مشكلة نتاع بنت اختي

[طموحة بلا حدود]

خير الكلام من بدأ بالتحية وخير تحية تحية الاسلام وتحية الاسلام السلام
خواتي وخواتاتي حبيت نسقسيكم في واحد الموضوع
عندي بنت اختي مستواها الدراسي الله يبارك ماستر 1 في الرياضيات ومازالت تسعى ..يتقدمولها غير الرجال الي لباس بيهم والحمد لله بصح المشكلة فيها انها ترفض والسبب قالته لي انا برك هي تبغي واحد يخدم دهان يبنتر يعني
يعني هي رايحة تضيع حياتها على جال الحب هاد الي يبنتر اكيد راه نهار يخدم و10 لا وزيد ماهوش موجد روحو قع
واش تنصحوها والله ماعرفت كيفاش ننصحها
انتي ايتها الطالبة الجامعية لو يتقدملك واحد دهان هل تقبلين ؟؟اجيبو بصدق متقولوليش عادي نقبل وين راه المشكل
والي يخدم دهان يقدر يعيش ولا لا
بصفة عامة اهدرولي على حياة الدهان كيفاش راهي

[hodayena]

اختي انا خالتي متزوجة من دهان والحمد لله عايشة لباس عليهاوكي يكون قاعد يخدم خدمة وحدوخرا لكن راجل خالتي يشد الباتيمات متعاقد مع شركات البناء ومرة مرة يخدم للناس والله اعلم

[fifi42]

ايه اختي وين راه المشكل لو تزوجت بدهان انا تان عندي ليسانس اعلام ولتصال وقبلت نتزوج بحلاق ونزيدك معرفتوش بصح الاخلاق و التربية وكل شئ فيه جذبني ليه على عكس لي حوسو علي بمستواهم بصح عقلية عيانة وذرك راني عايشة ملكة والحمد لله موفرلي كل شئ ميبخل عليا والو ربي يخليهولي

[مريم الصابرة]

السلام عليكم اختي
زوجوها بيه علاه واشبيه الدهاّن كوني هانية تعيش معاه خير من تكن مرت وزير عندبالك اللي لاباس عليهم هذو راحا تكن مليحة معاه ممكن عندو الدراهم ويظل فالملاهي ونتاع نسا واش ينفعوها دراهمو انا من رأي تدي الدهاّن لانها تحبو وربي يفقوهم اما
اما حياة الدهاّن والله يدخلو المال مليح ما يطيروش الناس كلها تدهن بيوتها وعندو صنعة في يدو ربي كتبلو يكون دهاّن ويزيد اختي هي حاباتو وقابلاتو انا من رأي عاونيها ما تعذبوهاش واهدري مع ختك يقبلو الطفلة حاباتو إنتوما ما شفتوش الألوان اللي هي شافتهم فيه هههههه امزح
ربي يوفقها غاضتني مسكينة عاونيها وما توقفوش في طريقها

[رجوت عفوك]

ماشي المشكل فالدهان المهم خدام خدمة شريفة وهي ماهيش مراهقة لي يلعب بعقلها راجل .. بصح وين راهو هذا ؟؟ تقدملها ؟؟ ولا راهي رابطة روحها بيه غير بالهدرة ؟

( لكن كون جيت فبلاصتها - يعني راي الشخصي واحد ما يعلقلي - نضرب جد الحب عرض الحائط و نتزوج بواحد لاباس عليه لانو بكل صراحة قليل الي يستاهل مثل هاذ التضحيات )

[النجمة القطبية]

يا اختى الدهان مهوش عيب بالعكس اذا كان ناجح في مهنته وعندو تقنيات مليحة ومعروف راح يكون من الاغنياء لانها مهنة مطلوبة وكي يكون خدام مليح الناس كامل توثق فيه
لكن بغض النظر عن هذا الامر انا ضد انها تعرف شخص في الخفاء والسؤال المطروح ما هى اخلاق هذا الدهان قبل ما تفكري اذا كان واجد وخدام فكرى اذا كان راجل وخلوق
يا حبيبتى لا يهم شحال يخطبوها الناس المهم تغير طريقة تفكيرها وتحوس على واحد راجل صح تتكل عليها وخلينا من الحب والبطيخ يهديها ربي

[sarl02]

المشكل ليس ف المهنة ...بل في كيف تكون ناجح فيها ام لا....يعني هل هذا الشخص بانتر احب خدمتو وناجح ام نهار يخدم ونهار لا .وانا شخصيا لي جاري وصديقي شاب في بداية الثلاثينات بانتر لكن محترف يعني ما اطيرلكش باش يخدملك لازم ادير لاشان ...اكتسب خبرة في وقت قصير جدا والان راه امعلم وعندو قريب 10 عمال اشغلهم معاه في مشاريع يعطوهالو المقاولين....وهو ناجح جدا مقارنة بموظفين واصحاب شهادات عند الدولة...وانزيدلك متزوج ودار سكن خاص وسيارة جديدة وعايش لباس بيه من مهنته كدهان فقط وليس له اي مدخول اخر...وانزيدلك التالية عليها ونختمو ..انا بشهريتي ثابتة والحمد الله كي تبانلي حاجة هو اسلفلي الدراهم ووفق الله الجميع.

[عبد الله 22]

المشكلة ليس في العمل الاهم ان يكون مسؤول محترم وذو أخلاق ، إضافة إلى عدم وجود حساسية المستوى التعليمي بينهم، أما الرزق فعلى الله وإن كان مكتوبها الخبز مع الماء فهذا ما يكون لها حتى في قصور الملوك

[Hind_dz]

المهم التربية و الأخلاق ،، كي يكون مربي و يعاملها مليح هذاك هو كلش ،، الدراهم مش هوما كلش ما فهمتش علاه هوما أول حاجة يخممو فيها الناس ،، المهم يكون قادر يعيشها و زيد هي حابتو .. و شخصيا راني طالبة جامعية في الطب و نقدر نقبل بدهان نورمال المهم يكون راجل و مربي و عاجبني و عاجبتو .. مش لازم علينا نبنيو القصور .. و الرسول عليه الصلاة و السلام هدر على الدين و الخلق فالراجل مش على الدراهم ..

[نارينا]

لابد أن يكون أولا رجل ويتقدم لخطبتها والا فلا فرق بينه وبين غيره ولن تشفع له مهنته لكي يشفق عليه الناس بحجة أنها عمل حلال مهما كان بسيطا ...ثم لم الحكم على باقي الناس وتقديمه هو كضحية يجب أن تتغاضى عن الكثير لتتزوجه والحجة أنهما متحابان ...كفانا تهميشا ونظرا بازدراء للطبقة المثقفة وكأن الاجرام بادي على وجوههم والوداعة ظاهرة على وجه هذا الشخص ....المهم ان كانت مقتنعة به وكان عاملا مستقرا فلابأس أن تتزوجه وهذا هو الاساس أما الحب وباقي الكلام الفارغ فلا مكان له هنا

[السي محمد]

دخله الشهري يساوي تقريبا دخل 3 اساتذة

[محبة الله الجزائرية]

دخله الشهري يساوي تقريبا دخل 3 اساتذة

:1::1::1::1::1::1:ههههههههههه الله يبارك حسبتلو بعد

[هيام الروح]

ya khti wlah sad9ini ana men nefsi lmohim ykoun wld familiya wykhaf rabi w yhanini w ya3ref 9imti w kifah ysoni w yhafd 3la darou kima ygoulou ness bekri khedam rjal sidhoum

[محبة الله الجزائرية]

دخله الشهري يساوي تقريبا دخل 3 اساتذة

:1::1::1::1::1::1:ههههههههههه الله يبارك حسبتلو بعد

[سماح 2]

نفسْ رأيْ مريمْ الصــــابرة

[نارينا]

دخله الشهري يساوي تقريبا دخل 3 اساتذة
هي ستتزوج رجل ولم تقل انها تريد الزواج من "دخل" .....ترى كم ضعف من مهنتك أنت دخله الشهري؟؟

[norhane taha]

السلام عليكم أختي
نقولك حاجة هادي بنت أختك مشكلتها ماشي أنو دهان ولا غيرو مشكلتها أنو هي راضية به وشايفة أنو هذا هو شخص لي تقدر تعيش معاه كان من ممكن يكون هذا شخص دكتور في جامعة ولا إطار متلا لكن ربي خلق وفرق ختو يعني دنيا مكاتيب ومراحش تضيع حياتها إذا ربي سهللها ممكن راح يكون نعم زوج علاش لالالالا
تعرفي في حياتها هادي كلها رضا هو الصح نهار ترضاي تقدر تتحملي وتكملي وتضحي مي نهار متكونيش راضية جي سبة صغيرة ولا نقد برك من طفل صغير تتأثري خاطاش أساسك راهو مشكوك فيه
أان نقولك ربي يقدملها لي فيه الخير وينورلها طريقها

[ام مهدي 03]

مع انى ضد الزواج الغير متوافق فى المستوى العلمى .لكن واش راح ديرو مادام حباتو ربى يسهلها .يكون برك هو راجل ويجى يخطبها ما شى يدير حجة مازال ما هوش واجد

[aridjali]

اذا جاءكم من ترضون دينه وخلقه فزوجوه

[الألماسة]

المهم يكون مسؤول و يعرف معنى الزواج
انا كي تزوجتو و هو عندو ماجستير واش دارلي؟حطمني بعدم المسؤولية
نعرف واحدة عندها دكتوراه و راجلها سنة تاسعة فقط لكن عايشين رووووعه
و هو راجل تع الصح و متفاهمين في كل شيئ

[وهراني 31]

ههههههههههههههههههههههههههههههههههه

والله أضحكني موضوعك وقصة الدهان

شوفي يا أختي يوجد دهان هو الدي يبيع الدهان يعني دهان تاع القاطو :1:

وكاين الدهان الذي يطلي الجدران بالالوان

الاول الذي يبيع الدهان هدا يمكن ان تعيش معه أبنة أختك احلى معيشة لانه سيشبعها بالدهان الدي تصنع منه القاطو والطعام

اما التاني والدي هو دهان يطلي الجدران فهدا سيدخل عليها يوميا ملطخ بالالوان الدهان ورائحة لالاك التي تسد الرئتان

سلام

هههههههههههههههههه

[السي محمد]

:1::1::1::1::1::1:ههههههههههه الله يبارك حسبتلو بعد


انا نحسب للجميع و نخلّصهم

مونافري.. ماصو ... بانتر... فيرايور.. كوفرور.... بلومبري......الخ

كل من له علاقة بقطاع البناء ههه

[sa78sa]

أقول لك شوف ناس بكري راجل قاري والمراء لا ليس المشكل في القراية المشكل فينا

[زايدي أمحمد]

اولا عليك ان تتقي الله في انفسك
فحسب كلامك ارى ان تحتقرين عمل الرجل
وتحتقرين كيف لجامعية ان تتزوج بدهان
وتحتقري عمل الرجل وانها عمل غر مضمونة
اجيبك
اولا الرزق من المولى وعلا وجلا
اما فيما يخص مشكلتك اقول الا كان الدهان يحب فتاة حقا فعليه خطبتها والا عليه ان يترك فتاة وشأنها
واما يخص الجامعية تدي دهان الامر عادي جدا وامر مقبول

[عزف الكمان]

اختي خدمة الدهان كيما قلتي مرة كاين وعشرة لا
زيد انا نمارس هادي الخدمة وفيها غير التعب وزيد انا نخدمها غير كي نكون مريح في العطل الصيفية متلا