مجرد فضفضة

[الداعي الى الحق]

سلام عليكم
حاب نفضفض شوي
بعدما كانت أمي تلح عليا كاي تخطبلي بنت من معارفها
أستجبت لها ولمطلبها رغمم أنني ضد زواج بهذه طريقة ألا انني وافقت لأسباب كثيرة

وقلت راح نقبل وقلت لأمي هدريلي شوية عليها قالتلي طفلة كيما البنات ماشي شابة ماشي مزعوقة
نورمال وخدامة فالبلدية بالكونترا وعاقلة وتعامل كل العجايز مليح

قلت ايه موافق وراحت يما خطبتها لي ومدوهالي ويما كانت فرحانة بزاف
لأنها هي لخيرت العروسة
ومدتلها يما نيمرو نتاعي باه تهدر معايا
ايا فالليل عطيتلي أنا حشمت وهي حشمت ومكنش ليهدر ...............
وفي اليوم تالي صارت تسقسيلي على خدمتي على فرنسا دخلت فتقاصيل...
وصارت تعيطلي في أي وقت حتى فالخدمة أنا منحبش هكذا صح هي من حقها تعرفني

بصح كل شي له حدود . وقلتلها بلاكي تعيطيلي فالخدمة بأسلوب ميزعفهاش
بصح صارت تبيبلي كل وقت والبيباج هدا انا نشوفه تصرف صبياني واش معنتها واحد يبيبلي
مفهمتش أنا . وكي قلتلها هكدا قالتلي باه تفكرني


كيفاه نفكرها؟ وانا عمري ماشفتها ؟؟؟ محبيتهاش باه نتفكرها
والاهم من كل هدا كيفاه تقدر تتعلق فيا وهي شفتني بالصورة برك حبت صورة ؟؟
حتى العقلية نتاعي ماتعرفهاش واش حبت فيا أملا؟
وثاني حاجة كي سقسيتها واش تديري في وقت فراغك قاتلي نتفرج تلقزيون مسلسلات؟

وماتعرفش تهدر وتستخدم الفاظ ماشي محترمة وتضحك بزاف في تلفون وتحب تشدني ساعة فتلفون وانا عندي شغلات حتى كي نكون فدار عندي شغلات الخدمة نتاعي نجيبها لدار نخدمها وكي نقلها هكدا تزعف كي شغل تعرفني من 10 سنين.

ومرة قاتلي قولي كلمة شابة وقتلها كلامي ميعجبكش قاتلي لالا كلمة شابة قلتها واش نقولك
مبعد فهمت بلي هي تقصد نقولها بلي نحبها هههههههه

قلتلها منقدرش نقولهالك لأنه مرانيش كداب وهاذي الكلمة عندي مقدسة ومانقولهاش ألا اذ حسيت فيها
وزعفت بزاف
وكلا مرة تذكرني بخطيبتي سابقة تغير عليها وهي ماتعرفهاش
وتسقسيني عليها علاه افترقنا وانا منقدرش نحكي اسراري لايو واحد ومنحبش نهدر على خطيبتي سابقة
لا بسوء لا بالخير. بصح هي محبتش تفهم علبالها مزلني نحب خطيبتي سابثة وتبدا بزعاف والبكاء .

كل مرة نشوكي فيها
وتقولي سور خطيبتك سابقة تقولها نحبك وانا لالا وتبدا تنسج فالقصص من خيالها

رغم انني مقتلها والو على الماضي نتاعي وواحد المرة بدات تسب في خطيبتي سابقة قكوبيت عليها وكتبتلها ميساج بلي خلاص راح نفترقوا بدات تحلل فيا مكنش قصدها وكس شفتها هكداك محبيتش نظلمها وقتلها وعديني متزيديش تجيبلي سيرتها ووعدتني بصح زادات يمات رجعت ليها

ولزعفني كثر كي درتلها test

قتلها بلي كي نتزوجوا انتي حتقعدي فزاير منجيبكش معايا وهي قالت ليما وقالت لوالديها وصارت مشكل بين عيلتها وعيلتي

ثم اكتشفت عله تعلقت فيا لأنها حابة فرنسا ماشي أنا

يا خي حالة تحملتها برك علجال يما وهي درتلي مصلحة حابة تمشي على ظهري باه توصل لمبتغاها.

عييت وكرهت كشي ولى مصالح مكان حتى حاجة سيريوز
حتى زواج لهو رباط مقدس صار مصلحة

وحاجة مافهمتهاش كي عاد ماتحبنيش علاه راهي تغير عليا ماتهدرش مع البنات بلاك من الجيران

وعلاه هذا نفاق وعلاه لعبت بيا برك علجال مصلحة نتاعها صح انا ثاني غلطت كي قبلت نتزوج بهذي طريقة

مرانيش طالب حاجة معجزة طلبت برك طفلة تحبني انا ماشي غيري تحبني انا ماشي فرنسا ماشي كيما جات كلات .

واحدة تتزوج واحد علجال دراهمه وثانية تتزوج واحد علجال فرنسا والاخرى تتزوج علجال طونوبيل

والاخرى تتزوج برك لانه خطبها يعني اي واحد يخطبها تتزوج بيه
وتعجبت بزاف ثاني كي سمعت بلي جارتنا كبيرة فالعمر تزوجت بواحد عنده 4 دراري برك لانه جاء خطبها يعني لوكان اي واحد سبقه راح تقبل بيه

لمادا صار زواج بكل اشكاله مصالح

[ام محمد امير]

يا اخي والله نحير كنسمع حكايات كما هذو لهذي درجة لبنات يهبطو من مستواهم وطيحو من قيمتهم راجل ماتعرفوش في حياتها تهدر معاه بهذا الاسلوب، والله هذي باينة وجهها صحيح وديجا ياك الراجل ليسبق يعيط ولا هي لتسبق تعيطلك سبحان الله ،نصيحتي اخطيك منها هذي راه همها كامل فالخارج ،اهدر مع يماك وفهمها باش ماتزعفش هذي ماتعرفكش وراهي دير هكذا مالا نهار تعرفك صح تولي ماتهدرش معاها ربي يفرج عليك خويا ويرزقك بنت لحلال.

[hodayena]

نقولك حاجة اخي نورمال هذي تصرا وراهي صايرة ساكن ف البلاد وصرات كيما النساء كيما الرجال
من جربتي الشخصية زواجي كان عبارة عن صفقة بين طليقي ووالديه نجيبوهالك ولاتزم تكون نية وتصبر على واش ندير فيها والا تطلقها
دوكا ولاالزواج في الجزائر صفقة اما يحبوها قاعدة في الدار وبنت فايمليا باه يديرو فيها واش يحبو وتصبر حتى تموت ولا تهبل
ولا خدامة باه يستنفعو من دراهمها واذا محبتش يهددها بالطلاق
خليك انت الي راك في فرنسا وتقريبا البنات يحلمو بيها وكانها مكمة ورايحين يحجو لها

ربي يبقى الستر وانت تحدث مع الوالدة وربي يرزقك حسب نيتك

[ليلى الجزائرية1]

ياخويا ماينة ليك بصراحة كيفاه راك مستحملها
وقاحة هاذي نتاع هي اللي تعيط لك الأولى
أنا هاذي حبستلي مخي بصراحة
الله يكون في عونك أخي

[أم شروفة]

أغلب الظن أنها صغيرة في السن وتقول هذا من فرنسا أي أنه ماعلابالوش لذا دات راحتها بالكلام معك والهاتف راه يغلط ممكن تلقاها فتاة بسيطة ورزينة لان نظرة الأم لا تخطئ أما عن كلامها في كل وقت قلها ماتزيديش تكلميني انا نكلمك فقط قلها مانحبش المراة تخسر اللينيتي عليا

[* عبد الجليل *]

يحسن عونك وداك القلب لي عندك سمحلي راك متحمل فوق الطاقة
واش نقولوا يا خويا هادي الوالدة حبت تفرح بيك لازم تطيعها
ياخي ماتعرفها ماتعرفها ... اولا نتا درت غلطة اعطيتها نيميروك... وهي ماخلاتش القدر والقيمة لنفسها هي من بادرت واتصلت
ثانيا مادرتش نظرة شرعية ... تم كان تبدل كل شيئ يا تديها يا تقعد عن والديها
ايه خويا واش نقولك ربي يفرجها عليك
وان شاء الله تلقى بنت الحلال لي تقبل بيك كرجل يحميها ويصون شرفها لا لمصالحك ولفرنسا كما ذكرت
بصح تاني ماجاياش تتزوج وتخليها هنا في دزاير ها غير هم في هم ابرة بلا خيط ... المهم خويا ربي يفرحك ويجيبلك مكتوب لي تستاهلوووو
نيتك طيبة يا خويا وهذا جلي في كتابتك لكن الخطيبة الجديدة حبت مصلحتها ... واش دير مجتمع مبنى على المصالح خاصة هذا الوقت
ربي يسهلك

[سماح 2]

هذه البنتْ امــآ لهــآ تصرفاتْ صبيانيــة لوول ,,يعني ماعلابالهاش واش راها دير زيد فارغة شغلْ بزافْ ,,عليهــآ في أ وقت تعيطْ وكل ما تعيطْ تجيب ساعة ساعتينْ ,,واما مازالت صغيرة صحْ :p
حتى قدرْ للنفسهــآ ماش مدايرة يعني انها تخليك حتى تعيطْ انت ماش كل دقيقة تبيبي ,,
+ كيمــآ قالت العضوة من قبل لآ يمكن الاعتماد على الهاتفْ ,,قد تكونْ مختلفة تمــآمـآ ,,

ربي يجيبك في الصوابْ ,,

[أم شروفة]

أختيhodayenaوش درتي فيها .أنتي اللي كان زوجك حاب يطلقك ؟
(http://www.djelfa.info/vb/member.php?u=371322)

[(( هبة الرحمن ))]

عسى أن تكرهوا شيئا وهو خير لكم

[الدكتور شهاب الدين]

السلام عليكم ..

و الله موضوع رائع ، بصراحه عندما ذكرت '' خدامة فالبلدية '' استطعت التنبأ بالنهاية و تصرفاتها ...

بالتوفيق و بانتظار جديدك

تحياتي .

[~ السلطانة ~]

السلام عليكم ...
يعني راكم طحتو في المخلوقة شطاخ طراخ ... يا ريتها كانت هنا تقرا و ترد .
الغلطة الأولى من السيد صاحب الموضوع ، لما كنت عارف نفسك انك ما تقدرش ترضي والدتك علاش رحت لبنت الناس و لا انت برك للي عندك مستقبل تفكر فيه و ما يهمكش و المخلوقة تروح تخطبها و تبطل و عادي تزيد تبهدل فيها و تنتقد تصرفاتها ...
كي شفت روحك عند مطلب معين علاش ما اختبرتش البنات من بعيد و تقدمت بنفسك ، خاطر كي تقول خطبت باش نرضي امي هذا لا يشفع لك لمام جرح الفتاة و احراجها ..
و الأمر المهم واش هي فرنسا هذي ؟؟؟ سبحان الله و شكون أكدلك بللي البنت تحوس على الخارج ؟ غير كي سقساتك برك على ظروفك ؟؟؟ حتى انت يظهرلي كنت رايح تحطم مستقبل الفتاة في سبيل ارضاء امك ... امك قاتلك تزوج باش تفرح بيك كنت تقدر تسعى لذلك و ترضيها ماشي تقبل بللي تخطبهالك هي المهم عندها تفرح بيك ..
الأمر الأخير اعتقد ان المغترب للي في نظره كل البنات للي تقبل بيه تحوس على الغربة عمره لا يكتشف الدواخل الطيبة للمرأة ...
الأمر الأخير علاش هي كي تتزوج بيك راح تكبلها فرنسا على اسمها ؟
وجعني قلبي..
و اذا راك شايف روحك بللي صبرت على تفاهتها ، تأكد هي صبرت عليك أكثر منك على غلظتك و سوء تقديرك لها .
و علاه " خدامة في البلدية " ما تلقيش بمقام فرنسا ؟؟؟

[محمد جديدي التبسي]

الأمر بيدك ما تقلقش روحك النساء كثار اختر وحدة تكون رزينة وثقيلة وإياك من عقلية المراهقات الجريئات
ربي يفتح عليك اخي

[oum imane83]

وعسى ان تكرهو شيئ وهو خير لكم وعسى ان تحبو شيء وهو شر لكم ...
ربي يرزق كل مؤمن زوجة صالحة ويرزق كل مؤمنة زوج صالح

[~ السلطانة ~]

الأمر بيدك ما تقلقش روحك النساء كثار اختر وحدة تكون رزينة وثقيلة وإياك من عقلية المراهقات الجريئات
ربي يفتح عليك اخي

الأمر كله بيد الله ... و هو يرزق المرأة و الرجل . و الحمد لله ان الدنيا بين يديه كريم عزيز حليم قوي على الظالمين

[jamaltahar]

حليليك يا خويا نعرف بزاف بنات بهاد العقلية بصح وكان جيت تحبها تقبلها ولو كانت اسوا من هاك الحب حاجة قيلي الي يفهمها تقدر تكون كل ديفوات حبيبك اجمل حاجة في الدنيا ادا كان كاين حب صارح يماك وقولها متفاهمناش واستعمل اساليب تقنعها وتفهما ا بلا ماتزعف منك واعرف كيفاه ترضيها

[mounaminou]

domage enta mat7abhach ...c'é pour ca rak tehdar 3liha hakda...hya ki chafet naytek bayna wellat t3ayatlak tssakssi 3lik suuurrrrrrrr rahi m3adba kimarakch t3ayat tssakssi 3liha .......la logique tgoul beli rajel houwa elli yehtam ydir le 1 er pa...mach yrouh yekhtab mba3d yejbad rouhou khlass ...kan lazem 3lik ya tkammel m3aha w tmeddelha ihtimam ta3ek kamel ya t7abas madamek chak f rouhek

en+ ay tofla 3andha l7ak tssakssi 3la l avenir ta3ha ....bah tdir hssabha...par exemple ana lakan khatibi hdarli hadra mba3d dar f klamo suur maya3jabnich l7al...wech tssana menha ....fehhamtha f lowel beli troh m3ak w dork goultalha beli tkheliha hna....hadi haja kbira bzf...balak rahi khayfa mennak ...hya tani rahi tgoul khda3ni w balak rahi tgoul ma3andouch kelma w ....kbal mayedini bda ydour f rayo pask sa7 kayen des cas khelaw nssahom hna raho w maelwch ...c'é normal hya tetkallak men haja kimma hadi ...
hab tdirelha test goulha ani marayehch nrouh l franca w rayeh n3ich hna w chouf la reaction mach tgoulha nrouh w nkhelik hhhh...bayen fik 7ab tlikidiha messkina hhhh
kbal matadlamha 7at rouhek f plassetha ....3lah enta ma3andakch haja te3jab ghir le7kaya ta3 franca ....sur andek personnalité khelatha tet3allak bik ...donc c'é pas la peine tasswass rouhek kbal matconfirmi

[ام نهوله]

مع كل احترامي لهده البنت لاني ما نعرفهاش لكن صراحه و انا نقرا في الموضوع خفتها شويه و ربي يجيبها في الصواب

[rihab jana]

انت غلطت وهي اكثر منك كون خبرت يماك منقبل
وهي باين على مصالحها نرمرموا انت تعيطلها مشي هيا تعيطلك كل وقت وفي النهاية ربي يكون معاك وكمال لنا الباقي

[samar alil]

وعسى ان تكرهو شيئ وهو خير لكم وعسى ان تحبو شيء وهو شر لكم ...
ربي يرزق كل مؤمن زوجة صالحة ويرزق كل مؤمنة زوج صالح

ya3tik saha hada howa laklam sahih amin rabi yarzagna bwlad lahlal amin ya rab al3alamin

[الداعي الى الحق]

شكرا لكل من رد علي بدون إستثناءات

[oum imane83]

ya3tik saha hada howa laklam sahih amin rabi yarzagna bwlad lahlal amin ya rab al3alamin



شكرا اختي ربي يحفظك ويرزقك بزوج صالح يسعدك وتسعديه

[الداعي الى الحق]

السلام عليكم ...
يعني راكم طحتو في المخلوقة شطاخ طراخ ... يا ريتها كانت هنا تقرا و ترد .
الغلطة الأولى من السيد صاحب الموضوع ، لما كنت عارف نفسك انك ما تقدرش ترضي والدتك علاش رحت لبنت الناس و لا انت برك للي عندك مستقبل تفكر فيه و ما يهمكش و المخلوقة تروح تخطبها و تبطل و عادي تزيد تبهدل فيها و تنتقد تصرفاتها ...
كي شفت[/i]روحك عند مطلب معين علاش ما اختبرتش البنات من بعيد و تقدمت بنفسك ، خاطر كي تقول خطبت باش نرضي امي هذا لا يشفع لك لمام جرح الفتاة و احراجها ..
و الأمر المهم واش هي فرنسا هذي ؟؟؟ سبحان الله و شكون أكدلك بللي البنت تحوس على الخارج ؟ غير كي سقساتك برك على ظروفك ؟؟؟ حتى انت يظهرلي كنت رايح تحطم مستقبل الفتاة في سبيل ارضاء امك ... امك قاتلك تزوج باش تفرح بيك كنت تقدر تسعى لذلك و ترضيها ماشي تقبل بللي تخطبهالك هي المهم عندها تفرح بيك ..
الأمر الأخير اعتقد ان المغترب للي في نظره كل البنات للي تقبل بيه تحوس على الغربة عمره لا يكتشف الدواخل الطيبة للمرأة ...
الأمر الأخير علاش هي كي تتزوج بيك راح تكبلها فرنسا على اسمها ؟
وجعني قلبي..
و اذا راك شايف روحك بللي صبرت على تفاهتها ، تأكد هي صبرت عليك أكثر منك على غلظتك و سوء تقديرك لها .
و علاه " خدامة في البلدية " ما تلقيش بمقام فرنسا ؟؟؟

أختي الكريمة حبيت نعلق على ردك الذي كان إتهام باطل
صح انا غلطت ومانكرتش وقلت هذا بموضوعي كي دخلت يما وعياتي في مشاكل كبيرة بصح أنا مريت بظروف صعيبة ونحيت زواج من بالي وكي عاد يما حابة تفرح فيا قلتلها دابري راسك خيريها أنتي وماشي مهم تعجبني كيما جات كاات قلت في بالي بلي راح كيما تجيني نقبلها بصح كنت غلطان . ويما عجبتلها هاذي بويسك تهدر مع ناس كامل سورتو مع العجايز وحبتها يما علبالها صح مليحة . ام

أما أنك تقولي نختبر البنات من بعيد هاذي مكنش منها الإنسان ماتعرفهيش حتى تهدري معه أما من بعيد لبعيد هاذي غير لميخافش على روحو.

واقلت بلي حبىني لمصلحتي لأسباب كثيرة
كي درتلها تاست حبيت نشوف ردة فعلها والحمدلله تأكدت ودرتلها تاست بعدما كترتها عليا سقستني على شهريتي فالايام الأولى قلة الفاهمة صح أنا شهريتي مليحة ونقدر نقولها لكل ناس بصح أنك تسقي إنسان ماتعرفيهش مليح على شهريته عيب شهرية خصوصية إذ حبيت أنا نقولها ماشي هي لتسقسيني على أقل تستنى .

وبدات تسقسيني على دار إذ كرا ولا شريته و على طونبيل شحال شريتها وتلمح بلي حابة طونبيل تهدر بزاف على الماديات وثاني حاجة قالتلي تحبني في ثالث مكالمة يا عباد الله كيفاش قدرتتحبني بهذه سرعة ثلاث مرات برك حتى تفكيري مزال معرفتوش وقتها ..

والخدمة نتاع البلدية يا أختي ظلمتني بزاف في هذه أنا نحترم كامل الخدمات وديما كنت نقول هاذي الحاجة في ردودي و لكان جيت منحبش خدمات البلدية علاه نقبلها من الأول ...
أنا عندي كامل ناس كيفكيف ومفرقاش معايا إذ ماكثة فالبيت أو خدامة أو مطلقة أو ارملة أو عمرها ماتزوجت هاذ الحوايج عندي زايدين وماعندهم حتى قيمة
وشكرا على صارحتك

[أبو خالد سيف الدين]

ما دمت متشائم من تصرفات هذه الفتاة من الأحسن أن تتركها و تبحث عن من تناسبك, و الزواج في النهاية أمر يخصك وحدك فليس من المعقول أن توافق على خطوبة فتاة لمجرد إرضاء رغبة الوالدة الكريمة, أي نعم لا حرج في أن تختارها الأم لكن يجب أن يكون إعجاب و توافق و تراضي من الطرفين و إلا في أكثر الحالات هذا النوع من الزواج تكون فيه عشرة مليئة بالمشاكل و نهايته الطلاق

فمن الأحسن أن تحزم أمرك الآن قبل فوات الأوان و الله تعالى هو الرزاق

[الداعي الى الحق]

وطاحولي مشاكل بزاف بسبابها مكنتش نستنى فنيها
كي خبرتها منجيبكش معايا لفرنسا راح قالت لاهلها وأتصلت بيما وبهدلت ياما
وجات يماها عند ياما باه تزعفها كيفاه خدعتونا مقلتوناش بلي راح يخليها هنا وووو
وكي قالتلي يما بواش يديرو عيطلتها وقلتلها هذاك تاست درتهولك حتى نعرف نواياك بصح حمدالله كي بيناك ربي ولبينا خلاص وكوبيت عليها ومن هداك اليوم مزدت نهدر معاها وهي كي فاقت بلي ماشي صح وكان تاست برك بدات تعياط ومنرفدش عليها وبدات بالمساج تطلب سماح وتحلف بلي حبتني ووووو وكي شافت مقيمتهاش بهي بمسجاتها
مدت لخوها نميرو نتاعي واعيطلي ويهدد تديها حبيت ولا كرهت مكنش عندنا لا يخطب ويخلي خطبتها معنتها تديها أحنا منفهموش هدرة أخرى
قتلو دير واش تحب أنا منديش أختك وكوبيت عليه
وخوها حامي راح لبابا للحانوت وبدا يبهدل فيه راح تدوها يعني راح تدوها حبيته ولا كرهته وبابا كي حاب يفهمه بسياسة راح يضرب بابا ولكان متدخلوش ناس برا لكان معلباليش واش دار
ناس همج يمد يده على راجل كبير ميحشمش وولا يراقب البيت يفوت ويجوز من طريق لقدام دارنا
وكي حكولي فدار واش صاري قتلوا لبابا تروح تشكي بيهم وبابا راح وكي علبالهم بلي بابا قدم شكوى عليهم صارو يترقبوا من بعيد لبعيد
أنا فالاول غضتني قلت برك ضلمتها بصح كي شفت فعايلها لشيطان رجيم مايقدر يديرلهم قلت لازم ترحم ربي لطحت فيدي لكان جاء واحد أخر في بلاصتي يلي دركا دار فيها لميتندرش
وثاني قلتلهم فدار متجبدوش سيرتها بشر وقلت لياما بلاكي تهدري وهذا علجالها باه حتى واحد ميقسها بالهدرة بصح هي خبيثة بحياتي مخممت كاين ناس هاك
صح في منطقتهم عيب طفلة تفسخ الخطوبة وتكثر الهدرة علي أي واحدة فسخت الخطبة والخطاب يوليو يناقصوا
وعلى هذا ضميري يعذبني شوي بلا حطمت مستقبلها بصح صدقوني منقدرش نتحملها لكان نجيبها غادي نهاجر ونخليها ولا نطلقها صافي هكذا أحسنلها
وسرتوا بعد شي لدرتوا مع عيلتي حتى اوكان جات مليحة نخليها أنا منقدرش ننسى إذ هي وجهها صحيح أنا ماشي كيفها

[الداعي الى الحق]

وأنا تشوكيت منها كامل واش دارت حبت ترجع ولات تعيط بزاف والبارح فليل عيطلي نميرو كاشي رفدت لقيتها طفلة قالتي حاب نتعرف عليك وكوبيت عليها وماعلباليشإض هي ولا صحابتها بصح هذ صوت ماشي صوتها وهاذي زواخة بزاف
ومعلباليش وعلاه تدير هكذا واش حتستفاد كي تمد نميرو لبنات .
ووولات تعيط هذه طفلة حتى غلقت البورطابل مانفتحوش بإذن الله حتى نشري نميرو جديد

صراحة وليت معقد كثر من بكري بنات الجزائر ماصدقتش يولسو اقبح من الأروبيات صحصح مكنش أروبية لتدير هكذا
سبحان الله العظيم دخلتلي في مشاكل غير ربي لعلم بيها ودخلت والديا لمخصهمش كاش واحد يبهدلهم ويديرلهم مشاكل بهذ العمر
ضميري يوجعني أنا سبة واش صاري لوالطيا ويما ولات تكرهها وتطلب سماح مني وقالتلي منزيدش ندبر عليك

[first first]

معليهش اخي نعلق...
اولا اخلاق الفتاة مانعلقش عليها لان لايشء يستدعي اصدار احكام.................تبيبانية ...........طريقة في الجزائر .....كنت اعتقد انها انقرضت...............موضوعك اثبتلي انها موجودة.
كاين ناس عفويين وهدارين والناس طباع وشخصيات...............وانت حر في قبول تلك الطباع او نفور منها
ثانيا كيفاش عرفت بلي حبت فرنسا؟؟؟................اضن حتى لو جيت تخدم في الصحراء ...............او مزنبيق...........اي وحدة تقولها نخليك في دزاير متقبلش...............وسينورمال تحكي لماليها....................واك علابالك.................لازم ماليها يفهمو .
مع انك عنك الحق انت تاني تتوسوس.............تقول على جال فرنسا يقبلو بيا................خونا لعزيز..................نصيحة .................التاست الجديد قلها ..............نقعد ل2في دزاير ونموت تم..................هنا تقدر تحكم.
بالتوفيق اخي ..................ربي يجيبلك الخير.

[first first]

هدا وين قريت لاسيوت......................اسمحلي.:1:

[mouadezzine]

السلام عليكم
خويا
أنا نشوف فيها نورمال
من بكري كاين هاذو البنات وكاين ما أسوأ منهم
ولكن كاين أيضا ما خير منهم.
الله غالب
ربي كتبلك وحدة ماقدرتش العلاقة الي كانت تربطكم
وتصوّرت أن كانت فرصتها باش تسافر لفرنسا وتعيش فيها
وربما بالاك تروح معاك وتخلّيك.
من يدري؟
et bien أحمد ربي وما تقلّقش روحك
واطلب ربي يوفقك في اختيارك
واحنا بدورنا ندعولك تطيح في بنت لحلاح.
ربي يسهّلك تلقى اللي تناسبك
.............
الله يفارقنا بلا ذنوب

[nilly]

نقولك صح صح هده طفلة جايحة حابة تولي ستوتة بصح ماتقدرش

لكان جات ستوتة يلي تدير روحها ملاك وعينها ماشي على فرنسا تحت تحت حتى تبلعك بثيابك ومتفيقشش وتكتر عليك سحور حتى تولي جسد بلا روح

مي هدي مفهمتش علاه تعجبت لخبثها راهي وراثة ربع الخبث من نساء يالكان تشوف الاخرين يديروا روحهم ملايكة دين وكلش بصح هما افاعي

نصيحة متتزوجش جزاشرية مهما كان تزوج مسلمة من البوسنا ولا من شيشان اي دولة خطيك العربيات فيهم كل سيئات العالم تلا القليل جدا من سلمت وهدوا متلقهمش بسهولة لازم هليك المجهر

[thamourth]

نقولك صح صح هده طفلة جايحة حابة تولي ستوتة بصح ماتقدرش

لكان جات ستوتة يلي تدير روحها ملاك وعينها ماشي على فرنسا تحت تحت حتى تبلعك بثيابك ومتفيقشش وتكتر عليك سحور حتى تولي جسد بلا روح

مي هدي مفهمتش علاه تعجبت لخبثها راهي وراثة ربع الخبث من نساء يالكان تشوف الاخرين يديروا روحهم ملايكة دين وكلش بصح هما افاعي

نصيحة متتزوجش جزاشرية مهما كان تزوج مسلمة من البوسنا ولا من شيشان اي دولة خطيك العربيات فيهم كل سيئات العالم تلا القليل جدا من سلمت وهدوا متلقهمش بسهولة لازم هليك المجهر
ههه انا خايف من بنات البلاد..............كملتي علينا نتيا
هههههههههه

[anfal10]

يا لطيف يا ستار هداك لي قالو هربت من الحبس طحت في بابوا وشنوا هادي الفاميليا سلكك ربي منهه بايننن تاع مشاكل بعيد الشر الام تاعك مسكينة في بالها لي يهدر مليح مع الكبار في السن معناتو طفلة مليحة و انت علط بزاف كان لازم تقوللها لالا للام و لا كي رحت اشوفي الطفلة تقولوا جينا نشوفوا ماشي نخطبوا هاكا ما يهدروش للناس و انت اذا بدلت رايك نورمال
لازم انت لي تخير ماشي يماك اسمحلي قدرك عالي راك قاري او فاهم كان لازم عليك تشوف طفلة لي تناسبك في النيفوا تاعك لي تفهملك يعني يكون المستوى تاعها لاباس بيه و تكون رزينة في التعاملات تاحا ماشي دراري
المهم ربي ايجيبلك ما خير ما تقول لا مشوكي ما والوا ربي هناك في زوج مرات لو كان اديت وحدة فيهم واقيل تولي في مشاكل كثر و كثر احمد ربي جات سلامات هاكا و لا اكثر انا ثاني صرالي مشكل كيما هادا او اكتر انا قريب ما تزوجت او ربي ما حابش لخسارة كرهت الرجال صرا في الباطل مرضت وليت كي المهبولة حاجة ما تستاهل كي نتفكر نضحك على روحي هاهاهاهاها
و نقول الحمد لله .ربي احبك بزاف ما تجهل ما والو كي اليوم تكتبنا حكاية تاع عرسك او كيفاش تبدلت حياتك الحياة ما تتوقفش عند واحد او مالازمش نتشاؤموا و نقولو الزهر والوا مكتوبك مازال ماجاش
ربي لي عارف وراه الخير ماتتشوكا ما والوا ان شاء الله ربي يطيحك في بنت لحلال ماشي طماعة و لا مخلوعة بفرنسا
ما عنداك بنت بلادك خيرقد ما كان الحال.
انا نقول لكامل رجال لي في الخارج القاورية مادومش رانا شفناهم يكرهوا دقيقة ميحبوش لي يتحكم فيهم قليل وين تصيب النفع فيهم بنت بلادك ترفدك اتكلوا على ربي وأو خيروا بنات أصل لي شبعانات ماشي تروحوا عند الجيعانات .

[ام رمال]

احيانا ناوايانا تكون انقى من قطرات المطر واكن تلطخها اعتقادات الاخرين لماذا تنظر بمعتقداتك انت يمكن انها احبتك لكن اسلوبها هكذا لماذا تتسرع وتحكم رب العالمين منح فترة الخطوبة للتعـــــــــــــــــــــــــــــــــــــارف

[ام رمال]

احيانا تكون النوايا انقى من قطرات المطر لكن تلطخها اعتقاداتنا المختلطة بغرورنا وكبريائنا

[ام رمال]

اختي لقد قرات رسالتكي ولكني لم استطع افتح الرابط

[ام رمال]

اختي لقد قرات رسالتكي ولكني لم استطع افتح الرابط

[ام رمال]

اختي لقد قرات رسالتكي ولكني لم استطع افتح الرابط الرجاء ان تساعديني لان الوقت ليس في صالحي بقي اسبوع واحد فقط الرجاء ان تساعديني وتدليني كيف اكتب قصتي

[ام رمال]

هل وصلتك رسالتي

[خولة الخنشلية]

قل اللهم اصلحني و ارزقني الزوجة الصالحة و الحب الحلال

و مخطيش خطوة بلا استخارة الله . ففيها كسب للنفس و رضا للرب و بعده الوالدين


ربي يصلح خويا