ان لم يعجبك شكلا فالنفور يولد الكره او عدم الرضا للاختيار وهاذا حتما تفاقم بسب زوجات اخواتك فانت تحاولين ايجاد سبب مقنع لتقولي لا ....
ان كنت غير مرتاحة فمن الاجدر بك اخبار عائلتك فلا اعتقد انهم سيجبرونك على هاد الزواج
ملاحظة فقط الوسامة لا تعني المحبة المطلقة او الحب الرومانسي الدائم مثل المسلسلات التركية هاهاهاها اريد زوجا يشبه فلان الحياة الزوجية غير ما ترينه تبنى على التفاهم و المحبة و ليس على اساس الوسامة فالمظاهر خداعة يا اختي عليك بالاستخارة
اما فيما يخص المهر اظن انها اصبحت موضة الظفر باكبر قدر من المال يعني في نظرهم القيمة الانسانية و هاذا اكبر خطا الحمد لله احنا لقبايل ما نشرطوش اقلهن مهرا اكثرهن رزقا .

[~أمة الله~]

وعليك السلام ورحمة الله وبركاته
أولا أختي ربي يهنيك ، ثانيا كي قبلتي بالراجل أكيد أُدِم بينكما وحسيتيه وسيم ، بصح كي بديتي في المقارنات لي ولاتلك هادي الحالة ، واعلمي أنو الواحد مع المقارنات ما يعجبو حتى واحد والله المستعان ,,,لذلك توقفي عن المقارنات حالا ، وادعي الله أن يرضيك بهاد الإنسان إذا كان ذو دين وخلق واستخيري مرة أخرى وشوفي روحك إذا تقدري تواصلي إن شاء الله
أمّا قضية المهر ، الله المستعان ، علابيها ما خلاوش الناس تتزوج وتبني حياتها في الحلال ، يا أختي 25 مليون راهم الله يبااااارك بزاف ... عندي صحباتي مستقيمة ، مهندسة ،دارهم لاباس عليهم الله يبارك ،وكان مهرها 6 ملايين !!+ سلسلة وغورمات إذا لم تخني الذاكرة والله أعلم... لذلك لا تُلقي بالا لكلام النسا إذا حبيتي تعيشي هانية

والله أعلم

ربي يوفقك ويهنيك أختي

[naamane3]

اول حاجة ما حكيتيش على الاستخارة
لانها هي من تضمن لك زوجك
ثانيا الا تعلمين ان اكثرهن بركة
ايسرهن مهرا او كما قال رسول الله
صلى الله عليه وسلم
عاودي روحك ومشاوري اصحاب العقول
المستنيرة بنور الله

[مراد سابقا]

يا اختي

انا ساقول

لك ما لم يقله الأعضاء الأخرون

انت من ستتزوجين

إذا لم يعجبك شكله

توقفي من الآن

ولن يلومك احد

لأنها حياتك

وكما قالك العضوة سيابقا

إذا نفرت منه في اليوم الأول ستبقين تكرهينه

مدى الحياة


لذا نصيحتي

توقفي الآن

ومن حقك ان تتزوجي واحد وسيم

وحتى انا من شروطي فتاتي المستقبلية أن تكون جميلة

وغذا لم تكن جميلة لن أتزوج

لأني أعشق الجمال

لا اريد خيانة زوجتي مستبقلا

[صفيان 11]

بسم الله الرحمن الرحيم
عليه نتوكل وبه نستعين

السلام عليكم ورحمة الله وبركاته


اختي نقولك حاجة الزين ميبني الدار كما قال النبي عليه افضل الصلاة والسلام اإذا أتاكم من ترضون دينه وخلقه الدين والخلق و الله غير مع الوقت غير تلقايهم واحد مدين ومتخلق بإذن الله تعالى يعيشك معيشة هنيا او متنسايش الاستخارة و الهدرة تولي ليك

[الجنة الجنة]

لا تلتفتي للمال كثيرا لكن بالنسبة لاستهزاء الاخوات عليك التروي والسؤال عنهم لانو اذا عندهم عقلية ماشي مليحة راح يبقاو يهبلو فيك حتى بعد الزواج ربي يسهلك ويفتح عليك وطبعا ما تنسايش الاستخارة

[fafi05]

اختي اسمحيلي حتى انت راكي غالطة تقولي انك تغيري من ازواج اخواتك و اخوك لانهم اجمل منه علاه اختي خطيبك هو اللي خلق نفسو يخي ربي اللي خلقو واش ذنبو هو و لا بعد المقارنة ولا ماهوش زين المهم في الراجل يكون يخاف ربي و يسترزق بالحلال والحاجة الثانية اخواته اسمحيلي هذه الخلافات مع اخوات الزوج اصبحت شئ عادي و تجدينها في كل عائلة جزائرية تقريبا ماهيش جديدة و الاحسن تكوني رزينة و ما تعانديهمش برك هذا ماكان اما بالنسبة للمهر ما عندو وين يزيد اختي حنا في منطقة الشرق ما تفوتش 15 مليون و فيها كلش و قانعين و الحمد لله المهم الهناء المال مايدير والو اذا ماكانش الهناء و لا يكلف الله نفسا الا وسعها ربي يهنيك اختي و نصيحة مني كبري عقلك على هاذو التفاهات لان الزواج مسؤولية فبل ما يكون امور مادية

[ام نهوله]

يا اختي اذا كان وليد فاميليا واش ديري بالدراهم الناس راهي تحط الملايين و في الاخير يعيشو حياه تعيسه
ادا كان صح راجل غير شدي فيه و ربي يوفقك

[fella111]

اختي باينة ماكيش مقتنعة به نهائيا ...........و مسألة 25 مليون مجرد حجة تتحججين بها .....................

[فحلية]

أختي سأحكي لك حكاية واعتبري منها
ذهب رجل كسلم إلى جاره اليهودي وقال له : لدي مشكلة وأريد منك النصيحة بحق الجوار
فقال له اليهودي : بحق الحوار سأنصحك ولن أغشك فماهي مشكلتك ؟
فقال المسلم : لدي ابنة في سن الزواج وقد خطبها عدة رجال ولا أدري لمن سأزوجها
فقال اليهودي : الروم كانت تختار الجمال
والفرس كانت تختار المال
والعرب كانت تختار الحسب والنسب
ونبيكم محمد كان يختار الدين
فانظر بأيهم تقتدي

[..بسمة أمل ..]

لو كان جات السعادة في المال و المظهر كان راها الدنيا لباس كوني قوية

[..بسمة أمل ..]

يانسبة للاخت فحلية شكرا على الحكاية حقا هي عبرة لمن يعتبر

[عبد الله 34]

اسمحيلي بصح 25 ميلون بزاف
نشري طوموبيل ونروح نفرودي خير لي

[khawlita.dz]

السلام عليكم
تمت خطبتي من حوالي شهر من رجل مستقيم ولاباس بيه لكن ليس وسيم انا قبلت لاخلاقعه مي كي نشوف خويا و ازواج اخواتي نغير واخته تسمع في الكلام ياسر مش مليح حتى كي يجو يخطبو قاعدين يضحكو عليا رغم انني جميلة واكثر منهم بكثير ,,,,,
وهو ما يحكيش معايا يقول بعد العقد وانا منعرقوش مليح والشرع سمح ليا نحكي معاه في خدود وهو رافض
والشرط تاعي 25 مليون فيها كلش ذهب و كسوة و صوف وووو حسيته حقرني هكا
اعطوني حل ارجووووووووووووووووووووووكم

عليك ان تجلسى وتفكرى بهدوء هل هو لا يعجبك انت شخصيا ام انك تخافن من نظرة اهلك وصديقاتك له
ان لم يعجبك حقا فانهى هدا الزواج لانك ان لم ترتاحى له الان قبل الزواج وكل شىء بينكما وردى وجميل الحديث قياس و برزانة و وو
فما بالك بيوم يصبح زوجك وتحدث بينكما المشاكل ووو اكيد لن تتقبليه ابدا
من كلامك انت يااما لست مقتنعة به با اما شخصيتك ضعيفة وتتاثرين بكلام غيرك فححدى مشكلتك لتعرفى القرار الصحيح
اما خلاصة القول فلا تقبلى ابدا بحياتك بىء لست مقتنعة به 100 ب100 فما بالك بالزواج
الرجل اللدى ستقبلين الارتباط به ستعيشين معه حياة كاملة ستنجبين منه اطفالا ستكونين مسؤولة امامه ومسؤولا امامك ستتشجاريين معه وتتصالحين معه ستحدث بينكما مواقف لا تفوت الا ان كنت تحبينه وتتقبلينه والعكس صحيح
الامر لا يحتمل القسمة او التشكيك اما يعجبك واما لا

احسمى امرك واستخيرى مرارا وتكرارا
بالتفيق

[nilly]

وين علبالك بلي عنده املاق ناس لقلولك بلاك من وجهة نظرهم خلوف وانا كاين بزاف المرات يقاولوا هداك او هديك خلوقة نلقاه عكس
مرانيش ندمك بصح فقط وضحتلك نقطة مهمة لازم تتعرفي عليه مليح اطلبي منه وقولي لشيخ الجامع يحكي معه ويقنعوا
وثاني حاجة راكي غالطة بزاف انىي طفلة تركزي على الماديات ماشي على الاخلاق ماتعرفيش دنيا مليح واش تديري بمهند جميل ومتكبر ومغرور ولااخلاق له
الجمال ليركز عليه نعتبره انسان سطحي خصوصا لتدور الجمال عند رجل اكيد الجمال مليح بصح شي ثانوي ماشي حاجة اساسية ويكفي ان يكون مقبول شكل
وحاجة اخرى كي عاد من دركا حقرتيه فيااختي متلعبيش بيه اطلقي سراحه

ونقولك صحصح لكان جيت في بلاصته منمدلكش 25 مليون محال نمد 25 مليون لمرا مهما اكان جمالها

[nilly]

لسلام عليكم
من حقك رفض الخاطب ان لم يعجبك شكلا فالنفور يولد الكره او عدم الرضا للاختيار وهاذا حتما تفاقم بسب زوجات اخواتك فانت تحاولين ايجاد سبب مقنع لتقولي لا ....
ان كنت غير مرتاحة فمن الاجدر بك اخبار عائلتك فلا اعتقد انهم سيجبرونك على هاد الزواج
ملاحظة فقط الوسامة لا تعني المحبة المطلقة او الحب الرومانسي الدائم مثل المسلسلات التركية هاهاهاها اريد زوجا يشبه فلان الحياة الزوجية غير ما ترينه تبنى على التفاهم و المحبة و ليس على اساس الوسامة فالمظاهر خداعة يا اختي عليك بالاستخارة
اما فيما يخص المهر اظن انها اصبحت موضة الظفر باكبر قدر من المال يعني في نظرهم القيمة الانسانية و هاذا اكبر خطا الحمد لله احنا لقبايل ما نشرطوش اقلهن مهرا اكثرهن رزقا .


رد رائع نابع من تفاهم كبير للحياة

[nouna l maghbouna]

بالمختصر المفيد ماتحتميهش علي روحك
ماهوش عاجك بطلي عادي
امبعد تندمي