كيفاه نتعامل مع هاذ النوع من الناس

[مشكلتي]

مشكلتي مع عزوجتي ....انا إنسانة من الصحراء و تزوجت في الشمال .. ....ماكنتش نعرف حتى نهار اللي تزوجت بدات تعاملني بإحتقار و تهيني امام سلفتي..وتهين ناس الصحراء و انا نسمع شحال من مرة ...و دايما المعامالة مختلفة بشكل كبير ...انا من البداية كنت نحكي لماما تقولي هاذي مرا كبيرة و ماتعانديهاش راه فيها لاطونسيو وبالاكي تزيدي عليها و تجي بسبابك...و انا دايما كي البهيمة ساكتة ما نردش و هي كل مرة تسمعني كثر من السابقة...سلفتي مقلشتها لأنو تخاف منها ...داوست معاها خطرة وقفت عند حدها و زيد راجلها لاقياتو في كتافها ...و انا راجلي يخاف من امو حتى لو هي غالطة يعطيها الحق ..و خوه مسكين ينيف عليا....سلفتي في نفاسها تروح تشريلها اللحم و الكبدة و تقولي طيبيلها و ديهم ليها للبيت تاعها ....و حتى مين تمرض تقولينا دوليها عشاها للبيت رغم انو تعبانة برك..و انا كنت بالحمل ...و جاية من عند الطبيبة نبكي وحالتي حالة وقفت عليا كيما البوليسي و قالتلي **لياه واش درتي ...ماعندك مادرتي ...***يعني مابذلتي حتى جهد..صدقوني و غير انا كنت نعملها الميناج و نمسح الغبرة و سلفتي ماتعمل والو من غير الدالة تاع طياب و غسيل الماعين ...انا عروس و ماما عندي ضيفة كنا نشربو القهوة في الصباح جات سلفتي ريحت باه تشرب القهوة..إمالا قاتلي نوضي جيبي لسلفتك الحلوى باه تشرب قهوة....ضرك راني حاسة روحي حمارة...لأنو راهي حاقرتنيو حتى اللي وصلت مين تشوفني يبانولها الأوامر جيبي ديري ...و المشكلة انو تخلي بنات ولادها و بنات بناتها جالسين و تبقا ترسل فيا ... زايدني ولدها لاخدمة لا والو غير انا نصرف عليه ما يشريلي حتى حاجة ...و يزيد يشري المخدرات و الدخان على حسابي...العيد النسا كامل باهيين و لابسيين ...و انا مخلية كل حاجة في خاطري حتى الكوسميتيك نشري الرخيصة.و يزيد يحاسبني ..تعبت من هاذ الحالة ...وجيت نحكيلم بالاك عندكم حل و إلا نصيحة باه توقف عند حدها

[ابتسام smile &hope]

يا اختي اذا تاكدي انه يشتري المخدرات فلا يجوز لك اعطاؤه مالك اما عن اعمال المنزل ديري الدالة و قيمي روحك اشري ولبسي مليح وقيمي روحك الناس يقيموك عجوزتك ماتقوليلها والو وساعفيها بصح المشكلة تاع راجلك هي المشكلة العويصة بدون عمل +مخدرات

[*غامضـﮧْ بطبعـﮯ*]

الطلاق هو الحل الوحيد مادام يشري المخذرات و يعاملوك هكا ما بقاش هاذو ناس ما عندهمش ذرة تاع تربية و أخلاق

[تراتيـل صبــح]

أختي اعذريني لكن حددي مشكلتك بالضبط
هل هي عجوزتك ومعاملتها السيئة لك
أم هي زوجك الغائب عن الصورة بسبب ما يتعاطيه من المخدرات ؟
لو كنت مكانك لفكرت في حياتي مع زوج مثله وما فكرت في سوء معاملة أمه لي
فكري كيف ستكون حياتك معه وهو مستمر بتعاطي المخذرات وهو دون عمل ويستغلك ولا ينفق عليك
فكري في حالة ما أنجبت معه أولاد من سيتكفل بهم ويربيهم وهو غائب عن الوعي؟
وماذا لو حدث وانفصلتم عن العائلة الكبيرة؟
هنا ستسوء الأمور أكثر صدقيني
فحاليا هو يخاف من أمه كما تقولين لن يحرك ساكنا
لكن في المستقبل ستتعرضين للتعنيف ربما حين يجد المجال
ولن تجدي سندا لك لا أهلك ولا أهله
فكري في كلامي ومستقبلك جيدا
استخيري ثم قرري
موفقة.

[اسامة رحمون]

تمديلو يشري المخدرات من جيبك ونت علبالك ساكتة ربي يفرج عليك

[aya2007]

الحل هو انك تقيمي روحك و تثيقي في نفسك ...و هاذ الانسانة في نظري ما تديريلها حتى حساب نحيها من بالك ...زوجك حاولي تناقشيه في الموضوع و ان تطلب الامر تهديده بالانفصال ...

[lachiche]

السلام عليكم و رحمة الله و بركاته
شخصيا أرفض فكرة الزوجين يعيشوا مع الأهل اختي انت اهدري مع رجالك بالاك يديرلك دارك لأنه من حقك تعيشي وحدك

[ام آدم]

يا اختي و الله مشكلة عجوزتك ما تبان والو قدام مشكلة راجلك المدمن راهي الخمر والمخدرات ام الخبائث و زيد عايش عالة عليك
صدقيني اهتمي بزوجك وحاولي ترجعيه لطريق كي يتعدل هو كلشي يتعدل وكي يدير قيمة لنفسو راح يديرلك انت ثاني قيمة
كان الله في عونك وربي يهدي زوجك و عجوزتك

[شخصية نرجسية]

قولي لزوجك الوداع أطلقي أحسنلك لا بركة في زوج يتعاطى المخدرات

[hamza touazi]

اتاه وقفيهم عند حدك علابالي وراني حااس بيك صح يقولك نتي من صحرا عمباتلهم ملقطة ولا لقاوك فطريق شوفي ديري قيمة لروحك باسكو والله ناس فهاد الوقت يشوفووك نية بزاف ياكلووك شوفي روحي معاها بالظرافة وحبسيه_ا عند حدها مثل راكي مريظة ريحي فغرفتك قوليلها راني مريظة فيسيلها بزاف باسكو تكوني نية بزااف ياكلووك وراجلك هدا طرطوور ياك الرزق بيد ربي والعجوزة سمعيها قوليلها نخدم لقدرت عليه كي نكون مريظة انا مانيش الة نمرظ لازم تريحي انفظي الغبار على روحك والله

[رانيا لوك]

ربي يفرج همك

[yacine-08]

دايرين ناس الصحراء مايعرفوا والو

ومعا يشوفوك تحشم هذاك وين يطلعوا فوقك

لازم تكون عندك شخصيتك

[salem1985]

السلام اختى والله انتي في ورطة كبيرة ربي يفرج عليك هذا هو المشكل انتاع العائلات الي يطيشوا بناتهم برك ما يحوصوش عليهم ولا كيف راهم عايشين الحاجة الاولى كيف يعطي بنتولمدمن مخدرات والحاجة الثانية انو يشوف تجاوز الحدود من طرف عائلة الزوج وما يوقفش مع بنتو ولا اختو حنا ناس الصحراء ناس ملاح ونيه ونصبروا بصح الطفلة كي تروح لعائلة اخرى بناتنا تتهان وزيد الام تقول لبنتها صبري مع زوجك حتى البنت تهلك صحتها ربي يقدر الخير لازم الاب والاخ ديما يروحوا لاختهم ويشوفوا كيف راهي عايشة وخطرات بالصدفة بلاك راهم يضربوها ولا معذبينها لانا بنات الصحراء حشامات وما يخبروش العائلات انتاعهم ربي يهديهم امين

[7anine 87]

اختى المفروض تحكي وتشكى من راجلك عجزوتك مشكلتها ساهلة وحتى لما تحلتش تتحل مع الوقت مى راجلك لا خدمة لا قدمة وزيد مخدرات من فوق كتباتها مع لخر كانو هدا الشئ تافه والاهم حقرة عجوزتك ديري حل لعمرك وهدا مشها حياة لعيشتيها

[ام رجاء 09]

المشكل العويص لي تخمي فيه المخدرات وزيد بلا خدمة كي تنفتح المشكلة تما خمي في عجوزة وووو ونورمالمو هما يهبطو رواحهم بنات الصحرا ماصلين واش خصهم ورافدة هم وليدها وساكتة وين تصيب وحدة هكا قيمي روحك يقيموك ناس انطقي شوية وبعدي على جمايع تاعهم كي غير تقعدي يديروك سكرتيرة انفظي على روحك ياك ناس ولاو لي بنت فاميلية ينطقوها كي تنطق يقولو شتي ولات تهدر باسكو والفو سكاااااااااااااااات كرهنا من هاد قباحة كاين ربي حسبنا الله ونعم الوكيل علاه تفكري فيا علاه ادعي ما يسلكها غير القيام في جوف الليل ودعي اول حاجة المخدرات تم خدمة ونتي كوني قافزة ربي قال زواج نصف دين ماشي نص شخصية ودل

[miinoucha25]

سلام اختي اسمحيلي عندك الحق تحسي روحك حمارة مادام راكي تبعتي في راجلك للتهلكة بيديك

هاداك المال للي راه يقتل في روحو بيه انتي اولى بيه

اصرفي على روحك و البسي و حوسي

لاكان ما قيمتيش روحك ما تستنايش منهم يقيموك

و نظن وضعية زوجك للي زادت الطين بلة لان قيمتك من قيمة زوجك

و نعرف ناس بزاف من الصحراء عايشين في منطقتنا والله يا ختي الناس الكل مقادرتهم لانهم هم عرفو كيفاش يتعاملو و ماعندهمش خلاص العقدة للي عندك

شوفي يا ختي ما قلنالكش ديري الشر باش يقادروك لكن اهتمي بنفسك و قيميها

و ربي يفرج الاحوال لكن لازم تشوفي حل لمشكل زوجك و المخدرات اما المشاكل الاخرى فهي تافهة مقارنة بهذا المشكل

[blanche rose]

المخدرات
يعني زوجك كالاهبل
كل من يتناول المخدرات تموت خلايا دماغه و يصبح كالخاتم في اصبع من حوله

يمكن تمييزه ببساطة لأن تجاوبه مع الحوار بطيء و عصبي
و ردوده غبية دوما

معروف ان الرجل اذكى من المرأة و متى صار العكس فهذا يدل على انه من مدمني المخدرات
اقول هذا لتتاكدي من معلوماتك
هل هو يتناول المخدرات فعلا ام هي مجرد شكوك

المهم

مادمت تصرفين فالاحسن ان تستاجري بيت انت و زوجك بعيدا عن الاهل
و عليه ان يعمل ليحس بالمسؤولية

بخصوص ان عجوزتك تعاير اهل الصحراء ...الخ
صدقيني اللي قليل اصل قليل اصل

حتى لو كنت من نفس العرش رايحين يعايروا كل اهلك واحد واحد
انا شفت و عرفت

لا تقولي لا صحراء و لا شمال
كاين ناس يحبوا يعايروا و خلاص و لوكان تحسبي عيوبهم ما يخلاصوش..
و اذا شافوك خير منهم يحاولوا يذلوك
وهذا دليل على الاحساس بالنقص

لان اللي ما يحسش بالنقص ما يذلكش .. بالعكس يزيد من قيمتك يا لوكان كنت اقل منو

استأجري بيت و استقلي مع زوجك و ربي يهديه
و ما تنسايش الصلاة و الدعاء

ما يحلها غير ربي سبحانو
اقرئي القرآن

اقرئي سورة الواقعة خصوصا بعد الفجر فهي كالمعجزة ان شاء الله

آية الكرسي
أواخر سورة البقرة

المهم لا تبتعدي عن الله

[fati kibir]

شكراااااااااااااااااااااااا

[sarah1424]

المشكل ليس عجوزتك
يعني عجوزتك في اسطر وزوجك مدمن مخدرات بدون عمل في كلمة ؟؟؟د
المشكلة الاساسية هي زوجك وليس امو

[.نجاة.]

الاخت شوفي اولا العجوزة ماشي لازم عليك طيعيها ولى تخدميها شرعا ماشي بسيف اللي بسيف هو زوجك او خدمت العجوزة من باب الاحسان منك او في وج راجلك المزطول انتي حاولي تسقمي الحوال اخدمي خدمتك برك او كي جي عجوزتك تشوكر عليك على سلفتك قلها كل واحد يخدم روحو ولى جيبيلها خدامة او راجلك حبسيلو المصروف حاولي تصلحيه ماشي تكملي عليه او حوسي على كراء دار او خرجي من ثم راكي كي العبيد ان شاء الله ربي ايفرج عليك ديري مليح في بالك العجوزة شرررعااااااا ماشي لازم عليك تخدميها ماشي حتى سلفتك متبقايش دايرتهم في بالك خمي على راجلك كيفاه قولي لباباك راه يشرب ايشوفولك حل معاه خمي على دارك نتي ماشي عجوزتك ربي ايفرج ان شاء الله

[Golden Princess]

اختي انت تحدثت عن مشكل و انا من خلال كلامك وجدت مشكل احر اهم و اخطر . مررت عليه مرور الكرام رغم ضرورته علك عرفته !!!

تعاطي زوجك للمخدرات مشكل كبير و خطيرو انت لم تعيريه اي اهتمام فكيف دلك ؟ انصخك بمعالجة الموضوع قبل تفاقم الامر فهدا قد يخرب لك

دارك

كان الله في عونك

نسأل الله الهداية لزوجك و لامه

[مناع]

ندعولك الله تعالى بالفرج الأخت
لكن كوني قوية ولا يستهان بك وردي عى روحك لا تسكتي عن الظلم لما تقول لك اعملي هذا الامر لسلفتك ساهلة قوليلها تنوض ديروا لروحها وخلاص انت تاني متكونيش هكذا

[مناع]

المشكل ليس عجوزتك
يعني عجوزتك في اسطر وزوجك مدمن مخدرات بدون عمل في كلمة ؟؟؟د
المشكلة الاساسية هي زوجك وليس امو

عندك الحق المشكا الزوج نتاعك

[امرأة من ذاك الزمان]

واش نقولك الموضوع نتاع العجوزة والكنة راني تكرهو وعندك الصح كي تقولي تخاف من مرت سلفك
كاااااااينة يخافو من القبيح وراجلها معاها
أقبح تربح هادا هو
والأخوة الأعضاء مع احترامي ليهم شكون لي راجلها مارا هش يكمي قارو زطلة
الا من رحم ربي يعني صح صعيب الحال
لازم تتغير الطريقة متاعك معاهم بصح بذكااااااااء