مشكلتي هل أنا المخطئة

[مشكلتي]

السلام عليكم
راني مقنوطة و حبيت نخرج واش كاين في قلبي انا اعمل استاذة في الثانوية عمري 30 سنة ماشي متزوجة راكو تعرفوا كل عام حكاية نفسها بالنسبة لتوزيع جداول التوقيت و المستويات قاع نحبوا نطيحوا مع تلاميذ ملاح خاصة في الثانوية ديالنا جاية في منطقة شوية حساسة يخدمو معايا 4 اساتذة من نفس المادة 2 منهم من نفس سني تقريبا ولكن متزوجات وا حدة عندها طفلة و الثانية ولد نقولكم هذا باش تفهموا كلش امبعد و كاين الاستاذة المنسقة امراة كبيرة متزوجة و عندها اطفال و كاين راجل تاني هو الصغير فينا و يخدم ما شاء الله جامي يشكي مسكين والمشكل الي يتكرر كل سنة بنفس الاسطوانة هو توزيع المستويات دائما المتزوجات اللي من سني مايحبوش يشدوا المستويات العليا بحجة انهم متزوجات و عندهم اطفال و والمنسقة و الاستاذ الشاب هوما لي يحكموا المستوى الثالث مع مستوى اخر حتى انا حكمت طلاب الثالثة عدة مرات و خدمت معاهم نورمال وهذا العام في زهري طاحلي جدول توقيت مليح و مستويات ملاح الحمد الله لانو في السابق دائما ايطيحلي كارثة و كي نشكي اقولولي معليش هوما متزوجات و عندهم اطفال ونتي راكي سليبتار براسك كل عام هكذا نسمعها و هذا العام كي جاني مليح جات عندي المنسقة طلبت مني نمدو لاستاذة اخرى بحجة ان هذه الاخيرة ما تقدرش تخدم بالجدول تاعها شارجي شوية و قالتلي لوكان انا وزعت الجداول مانمدهولكش ليك نمدوا ليهم لانهم متزوجات باطفال اما انت مراكيش متزوجة تقدري تسلكي بيه المهم انا رفضت نبدلو وحسيت بلي هوما زعفوا و دوكا وليت نحس روحي ماشي مليحة كي نروح الخدمة خممت حتى نحبسها ما فهمتش هاذ العقلية لي متزوجة تتكسل و تدي الشهرية واللي ماشي متزوجة تخدم يحرثوا فيها نورمال ا على أساس راني فرحانة بروحي كي ما رانيش متزوجة مع انني اتمنى هذا كل يوم وندعي ربي صباح و عشية ونبكي ساعات بصح واش ندير وهوما متزوجات و لاباس بيهم من كل النواحي ايزيدوا يشكوا و يحبوا كلش ليهم و الله غير غاضني الحال و المشكل كل عام يصرا هكذا ما يهدالهمش بال حتى يدوا واش حبوا و هذا العام كي طاحلي في زهري حبو يفسدوها عليا والله غير كرهت الخدمة قولولي راني غلطة ؟

[مراد سابقا6]

كيف تتوقفين عن العمل

؟؟؟؟؟؟؟

انت طيبة فوق اللازم

حتى انت ابحثي عن مصلحتك

ولي معجبوش الحال يخبط راسو في الحيط

[hamza touazi]

ختي نتي باين بلي عاقلة بزاف وبنت فاميليا شافوكك عاقلة حبو ياطكلوك ياحختي الحاجة الاولى الخدمة مافيهاش العاطفة راكم كامل خالصين متزوجة ولا مطلقة مالا علاه تخدم كي متزوجة معجبهاش الحال هوما يحبسو ماشي نتي نتي تان عندك حياتكك الخاصة وداركم ويماك واهلك نورمال ماتحبسي موالو ومتسمحيش في وقتك هوما اللي غالطين وماتمديلهمش فرصة يطيحولك مورالك قوليلهم رانا كامل خالصين وكامل خدامات وادا نتي بولادك مساعدكش الوقت متخدميش ولا حابة تدي وقت مليح وزيد تخدم كل واحدج يحوس على مصلحتو الله يسترنااااااا

[سجل أنا جزائري]

كبري قلبك أختي

حطي نفسك في مكانهم كون جيتي متزوجة و كاينة واحدة مش متزوجة كون راكي تخمي كيفهم

ديري الخير فيهم معليش علابالك وحدة متزوجة تكون عندها مسؤوليات أكثر

صح تتعبي كثر مي يجي نهار تسحقيهم و يهزوك

شوفي هذاك الشاب كيفاش ما يشكيش علاش ؟ ماشي بسكو جايح مي علابالو النساء ديما عندهم مشكل تع التوقيت مي الراجل يقدر نورمال ملغري يتعب مي يراعي الظروف تع االزملاء تاعو

[صدفات]

إستغفري يا أختي الحياة صراع ماتسمحيش في حقك الجدول راه نتاعك ما تمديه حتى الواحد .هاذو ك كسالى يتخباو وراء الاولاد والبيت انتي كذالك عندك بيت و اهل ما ركيش في الفندق لي ماهيش قادرة تبقى في بيتها مع اولادها.

[اياد حياتي]

بالكي تحبسي الخدمة هي صح متزوجات عنهم مسؤوليات اكبر بصح مادام الجدول تاعك بالكي تسمحي فيه واللهع والله قدمى ديري مع ناس ما راح يستعرفو بيك

[آنثى آلمطر]

وعليكم السلام

اختي وعلاه تخلي مكانك


هههههههه والله غريبة كيفاه الي متزوجة لازم تتقلش في الخدمة لالا حنونتي
كل وحدة ومكانها وانت متسمحيش في بلاصتك

انت شافوووووووووك عاقلة حبو ينتاهزو
والي معجبوش الحااااااااااااال يخبط راسو على حيط ولا يخرج


اتمنى لك توفيق

[بسمة اكرام]

لا لا حنونة هدا حقك وماتسمحيش فيه
هي مدام دخلت تخدم وعارفة عندها اولاد
تتحمل
اختي ماعندك علاه تبطلي الخدمة او تحشمي
الوقت الي رنا فيه الي يحشم يقولو عليه جايح

[nasser26]

تصدقيني والله معلاباليش كفاش اكي حاطتلهم بال وتخمي فيهم وزيد تخمي تحبسي خدمتك

ياك كامل خدامين عند الدولة ؟؟

لي متزوجة ومقدرتش قوليلها انتي فضلتي خدمتك على دارك ....... انتي وليتي تحلي مشاكلهم ؟؟؟

اختي انا نعرف مليح لاشارج تاع الخدمة اخطيك من كلامهم ولي يزعف خلي يزعف .. شدي فالجدول تاعك واربحي راحتك وربي هو لي يجازي

[أم أمين2007]

كلكم راع وكلكم مسؤول عن رعيته
اجر متساو= عمل متساو وفرص متساوية

[عبد الله 22]

من حقك أن أيضا أن الإستمتع بأيام العزوبة هذا يكفي لكي يكون لك وقت مناسب لكن من جهة اخرى من الممكن ان تساعدهم تفضل منك لا واجب، وفي الاخير إن شاء الله تتزوجي في القريب وتهنى الفرطاس من حك الرس

[sara160349]

يا اختي حابين يحكموها من الجوايه كامل يحكمو الدار و الراجل و ما يفرطوش فالخدمة لي ماشي قادرة تحكم دارها و اولادها عندها زوج مسؤول عليها انت الاحق انت علي صواب اختي ماتدريش ههذا العام يجيك مكتوبك و تولي انت تاني عندك مسؤوليات استغفري ثم استغفري و ربي يرزقك كل خير

[○•ميسون•○]

السلام عليكم

لا أختي ما راكيش غالطة و هاذا حقك بويسك الجدول عطاوهولك ليك انتي يعني انتي حرة فيه و نصيحتي ليك ما تفرطيش في الجدول نتاعك تمسكي بيه

++أبعدي فكرة التوقف عن العمل هناك الآلاف ممن يحلمون بمنصبط و الفرصة لي تروح ما ترجعش

[.ام زكرياء.]

السلام عليكم اختي هذي خدمة مش لعب وعواطف هما مزوجين ربي يسهل انتي هاذي خدمة متبدلي حتى الواحد وزيد اوكان راكي متزوجة ومعندكس الدراري ايديرولك هكا انتي اقطعيهالم من ذوك ومعلا بالك بحتى واحد

[مريم سلمى الجزائرية]

السلام عليكم و رحمته تعالى و بركاته:

السلام عليكم
راني مقنوطة و حبيت نخرج واش كاين في قلبي انا اعمل استاذة في الثانوية عمري 30 سنة ماشي متزوجة راكو تعرفوا كل عام حكاية نفسها بالنسبة لتوزيع جداول التوقيت و المستويات قاع نحبوا نطيحوا مع تلاميذ ملاح خاصة في الثانوية ديالنا جاية في منطقة شوية حساسة يخدمو معايا 4 اساتذة من نفس المادة 2 منهم من نفس سني تقريبا ولكن متزوجات وا حدة عندها طفلة و الثانية ولد نقولكم هذا باش تفهموا كلش امبعد و كاين الاستاذة المنسقة امراة كبيرة متزوجة و عندها اطفال و كاين راجل تاني هو الصغير فينا و يخدم ما شاء الله جامي يشكي مسكين والمشكل الي يتكرر كل سنة بنفس الاسطوانة هو توزيع المستويات دائما المتزوجات اللي من سني مايحبوش يشدوا المستويات العليا بحجة انهم متزوجات و عندهم اطفال و والمنسقة و الاستاذ الشاب هوما لي يحكموا المستوى الثالث مع مستوى اخر حتى انا حكمت طلاب الثالثة عدة مرات و خدمت معاهم نورمال وهذا العام في زهري طاحلي جدول توقيت مليح و مستويات ملاح الحمد الله لانو في السابق دائما ايطيحلي كارثة و كي نشكي اقولولي معليش هوما متزوجات و عندهم اطفال ونتي راكي سليبتار براسك كل عام هكذا نسمعها و هذا العام كي جاني مليح جات عندي المنسقة طلبت مني نمدو لاستاذة اخرى بحجة ان هذه الاخيرة ما تقدرش تخدم بالجدول تاعها شارجي شوية و قالتلي لوكان انا وزعت الجداول مانمدهولكش ليك نمدوا ليهم لانهم متزوجات باطفال اما انت مراكيش متزوجة تقدري تسلكي بيه المهم انا رفضت نبدلو وحسيت بلي هوما زعفوا و دوكا وليت نحس روحي ماشي مليحة كي نروح الخدمة خممت حتى نحبسها ما فهمتش هاذ العقلية لي متزوجة تتكسل و تدي الشهرية واللي ماشي متزوجة تخدم يحرثوا فيها نورمال ا على أساس راني فرحانة بروحي كي ما رانيش متزوجة مع انني اتمنى هذا كل يوم وندعي ربي صباح و عشية ونبكي ساعات بصح واش ندير وهوما متزوجات و لاباس بيهم من كل النواحي ايزيدوا يشكوا و يحبوا كلش ليهم و الله غير غاضني الحال و المشكل كل عام يصرا هكذا ما يهدالهمش بال حتى يدوا واش حبوا و هذا العام كي طاحلي في زهري حبو يفسدوها عليا والله غير كرهت الخدمة قولولي راني غلطة ؟
وفقك الله أختي لما يرضاه دائما.
متى كان حقا للمتزوجة أو التي لديها اولاد في التعليم أو في غيره من القطاعات الاستفادة دائما من الوضعيات على حســـــــاب غيرها ممن معها ؟
نعم تأخذ فرصتها كغيرها ،و نعم تستولي على فرص غيرها إن سمحوا بطيبة خاطر لها ،أما أن يصبح حقا لها على غيرها فلا قانون يسمح ،و لا إنسانية تسمح، فلنكن عادلين مع أنفسنا أولا.
أنصحك بأن تستخيري الله وافعلي بعدها ما يريحك أنت خاصة أن الفرصة أتتك لوحدها و لم تخططي لها،فلا تستمعي "لتراهات" و أسطوانات مشروخة سمعنا مثلها كثيرا ، فلا تعطي فرصة لكل من به مرض الأنانية أن يستغل التسامح و الطيبة فيزداد أنانية بل عالجيه قبل أن يستفحل المرض .
إن كَثُر اللَّغط حول الموضوع ،إجمعي شملهم و قولي كلمتك بكل وضوح و لباقة و كوني مستمعة جيدة قبل ذلك لتَصلي إلى نتيجة منطقية فتبدي أنانيتهن و تمسكي بحقك أعجبهم ذلك أم لم يعجبهم .
إن الله يحب الحق فلا تكوني ظلومة لا لغيرك و لا لنفسك و كفى بالله حسيبا.

[الماسة النادرة]

وعلاه الي ماشي مزوجة تسكن في المؤسسة ولا واش اسمعي اختي اولا ربي يلاقيك بوليد الحلال ويرزقك بالولاد الصالحين ثانيا متحسي روحك لامعزولة ولا والو انتي وهوما كيف كيف قانون العمل ميمدش الافضلية للمتزوج والي معجبهاش الحال تروح تريح في الدار وتعس ولادها ولا واش يديرولها دول التوقيت عى قيسهم بلاكي تتنازلي واذا معجبهمش الحال روي اهدري مع المدير علال العرب تاوعنا يحبو سواء يدو واش يحبو ولا يشنفو راكي تخدمي عند الدولة ماشي في ثانوية باباهم وبلامزية حتى واحد

[لحن الحياة.]

ماكيش مخطئة شدي توقيتك واخدمي بيه رانا كامل هاك انا العام لي فات كنت شارجي هاذ العام زملائي حكمو لاشارج كل عام يريح واحد بالعدل و لاباس علينا هاذو يحوسو يحقروك

[loufa]

متسمحيش فحقك واللي معجبوش الحال يبطل الخدمة هو واذا مهمش قادرين كاين البطالين اللي يتمناو هاذ الخدمة
أن شاء الله يرزقك ربي بولد الحلال هاذ العام قولي امين

[kamelaka]

ختي نتي بين عاقلة بزاف نواريلك حاجة شوفي هاد العام زيدي أدربي النح أوقبلي مي العام الجاي إن شاء كيقولولك منعطهمش ليك قوليلهم أنا ثاني تزوجت أو هادي هي يلزم عليك تزوجي وخلاص و الله إنها الحقيقة إنه مجرد رأي

[دعاء المحبوبة]

لست مخطئة، لك كل الحق في التمسك برأيك

[صدفات]

أعود لاقول لك صممي على موقفك ولا تتراجعي اختي أستاذة ولما كانت غير متزوجة كانوا يفعلوا معها نفس الشيء و لما فتح عليها ربي وتزوجت واش يقول لها مدير الدراسات راني تاكل عليك انتي تسلكيها وإستمر الوضع حتى رزقها ربي بإبنها و بقات بنفس الضغوطات ولما طلبت على ترقية أستاذ مسؤل واش يقولوا لها هاذ النساء لي كانوا شافينها هما و المدير ما عندكش الحق الاقدمية هما دخلوا قبلك.راني تقلقت لمجرد الكتابة ما تسمحيش في حقك.

[فريال القسنطينية]

هناك مثل ألماني يقول :
Jeder weiB wo der schuhe schmerzt
ومعناه بالدارجة : كل واحد عمبالو وين يظرو سباطو ...
ولكان هوما متزوجات ربي يسهل عليهم ... مشكلتهم.
اذا بغاو يخدموا يديروا حسابات لكلش
والسلام عليكم

[زايدي أمحمد]

مراكيش غالطة وكاين حل نتزوجك باش تحل المشكلة نهائيا

[السي محمد]

عادي

كي تتزوجي و يصير عندك اولاد

رايحين يعاملوك نفس المعاملة

و تبدا الاستاذات الاقل سنا و العازبات يشكيو كيفك ههه


=========

انا نتمى

تتزوجي و تحكمي دارك

و ( المنصب تاعك )

يأخذه شاب و يفتح بيت و يستر فتاة اخرى عزباء

[وفـــــاء]

تمسكي بقرارك أخت الكل أصبح يبحث عن مصلحته الخاصة وفقط لا يهمه ما يحدث للاخرين ....لست أقول هنا عيشي لمصلحتك لكن افرضي نفسك الحياة معركة مع أشباه هؤلاء

ربي يرزقك ان شاء الله بالزوج الصالح والذرية الصالحة ^__^

[صوفيا2000]

الله يعينك اختي
انا رأيي شدي الجد ول تيعك وما تغيريه
ادا هوما ما يقدرو ش عالتعليم يروحو يشد و ديارهم ويربيو اولادهم احسن
الأستاذ الحقيقي ما يقول ش الجدول شارجي

[first first]

شوفي اختي اني حاسة بيك.
نقولك انت حرة ................ومن حقك تحتافضي بالجدول الزمني تاعك........................وادا حبيتي تمديه راهي مزية من عندك.
هادي العفسة دايما كاينة في الخدمة ...يحطو لي ماش مزوجة مروحة لاوتال...يعني رايحة تقعد وترقد في الدار...واحيانا هم الغير المتزوج يفوق المتزوجة بكثير خاصة ادا كان عندهم ضرف خاص في البيت كمرض احد افراض الاسرة او غير دلك.
اما ادا كنت والحمد لله ليس لديك مشقات اخرى في الحياة......فتفضلك على المتزوجات بجدولك الزمني يعتبر كرما من عندك وخدمة لوجه لله قد تاتيك ثمارها يوما ما ............لعلك تصبحين متزوجة يوما ما وتاتي من هن اصغر منك لمساعدتك.
والله يااختي.............حاسة بيك.............انت تحبي ديري لمزية ..............اللهم بارك وبارك الله فيك...وماتنسايش من كان في حاجةاخيه كان الله في حاجته.ماحبيتيش..والله واحد لا يقدر يقاولك علاش.
وعلاش يااختي يديرو توقيت مليح وتوقيت بايخ...علاش مايديروش العدل؟؟؟

[knives66]

كل أساتذة يهربوا من مسؤوليات ومن بعد يجوا يشكوا وحابين شهرية

تقول تلاميذ الباك جوا من مريخ

ربي يهديكم ركم ضيعوا في جيل قاعدين تخملي في جدول والوقت تخدموا 2سوايع في نهار وتشكوا

وناس تخدم 12 ساعة في ظروف قاسية وحمدة ربي

يخي حالة يخي