فكرة جديدة و لذيذة يا لبنات

[روح مراد]

سلام أخواتي العزيزات
ندخل مباشرة في الموضوع
أغلبكم يعرف البرغل أو سمع بيه راهو قمح جاف طايب و ينشفوه من بعد و يرحوه مثل الفريك تقريبا كاين خشين و كاين رقيق
البرغل عند الأوروبيين يستعملوها كسلاطة لما فيه من فوائد عديدة
حتى السلاطة راهو بنين تحكمي شوية برغل تحطي عليه ماء مغلي و تخليه يتنفخ من بعد ديريلو القارص و الزيت و أي خضر أخرى
أنا كنت استعملت البرغل بعدة طرق منها منفخ و و مفور و نديرلو مرقة خاثرة باللحم أو الدجاج
استعملته في الفرن بالدجاج و الصلصة و الزيتون مثل الأرز
في هاته الحالات ذوقه رفيع جدا و لكن مأخرا جاتني فكرة نستعمل البرغل في مكان الفريك و نحضر بيه شربة فريك
صدقوني أخواتي أني حضرت شربة بدون لحم و لكنها لذيذة جدا جدا
رايحة نعطيلكم المكونات
نهاية الأسبوع الخميس لعشية في الحقيقة مطبخي كان فارغ
درت بصلة مقطعة رقيق + حبة لفت مقطعة رقيق + كرافس مقطع رقيق + زيت + ملح+ عود قرفة + فلفل أسود و حبة طماطم مقطعة + ملعقة كبيرة طماطم مصبرة و نعناع يابس و كسبر مقطع رقيق قليت كل شيء على نار هادية لمدة 10د
درت حميصة + برغل (كنت حطيت نصف كاس برغل في إيناء و فرغت عليه حوالي كاس ماء مغلي و خليته يتنفخ رايح يشرب كامل الماء تخليه لمدة 20 د أو 15د حتى يتشرب كامل الماء) و قليته مع المكونات كامل و مرقت بماء مغلي و غلقت الكوكوط (أنا عندي كوكوط ساب 15دقيقة و كل شيء طايب) اللي عندها كوكوط عادي بين 20-25د يكون كل شيء طايب
البرغل راهو يتباع في سوبيرات كاين رطل 130دج و كلغ 230 دج أنا استعملت الخشين
جربوه وردولي الخبر

[متمنية]

ان شاء الله نجربو

[روح مراد]

جربيه و رجعيلي الخبر

[ombouchra]

يعطيك الصحة اختي راح نجربو ....لوكان تزيديلنا طريقتو في الفرن

[روح مراد]

طريقة الفرن راهي أسهل
دائما تنفخي البرغل و كميته تتضاعف بلاماالديري بزاف باش تتحكمي فيه حتى تتعلمي
ديري مثلا كأس برغل و نفخيهي في كأس و نصف ماء مغلي و يخليه
ديري أطراف دجاج في طنجرة و زيدي عليها البصل و الثوم و حبة طماطم كبيرة و قليهم مليه من بعد زيدي حبة جزر دوائر صغار و قليل من الزيتون + طماطم مصبرة و رند و فلفل أسود و هريسة من بعد ما يتقلاو مرقي و خلي كل شيء يطيب
تقدري تعوضي الزيتنون بالجلبانة أو الحمص
لما يطيب الجاج نحيه و خلي المرق يبرد شوية
بنفس الكأس اللي كيلتي بيه البرغل لازم تتحصلي على 3 كِوس أو أكثر من المرق
حطي في صحن الفرن البرغل و فرغي المرق عليه خلطيه مليح و غطيه بورق ألمنيوم و دخليه للفرن لما تشوفيه بدأ ينشف من المرق خرجيه
و حمري الجاج وحده في صينية فرن و قدميه مع البرغل في الأخير

[kikimnarim2]

البرغل يتباع ولا يخدموه

[ماجدة ميمي1]

يعطيك الصحة انشاء الله نجربها

[روح مراد]

تلقاوه dans les grandes supérettes en general يتباع كيما المقارون أو الأرز في أكياس مغلقة كاين الرقيق و كاين خشين

[*أم جابر*]

بارك الله فيك روح مراد و الله عندو شحال و هو عندي و انا حايرة به جزاك الله خيرا

[melissa lola]

اختي مشكورة احنا نديرو شربة البرغل وتجي بنينة بزاف خير من الفريك

[ام سوهيل]

يعطيك الصحة

[أم لجين هيثم]

يعطيك الصحة

[lilii7179]

يعطيك الصحة والله فكرة هايلة , انا نديرو تبولة ولا كبة
مشكورة

[ام حمزة22]

مشكورة روح مراد على هاد المعلومة
انا عمري ما شريتو نسمع بيه برك
ان شاء الله نجربة ونردلك بالخبر

[روح مراد]

جربيه أم حمزة ما تندميش تقدري ديري بيه بزاف حاجات رائعة بالإضافة إلى الفائدة الصحية

[Zaghdouda Douda]

بارك الله فيك اختي حتى انا عندي مدة مللي شريتو و جات الفرصة باش نجربو و الفضل يرجع ليك شكرا جزيلا ربي يهنيك

[***سلمى ***]

البرغل هوقمح او شعير .مشكورة على الكيفية نعرف المرمز هل هو نفس الشيء

[***سلمى ***]

درك تولهت ل واش كتبت

[loujayne loulou]

merci bcccccccccp

[jawada22]

يعطيك الصحة

[روح مراد]

عاش من شافك جوادة واش أحوالك

[أم الحبايب 26]

يعطيك اصحا ام مراد انا نستاعملو شوربا وجي هايلى يوم دارتو فطور ثاني نطبخوه واحدو كما محامصا ويجي بنين مباصح هذي اول مرا نسمع بيه يجي فلبلا حنايا نخادموه فدار ناقيو زراع من
بعد نطايبوه كيطب ناكلو منو ثاني ولادي يموتو عليه من بعد نحطوه يبس ونطاحنوه فرحا ختك نها مجازت عليها ارحا مبصح ظركا راهوم يادوها لياطحن ازراع من بعد نحوكوه وانسايروه وانخاير

و لخشين واحدو ورقيق واحدو ليندار معا دولما يعطيك اصحا ام مراد على الموظوع

[روح مراد]

شكرا أختي أم الحبايب أصلا أنا أووا مرة كليتو كان منذ مدة قديمة في فرنسا و أصلا أحنا كنا صغار بالصح والديا ما عرفوش واش هو و ملي رجعنا و يما تجرب في كل شيء يشبه الفريك، المرمز ... و ما خرجش كيفو حتى مرة كبرنا لقاه خويا في فرنسا يتباع جابو منغير ما يعرف واش هو حسب كسكس نتاع القمح و كي جابو لقيناه برغل طيبتو مفور و مرقة كيما طعام عجبهوم كامل و من هاذيك و احنا نحوسو عليه حتى لقيتو يتباع في ليسوبيرات فرحت رجعن نشري ديما و نطيبو بكل الطرق