نداء للأخت oum aness وجميع المغتربات

[نانا الحيرانة]

السلام عليكم ورحمة الله

اخواتي حابة مساعدة بخصوص تنظيف الدجاج والاحتفاظ به في المجمد
أنا كنت ننظفه عادي ونخبيه لكن مؤخرا جات وحدة من الاقارب قعدت عندي كي لقاتني نظف فيه قاتلي اياك تعاودي تنظفيه
لازم تخبيه كيما راهو وكي تعودي راح تطيبي اجبديه نهار قبل من بعد شوطيه ونظفيه وطيبي انا تخلعت قلتلها كيفاه :confused: ؟!!!
قاتلي أنا سمعتها قالها طبيب هنا في القناة الفلانية في الخارج كي تنظفيه ويدخل المجمد راح تتزايد فيه نسبة البكتيريا مع الماء وتؤدي للتسمم
قتلها مي كي تطيبيه يروح كللش
قاتلي حتى لو طيبتيه تبقى
أنا عندي مدة ندير في هاد الطريقة بصح ما ارتحتش عليها مام الكونجيلاتور عدت نعافوا معمر بالدجاج بخماجه :sdf:

قولولي آسكو صح هكدا وللا لا ونخص بالدكر المغتربات أو كل وحدة عندها معلومة أكيد

ياريت تجاوبوني والله راني في أمس الحاجة للتأكد من عندكم اخواتي الغاليات

وبارك الله فيكم

[om najib]

و عليكم السلام أختي أنا نغسلو مليح بشوية خل و ملح و نخبيه في الكونجيلاتور ساعات كي نكون مزروبة نلوحو ديراكت في لا كوكوت و الله أعلم راهم كل يوم يخرجولنا بحاجة جديدة

[**وحدها غريبة **]

اختي انا ثاني نتبع نفس الطريقة كي نشريو
ديجا مقطع ندير الأفخاذ وحدهم وكل حاجة وحدها مغلفة في بابيي فيلم
وكي نحب نجبد نطيب غير نديكونجليه شوي في مكرواوند ومبعد ننظف مليح ونطيب
هكذا ندير معلاباليش اسكو مليح ولا لا

[lamiak1]

Je sais pas ma sœur c bizarre !!

[ilhemnanous]

حنا رانا في قرون نستعملو هاد الطريقة من الي بان الكونجيلاتور ولدروك حتى حد ما مات بيه ههههههه

[نانا الحيرانة]

ربي يحفظكم عزيزاتي بصح الحد الآن ما عطاتنيش وحدة كلمة أخيرة واش ندير ههههه راني معولة عليكم يا الفحلات

[نانا الحيرانة]

أنا راسلت الاخت ام انس من بعد موضوعي لكنها لم تجيبني ولو برد على رسالتي على رغم تواجدها يوميا
أنا لم اتوقع منها دلك للاسف ...التواضع من صفات العظماء يا اختاه
كيما يقولو انا كبرت بيك واخترتك من بين مشرفات القسم الغاليات على قلبي واللي نصائحهم من دهب
عموما لا علينا ...فهدا من دوقك

[نانا الحيرانة]

شكرا لجمييييع الاخوات لردوا فموضوعي

بارك الله فيكن

[نانا الحيرانة]

للغلــــــــــــــــــــــــــــــــــــــــــق

[دموع تائبة]

علاش للغلق يا اختي موضوعك مهم جدااا
والله تقول عليك طليتي على قلبي
انا ثاني موضوع غسل الدجاج كان محيرني
ان شاء الله يساعدونا الاخوات سواءاا كانو مغتربات او هنا من الجزائر
لا تعتمدي فقط على العضوة ام انس
في المنتدى هذا كاين فحلات بزاااف تحطيهم على الجرح يبرا
ومايبخلوش عليك ان شاء الله بالرد
ماكاش لي ميحبش يدي الاجر ويساعد خوه المحتاج للنصيحة
انا كنت راح نساعدك ونراسل العضوة ام انس بصح قلت لا لا
اكيد ماراحش ترد عليا كيما ماردتش عليك ههههه
ان شاء الله الاخوات يساعدونا
واجرهن محسوب

[zamilio]

انا من بكرى نغسلوونحطوافى الكونجلاتور بصح صح هاذى المعلومة سمعتها على اللحم حتى قالوها فى كلام نواعم بصح مانيش انطبق فيها خاصة لحم الدجاج فيه الريحة

[panpouna]

c'est juste du blabla je néttoie tjs mon poulet avec de l'eau et du vinaige et au congélo et personne n'est encore mort

[lilii7179]

ديري في بالك حاجة مهمة : كاين بكتيريا تموت مع البرودة و كاين بكتيريا تتكاثر و لو في المجمد. معناها اذا دخلتي الدجاج الى المجمد و هو موسخ راح تتكاثر البكتيريا اللي فيه و فوق هذا قادرة حتى تمشي البكتيريا الى المواد الاخرى اللي في المجمد. و لهذا من الافضل انك تنظفي الدجاج مليح كيما قالو الاخوات بالملح و الخل خاطر الخل يقتل البكتيريا و الملح aniseptique و بعدها الى المجمد.
انا كي يكون عندي الوقت نزيد حتي الدجاج نداويه: ثوم, ملح, فلفل اسود, زنجبيل , موطارد, شوية عصير ليمون, نحط في صاشيات و ونحط الصاشيات في porte manger يتقفل مليح باش ما تخرجش ريحة الثوم للمجمد, صدقيني كي نطيب بيه بنتو هايلة ما يجيش صامط.
انا امي من 1987 يعني من و انا عمري 8 سنوات و هي عندها مجمد كبير و كلشي تجمدو و كلشي تغسلو عندي خالي طبيب كان هو لي يمدلها نصائح ب هاذ الخصوص و الحمد لله رانا لا باس بينا.

[لينا11]

اهلا عسولة
صراحة شخصيا مانقدرش نخبيه بيه بالوسخ تاعو لانو بكتيريا تتكاثر فيه خاصة فالصيف
نغسلو مليح ونديرلو الخل ونخبيه فالمجمد
وزيد طريقة تاعها والله اعلم لازم درجة برودة تكون عالية جدا باش بكتيريا تموت

وحتى البيض مالازمش نغسلوه حتى نجو نطيبو بيه