خاصة الرجال تعيشوا كيف اتصرف

[مشكلتي]

السلام عليكم انا موظفة في الادارةعقود ما قبل التشغيلاي نخلص مليون ونص هذه الخلصة تاعي الاولى الي مرانيش رايحة نصرف منها بحكم انو كانت عندي ديون قبل ما نزوج والحمد لله كملتهم المهم زوجي قالي نبدى نعطيك 500 الف برك ومليون ندسو في كارني تاعي ونلمو باه نشرو طونبيل انا قتلو اعطيني دراهمي وخليني ندسهم عندي ونهار الي تلم نمدلك من عندي والله ثم الله انو كنت نمدلو كل مرة كي كون محتاج حتى قبل زواجنا مديتلو 5 ملاين وانا كونت نجهز وما قتلو لالا وكي مرت مدة وقتلو عليهم قالي معنديش لا علينا وحتى حوايج نشري من مصروفي دبرو عليا كيفاش ندير انا والله دايرة النية معاه بصح حبيت دراهمي في يدي ونعاونو عادي بصح كون نحتاج وحاب نشري نقعد هكذا وتاني حبيت كي كملت دين تاعي حبيت نشري خاتم بحكم انو مديت معايا والو من صيغة لظروف الله غالب
والله احيانا نحتاج صوالح والله ما نصيب وحتى كي كون خارج من الدار ونقولو خليلي هذاك صرف يقولي واش ديري بيه والله حتى 20 الف ماني داستها وكامل ماليه حاسبين عندي دراهم يقولو خدامة وماعندكش
قولولو هل نخليه يدس دراهم ولا نخليهم عندي وكذلك من 500 نخلص الي تشدلي وليدي انا كي قتلو خليهم عندي زعف

[مياسم الصمت]

السلام عليكم ورحمة الله وبركاته

المشكل اختي أنك انت عودتيه على ذلك من البداية قبل الزواج بمساعدته

انا لا انكر على الزوجة مساعدة زوجها لكن ليس لدرجة الاتكالية هذه و أن تصبح الزوجة محتاجة

صراحة مادام أنك لم تستفيدي شيئا من عملك فالمكوث بالبيت أفيد لك على الأقل تربحي راحتك

واتركيه يتكفل بمصروف البيت وحده ربما يحس قيمتك فلا يراك بنك متنقل يأخذ منه في كل وقت

ربي يكون معاك اختي وييسر أمرك

[nasser26]

نقولهالك بكل صراحة

أنا شخصيا نخليها حرة في مالها حتى ولو احتجت نتسلف و مراحش نطلب منها ومتأكد من نفسي واش اني نقول

الله يهدي بعض الرجال ..

يا اخي الرجل نعم هي زوجتك لكن لا تنسى ان القوامة عليك ...هي ان شاءت ساعدتك وان لم تشأ فلا ترغمها رجااءا مالها ليس حقك وان كنت تاخذ من مالها بدون رضاها فهذا ظلم

اقول هذا لانه لا اظن ان هنالك امراة عاملة ولا تحب مساعدة زوجها .. نعم تحب مساعدة زوجها لكن برضاها وبالمبلغ الذي تراه هي مناسبا فاترك لها مجال حرية في مالها

[نورسين.داية]

السلام عليكم

السؤال الذي حيرني كيف هو يعطيك المبلغ المالي الذي هو ثمن أو اجرة عملك .......؟؟؟

ياخي من المفروض الأجر يدخل في حسابك البريدي ......كيفاش حتى تصل القيمة المالية في يده ....؟؟؟ و من بعد السيد يتقشف و يحدد ما يمنحني من جهدي و عملي هههههههههههه و الله مليحة هاذي يعطيه الصحة و كثر خيرو

عزيزتي غيري من بنود العقد ....ياخي راجلك ........و هاذي عقليت ...واش ديري بهم يدبر على روحو .......نرميهم في الواد .....ماذخلو فيا ياخي عقلية ياخي ....

إتفقتما على العمل .....هذه هي الأثار النتائج ........الله إسهل .......ليس معناه أن المرأة لا تعين زوجها لكن أن يستأثر طرف بالمال على حساب الطرف الثاني .............آآآآآآآآآآآآآآآآآآآآآآآآهه هنا مانتفاهموش

و قالك المثل لي صبر في ما غرو الشيطان ضرو ......................وفقكي الله أختي

[*نـــور*]

مالك هذا من حقك
لا تخجلي منه فهميه قوليله نخزن دراهمي وحدي
لان من كثر المشاكل الي رانا نشوفوهم
الوقت صعاب
لن اكون مثالية و نقولك زوجك و مسكين
انتي تاني راكي تتعبي و في الاخير ما تلقيش 20 الف في جيبك..و لا قوليله نحبس من الخدمة و لايم وحدك و لا دبر راسك

[knives66]

أفضل أنك تخليهم عندك

[زايدي أمحمد]

يااخت الامر معقد حاليا واصوب راي اراه حاليا هو انك توجهييه مباشرة لكن انصحك اختي ان تكون مواجهة لينة وعليك ان توضحي له انك تحبينه وانه هو مسؤول عن البيت وانك محتاجة لمالك من اجل البت كله وليس لنفسك
والله اعلم

[سجل أنا جزائري]

ما فهمتش علاش بعض راهم يشعلو في النار


كي هو راه يدس الدراهم باش يشري طوبيل راح تستفادي بيها نتي و باين هو ثاني راه يدس من دراهمو

و حسب اعتقادي هو اللي يصرف على دار مش نتي خلالك 500 ألف باش تصرفي على روحك

حاب فقط كيما نقولو يزير هو شوي و نتي شوي باش يتهنى و يشري طومبيل

عادي تعاونو و خلاص و اذا حاجة مش عاجلة حاولي نتي ثاني تتقشفي حتان تشري طوميل

كاين زوجات يبعو الذهب تعهم و يزيدو دراهمهم باش يعاونو رجالتهم باش يشرو طومبيل
دراهمك هما دراهم زوجك و عكس مكاش منها هذي دراهمي ندير وش حبيت و هو دبر راسو مين يجيب !!

[الألماسة]

انا كي قتلو خليهم عندي زعف
شوفي دراهمك انتي و هو يزعف؟ مليحة ياك ههه
اختي عاوني راجلك و ساهمي في مصروف دارك لكن دراهمك يبقاو فجيبك

[راضية12]

والله الا ربحت 15000 وطامع فيها والله الا مايحس بالجمرة غير اللي عفس عليها انا في هذي الحالة ماعندي ماندير بالخدمة الله يسمح هو المسؤول عليا وعلى وليدي وانا من دعاة عدم عمل المراة بعد الزواج الا في حالات خااااااصة ،ويشري طونوبيل على ظهرك انت؟. انت قلتيلو نخبيها عندي ونساعدك علاه لازم يخليها عندو وفوق هذا الشيء تقول دراهمو هو يعطيلك انت 500 الف الله الله علاه الرجال وحاشى الرجال ولاو يديرو هكذا على الدراهم علاه يشوفو في المراة بنك الله يهدي

['مــــــــــــرجان نينو']

سلام عليكم ورحمة الله وبركاته .

اظن ان المشكل بسيط سوء تفاهم فقط .

انا اقلك زوجك نوياه حسنة فهو يتطلع لشراء سيارة تستنفعو بيها في زوج.

ومن الطبيعي جدا هو يتقلق لانه يقول في نفسه هذه المرأة لا تثق فيا لانك لم تكوني معه في الرأي .

المهم حاولي كيفاه ترضيه لأن المال ليس هو كل شيء .

[ندى الصبح]

السلامليكم
ردي بالاك تتنازلي وتقولي معليش لالا يا اختي دراهمك في جيبك وكي يلايم هو زيديلو ، بصح ما تولفيهش يديلك دراهمك والله ما تفرحي بيهم وهذا شيء شفتو كثيرا عند قريباتي المتزوجات والله ما يفرحو بدراهمهم
واذا زعف خليه يخبط راسو على الخيط ايامات ويتريقل
الله يسهلك اختي

[blanche rose]

ما فهمتش علاش بعض راهم يشعلو في النار


كي هو راه يدس الدراهم باش يشري طوبيل راح تستفادي بيها نتي و باين هو ثاني راه يدس من دراهمو

و حسب اعتقادي هو اللي يصرف على دار مش نتي خلالك 500 ألف باش تصرفي على روحك

حاب فقط كيما نقولو يزير هو شوي و نتي شوي باش يتهنى و يشري طومبيل

عادي تعاونو و خلاص و اذا حاجة مش عاجلة حاولي نتي ثاني تتقشفي حتان تشري طوميل

كاين زوجات يبعو الذهب تعهم و يزيدو دراهمهم باش يعاونو رجالتهم باش يشرو طومبيل
دراهمك هما دراهم زوجك و عكس مكاش منها هذي دراهمي ندير وش حبيت و هو دبر راسو مين يجيب !!

عذرا أخي
نصيحتك ليست في محلها ولا أنصحها بها

من حقها ان تجمع مالها عندها..وديننا الحنيف جعل للزوجة ذمة مالية مستقلة
مادامت الزوجة تخدم زوجها في البيت وتعطيه مالها فما هو دوره هو؟؟

و يزيد يعطيها 500 ألف من دراهمها؟!!!
مليحة هذي.

هذي تبناتو امالا ..ماشي تزوجاتو.
ما هو دوره اذن؟
اين الرجولة؟
كيف تكون له القوامة

اذا كانت المراة تقوم بالعمل المنزلي و تصرف فالمفروض ان تكون لها القوامة اذن!!!!


من حقها جمع مالها..و اي زوجة تساعد زوجها حتى و ان لم يطلب ذلك

اما ان يراها كيس مالي متحرك فلا
أختي اذهبي لقسم دردشة البنات واقرئي قصص النساء اللواتي يعانين بسبب المال.

من يريدك لاجل مالك ليس برجل
فعذرا.
تحيتي

[Kawthar77]

ما فهمتش علاش بعض راهم يشعلو في النار


كي هو راه يدس الدراهم باش يشري طوبيل راح تستفادي بيها نتي و باين هو ثاني راه يدس من دراهمو

و حسب اعتقادي هو اللي يصرف على دار مش نتي خلالك 500 ألف باش تصرفي على روحك

حاب فقط كيما نقولو يزير هو شوي و نتي شوي باش يتهنى و يشري طومبيل

عادي تعاونو و خلاص و اذا حاجة مش عاجلة حاولي نتي ثاني تتقشفي حتان تشري طوميل

كاين زوجات يبعو الذهب تعهم و يزيدو دراهمهم باش يعاونو رجالتهم باش يشرو طومبيل
دراهمك هما دراهم زوجك و عكس مكاش منها هذي دراهمي ندير وش حبيت و هو دبر راسو مين يجيب !!


هههها ضحكتني اخي على بيع ذهبي باش راجلي يشري سيارة ومن بعد ؟؟؟؟؟؟؟؟؟؟؟؟؟؟؟؟
انا ضد هدي الفكرة وحقا نبيع دهبي ومع راجلي من اجل سكن وبشرط اسمي واسمه في السكن لكن من اجل سيارة مستحيل وأعطيه راتبي من اجل سيارة هدا مستحيل

[noeddin]

ربي يهديه ، حاولي أخد دراهمك بطريقة فطنة ، فعلا لقد اعتاد على الطمع فيهم.

[نتــــــــــاشا]

انا نضن انو تخلي دراهمك عندك يكون احسن لانو الدنيا هاذي مافيهاش لامان ممكن في اي لحظة لا قدر الله تنفصلوا وبعدها واش تكوني استفدتي لا زوج ولا مال لعقوبتك ليس من العيب المراة تعاون راجلها لكن ليس لدرجة انو يتحكم في مالها اساس الاسلام جعل من الرجل المسؤول عن المراة ومتطلباتها اسفة لكن زوجك بالغ كثيرا

[الصديق قروف]

رايي لوكان تتهلاي في ولدك خير من المليون ونص

[7anine 87]

مالقيت مانقول وعندك حق كي وجهتى سؤالك للرجال لانهم هم ليقدروا يفهموك ويفهمونى راجل طامع فى باي تاع مرتو وكون جات حتى صوارد مليون نص واش يديرو اوكى لمرا تعاون راجلهاولكن هدا قرارها وصوردها يكونو فى جيبها انا اول شرط شرطى على زوجى هو انى منخدمش هو وافق ديراكت خاطر مستحيل نتخيل انو دانى وهو طامع في هدى اهانة منقدرش نتقبلها فمبالك يعود يتحكم فى خلاصى لى شاقية عليه لمرا كى تشوف راجلها مش طماع ونحكى على روحى نعطيه واش عندى ونبيع دهبي عجالو وجامى نحسو انى درت فيه مزية بصح لشميت ريحة الطمع خلاص الدورو نستخصرو فيه ربي يعينك واسمحيلى طولت عليك مى الموضوع هدا استفزنى اختى احكى معاه بشوية وفهميه مى بلا عراك وبلا ماتحسيه بحتشى مى قوليلو نحتاجهم وكى تسحق ام هنا

[" أبو عبود"]

لا حول ولا قوة إلا بالله. السؤال كفاش تتزوجي واحد يدي عليك 5 ملاين قبل الزواج؟ وكفاش تقبلي يدي رداهمك ويزيد يحسابك؟ انا اسف بصح الحل الوحيد أنك تقوليلو نبطل الخدمة ما خرتش علي نقعد في الدار. وهكذا خليه هويتحمل مسؤولية المصروف. شحال نكره الرجل الانتهازي

[الجنة الجنة]

ما تخليش الثقة اللي بيناتكم تتزعزع لانها قادرة تسببلك مشاكل اخرى، اذا شفتي بلي هذا الامر راح يسببلك مشاكل تنازلي وان كان دراهمك من حقك يقعدو عندك والشرع يقول هذا

[اياد حياتي]

الافضل انك تخليهم عندك وكيما قتلي كي يكون رايح يشري عاونيه عادي انو المرأة تعاون راجلها بصح كون تمديهم وما يشريش وين رايح تشوفيهم وبلاك يديهم لوحدو هذا الزمان غدار وشحال من وحدة نغدرت

[حمودية]

نصيحة ماتمديش دراهمك .......انا ارى ان الامر فيه استغلالية