الدال دو صول رايح يهبلني

[wahibaazel]

السلام عليكم أخواتي الكريمات الكارلاج انتاع داري يهبل نظيف وكي نسيب تقعد الدار نظيفة لعدة ايام ،درنا ألفا يونس للكلوار فقرر زوجي انو يدير الدال دو صول وكانت الكارثة نسيق ولا نقعد الحالة تبان موسخة وحتى لم يمر عليها ساعة بالرغم من ان الدال دو صول إسباني افيدونا من فضلكن

[آلاء النايلية]

ااا ياختي ملقيت حتى حل انا ثاني كرهت الدال د صول يا لو كا في اليوم تمسحي مرتين و ثلاثة و ميبانش ... فيف الكارلاج

[زوجة على]

هيا ننظفو نحتسبو الاجر احسن من الشكوات لا يوجد حل للدال دو صول لازم كل دقيقة تمسحي

[fadi02]

اشري vigor ادير 35000 مليح اخرج الارض و ارجعها تشعل

[آلاء النايلية]

مش المشكل في التنظيف المشكل في انها في ساع ترجع تتوسخ و خاصة اذا كان الدار فيها العفس و الداخل و الخارج و الاطفال ...

[هاجر 76]

باينة اختي شريتو لدال دو صول لون يوضح اي بقعة للاسف ما عندك ما تديري حنا في الحوش درناها بيضة والله ساعة ولا اقل تتوسخ ندمنا

[wahibaazel]

بارك الله فيكم أخواتي على الاهتمام، ما كانشهية كيما الكارلاج قدر الله ما شاء فعل.

[life is life]

تقريبا نفس الشي حتى حنا درنا دال دوصول و فيها اللون الابيض عليها فيسع تتوسخ
انا نسيق و نخفف بيدي بالجفاف و كل مرة كيفاه ندير
مي نكره حياتي كي نجفف و يجوني بصبابيطهم يوسخولي كلش

مي اختي ماشي شرط كل ساعة تسيقي سيقي نهار بنهار و ديري بيدون جافيل و قريزيل و بالجفاف و كل ما تشوفيه توسخ ديري شيفون في الفروطوار باه ما تتعبيش كيما خيتك -_-

ربي يوفقنا جميع و يهنينا مهاد لعداب تاع التنظيف

[oumhoudadz]

السلام معليكم

[nazima]

hakoum elhal andi hihi ana chaybetni alors echrit frotoire laska fih nechafa zarga 50 alf jay mostatil enchemekheha belma bark ou jawziha etlem hadik elghabra hayla

[wahibaazel]

بارك الله فيك اختي، يا ريت تحطيلنا صورة الفروتوار، وجزاك الله خيرا.

[شموخ امرأة]

ربي يكون في العون اختي حتى انا راني نعاني من نفس المشكلة كي نضفه يرجع شعل تشوفي وجهك بمجرد ما يدخلوا الاولاد يرجع موسخ تقول ما سيقت ما نقيت حتى انا دايرا دال دوصول نتاع الخارج و نتاع الداخل ههههه الكل واحد يحب الرغوة و الماء يجري في الدار ههه حتى المسيح بالمنشفة ما ينفعش يبان شهب كيما نقولو راني نسيقه مرة في الاسبوع و باقي الايام نرش بالمنضفات وقليل من الماء و نجب بالفورتوار

[شموخ امرأة]

فكر ربما تساعد في الشتاء فرشي الدار لكل با مونكات او سجادات و نضفي السجاد هذ الفكرة راني نديرها في الشتاء تهنيني من المسيح كل وقت

[lilii7179]

دارنا ثان فيها نفس المشكل, في العام الماضي دارت امي عملية و كثرو الضياف بزاف و الداخل و الخارج , فرشت فالكولوار tapis طويل لقيت بلي تهنيت , لعشية كي يروحو الضياف نهزو ننفضو و كل 15 يوم نغسلو و لباقي تهنيت من تسياق كل يوم مع العلم انو دال دو صول فالكولوار blanc cassé ما تحملش الوسخ خلاص خلاص

[ام فيفي]

سلام اخواتي حتى انا نعاني من نفس المشكل الحل نلقاه غير في الشتاء كي نفرش ليموكات ربي يكون في العون

[سامية37]

الكارلاج خيييييييير

[wahibaazel]

السلام عليكم أخواتي الكريمات، شكرا لمروركن.

[أم يوسف العربي]

السلام عليكم
و الله صح المشكل قائم ومش راح يزول
عندك حلول و الاسهل ديريه والا ديريهم كامل
اما تشري فروتوار كيما قالتلك الاخت و غير شوفيه فالحانوت تعرفيه لانو ما يشبهش الفروتوار العادي
اما تفرشي الدار و لا ما قدرتيش ديري تابيات نتاع متر واحد في كل عتبة باب
و في نص الدار او نص الكلوار حطي واحد اكبر شو يقص عليك شوي
و كاين انواع نتاع التابيا انتي خيري الي ثقال شوي باش ينحو لوسخ من السبابط
و الله يكون في العون

[دائمة الحمد]

صباح الخيرات
ماعرفتش علاه عندكم مشكل مع لادال دوسول انا عاملتها في الكولوار والكوزينة ولاسالدوبان والاول عندي 10سنوات من2005
فقط هي تحب الماء وتجبدي بالفروطوار عادي ماتحبش المسحان وحد وشيحي مرة والا 2 ما تخليهاش تشيج خلاص تشيح من بعد وحدها بالهواء وتحب ماء النشافة اكرمكن الله نظيف لاداعي للجافيل ياسريشهبها
لي برودوي ما نكثرش ياسر ممكن حتى قطرة جافيل وقطرة قريزيل وكاين برودوي من بعد نصورهالكم

[La perle rare]

لازم توافيلهم ينحو صبابطهم كي يدخلو و لازم يكونو بلايغكم نظاف و ممنوع يكلو بالوقفة تسمى لازم تبدلو طريقة التعامل معها و سيقي مرتين في الأسبوع يكفي