طبق ليلة عشوراء

[روح مراد]

أتمنى من الأخوات المشاركة بعرض طريقة تحضير طبق ليلة عشوراء
كيما نعرفو لكل منطقة طريقة تحضير أطباقها ، و نفس الطبق يتحضر بعدة طرق حسب المناطق
أنا نبدا من عندنا و بالأخص من دارنا
في دارنا و حتى داري نحضرو كسكسي باللحم في دارنا نحضروه مرقة بيضاء باللفت و القرعة
و في داري نحضروه مرقة حمراء عجوزتي ماتحبش المرقة البيضاء

عند مرت خالي إما تحضر في عشوراء كسكسي باللحم المجفف كيعادات بكري أو تحضر كسكي بالعصبان مثل توانسة بحكم أن أمها تونسية

[صدفات]

صباح النور أختي روح مراد
احناليلة عاشورا عادي ولكن نهار عاشوراء نديرو الرقاق مع الجاج بالمرقة هذا للفاطرين أما الصيام نزيدولهم الشربة مع الرقاق في الليل نقصو شعورنا ونديرو الحنة .إذا تفكرت حاجة أخرى نرجعلك

[ام النجمين]

وكت عاشوراء

[ام حمزة22]

سلام روح مراد
حنا فالعاصمة نطيبو رشتة لاكن درك ولادي ربي يحفضهملي كي كبرو ولاو يصومو معانا حتى بنتي لي عندها 15 سنة قالتلي نصوم معاكم وكي يصومو ما يكلوش بزاف كل واحد واش يشرط علية
حتى انا كي نكون صايمة نكل غير حاجة خفيفة مازال ما قررتش واش نطيب في هاد عشوراء ربي يقدرنا
شكرا روح مراد على هاد الموضوع بارك الله فيك

[صدفات]

وكت عاشوراء
صباح النور
يوم عاشوراء يكون يوم الإثنين 03 نوفمبر إن شاء الله

[أم مجد]

نحن في عنابة نديرو شخشوخة بالدجاج او تليتلي نكحلو و نقصو شعورنا

[روح مراد]

شكرا لكن على التفاعل
بكري يوم ما كنا صغار كانو يقصو شوية من شعرنا و البنات يطلعوهم فوق السطح يدورو و كل واحدة تقول "يا لالة عشوراء خليني بين لبنات مشهورة" و يديرو الحنة و عشاهم كسكس
أما الآن في وقتنا الحالي مازلنا محافظين فقط على الكسكس حتى الصايمين يفطرو بالكسكس
أما الأمور الأخرى راحت خلاص ماوليناش نطبقوها
بالصح بيناتنا أنا أعشق تلك العادات مي الوقت ما يخليناش نطبقوها

[ام ادم11]

سلام اخت روح مراد
انا في ان شاء الله ندير شخشوخة الضفر و على كلامك بكري كانت ماما تقصنا شوية من شعر نا وتحنينا بصح درك قلتلها باه نقص شعر جوري ( بنتي) تعرفي واش قاتلي
هدي خرافات !!!!!! يالا العجب
بصح ما هدرتوش واش ديررو في السهرة

[صدفات]

أختي روح مراد تقدري طبقي هاذ العادات في رأيي ألأم هي المسؤلة على المحافضة على عاداتنا بتحضير الأطباق و الوجبات بشراء الحنة و تخمارها بقص الشعر كل هذه حاجات بسيطة ولكن تخلق الفرق و على هذا الأم ما يليقش تتهاون وتتكاسل يلزم جاهد نفسها باه تحافظ على تقاليدنا وتعطي المثل لأبناها و بناتها. و لا شتى قلتي.

[ام حمزة22]

عندك الحق صدفات الام هي لي تشد فالعادات والتقليد انا نسيت قص الشعر والحنة حتى فالعيد ما وليتش نديرها نموت عليها ولادي الدكور يعيفوها لوكان نديرها يقولولي ما ناكلوش ماكلتك
تلقايني لي نشوفو فالعائلة داير الحنة نروح نشمها نموت على ريحتهت هههههه

[صدفات]

عندك الحق صدفات الام هي لي تشد فالعادات والتقليد انا نسيت قص الشعر والحنة حتى فالعيد ما وليتش نديرها نموت عليها ولادي الدكور يعيفوها لوكان نديرها يقولولي ما ناكلوش ماكلتك
تلقايني لي نشوفو فالعائلة داير الحنة نروح نشمها نموت على ريحتهت هههههه

حبيبتي ديري الحنة ما تخليهاش في قلبك كي يجوعو ياكلوا.

[أم نهال]

نتفكر كي كنت صغيرة كانت أمي تقصلي شوية من شعري درلي القطران كي المسياسة في يدي والحنة ودير الأطباق التقليدية والآن راحت هذه التقاليد

[روح مراد]

صباح الخير شكرا لكن على التفاعل
حاجات كانت زمان و الآن لا الوقت يسمح باش نديروها و لا حتى الظروف
الحنة أنا شخصيا ما نحبش ريحتها بزاف و ما نحبش نديرها بالرغم من أن عجوزتي ديما تطلب مني نديرها و لكن الله غالب
أما فيما يخص الشعر و الكحل .... هاذو يروحولي كامل من راسي ليلة عشوراء حتى يفوت الوقت باش نقول لخواتاتي نسيناهوم
و الله ما فهمت إذا احنا اللي تبدلنا و اللا الوقت تبدل

[maya83]

اخواتي راكم تقولو قص الشعر و القطران و طلعة للسطح واش معنتها هاذ الامور و هل هي بدع و اذا كان فيها فايدة قولولنا نورونا

[روح مراد]

يا أختي رانا نهدرو على العادات و التقاليد واش كانو الناس زمان يديرو
رانا كامل أبناء الجزائر و كل منطقة عندها عادات و تقاليد تتوارثها أجيالها (فيها المفيدة و فيها غير المفيدة) و لكن تبقى تتوارثها الأجيال
كيما يقولو من لا تاريخ له لا مستقبل له

[صدفات]

الجديد حبه و القديم لا تفرط فيه
و العادات لوكان ما حافظوا عليها ما توصل لينا و إذا قصينا شعورنا و درنا الحنة واش من بدعة في هذا الشيء إستفتي قلبك قبل أي شيء.

[ام مودة33]

ليلة عاشورة نجوزوها في بيت شيخي نتلمو كامل ونطيبو الشخشوخة باللحم مع شوية كسكس لانو كاين لمايكلش الشخشوخة مع شوية شربة لاننا نصومو انشاء الله ربي يقدرنا و في السهرة نديرو المشروبات مع الطمينة و المكسرات بلاما ننسا الحنة للاولاد

[روح مراد]

ابصحتكم
تفكرت حاجة من الممنوعات في ليلة عشوراء
ما نغسلوش الحوايج، و ما نخيطوش الإبرة و الخيط من الممنوعات ليلة عاشوراء
يقولو لي يخيط في عاشوراء تحكمو الرجفة في اليدين

[tedsm]

[تذكير بيصيام عشوراء والطبق في هده المناسبة الرقاق

[crono]

ابصحتكم
تفكرت حاجة من الممنوعات في ليلة عشوراء
ما نغسلوش الحوايج، و ما نخيطوش الإبرة و الخيط من الممنوعات ليلة عاشوراء
يقولو لي يخيط في عاشوراء تحكمو الرجفة في اليدين

سلام عليكم
شكرا روح مراد على هاد الموضوع بارك الله فيك
شكرا لكن على التفاعل
حنا فالعاصمة نطيبو رشتة نهار هاد نصومو أ ما نكلوش بزاف كل واحد واش يشرط علية :D
فكرتني بكري ما كنا صغار كانو يقصو شوية من شعرنا و نيديرو الحنة
أما الآن في وقتنا الحالي بديت ننسها كي كبرو وللدي بنتي وللت متحبش نقص من شعرها ولا الحنة تحب تعمل تع رشمات أنا نموت علها تفكرني في صغري :rolleyes:
قريب منسيتها فكرتني فها روح مراد ما نخيطوش الإبرة و الخيط
وتفكرت حاجة نهار عشوراء نفتحو البيبان تاع خزانات و قجورة نفتحوهم شويا يقولو يدخل الخير

[ام هاديل وياسين]

شكرا لكي روح مراد على الموضوع هكدا نعرفو على كل منطقة وعداتها
احنا يوم عشوراء نصومو ونديرو الكحل ونقصو شوية من شعر لبنات والحنة طبعا بصح انا منحبهاش بزاف
وحتى بناتي شبهوني وكي نشوف وحدة دايرتها تعجبني وولادي يقلولي اذا درتيها ماطيبيش جيل اخر زمن ههههههه
والعشاء نديرو رقاق بدجاج وحاجة حلوة

[Sidra Seba]

مساء الخير موضوعك رائع

[روح مراد]

الموضوع رائع بمشاركتكن
تقريبا نفس العادات في كل المناطق
طبق تقليدي، حنة، قص الشعر، الكحل و الصيامن و ... بالصح هاذي نتاع البيبان حاجة جديدة إن شاء لعشية الروح نجري نفتح كل شيء خاصة القجر اللي فيه دراهم

[صدفات]

صباح النور يا روح مراد ضحكتيني مع الصباح عندك الصح اليوم ما نرقد حتى نحل كل شيء هههههههههه

[أم هبوبة]

احنا في يوم عاشوراء كانت امي و الجدة الله يرحمها تقصلي شوية من شعرنا كانوا يقولونا باه يزيد يطوال و كنا نعملوا للقهوة نتاع العشية المسمن و البغرير و العشى نديرو مرقة بالرقاق كاين الي يسموه التريد كنا نتلايموا قاع في دار جدي الله يرحمه و نتعاشو و نسهرو ا اليوم تبدلت الحالة و بدى كل شيء ينقص شوية بشوية و دروك كي نحبوا نعملو العادات يقولولك هدي بدعة و الله أعلم

[روح مراد]

أخواتي ماكاش كيما العادات و التقاليد في مثل هذه المناسبات أشياء تبقى راصخة في عقول الصغار و الكبار و الواحد يتشوق وقتاش يعيشها
صح ممكن تكون بدعة ولكن بدعة فيها إيجابيات عديدة منها ترصيخ القيم الإسلامية كالزكاة في مثل هذا اليوم، الصدقة للفراء، الصيام، ذكر الله، و لم شمل الأسرة الكبيرة
تلقايهم يتلاقاو في الدار الكبيرة و يتعشاو و يسهرو هذه كامل إيجابيات خاصة في وقتنا الحالي رانا في دار وحدة و ما نتلاقاوش
أنا وسلفتي نسكنو في دار وحدة هي في طبق و أنا في طبق تلاقينا في العيد و من هذاك اليوم ما شفتها يعني مناسبة كي هاذي تلمنا و تخلينا نتقربو من بعضانا و تزرع بيناتنا المحبة و الأخوة
نفس الشيء في دارنا يتلاقاو دايما في مثل هذه المناسبات عشاء للجميع مطعم الرحمة كيما كنت نسميه بكري نص النهار و أنا في الكوزينة
الأيام تمر و يبقى فقط مثل هذه الذكريات أولادكم رايحين يكبرو و يتزوجو و يبقاو يتفكرو مثل هذه المناسبات و حلاوتها يحكو لأولادهم عليها و يقولو لنياهوم علاش ما الديروش كي يما هذا رايح يكون فخر لكن كأمهات

[صدفات]

أخواتي ماكاش كيما العادات و التقاليد في مثل هذه المناسبات أشياء تبقى راصخة في عقول الصغار و الكبار و الواحد يتشوق وقتاش يعيشها
صح ممكن تكون بدعة ولكن بدعة فيها إيجابيات عديدة منها ترصيخ القيم الإسلامية كالزكاة في مثل هذا اليوم، الصدقة للفراء، الصيام، ذكر الله، و لم شمل الأسرة الكبيرة
تلقايهم يتلاقاو في الدار الكبيرة و يتعشاو و يسهرو هذه كامل إيجابيات خاصة في وقتنا الحالي رانا في دار وحدة و ما نتلاقاوش
أنا وسلفتي نسكنو في دار وحدة هي في طبق و أنا في طبق تلاقينا في العيد و من هذاك اليوم ما شفتها يعني مناسبة كي هاذي تلمنا و تخلينا نتقربو من بعضانا و تزرع بيناتنا المحبة و الأخوة
نفس الشيء في دارنا يتلاقاو دايما في مثل هذه المناسبات عشاء للجميع مطعم الرحمة كيما كنت نسميه بكري نص النهار و أنا في الكوزينة
الأيام تمر و يبقى فقط مثل هذه الذكريات أولادكم رايحين يكبرو و يتزوجو و يبقاو يتفكرو مثل هذه المناسبات و حلاوتها يحكو لأولادهم عليها و يقولو لنياهوم علاش ما الديروش كي يما هذا رايح يكون فخر لكن كأمهات
يعطيك الصحة روح مراد كلام حسيتو خارج من الصميم إنشاء الله ربي يقدرنا ونحافظو على التقاليد لازم كل ألامهات و أمهات المستقبل يكون عندهم غيرة على تقاليدهم و عاداتهم الأنسان الذي لا ماضي له لا جذور له اي ريح جي تزعزعه.

[احلام البرايجية]

السلام عليكم، اخواتي حبيت نقول انو مش اي شيء عملوه اجدادنا صحيح ولازم نعملوه باسم العادات والتقاليد، مثلا قص الشعر والحنة واعداد طبق معين اظنها فكرة جيدة اما الصعود فوق السطح وقول يا لالة عشوراء خليني بين لبنات مشهورة اظنها خرافة، المهم ان شاء الله رايحة نقوم باعداد التليتلي باللحم كتغيير ونحني لابنتي طبعا ونقصلها من شعرها وفي الاخير نقول لكل الامة الاسلامية كل عام وانتم بالف خير.

[أم أسامة 07]

كل عام وانتم بخير
انما الاعمال بالنيات

[روح مراد]

أحنا ما قلناش أن كل العادات و التقاليد قيم ثابتة و لكن رانا نحكو على العادات نتاع بكري و فقط فيها البدع و فيها الخرافات و فيها الصحيح و السلبي و الإيجابي
ربي عطالنا العقل و البصيرة و نقدرو نفرقو بين الضار و النافع دون المساس بقيم ديننا الحنيف
أحنا عام كامل في صالونات الحلاقة، و عام كامل و احنا نطلو اضافرنا بكل ألوان طلاء الأضافر و .....
أين المضر إذا قصيتي شوية من شعر بنتك في هذا اليوم للبركة كيما يقولو لعجايز ، و نحضرو على مدار العام كل أنواع الأطباق ما فيها والو إذا درتي عشاء خاص اليوم
و لكن في نفس الوقت لازم نتمسكو بالجانب الديني و نبهو أولادنا و كبارنا على الصيام و ذكر الله و نشرحو الجانب الديني للشهر الفضيل و اليوم بثفة خاصة و نبينو ماهو أمر ديني و نبينو ما هو تقليدي و ما هو من العادات اللي نتوارثوها باش يفهو أولادنا و أزواجنا و إخواننا
ماشي نخلطو كل شيء يرجعو ذراري يفهمو أنم عشوراء حنة كيما يفهو أن العيد كبش فقط
المشكل ماشي في العادات و التقاليد و إنما المشكل في كيفية التعبير عنها و كيفية الحفاظ عليها و كيفية ترسيخها

[alg04000]

شكرا جزيلا اختي