عاونوني برايكم

[ليلى الجزائرية1]

السلام عليكم
جمعة طيبة ومباركة على الجميع
اليوم كيما العادة يوم عطلة لا دراسة ولا عمل
وانا ندير فالميناج سمعت الباب يدقدق
والطارق كان ولد خال بابا جاي يزور في جدتي اللي هي عمتو
موالف يدقدق فالباب ومن بعد يدخل مي اليوم دخل ديراكت
ومزية انا كنت قريبة للكوزينة دخلت نجري
وبديت أنا نغلي على خاطر مهما كان راه اجنبي عليا
وحسيت بالقهر وقتها وغاضتني روحي ياسر
على خاطر حتى أولاد عماتي ثاني يدخلو بلا ما يستاذنوا
أمالا انا من اليوم قرررت ندير حل للظاهرة هاذي
مي ماعرفتش واش ندير بالظبط أمالا بغيتكم دبرو عليا وتعاونوني

[El saker]

أحكي مع جداتك خليها تحكي مع الزوار باش يولو بطبطبو قبل ما يدخلوا

أو

ضعي قفل للباب حيث لا يمكن الدخول الا عند فتح الباب من الداخل

[أم عبد الكريم]

م عندك حتى حل انا كنت عروسة جديدة نخرج نلقا واحد مقابلني و نقولك مرت سلفي خطرة خرجت من الدوش لاقت ولد سلفي وأقف قدمها
م عندك متديريلهم اللي مربي مربي

[fadilasor]

والله عيب كبير ربي سبحانه يقول ياايها الدين امنوا لاتدخلوا بيوتا غير بيوتكم حتى تستانسو ا واحنا تلقايه داخل بلا ماحتى يقول والمشكل انو نحشمو حتى نقولو ولا نرجعو تجي حشومة قولي لجداتك وهي تهدر معاهم ولا اغلقي الباب

[ام محمد امير]

يا اختي لازم تقفلي باب دار لاه من هب ودب يدخل ،ماعندك واش تهدري لعادت هذي داركم الحل الوحيد هو تقفلي الباب

[الفآرسُ المُلثَم]

السلام عليكم
أقترح عليكي قراءة هذا الموضوع ربما يفيدك

حجاب المرأة في بيتها ..........؟ ‏(موضوع متعدد الصفحات 1 2)

[ليلى الجزائرية1]

ياناس فتحت الموضوع فالدار قدام الوالد
كل حطو اللوم عليا انا
لوين نروح ياناس؟
في دارنا ولازم نلبس حجاب والا كيفاه؟
كرهت والله

[أم شروفة]

ما تخرجيش تسلمي عليهم ولما ياتو قعدوهم في غرفة الضيوف.يفهمو ارواحهم

[ليلى الجزائرية1]

ربي يجازيكم كل خير خاوتي
وربي يعطيكم ما تتمناو

[ادرة مكنونة]

حكايتك كيما حكايتي انا واش درت ولان لا طاعة لمخلوق في معصية الخالق قلت لهم وبصراحة متزادوش تدخلو الا توقفو وتتكلمو من حذا الباب لما نقلكم ادخلو ادخلو المرة الاولى ماتقبل حتى احد الوضع وتقلقو وباخلاقي الحسنة انا رجعت الامور عادية المهم بالتي هي احسن صارو الان ميتخطوش الباب الا كي نوافقو وانا نتخبى في البيت

[salim.salim]

رجعنا الى زمن الجاهلية الاولى
واحد يقلك بنت خالتي و بنت عمتي كيما خاوتي و نسلم عليهم و نحكي معاهم عادي و نشوفهم بلا خمار
و واحد يقلك امراة خويا كيما اختي
و كي تحب تقنعهم يقولولك انت مريض و النية تاعك خبيثة
ياخي وقت حضرنا ليه ربي ياخي

[ادرة مكنونة]

رجعنا الى زمن الجاهلية الاولى
واحد يقلك بنت خالتي و بنت عمتي كيما خاوتي و نسلم عليهم و نحكي معاهم عادي و نشوفهم بلا خمار
و واحد يقلك امراة خويا كيما اختي
و كي تحب تقنعهم يقولولك انت مريض و النية تاعك خبيثة
ياخي وقت حضرنا ليه ربي ياخي


صح يقولو ماديروش النية وموسوسين وديم تفكرو غير في الشر قلنالهم باش تعرفو خير من رب الخلق هو الى خلق وعالم بما توسوس النفس الوقت هذا صار القابض على دينه كالقابض على الجمر

[mouadezzine]

السلام عليك
والله القضية ماراهي بهذه لفداحة
ياك يقولو إذا عرف السبب بطل العجب؟
مادامهم يدخلو بلا استئذان أقفلي الباب بـ vachette
وكل ما يطبطب واحد عليكم روحي تخبّاي في غرفة من الغرفة.
وهكذا يتعنى الفرطاس من حكان الراس
هذا رايي
مانعرف إذا يعجبك أو لا

[sunshine2013]

وعلاش ما تغلقوش الباب و تخلوه مفتوح أصلا؟؟؟ لوكان دخل كاش مهبول