انا اعاني في صمت

[مشكلتي]

السلام عليكم
انا اعاني في صمت طويل
انا شاب ابلغ من العمر 32 سنة احمل شهادة جامعية ليسانس حقوق لكني اعاني من مرض الربو منذ ان كنت صغير
انهيت الجامعة وانا الان بطالحتى اني اجتزت العديد من مسابقات التوظيف و بدون اي جديد كما اني دائما ما اكون منعزل عن المجتمع . لاني احس بالحرج بكبر سني وانا لا اعمل و حتى اني لست متزوج مثل جميع اصدقائي بالرغم من سغر سنهم علي
انا لا استطيع ان اعمل في المزارع ولا في امور البناء لاني جربت في احد الايام و زاد مرض الربو علي و انقذتني المضخة
لقد رايت العديد من البنات و الاولاد ممن يصغرونني سنا تم توظيفهم في المسابقات التي شاركت فيها انا يصغرونني سنا . وانا اظن اني لن استطيع الزواج بدون ان اجد عمل اي اني ممكن جدا ابقى اعزب طول حياتي ..
اخبروني هل يحق لي الزواج ام لا نظرا لظروفي. فالوقت يمر و جميع اصدقائي يسالون مشكلتي حتى انهم قالو لي البطالة ليست عذر لانهم لا يعلموني مرضي

[سجل أنا جزائري]

اولا ربي يجيبكل الشفى

ثانيا علاش عليك يا خويا توكل على ربي و شوف أي خدمة حلال مش لازم تكون مرسم و لا حاجة

و شوف وحدة تناسبك مرض الربو مش عائق باش ما متتزوج كاين اللي مراض عقليين و يتزوجو

المهم تشوف وحدة تناسبك و ترضى بوضعك و نت ترضى بوضعها مثلا تكون هي ثاني مريضة كي مرضك ما تروحش تشوف وحدة 20 سنة و جميلة و عليها طلبات بزاف هذي واحد صحيح و خدام و و و ما تقبلش بيه

ربي يفرج علييك خويا

[amoros]

اخي كن متفائل انت قضيتك ليست كارثيه كما تتوهم عمرك ليس عمر يأس 32 سنه هناك الاف مثلك لا تحزن اما مرضك كذلك يعاني منه الاف ويمكنك التعايش معه هناك عدة وصفات مفيده ممكن تنفعك اليك هاته اذهب الي محل عطاره اطلب منه عقار اسمه مر الصبر غليه في الماء ثم اتركه يبرد صفيه بمصفاة واشرب قليلا منه كل صباح انه مر كثيرا لكن تحمل واضب علي العمليه وادعو لي بالخير

[سعاد الجنة]

ربي يفرج عليك أخي
إعلم أن اليأس قد تمكن منك ولكن يجب أن تحاربه بالدعاء أولا والتوكل على الله ثانيا واصدق النية وشارك في كامل المسابقات ما تخلي حتى مسابقة دون أن تحط فيها ملفك وحتى ولو كان منصب واحد فقط
إعلم أن الرزق من عند الله لذلك اصدق النية مع الله صلي صم تصدق ......فالطاعات تذهب السيئات وبالدعاء إن شاء المولى يفتح عليك ويرزقك من حيث لا تعلم
لا تيأس فاليأس من الشيطان والعياذ باله
ربي يوفقك ويعطيك منصب دائم إن شاء الله

[ام محمد امير]

يا اخي عمرك غير 32 سنة وراك تقول كبرت والله نعرف خرين عندهم 40 سنة كي تقولو ازوج يقولك مزالني صغير يا اخي حوس خدمة عند بريفي نورمالمون تلقى واذا عندك شوية صوارد تقدر تحل حانوت مواد غذائية والله راهي ماشية بزاف في وقتنا هذا ولا تقدر دير دروس خصوصية للتلاميذ،ومن ناحية زواج المرض تاعك ماهوش عائق راهم مختلين ذهنيا والله العظيم زوجو كاينين بنات يحبو السترة وربي يفرج عليك وعلى كامل المومنين

[naamane3]

واللي عمرو 40 وعاطل عن العمل
واعزب ولامرض لديه واش يقول
انسى مرضك او تناساه
وعيش حياتك عادي
وادخل مجال التجارة مثلا
المهم شغل مخك وانتهى الامر
ولكن يبقى امر مهم وهو الخطوة الاولى
ابدأها بكثرة الاستغفار وسترى منه العجب

[ام نهوله]

واش هاد النظره التشاؤميه عندك 32سنه وتقول كبير يا خويا هدا وين راك جاي للدنيا و مرض الربو ماراهش مانع
نعرف بزاف ناس مراض بيه و عايشين عادي حتى نسينا بللي مراض و مشكل العمل ما عندو حتى علاقه لا بمرضك ولا يسنك
الغاشي كامل راه بطال المهم تكون عندك الاراده و تبقى تحوس على عمل يناسبك و باذن الله تلقى اما الزواج و الله غير تدي لالات لبنات
و كيما راك حابها كون واثق من نفسك برك و اخر نصيحه نحب نقولهالك
لا تجعل الدنيا مبلغ همك

[عطر الياسمين الاصلي]

يا اخي اكثر من الاستغفار والدعاء وان شاء الله ربي يفرج همك ويشفيك ويرزقك بمنصب دائم وزوجة صالحة

[dalal 28]

لسلام عليك اخي
كن اكثر تفاؤل وتعايش نع المرض
اعلم ان كل الناس راهم مرضى اللي سكري اللي حساسية واللي شقيقة ووووو الا من رحم ربي
بالنسبة للعمل ابحث عن عمل كبائع في محل اظن انه تناسب مرضك واحمد الله انك جامعي ولديك شهادة
وستحصل على عمل عاجلا او اجلا
اعلم ان الامر صعب لكن على الاقل هناك حق وستحصل عليه
اما في ما يخص الزواج فهو نصيب وليس له علاقة بالسن
وربي يرزفك الزوجة الصالحة وعمل مرموق والشفاء العاجل

[مريم الصابرة]

السلام عليكم اخي الكريم
أولا نبدا بسنك وعلاه تهدر وكانو عندك 60 يا اخي 32 سنة كاين اكبر ومش متزوجين هذا هو السن المناسب ماراك روطار ماراك والو ومازال ربي ما كتبش و فقط اما موضوع السن راك مناسب جدا
عودة لموضوع مرضك والله يا اخي واشبيك تشوف لروحك كانو فيك عيب او نقص مريض الربو مريض ككل المرضى المابون بأمراض مزمنة اخي فقط ولن ازكي نفسي مريضة مرض خطير ويمكن بتر رجلي ومصابة في يدي وظهري وكسرت من جديد في رجلي السليمة بمعنى كل شي مريض والحمد لله وعادي نشوف فروحي إنسانة عادية جدا والحمد لله والشكر لله أني في قائمة المرضى اللي عندهم مكانة عالية عند ربي
اخي نظرتك لروحك هي تصنع نظرة اناس ليك ما تحاسبش روحك وتحطها فخانة إنك ناقص على كل الناس راك راجل وعادي جدا
الخدمة راه مشكل كل الشباب وربي يرزقك يا رب وإن شاء الله ربي يكتبلك خدمة وتسترزق بها اما تلقى وحدة تتزوج بك اكيد تلقى وهذا امر عادي جدا
الله يشافيك يا رب
موفق

[سجود نور الايمان]

السلام يا اخي اولا ربي يشفيك و يشفي جميع المرضى
مرض الربو من اكثر الامراض انتشارا و ما هوش مشكل خلاص اما سنك فانت اقل من زوجي بسنة و انا عندي حوالي عام و نصف زواج و معضم اصدقائو مازل ماتزوجوش
اما العمل فمعضم الشباب ليس لديهم عمل ثابت انا اعرف مراقب يعمل معي ادماج متزوج و له ولدين و زوجته لا تعمل و يحمد ربي
اتوكل على ربي ابحث عن عمل حتى في القطاع الخاص و ربي يرزقك ببنت الحلال التي تسعدك و تنسيك في كل ما مر عليك

[إكليل]

أول شيء ربي يشافيك و يعافيك إن شاء الله .
لن أزيد على ما قاله الإخوة و الأخوات فقد كفوا ووفوا .

مرض الربو مرض عادي يقدر الإنسان يشفى منه إن شاء الله لدي أقارب كانوا مرضى بيه و شفوا بعد رحلة 5 سنوات علاج تابعوا علاجهم عند أحد الأطباء و تم شفاءهم بإذن الله تعالى .

و أصبحوا الأن يزاولون مختلف الأعمال في البناء في الفلاحة و حتى حاجة ما تأثر عليهم.

[أم شروفة]

وقال أبو بكر الصديق رضي الله عنه : (أطيعوا الله فيما أمركم به من النكاح ، ينجز لكم ما وعدكم من الغنى) .
وعن عمر بن الخطاب رضي الله عنه قال : (عجبت لرجل لا يطلب الغنى بالباءة ، والله تعالى يقول في كتابه : (إِنْ يَكُونُوا فُقَرَاءَ يُغْنِهِمُ اللَّهُ مِنْ فَضْلِهِ) .انا شخصيا .لا أرى أي مانع من زواجك.فلا تعاني اخي لافي صمت ولا في جهر.لأن الله سيفرجها فقط قم بالخطوة الأولى تزوج والكل يأتي اتباعا .

[first first]

مرضك اخي ليس نادرا ولا معيقا.فكما لم يعقك عن الدراسة لن يعيقك عن الزواج والعمل
وحقيقة عدم زواجك وعدم عملك لاسباب اخرى لادخل لمرضك فيه.
البطالة يعاني منها الكثير..وبما انك بطال فالزواج قد يرتبط بدلك ايضا
ماتعقدش روحك......هناك من هم اكثر منك سنا ولم يتزوجو ايضا......عمرك 32سنة ..............لست شيخا...............واضف الى دلك انتم الشباب عنكم ابسيو تاع العمر مايديرونجيكمش بزاف
ثق ان دوام الحال من المحال..وان الله يمهل ولايهمل...........يراك ويعرف حالك........................تفاءل بفرج قريب ان شاء الله.
واعلم اخي ان اغلب الشباب يعانون مثلك..............وربي يكون في عونكم....وربي يرزقكم من فضله وكرمه.

[لحن الحياة.]

وهل مرض الربو عائق.........؟

نحن عائلة باكملها متوارثين مرض الربو أبا عن جد و عادي جدا هو ليس مرض معدي و لا يمنعك من تاسيس حياتك ربي يفرج عليك

[ندى الصبح]

السلام عليكم
الاخ راهو يقول العمل هو المشكل مشي المرض وانما ذكر المرض باش يفهمكم بلي ما يقدرش يعمل في البناء او الفلاحه او الاعمال التي تسبب له ازمات الربو
واش نقولك اخي راهي مشكل تاع كامل الشباب ،،، البطاله سواء الي قرا ولا الي ما قراش
اكثر من الدعاء وقم بالخطوه الولى ( تاع الزواج ) وربي ان شاء الله يفتح عليك

[jayda]

yama ness mrad w tzawjoo w daro hyathom rabi ychifk w y3awnek w yorzkok bent hlel li thazek w mzlek sghir rabi yssahlk nchlh

[رضوان التلمساني]

ya khouya salam w salam 3la khoutna ga3 li rado rodod chaba bzzf allah ybarek fihom w ya3téhom esaha
bon khouna kima galou l ikhwa wel akhawat l'azm machi mard wa3ar li te9ta3 liyés menah w houwa mard kima ga3 l amrad l mouzmina w hmd ya rabi rah kayan e dwa w kayan les traitement li ykhalouk tensah ga3 bi idn léh bsah bchart wahad w li houwa l imen bi léh w ti9a fih wahdah beli houwa li yachfik kima houwa li khal9ak tu voi khouna
w nzidak haja okhra had l haja galhali wahad sahbé allah yfarhah kima fara7ni w tala3li l moral psk ana fia diabéte w kount taya7li l moral w gali wahd l hadra radatli ro7 gali "hamdouléh jék had lmard nta li t9ad dawih w 3ayach fi blad fiha dwah w 3andak la capacité béh dawih gali khir meli yji lwahdakhor ma y9adch ydawih wela 3ayech fi blad ma fihach les assirences kima ikhwana f l'afrique " men had lhadra ya khouya vrai welatli l hayat w hamdouléh 3ala kol 7aja tji men 3and rabi li biha na3ref beli rabi tfakarni w btalani kima ibtalak b had lmard beh ykhafefena m dounoub w salam w twakal 3la allah w dir chwiya salam w rabi yareza9ak nchalah b li rak baghih w yakssik saha okhra khir m li raha 3andak w

[<نَجْمَاتْ>]

زيادة على النصائح اللي قدموهالك الإخوة حببت نعطيك وصفة لعلاج الربو جربها قريبي وشفاه الله من الربو تأخذ كمية من العسل وكمية من زيت الزيتون تخلفهم وكي تروح تصلي الفجر كول مغرفة وروح تصلي وافطر بعد نصف ساعة والله قريبي كان يستعمل المضخة وأحيانا جيه الأزمة في ساعات متأخرة من الليل طبعاللمستشفى الى الاستعجالات ورآه شُفي والحمد الله المهم داوم عليها

[jamaltahar]

انا عندي خالي عمره 37سنة عنده شهادة بصح ملقاش خدمة يتقلش ماهو متزوج باباه قالو ازوج ونا نصرف عليك محبش قال راني مزال صغير مع انو مثقف و متخلق نحس من كلامك اخي انو مرضك سببلك مشاكل نفسية لانك صغير باش تشكى من هن قلة الزواج و الخدمة ماهيش فاحة وبناء كاين ياسر خدمات توالم الحالة نتاعك اتكل على ربي برك و حوس وخرج من راسك هاد الافكار السلبي[منلقاش خدمة راني مريض معناها مزوجش لا لالا يااخي هدا تفكير خاطئ نعرف بلي بلا خدمة متقدرش على الزواج لانه مسؤولية و مصاريف دير ربي في بالك علبك كثرة الدعاء و قيام الليل والله مجربتها فجاة تلقى كل لابواب مفتوحة قدامك

[نصيرة 02]

السلام عليكم ورحمة الله و بركاته
ربي يشفيك و يفرج عليك لماذا هذه النظرة التشائمية الحمد لله أنك جامعي و لك شهادة جامعية لي تخليك تدخل المسابقات سواء حكومة أو خاص
أما مرض الربو ماهوش عائق باش يحكمك على العمل أو الزواج ربي يفرج عليك وعلى جميع المؤمنين يرزقك بالزوجة الصالحة والعمل يارب

[loulou88]

السلام عليكم اخي الكريم
اخي انت لديك امرين:
1- امر المرض: مرض الربو الكثير يعاني منه والمرض لبس عيبا وانما هو ابتلاء من الله عزوجل .........طهورا ان شاء الله
2-البطالة:نصف الشباب الجزائري بطال والرزق بيد الله لذلك لا تقل اخي ذلك الشخص اقل مني سنا ووظف ........توزع الأرزاق بيد الله
وبالنسبة للزواج سن 32 ليس كبير على الإطلاق
صبرا جميلا يا خي