يارب اعطيني الصبر

[اياد حياتي]

السلام عليكم سبق وان كتبت مواضيعي معلبليش كيفاش ندير راني حيرانة وحتى سماطت عليا الحياة راني نضحك بسيح قدام راجلي باش منبينلوش اختو ما زالت احيانا تقيس في معاني وكلمات الاستفزازية والله نحب نروح نقولها كلمة ومبعد نتراجع يارب اعطيني الصبر تخيلو الميناج تاع الصباح انا نوض بكري نطيب القهوة راجلي ونهار تكون دالتي نسيق بكري بحكم اني خدامة هي دايمن الي تسيق الكوزينة مع الصباح وانا مع الليل نسيقها المهم ممكن يبان امر تافه لكن انا نضريت هي كانت تسيق الكوزينة معايا كي نكون ندير في الميناج ودورك راني نسيق بحكم الوقت ضيق باه نروح للخدمة وهي تخلي الكوزينة حتى نكمل كامل الميناج ونشف وتروح هي تسيقها تعاود ترمي ما كأنو انا مادرت والو وكامل الحالة زرزق وحتى شومبرا تاع خوها الصغير انا نكون نسنا فيها باه ترفدلو فراشو حتى ذاك تخلها حتى نكمل واش ندير تبدا تقول اه يسيقو نص تسياق ويقولو نقينا... نسكت علابالي معندي ماندير انا معندي وقت فطور نديرو قبل منروح ونوجد فطور وليدي ونقيه ونلبسلو نروح عيانا للخدمة وحتى هي كي راهي تطيب وحدها بصح طيب معايا في كويزنياغ انا شريتها تخيلو انا لي نقيها برك تخليها هكذاك واحيانا برك كي تكون طاحت فيها كاش ماكلة تمسح غير من فوق لفوق عارفتني بلي نقي موراها لخطارش نستحفظ بيها وما نحبهاش تفسد وتقول بحارعليها وحتى فريجدار والله متوشيه بحكم انو انا شريتو مع راجلي ممكن تبان للبعض انو اشياء تافهة لكم انتو واش ديرو لو كان في بلاستي تسكتو اه نسيت جاها عريس هذو ليام وصغير في لاج وما قبلتش قالت مطلق منزوجش بيه وانا منيش مقلقة على زواج

[fifib05]

matkoulich rabi aatini sabr raki toutoulbi fel ibtilaa hakadha kala rassoul aalayhi salam

[hodayena]

والله يا اختي كبري خاطرك صح تبان اشياء تافه بصح تعكر صفو الحياة الزوجية انتي اخدمي دالت وهي دير واش تحب والا اصبري حتى ديري سكنة وحدة وخلاص وكلي ربي وخليك منها عديها مريضةوراهي تهدر

[loufa]

لاحتلك الهدرة رجعيلها الصرف قالت تسيقي نص قوليلها كاينة ناس تطيب وماتمسحش كويزينيار
لو انا منك نهدر ديراكت انا خدامة ومنقعدش ومع وليدي خاصة لازملو عناية عجبك الحال سيقي معجبك خليني نسيق بطريقتي واللي ماعجبتوش يوريلنا الشطارة نتاعو ومكان لاه يستناني انا


والحل الانسب هو

حاولي تشريلها هدية تفرحيها وتتجنبي اذاها
اعطيهالها وحدكم وقوليلها العيد جاي بغيت نفرحك انتي كيما اختي ورانا فدار وحدة مالازمش نكملو هكا واضحكي وحضنيها سترين التغيير احسن من القلقة

[اياد حياتي]

اه واش قولتلي والله ما تشدها مني وانا عارفتها مليح حتى ماكلة كي نطيب حاجة مليحة نحط طبسي زيادة والله ماتكلها وتقولي كادو من قبل كونا نتهادرو ونشريلها ومع تالي دارتني منيش مليحة

[pro24]

الصمت هو دواء هكذا اشخاص.........

[loufa]

اه واش قولتلي والله ما تشدها مني وانا عارفتها مليح حتى ماكلة كي نطيب حاجة مليحة نحط طبسي زيادة والله ماتكلها وتقولي كادو من قبل كونا نتهادرو ونشريلها ومع تالي دارتني منيش مليحة

اسمعيني مليح
تفاهمي مع راجلك في يوم عطلتك تعملي عشاء خاص كانها مناسبة وزوجك هو اللي يهدر مع خاوتو وتتعشاو جميع وقدميلها هدية وسلمي عليهاوحضنيها راهي محتاجة حنان رايحة تحشم من خوها ومتصلحش كيفاه تردك اما اذا رفضت على الاقل انتي عملتي اللي عليك قدام ربي



ملاحظة صغيرة اذا ما سيقتش والا ماغسلتش اواواواو ربي يسهل عليها انت كوني مرا شاطرة واعملي كل شيء
اذا قدر ربي ومرضت توددي اليها ولو كان بتيزانة تشربها
اعلم ضيق وقتك لكن لا ادري لما تعاطفت معها ربما احساسي يقول تشف


مسالة العريس ري يسهل عليها ماقبلتش واحد ما يسالها كي يجي مكتوبها راهي تروح وزيد هاذ السيد متكونش رفضاتو هكا اكيد عندها اسبابها المقنعة واكيد في سنها تكون حابة تعمل دارها حتى هي خصوصا مع المشاكل اللي راهي صايىة بيناتكم

[اياد حياتي]

شحال عندها الزهر مع الناس تعرف تمثل ويدوروها ومسكينة بصح معايا تبدى تطلق في الرصاص حتى مع ناس ميعرفوهاش وما شافوهاش وقالو تشف معليش ربي كبير والله يفرج عليا وعليها وانا ما ني كارهتها الله يهدي النفوس

[الألماسة]

انتي ديري اللي عليك و اخدمي دالتك
اذا هي عاودت موراك الله يسهل عليها
ماتناقشيها ما تبقاي في مشاكل تافهة
المهم انتي ديري اللي عليك و هي دبر راسها

[anissa90]

يا اختي الله يعطيك الصبر عباد كيما اخت زوجك ما ينفع معاهم حتي شئ لازم كلمة بكلمة حطها في بلاصتها راهي اخته ماشي امه تقدري جوبها مسلكناش من لعجوزة و لوسة سكنين معهم ولا بعاد نفس شئ

[loufa]

شحال عندها الزهر مع الناس تعرف تمثل ويدوروها ومسكينة بصح معايا تبدى تطلق في الرصاص حتى مع ناس ميعرفوهاش وما شافوهاش وقالو تشف معليش ربي كبير والله يفرج عليا وعليها وانا ما ني كارهتها الله يهدي النفوس

يا ام اياد يبدو انك لا تريدين النصيحة ودخلت فقط لتفضفضي

عموما ربي يفرج عليك ويرزقك بدار وحدك وتتهناي من هاذ المشاكل لانه المراة ماتحسش روحها مراة الا فدارها وحدها

ومتقوليش راني ضدك انما لم نسمع للطرف الاخر وكل ردودي كانت لمصلحتك

[التواتي الونشريسي]

لقد أتعبتن أنفسكن كثيرا لما تناديتن إلى الخروج إلى العمل خارج البيت بحجج عديدة أغلبها واهية، فالواقع يثبت أن زوجات كثيرات ممن امتثلن أمر الله عز وجل "وقرن في بيوتكن" قد فتح الله على أزواجهن خيرا كثيرا فوفر لها بيتا مستقلا وواسعا بكل مستلزماته ... راجعن أنفسكن بارك الله فيكن لعل الله جل وعلا أن يفتح عليكن من فضله فتعيش الزوجة حياة سعيدة تجد فيها راحتها البدنية والمعنوية وراحة زوجها وأولادها...إن خروج المرأة لم يزدها إلا نكدا وضياعا...أصلح الله حالنا وأحوالنا.

[اياد حياتي]

يا أخي هذا الوقت إلي رانا فيه راجل يخدم ومرا تخدم وما يلحقوش وما بالك انا راجلي ميسور الحال وزيد بزيادة مسؤول على عايلتو كامل والمرأة كي تكون مستورة وخدمتها مليحة لامانع من انها تعمل

[ツღعـصُـ♥ـوِݦۑツღ]

الله يفرج عليك اختي

ربي يفتح عليك أبواب الخير

[naamane3]

هذه المشاكل ناتجة عن تركك
لاذكار الصباح والمساء
الزميها وسوف تزول كل المشاكل

[bellaluna]

هذه المشاكل ناتجة عن تركك
لاذكار الصباح والمساء
الزميها وسوف تزول كل المشاكل




كيف عرفت أنّها تاركة لأذكار الصّباح و المساء؟

[زرقـآء اليمآمـة]

السلام عليكم
النساء هن اسباب معظم المشاكل خاصة زوجة الاخ واخت زوجها وامه ........ هذه موجودة في كل مكان اختي .... ما عليك سوى الصبر او استقلي ببيت يجمعك وزوجك واطفالك على ان لا تقطعي صلة الرحم بينه وبين اهله ................. فالبيت المستقل احسن بكثير و يوفر المشاكل التي تحدث بين اهل الدار من هذا النوع ............... وهناك الكثير ممن لا يؤيدون فكرة الاستقلالية هذه لو يعطوا لاختنا حلا شافيا .........
واش نقولك في الاخير ...... ساعفي وربي يفرج والله المستعان هذا ماكان ........

[samirabahi]

[quote=التواتي الونشريسي;3991838829]لقد أتعبتن أنفسكن كثيرا لما تناديتن إلى الخروج إلى العمل خارج البيت بحجج عديدة أغلبها واهية، فالواقع يثبت أن زوجات كثيرات ممن امتثلن أمر الله عز وجل "وقرن في بيوتكن" قد فتح الله على أزواجهن خيرا كثيرا فوفر لها بيتا مستقلا وواسعا بكل مستلزماته ... راجعن أنفسكن بارك الله فيكن لعل الله جل وعلا أن يفتح عليكن من فضله فتعيش الزوجة حياة سعيدة تجد فيها راحتها البدنية والمعنوية وراحة زوجها وأولادها...إن خروج المرأة لم يزدها إلا نكدا وضياعا...أصلح الله حالنا وأحوالنا. [/quote


اعطيها رايك ماشي تفتي عليها ياخييييييييييييييييي حالا هذا فاش صانعين

[samirabahi]

حبيبتي عليك بالصبر خليها تهدر ديري واش عليك روحي تخدمي نزيدك حاجا وحد التعليقات راهم هنايا يطلعوا القلب دخلت على خاطرك هذا رايي ان شاء الله ربي يفرج عليك

[اياد حياتي]

والله العظيم ياريت نقدرو نخرجو المشكل انو حاكمة خوها من اليد الي توجعو ميقدرش يخرج لانو كبير الدار ومكانش الوالدين واش يقولو الناس خرج وخلا خاوتو