مشكلتي

[مشكلتي]

انا شاب في عمر 31 سنة
اعمل في الجيش
دلتني اختي على فتاة جميلة وتبدو ذات أخلاق حسب ما سألت عنها
تقدمت لخطبتها وتم القبول
تم العقد الشرعي بيننا
وبدأت اكلمها في الهاتف
حينها فهمت أنها تريد سكنا خاصا بها خاصة عندما قلت لها ان عائلتي مكونة من 7 بنات و3 دكور ووالديا طبعا
بمجموع 12 فرد
يسكنون في بيت مكون من غرفتين وصالون ومطبخ وحمام طبعا
رفضت الفتاة ان تسكن مع عائلتي بحجة أنها لن ترضى بأن ينام أحد من عائلتي في المطبخ والصالون وهي تنام في غرفتها
فقلت لها أنك لم تشترطي علي ذلك في الخطبة وامي شاهد بيننا
فذهبت لأمي وأخبرتها
فتكلمت مع خطيبتي وحاولت أن تطمنها بأنها لن تواحه مشاكل في البيت
ويفتح ربي مستقبلا
غير أن الفتاة اشتكتني لأمي وقالت لها اني شديد الغضب وتخاف ان اؤذيها مستقبلا
وقالت لها ان حديث السكن الخاص كان مجرد حديث وأنني افتعلت المشكل من لا شيئ
المهم امي قالت كلاما ازعج الفتاة
هي قالت لها من دون قصد
( بنات الفاميليا ما يعملوش هكذا(
فغضبت الفتاة وفهمت انو عجوزتها تعايرها
حاولت اصلاح الأمر
ومن جهة السكن
قلت لها انه لا يمكنني أن اؤمن لك السكن فغضبت وقررت الانفصال
ولكن بحجة أنني شديد الغضب ولا يمكنها ان تتحملني أو تعيش معي
بصراحة أنا شديد الغضب فعلا
ولكنني احببت هذه الفتاة ولا اريد أن أخسرها
هي تقول لي خلينا نتفارقو
راك دمرت علاقتنا
عندما قلت لامك انني اريد السكن
من الأحسن ان نتفارقو حتى لا تكون الاضرار كبيرة مستقبلا لي ولك
بالمقابل انا لا استطيع ان أؤمن لها السكن( حاولت ان ابني في الطابق الأول ولم استطع أن اكمل )
هي قالتلي بيع سيارتك واشتري واحدة اقل منها وعاون روحك في البنيان
مشكلتي اني اصرف على البيت ، أبي يعمل موال
لو كان يسمع ان كنتو حابة دارها وحدها سيجن وأكيد سيقول لي خليك منها
كاين غيرها
شهريتي 5 ملاين
لا تكفيني لأن أبني
قولولي واش ندير

[كمال22]

استأجر بيت و عيش حياتك اخي....

[nasser26]

يا اخي من ناحية غرفتين و12 فرد عندها الحق منلومهاش

انا متقبلتش الفكرة ما ادراك هي

[samy algerien]

يا اخ هذه حياتك الخاصة . مادمت ستتزوج ببنت الناس استاجر بيتا وعش معها حياتا كريمة .
وهذا لا يمنع ان تبقى بعلاقة جيدة مع عائلتك . وتساعدهم بما تستطيع من مال .

[وسيمツ]

اخي العلاقات تكون تتنازل شوي من عندك و شوي من عندها ... و هكذا تمضي على احسن حال
لكن اصبر شوي أخي حضر نفسك و بعدها تزوّج ... ، ما أعجلك ؟
على الأقل ابني الفوق ..
ربي يعاونك ..

[ساندريلا]

اخي كبرها تكبر صغرها تصغر
لماذا تصعدون الدرجات اصعد درجه درجه
مادام ااضيق الى هذا الحد ربي يفرج علاه اخي تزيد فرد في العائلة و بنت الناس حتى وين تقعد ما كانش
الزواج سترة لكن بهذه الطريقة سيكون عذاب الزوجة لن تأخذ راحتها في اي شيء
اذا اعجبتك حقا فما عليك الا تقبل الامر و ااكراء
ربي يهدي سرك اخي و يرزقك

[ماري نت]

السلام عليكم :واش نقووووووووول؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟
خطيبي رجل قدو قد حالو - ربي يعينو على كل حال- ،راهو يبني في الطابق الثاني من الدار ،عندنا عامين واحنا مخطوبين بالفاتحة ،أنا أقول له المدة طويلة لا يهمني شكل الدار،من بعد راهي تكمل بالشوية .وهو مطنش ومازال يكمل ومازالت ماخلاصتش؟؟؟؟؟
عيش يا راس.........

[SKYALGERIA]

السلام عليكم قرأت الموضوع و أردت أن أدلو بدلوي فيه لعلي أفيدك أخي الكريم . أنت بين أمرين أحلاهما مر إما إرضاء زوجتك و كراء مسكن لحالكما و تعيشان مع بعض أو إرضاء عائلتك و تبقى مع والديك و إخوتك و تخسر زوجتك . سأفيدك برأي أظنه صائب و هو :
حاول أن تفهم زوجتك بأن الإبتعاد عن الوالدين من اليوم الأول لزفافكما شيء صعب و أن السكن بمفردكما في مسكن مستقل ضروري جدا لأن في المستقبل سيكون لكما أبناء إن شاء الله . و لهذا عليك بحزم أمورك و أن تقوم ببناء غرفة للنوم و مطبخ لكما في منزلك العائلي بشكل مؤقت و لا أظن أن الوالدين سيعارضانك في هذا . أعتقد بأنك تستطيع ذلك بأجرتك الشهرية و مساعدة من إخوانك إن تيسر لهم ذلك . ثم بعد الزواج حاول الإدخار شيئا فشيئا و بعد مدة قم بشراء قطعة أرض أو شقة - أعرف أن الأمر صعب في بلادنا - لكن مع شيء من الإرادة و التوكل على الله عز و جل سيتحقق ذلك . مشكل السكن أخي مشكل عويص جدا و ربما هو أحد أسباب تأخر الزواج عند الشباب . ندعو الله في هذه الجمعة المباركة بالسداد و النجاح في حياتكما الزوجية بإذن الله .

[mounia 85]

خطيبتك عندها الحق كيفاه في 12 تسكنوا في زوج بيوت في المقابل شهريتك مليحة وقادر تكريلها وتيفيتي المشاكل اكيد والديك يديرولك مشاكل لوكان تكريلها على حساب هدرتك بصح صدقني على قد مايكونو المشاكل هادو مش قد ان مرتك تعيش مع 7 نسا وحدوخرين في دار وحدة و ماتقولش دارنا ناس ملاح ومايديرولهاش مشاكل والله منبعد تولي تشوف حوايج عمرك ماشفتهم منهم .... ومنبعد نتا لي راسك يوجعك وماتلقاش مع من تضرب..نورمالمون داركم يخلوك تخمم في مستقبلك وتدير دارك وباباك حابة نفهم علاه يجن لوكان تدير دارك وحدك علاه هو مازال ساكن في دار باباه مع خوتو ؟؟مع احترامي الشديد هو والف انك تعاونو في المصروف ولوكان تكري وتروح ماتساعدوش
هدا هو السبب الوحيد لي مخليهم رافضين انك تخرج عليهم
الحل انك تكري وماتنساهمش يعني كل شهر ابعتلهم مبلغ مالي لي تقدر عليه طبعا ياخويا ننصحك تخمم في روحك حتى انت مش راح تلقى راحتك في وسط الغاشي اللي فالدار ..انا في رايي تتفاهم مع داركم انك تحبس المصروف لمدة معينة وتخلي شهريتك تبني بيها على الاقل بيت وكوزينة وكي تخلص يرحمها ربي لوكان يعودو يخمموا شوية في مصلحتك راح يوافقوا ولوكان يرفضوا .....اكيد راك فهمت
المهم ازرب دير حل وتفاهم مع خطيبتك قبل ما تبطل على خاطر قليييييييييل لي تقبل بضروف كيما هادي ومن حقها انها تخمم في مستقبلها وخاصة انك عسكري يعني جيبها من دار باباها وتحطها بين 12 عبد وعلى الاقل كون جيت معاها درك المخلوقة تخمم تخمم ومنبعد تلقاها مافيهاش وتبطل
وتاني نرجع للكلمة لي قالتها امك انو بنات الفاميلية مايديروش هاكا علاه واش دارت مسكينة هي هدرت هدرة حق تصور هادي في البداية برك وفي حوار واحد برك بيناتهم وتناشعوا وين كون يسكنوا مع بعضاهم ومعاهم 7 وحدوخرين
عاود خمم يا خويا وربي يهديك للحل المناسب

[ام نهوله]

شوف خويا انا مانيش ابدا ضد فكرة انو الراجل يعيش مع والديه كي يتزوج
بالعكس انا من المشجعين على ذاللك لكن في حالتك 12فرد ربي يبارك في
غرفتين صعيبه شويه و البنت من حقها مسكن خاص وربي يوفقك

[ريان 7]

السلام عليكم
اخي منكذبوش على بعضنا f3 لا تكفي 12 فردا و انت حاب تزيد فرد آخر
جهز نفسك رويدا رويدا اكري و لا ابني .
اهم حاجة في الحياة الزوجية هي الخصوصية .

[سحابة مسافرة]

مش عيب ولا حرام انو الكنة تعيش مع اهل زوجها لكن لما تكون الظروف ملائمة
حبيت نفهم كيفاه 12 شخص و تزيد الكنة يعيشو في زوج بيوت و صالون ؟؟؟؟؟؟؟؟؟؟؟؟
و تاني باباك علاه يجن كي يسمع هاد الكلام ؟؟ اسكو راك نورمال ؟؟؟

[hodahodahoda]

غريب كيف لم تتكلمو عن السكن من قبل
لمادا لم تدكروا ان السكن سيكون مع العائلة

ربي يوفقك

[salem1985]

من حقها تسكن وحدها وانت خويا ربي يفرج عليك والافضل الكراء والا رايح يصراو مشاكل راهي الغيرة صعيبة

[bellaluna]

13 فرد في غرفتين..!!!!

[سرور2]

يا اخي انا عطاوني اف 2 وانا وزوجي واولادي 2 وقلت معنديش وين رقد ولادي راهم بداو يكبرو وين يانت علبالك يجي نهار ويقلولك انت ومرتك في

بيت لازم تبيت معاك وحدة من خوتاتك ولا زوج وش دير في وقتها وممكن نهار الي متكونش هنا يباتو كامل معاها وين راهي حريتها الله بارك شهريتك

مليحة بعد عن الشر وغنيلو من نهارك لول ربي ينولك الي في بالك

[محمد جديدي التبسي]

ابن في الطابق الاول غرفتين ومن ثم تزوج
اصبرالان باه تعيش مرتاح من بعد
حاول تجمع بعض المال وابن غرفتين حتى لو أخرت زواجك لعام آخر ..ربي يفتح عليكم

[wafwaf8471]

khoya khamime b3a9lik machi bgalbik ltofla kanite sari7a maak w 3labalha beli mata9derch taich fi doroufe hadi mine lahsene inkom tinfaslo dok khir mine baad lzwaj w hadrete yimak andha lhak tizafe minha khatche machi hadra

[nedjma19]

بحكم التجربة انا اقول لك انو البعد يجيب السلام و قرب يجيب الكلام و الايام تبين و اذا ماراكش حاب تخسر داركم لازم تبعد و تقعد عزيز و تعاونهم من البعيد لبعيد

[abdelmalekmhdf]

سلام اخي انا تقريبا راتبي يساوي رلتبك و اريد بعد الزواج ان شاء الله كراء بيت صغير الى ان يفرج الله رغم ان لا احد اشترط علي ذلك لذا من رايي اكتر بيتا و ان رايت منها تعنتا و عدم الرضا فالافضل قطع العلاقة . ربي يسهلك اخي سلام

[عائشة 88]

السلام عليكم اذا راك حاب تتهنا من الاحسن سكن مستقل بعيدا عن المشاكل ممكن تكري بالقرب من الاهل ربي يوفقك ويهنيك

[أم عروة]

الخطيبة معها حق
انت الان لا ترى الامور بوضوح
لكن بعد الزواج ستراها جيدا
بل وستندم انك لم تتزوج اصلا

وثمة ملاحظة لما قلت انها لم تشترط عليك المسكن الخاص
وها انت اعلمتها مسبقا بوضعكم
بارك الله فيكم الزواج اكبر مسؤولية والفتاة امانة عندكم
والاولاد مستقبلا ايضا

ابن في الطابق الاول غرفة او غرفتين ومطبخ
وحاول ان تفهم ابيك با سكنك لوحدك لا يعني انك ستعقه اولن تزوره
قل له عادي سنبقى بيتا واحدا

اعانك الله