كفالة طفل تغير حياة كل محروم

[هبة خير]

من خلال تجربتي اردت ان انصح المحرومين من الذرية ان يلتفتوا الي طريقة الكفالة فهي رائعة جدا فانا تكفلت بطفل جميل وهو هدا العام دخل التحضيريونحن جد سعيدين به ربي يحفضه فقد ملا البيت علينا واحسست معه بالامومة واتمنئ ان نزيد نربي بنت الا ساعدوني لانو فيه طلبات كتيرة

[أم أماني أريج]

ربي يباركلك فيه و يخليه بار بك و بزوجك و يدوم عليكم السعادة ............آمين يا رب .......
عندي سؤال أختي
ماهي المدة التي قضيتموها حتى أصبح الولد عندكم في البيت يعني من بداية وضع الملف في المصلحة المعنية
ياريت تشرحي بالتفصيل الخطوات لأني مهتمة جدا بالموضوع
و أكيد في كفالة يتيم بركة عظيمة يكفي قول الرسول صلى الله عليه و سلم
"انا وكافل اليتيم كهاتين في الجنة واشار بإصبعيه السبابة والوسطي"

[هبة خير]

شكرا اختي بعد مرور خمس سنين من زواجنا وربي مارزقناش بالدراري دفعنا ملف عند مركز الخدمات الاجتماعية la das لطلب التكفل الولد نصبرو عام والبنت ٣ سنين عليها طلبنا ولد في الاول بعد شهور من وضع الملف تجي اللجنة تشوف المكان اللي راح يعيش فيه لانو فيه شروط كتيرة الا حبيتي نحطلك الملف واش فيه ومن بعد شهور يبعتولك تجي تاخذيه هذيك اصعب حاجة يوم تحمليه ومن بعد تتوالفيه والله العظيم نحس بيه كبدتي وكامل العايلة تموت عليه ويعمر عليك الدار تحسي بامومتك كيما عادي وانت تاني تعيشي كيما الازواج تشري القش نتاع الدراري تسمعي الحس في الدار والجميل هاد العام دخل التحضيري تحسي درت حاجة في حياتك و زيد الاجر عند ربي كبير بزاف والله الخير اللي جابه معاه الحمد الله وماشاءالله غي تشجعي وناقشي الامر مع زوجك انا ندمت علئ خمس سنسن الولئ الي ضيعتها في teste de grossese والبكئ وراني دايرة طلب بنت هدي عامين وماعطاونيش الا عطلو عليا نجيب ولد اخر الوقت راه يفوت ورحنا نكبرو

[hodayena]

بارك الله فيك اختي ربي يجعلهولك ابن بار بيك ويشوفك احسن ام بالدنيا وتلقايه في عقوبتك صح الذرية تعمر الدار




سبحان الله ناس مشتاقة ذراري وناس ترمي في اولادها كيما حالت زوجي

[أم أماني أريج]

شكرا اختي بعد مرور خمس سنين من زواجنا وربي مارزقناش بالدراري دفعنا ملف عند مركز الخدمات الاجتماعية la das لطلب التكفل الولد نصبرو عام والبنت 3 سنين عليها طلبنا ولد في الاول بعد شهور من وضع الملف تجي اللجنة تشوف المكان اللي راح يعيش فيه لانو فيه شروط كتيرة الا حبيتي نحطلك الملف واش فيه ومن بعد شهور يبعتولك تجي تاخذيه هذيك اصعب حاجة يوم تحمليه ومن بعد تتوالفيه والله العظيم نحس بيه كبدتي وكامل العايلة تموت عليه ويعمر عليك الدار تحسي بامومتك كيما عادي وانت تاني تعيشي كيما الازواج تشري القش نتاع الدراري تسمعي الحس في الدار والجميل هاد العام دخل التحضيري تحسي درت حاجة في حياتك و زيد الاجر عند ربي كبير بزاف والله الخير اللي جابه معاه الحمد الله وماشاءالله غي تشجعي وناقشي الامر مع زوجك انا ندمت علئ خمس سنسن الولئ الي ضيعتها في teste de grossese والبكئ وراني دايرة طلب بنت هدي عامين وماعطاونيش الا عطلو عليا نجيب ولد اخر الوقت راه يفوت ورحنا نكبرو

بارك الله فيك أختي على الاجابة وربي يعطيك ما تتمناي
أنا وزوجي رحنا لمديرية النشاط الاجتماعي و استقبلتنا المسؤولة و سألتنا أسئلة على وضعنا المادي وسبب رغبتنا في التكقل و قالتلنا لازمكم تحطو الدوسي تاع النكفل و اعطاتنا الوثائق اللازمة باش نخرجوها و قالتلي لازمكم عام و نصف انتظار باش يصحلكم الدور على خاطر كاين بزاف طلبات التكفل و الأولاد ماكانش بزاف و قالتلنا رايحة تجيكم لجنة للبيت باش يعملو تحقيق .
ربي يرشدنا إلى ما فيه الخير لنا في ديننا و دنيانا و عاقبة أمرنا .

[أم أماني أريج]

بارك الله فيك اختي ربي يجعلهولك ابن بار بيك ويشوفك احسن ام بالدنيا وتلقايه في عقوبتك صح الذرية تعمر الدار




سبحان الله ناس مشتاقة ذراري وناس ترمي في اولادها كيما حالت زوجي


ربي يهدي زوجك و يلم شمل عائلتك في أقرب وقت
هذي هي الدنيا ما كملت لحتى انسان و أهم شيئ الرضى بواش اعطانا ربي و السعي في تحسين الوضع بالطرق المشروعة و الدعاء طبعا لأن التوفيق و الرزق بيد الله أولا و آخرا.

[هبة خير]

شكرا للاخت هدينة على الرد بالرغم انو عندك دراري واسمعتينا وحسيتي بينا راه حرقة الضنا يحس بيها غي اللي كواتو وربي يسهل على الاخت راجية وينولها اللي في بالها

[oum imane83]

ربي يجازيك كل خير اختي هبة .. اكيد الن التكفل بيتيم شيء جميل ورائع وخاصة للمحرومين من الدرية من جهة يحققو امومتهم ومن جهة اجر كبير عند ربي سبحانه

انا ثاني عندي قريب 4 سنين زواج وربي مازال ما كتبش .. والله عييت نجري مور الاطبة و الادوية كل شهر نستنى لكن ............والحرقة الي في قلبي كبيرة بزاف نموت على الدراري لكن........
عندي بزاف وانا نفكر في الكفالة .. لكنه يبقى حلم بعيد المدى لان هاد الشيء يسحق مكانيات وخاصة وجود منزل .. انا راني كراية ومانضنش يقبلوني في das ..... ربي يفرج على جميع المؤمنين

[جويرية الإيمان]

أنا طلبت من زوجي نتكفلو بيتيم فرفض و أنا مقدرة أسبابو و هي خوفه من العائلة لعدم تقبل الفكرة .

مع أنه عندي ولد ربي يحفظو بصح و الله العظيم إحساس الأمومة لي في داخلي رح يقتلني

و كل ليلة تقريبا نحلم بلي عندي طفلة و آخرها ليلة البارحة و الله كأنه حقيقة حلمت أنني ولدت بنت و سبحان الله

حتى ألم الولادة أحسست به و حملتها بيدي و هي تضحك و ناديت إبني و قلت له هاذي أخته و سوف تلعب معها

فقال لي لا لن ألعب فقلت إنها صغيرة الآن لكنها سوف تكبر و ستلعب معها. سبحان الله لم أستطع نسيان شكلها

و تمنيت لو لم أفق من النوم .

اسمحولي راني نكتب و نبكي

[hodayena]

شكرا للاخت هدينة على الرد بالرغم انو عندك دراري واسمعتينا وحسيتي بينا راه حرقة الضنا يحس بيها غي اللي كواتو وربي يسهل على الاخت راجية وينولها اللي في بالها


اختى الكريمة الام مش الي تولد برك الام الي تربي وتحن وتحس بوليدها بحس بفرحو وقرحو الام الي تحمي وليدها بكل طاقتها وتنحي من روحها وتم الامومة تضحية
اختي راني حاسة بالفرحة ديالك مع هذا الطفل الي هو وليدك ولم يعد يتيم بوجود ام مثلك واب مثل زوجك

[هبة خير]

اختي ام مان شفتي الايام كي تفوت غيهاد الشهرغي ها دالشهر ...............والعوام رها تفوت واحنا رانا نكبرو صح ربع سنين ماشي بزاف ولكن حاولي تتكفلي وفي نفس الوقت راكو تحاولو مع لاطباء ربي كريم حتي انا مازالني نحاول ربي برحمته وبالنسبة للكفالة صح مصعبين الحالة في هاد الوقت قليل اللي عندو بيت خاص احنا الحمد لله عندنا امكانيات لكن صديق زوجي ماعندوش الدار وما حبوش يعطيوه فابحت مع الاصدقاء والعائلة حتي لقا وحدة حاملة غير شرعي وتفاهم معها في المستشفئ وتنازلته في دار الشرع واليوم الولد عندو عشر سنين الله يبارك ونعرف بزاف اللي هاك

[هبة خير]

اختي جويرية اليمان ربي يكون معاك انت ماراكيش كامل محرومة عندك وليد ربي يخليهولك حاولي تعملي التلقيح الا يصلحلك وبالنسبة الكفالة هادي حياتكم والعائلة كيفما الحال راح يكون التعلاق احنا ما خبرنا حتئ واحد حتئماما العزيزة حتئ نهار مشينا وخليت ام زوجي تبكي ورجعت ولقيتها تبكي وماما قاتلي اختي كانت تبكي وتقول بنتي مشات تجيب ولد الزنقة ولكن بابا الله يرحمه فرح بزاف ودايما كان يقولي بنتي الجنة رها بين يديك الا عرفتي تستغليها عندك يتيم وعجوز اي حماتي مرا كبيرة وعاجزة عايشة معايا والحمد لله والله يفرحك ويفرحني وكل وحدة محرومة

[المنصور3]

من خلال تجربتي اردت ان انصح المحرومين من الذرية ان يلتفتوا الي طريقة الكفالة فهي رائعة جدا فانا تكفلت بطفل جميل وهو هدا العام دخل التحضيريونحن جد سعيدين به ربي يحفضه فقد ملا البيت علينا واحسست معه بالامومة واتمنئ ان نزيد نربي بنت الا ساعدوني لانو فيه طلبات كتيرة
بارك الله فيكم و أقول كيف لا تكونين سعيدة في الدنيا و رسول الله قال : أنا وكافل اليتيم كهاتين في الجنة و أشار بالسبابة والوسطى و فرق بينهما قليلا

[هبة خير]

شكرا اخي المنصور ٣ويارب ما تحرمهش من نعمة الاطفال

[هبة خير]

شكرا علي الرد

[نيل المنى]

وهل من الممكن للفتاة العازبة الموظفة أن تقوم بالتكفل بطفل أو طفلة؟

[هبة خير]

لا اعرف حبيبتي اسالي مديرية النشاطات الاجتماعية في ولايتك لانو الطفل لما نجيبوه نعطيوه اللقب نتاع الاب باش يعيش عادي

[لينة نور]

السلام عليكم

سبحان الله ، منذ سعات كنت أفكر في الاخت رجاء ....أسأل الله لها ولكن جميعا أن يرزقكم كما رزق غيركم .

شكرا الأخت هبة على هذا الموضوع الاكثر من رائع ، حاولي رفعه بين الفينة والاخرى ، ففي هذا المنتدى من النساء المحرومات

من الامومة الكثير ثم أكثري من حمد الله على الصغير الذي بين يديك فلربما رزقك الله بأخاه من صلبك .

[هبة خير]

شكرا حبيبتي لينا فايماني برحمة وكرم الله قوي

[لينة نور]

شكرا حبيبتي لينا فايماني برحمة وكرم الله قوي

السلام عليكم

العفو اختاه ، جعلك الله مثالا وقدوة لمن ضاقت بهم الاحوال فيستبشرو الخير .

[هبة خير]

امين نفرح كي يكون الرد حتئ من اللي عندهم دراري نقول راهم يحسوا بينا راه الحرمان من الضنا صعيب بزاف وشكرا مرة اخر

[oum imane83]

صعيب صعيب للغاية ..ربي مايدوقه لاي حبيب قريب ولا حتى عدو .......مايحس بالجمرة غير الي كواتو لان الحرقة الي تحسها المراة المحرومة من هاي النعمة لا توصف
تشوفي نساء بديارهم وبولادهم وانت دارك فارغة لا حس ولا ضحك ... والله راني نحس وكاني يتيمة ووجودي ماعندوش معنى .نحاول نشغل روحي و مانفكرش في الموضوع لكن ما نقدرش فوق طاقتي.. في بعض الاحيان نتساءل ادا كان هاد الشيء سببه ان ربي سبحانه غاضب وساخط علي... وزيد مع عقلية المجتمع الي يفكرك في كل وقت مهما تتفاديهم ماتسلكيش منهم ..
اكيد انه رنا في دار البلاء و الفناء .. ربي يصبرني و يصبر كل محروم وان شاء الله يفرج علينا ويرزقنا من حيث لا نحتسب..ويعوضنا قريبا ان شاء الله وينزل علينا رحمته ويلطف بينا ..امين

[هبة خير]

شفتي حبيبةام مان شحال صعيبة انا يقتلني كي نشوف مرا حاملة نموت بصح الله غالب هو عندو حكمتو علاه حرمنا ماعلينا غي نلجؤوله بالدعا والرجاء هادشي فوق طاقتنا اما الناس ماعلابلكش بيهم هم في كل حالة يهدرو ويسالو ولي سالك قوليله عاوني وارزقني الا قدرت ونتمني تكوني قريتي الطريقة اللي قتلك علي الكفالة والله حياة اخري تحسي راكي عايشة كيما قلت غي تشجعي انا زوجي في الاول ماكانش باغي ولما في يوم تلقي طبيبة كانت معاه ربات بنت وولد شجعاته وقالته الولد راه يدير تخصص في فرنسا والبنت راها في الجامعة والحمدلله ولوكان كنت حاسبة هاكة لوكان ربيت من الاول وزوجي اليوم لوكان ساعدونا يجيب يربي بلا حساب.......ههههههه قوليلي شحال من عام زواج راني ماشية نجيب ولدي من المدرسة يقرا تحضيري

[oum imane83]

3بقى شهور وندخل 4 سنين زواج .. الكل في العايلة يستنى في بنات من فاميلتي و حباباتي تزوجت قبلهم وراهم دوكا بولادهم غير انا الوحيدة الي قعدت في العايلة بلا دراري
انا مامنة بلي هاد الشيء مكتوب ربي و كل واحد فينا عنده نقص ما في حياته مكانش الي لقاها 100ب100

[هبة خير]

شوفي حبيبة ربع سنين ماشي بزاف الله يعطيك الصبر ما تياسيش زيدي جري مع الطبة مع الدعاء والرقية تاني مليحة والاعشاب كاين واحد في بليدة مشهور وراهنا صاحب راجلي طبيب نساء قاله كاين اللي ريح عليه انا بنت حمايا ست سنين وهي تستنا دارت كلشي قاتلي غي السم اللي ماكليتهش مع كان المشكل عندها راكي عارفة العرب دارت التلقيح في عنابة ومانجحش تم مشات لفرنسا وعاود دارت التلقيح في تونس ووالو ضاع عاود مشات بلجيكا ارخص من فرنسا ووالو حتي لقات روحها نهار حامل سبحان الله علئ زيارةعند طبيب عام في تلمسان والله العظيم يعني كيبغي ربي يجيب السبب سبحان الله ياربي ارزقنا الصبر والفرج

[om roumaissa]

يارب ارزق كل محروم بالذرية الصالحة
حبيت نحكيلك حكايت جارتي ربي مارزقهاش الذرية بعد سنوات تكفلت بيتيم جابت ولد و رباتو كي وليدها والله بعد سنوات قليلة حملت بتوأم بنات توافتلها وحدة وعاشتلها وحدة وزادت حملت موراها زادت طفلة معنتها ضرك عندها زوج بنات وطفل
وشحال تحب هادك الطفل تقوللنا ربحت عليه
وربي مافيه غير الخير
ربي يرزق كل محروم ان شا الله

[هبة خير]

سعدت بمرورك وشكرا كتيرا علي مشاركتك وربي كريم يرزق من يشاء

[oum imane83]

هبة معليش نسقسيك

[هبة خير]

ايه حبيبة ما كان حتي مشكل

[هبة خير]

وينك ام مان راني نقارع فيك

[oum imane83]

انت هدرتي للجميع ان الطفل ما هوش ولدك ولا غير للاقارب برك


انا نعرف زوجين قعدو لسنوات عديدة و ماكتبلش ربي ليهم الدرية ..امالا تفاهمو مع زوجين اخرين من عائلتهم يعطيلوهم مولودهم بحكم انهم عندهم دراري الله يبارك دكور و اناث


المراة العاقر ادعت الحمل وكي كي حان وقت ولادة المراة الاخرى راحو لنفس العيادة و كان عندهم معرفة سجلو الطفل على اسمهم و قدام الناس كامل و كانه ولديهم . و الوالدين الحقيقين سجلوفي دفترهم ان الطفل مات عند الولادة ... بعدد مرور سنوات هادوك الزوجين ماحكاوش للطفل الحقيقة ..الطفل كي كبر شوية كبر وهو معتقد ان والديه الي رباوه هوما والديه البيولوجيين اي الي جابوه للدنيا ..حتى وين سمع من الناس بالحقيقة وبدات تصرالو مشاكل نفسية حادة ....

[هبة خير]

اولا حبيبتي كامل العائلة واللي يعرفونا يعرفو ان متكفل ونعطيوه الاسم فقط في المحكمة يعني مانكتبوش في الدفتر العائلي حرام التبني وحتي في القانون ماكانش وهاد الزوجين غلطو من الاول تحيلو مع الناس ونساو ربي بالنسبة لولدي راني بديت لمحله قالنا الطبيب النفسي واللي عندهم التجربة تخبروه علئ سبع سنين وهو خمس سنين ونص وجارتي مربية بنت اليوم رها مزوجة قاتلي كخبرتها قلتلها انت عندك اتنين ماماتك واتنين باباتك انت محظوظة

[فرح حياتي]

ما شاء الله تبارك الرحمن
ان شاء الله ربي يحفضولكم و يكون وجه خير عليكم وتشوفو اختو
سبحانو ربي مايضيع حتى واحد حتى لي حرمو من الانجاب فرحوا بطريقة اخرى
في رايي انو لما اثنين محرومين يكفلو طفل على الاقل هذا راح يخليهم ينساو شوية مشكل النجاب ويتلهاو مع الطفل حتى يفرج عليهم ربي
كنت نعرف وحدة جابت بنت اختها من كانت بيبي لما كبرت الطفلة وجابت لباك قررت تروح لوالديها و تحرق قلب خالتها عليها وتخاصمت على جالتها مع اختها وبعد مدة قصيرة جابو توام بنت و ولد و رباوهم وماشاء الله تقولي ولادهم و اكثر
حبيت فيك الاخت انك تابعي مع اخصائي نفسي هذا وش لازم ديري و انك محضرة نفسك باش تصارحي الطفل يالحقيقة من وهو صغير احسن بكثير من انو يكبر و يتصدم
ان شاء الله ربي يرزق كل محروم و لي مارزقوش ربي يتكل على ربي ويكفل يتيم يكفي انو الرسول الكريم ساوا بينو وبين كافل اليتيم

[نيل المنى]

شكرا أخني هبة الخير ،و الله غالب أنا أيضا محرومة و لكني عازبة من أين أأتي بلقب للطفل الذي أريد التكفل به،صحيح أن الزواج أسبق للأمومة و لكني صراحة أحترق لأني لم أنعم بها ،أريد طفلا أو طفلة و لكن ....................... مازال ما كتبش ربي،الحمد لله على كل حال

[هبة خير]

شكرا حبيبتي مينو والله كلامك جميل وراقي
نيل المنئ كل امراة تتمنئ تحس بامومتها يارب يفرحك ويفرج عليك ربي كريم نعرف وحدة جارة لوستي خدامة وعزبا ربات طفلة ولكن هاد الطفلة عندها والديها برك باها سمح في ماها وهي حاملة بها وكان عندها دراري وماعندهاش واليوم البنت رها في الليسي وعمرو ماماها الحقيقية مادورت فيها لانو كان هذا الشرط نتاعها

[نيل المنى]

أمين ان شاء الله عزيزتي هبة الخير ،ربي يفرحك ان شاء الله ،و بالنسبة لهذا الشرط الأم التي تكفلت بالطفلة من اشترط على الأم الحقيقية ألا تسأل على ابنتها؟؟ اذا كان الأمر كذلك فوالله غير حرام عليها ...تدير الخير من جهة و تحرق قلب الأم من جهة واحدة أخرى ؟؟؟؟ ألاطيف الله يستر

[لمسة L]

السلام عليكم
اختي العزيزة مشكورة على طرحك لهذا الحل الرائع ،
انا ايضا اعاني من مشكل عدم الانجاب و اتمنى ان اجد سيدات من نفس بلدي للحديث حول هذا الموضوع و الاستفادة من خلال تبادل اراء الاطباء عناوينهم و الادوية المستعملة لعلى احدانا تفيد الاخرى

اردت ان اقترح عليكن فتح موضوع خاص مثل التجمعات التي نجدها في منتديات اخرى فما رايكن؟؟؟؟؟؟؟؟؟؟؟؟؟؟؟

[هبة خير]

مشكورة حبيبتي لمسة والله الموضوع اللي طرحتيه جميل انت افتحيه ونحن نشارك فيه

[لمسة L]

مشكــــــــــــــورة

[هبة خير]

اين موضوعك يا لمسة شفته وكنت مقلقة ولما رجعت نكتب لقيته مغلق ماعرفتش علاه ومشكورة علي الطرح

[أم أماني أريج]

سلام أختي هبة خير ..........إن شاء الله تكوني في أحسن حال
عندي فقط سؤال لو أمكن
عندما تأتي اللجنة المسؤولة عن التحقيق في قضية التكفل إلى المنزل ماهي الأشياء التي يسألون عنها أو يلاحظونها ؟
ولك مني كل الشكر .

[هبة خير]

حبيبتي طال الرجاء لما جات عندنا اللجنة انا كنت في دار بابا الله يرحمه كانو جاو من الحج وكنت ما زالني عايشة في دار العائلة وزوجي اخدهم لداري كانت مبنية وكاملة ولكن فارغة عدا ما سكنتش وما قالوله والو شافو السكن فقط بلاك خلعتهم حماتي من اللي دخلو وهي تبكي حتى روحو ههههههههه ومن بعد ماعطلوش وعيطونا اخدنا زيد ربي يحفظه ويخليهنا والا عندك اسئلة اخرى راني في الخدمة خاصة فيما يخص الطريقة لتغيير الاسم واللقب وكل المستلزمات باش تكون عندك دراية قبل

[أم أماني أريج]

ههههههه ضحكتيني بالاك صح حماتك خلعتهم :1:
أنا توسوست من اللجنة قلت بالاك تراقب كل شيئ في البيت
ربي يحفضلكم زيد و يزيد لو اخت في أقرب وقت
ان شاء الله حبيبتي كي يقرب الوقت إذا صادفتني أي اشكالية أكيد رايحة نلجأ ليك .
لكن هل فعلا يمكن تغيير إسم الطفل ؟

[هبة خير]

ههههههه ضحكتيني بالاك صح حماتك خلعتهم :1:
أنا توسوست من اللجنة قلت بالاك تراقب كل شيئ في البيت
ربي يحفضلكم زيد و يزيد لو اخت في أقرب وقت
ان شاء الله حبيبتي كي يقرب الوقت إذا صادفتني أي اشكالية أكيد رايحة نلجأ ليك .
لكن هل فعلا يمكن تغيير إسم الطفل ؟


امين ياربي وربي يسهلك ويفرحك وبالنسبة للاسم الطفل يكون عنده لقب واسم افتراضي اللقب يتغير بلقب الزوج اجباري باش يعيش حياته الاجتماعية عادية يعني اشهادة الميلاد تخرج بلقب زوجك برك ما يتسجلش في الدفتر العايلي اما الاسم يحتفظ باسمه اجباري انت برك عندك حرية ضيفي اسم اخر انا اسمه شهاب وانا زدتله زيد علي اسم زيد اللي رباه الرسول صلي الله عليه وسلم