حيثيات التسجيل في كلية الطب - قسنطية (نصائح + المفات المطلوبة + انطباعات) كلّ هذا مع نعمة القدوس ...تفضّلوا

[نعمة القدوس]

السسلام عليكم ورحمة الله وبركاته

كيف حال الأعضاء اليوم ؟
أنا تعبة جدا رايحة نموووت من التعب


(( واش عندي مدة ماكتبتش موضوع من هاد النوووع
يااخي حالة .. راني تووحششششت يااووو ))


المهم السبب وراء كتابة هذا الموضوع هو الفترة تاع التسجيلات التي بدأت اليوم
2 من الشهر الجاري (أوت) إلى غاية يوم الخميس 7 أوت

وبما أن هذا الموضوع رايح يكون ضمن اهتمام الكثير من الطلبة
من ولايات الشرق
(سكيكدة، أم البواقي، جيجل ...)
قررت أنني أكابد التعب اللي راني فيه وأصف الأجواء التي خيمت على أول يوم من أيام التسجيل
وذلك في

كلية الطب بقسنطينة

أول شيء وقبل أن أصف لكم الأجواء كان لابد أن نعلم مكان الجامعة
(أنا ذهبت برفقة أمي ولولاها لتهت ولوجدت نفسي كيما يقولو في "قرحة بوتلّاف" ههههه)

هذه صورة بالقمر الصناعي للموقع الخاص بالجامعة

http://im81.gulfup.com/jPQait.png

يمكنكم الاستعانة بـ Google Maps للحصول على الطريق الأقصر للوصول من مقر سكناكم إلى الجامعة بالسيارة
واللي ماعندوش السيارة كي حالتي
يشوف انسان يعرف البلاصة وخلاص
هو يديه يركّبو في طاكسي !

كيما حالتنا أنا وماما حكمنا طاكسي من "فيلالي" إلى حي "الشالي" (الصنوبر)

المهم كي توصلوا
تلقاو "غار" متكون من ثقبين ( يا عيني على التعبييير )
روحوا من الأيسر لأنو الأيمن فيه الما فالأرض (حاشاكم)

مبعد تمشيو في طريق نحو اليمين تلقاو واحد البناية
المهم شفيت على عبارة Bon Pasteur فيها ههههه
تتوجهوا نحو اليسار
( كاينة بوابة كبيرة )
اعبروا البوابة وامشيوا في الطريق
تلقاو باب فيه "أدراج" جاي على يسار الطريق
اطلعوا فيه وادخلوا

تفضلوا، هادي صورة حاولت باه نتفكر المكان ههههه
وحددت الطريق كما تذكّرتها

http://im81.gulfup.com/lNRMDk.gif

تقابلكم بعيدا شويا سبورة فيها المكان اللي يوجهوكم ليه باه تسجلوا
كاين تاع الطب - الصيدلة - طب الأسنان

أنا رايحة نحكيلكم على الطب
واللي راح وسجل في الباقيين له الحرية يتكلّم عما رأى وسمع ههههههه


تروحوا على يسار الأدراج اللي طلعتوا فيهم باعتبار أنكم دخلتوا لأول مرة
(نتمنى فهمتو هاد العبارة)

تلقاو قائمة فيها الأسماء تاع الطلبة اللي قبلوهم طب
رقم البكالوريا تاعهم، وواحد الرقم هكا
(لازم تحفظوووه)
نحبّ نقوللكم باللي القائمة مرتبة حسب الأحرف الأبجدية اللاتينية للألقاب
باه يسهل عليكم البحث عن اسمكم
لأني بحثت على اسمي وقريب مالقييتوش
(( بالعربية، مافهمتش أسكو الترتيب حسب رقم البكالوريا أو الاسم أو اللقب ههههه ))

الرقم اللي هدرتلكم عليه واللي لازم تحفظوه مكتوب بالشكل التالي
M14/000
في بلاصة الأصفار تلقاو الرقم تاعكم
أحفظوووه .. أكرر .. أحفظوووه !

مبعد تهبطوا في أدراج أخرى جاية على مقربة من القائمة المعلقة
عند نهاية الأدراج كاين باب خشبي
ممكن إذا رحتوا باكرا تلقاوه مغلق والغاشي مكووفر ههههه
كي يتحل
تلقاو باللي دخلتو إلى قاعة محاضرات ولا ماعلاباليش كيفاه يسميوها ههههههه
المهم فيها كراسااا بزاففففف

هاهي صورة موضّحة
http://im81.gulfup.com/8YrgKa.gif

في المدخل تاعها يعطيوكم نسختين لذلك ننصحكم تديوا معاكم قلم للكتابة
وماتخافوش أنكم تغلطوا في ملئها فهم سيزودونكم بأخرى جديدة إن كان ضروريا

وهذه صورة للاستمارة
http://im60.gulfup.com/JTs6xf.jpg
وهنا في هذا الرد شرح لكيفية ملئها
http://djelfa.info/vb/showpost.php?p=3991397941&postcount=20

ورايحة نمدّلكم بعض النصائح باه تتجنّبوا البهادل اللي طحت فيهم أنا ههههههه

- الاستمارة تملأ باللغتين : العربية والفرنسية
- تملؤا كلا النسختين اللتان تعطيان لكم الثانية ليست للاستعمال في حالة الخطأ



كي تخلصوا يوزعوا عليكم استمارة أخرى خاصة بالضمان الاجتماعي
هاد الاستمارة تملأ من الأمام فقط
ويوجد جزء في الصفحة رقم 3 من الاستمارة لأنها مضاعفة
تملؤوه وتمضيوا


هذه صورة كذلك للاستمارة
http://im81.gulfup.com/kWejgg.gif

توزع عليكم ورقة تصريح شرفي بأنكم لم تسجلوا من قبل في الكلية
تملؤوه كذلك .. سواء بالفرنسية أو العربية
وتمضييوا

هاهو التصريح
http://im81.gulfup.com/goUATU.gif

أخيرا
يطلب منكمم أن ترفقوا هذه الوثائق بمجموعة من الوثائق اللي تكونوا جبتوها معاكم
وننصحكم جيبوها قبل ماتروحوا لأنو المكان تقريبا مافيه والووو
حنا شطنا باه جبنا الطوابع للأظرفة
(كاين فوتوغراف للي ماعندوش الصور ولكن بما أني درت هاد الموضوع
لازم واحد ماينسى حاجة من اللي قراو الموضوع)

الوثائق المطلوبة في ملف التسجيل

- (3) شهادات ميلاد (لا أدري إن كانت الاصلية مطلوبة)
- (5) صور شمسية مكتوب عليها الاسم واللقب والرقم هذاك اللي قلتلكم أحفظوه
(من الخلف طبعا) وجيبوا معاكم صورة سادسة ستطلب منكم فيما بعد وترد إليكم في نفس الوقت
- (2) نسخ عن ورقة التوجيه التي تطبع من الموقع (لا يشترط أن تكون مصادق عليها)
(الذي لم يستطع طبعها، فيمكنه طبها مي قاعة الانترنت الموجودة في الكلية، شفتهم بعيني يدخلولا للموقع ويطبعوهم)
- كشف النقاط الأصلي (واللي هو بعد شهادة البكالوريا، ولا داعي أنكم تديروا الشهادة تلك التي لونها أصفر ووردي، لأنها غير ضرورية البتة رأيتهم بعيني يردوهالهم كيما يدفعوا الملف) ونسخة عنه مصادق عليها
- (3) أظرفة عليها الطوابع وعنوان الطالب
يقدروا يطلبوا منكم 2 فقط ولكن في مرحلة قادمة من مراحل التسجيل توجد من تطلب منك 3 أظرفة
لذلك تحسبا اديوا 3


وفقط

إييييه نسيييت

يعطيوكم ظرفين كبيرين بلون بنّي
تملؤوهم تاني

هادي صورة لهما

http://im81.gulfup.com/yzQCoM.gif

مبعد

تجي مرحلة أخرى من التسجيل في نفس القاعة
وهي مرحلة التأكد من الملفات (وهنا يتم توجيهكم في حالة نقص في الملف تاعكم أو زيادة في الملفا فترد لكم الوثيقة الزائدة)
تتم هذه المرحلة بشيء من النظام بحيث "تكوفروا" على مجموعة العمال اللي يقوموا بمراقبة ملفاتكم
واللي قاعدين في طاولة مثل "لجنة التحكيم"
(نتمنى تكونا قريتوها مثلما تقولها هاديك تاع الحان وشباب هههه)
بعبارة أخرى : تديروا لاشان بالكراسا هههههههههههه، ونخليهالكم مفاجأة
كي تروحوا تسجلوا تفهمووا


المهم كي تخلصوا
يتم توجيهم إلى قاعة أخرى يسميوها "قاعة الانترنت"
يقولولكم هوما أون فوغنسي "La salle Internet" هههههه

هيا أنا تعبت دركا
نخليكم تكتبوا شوي ردود وشوي تساؤلات حتى نزيد نكتب في رد جديد المرحلة الثانية من التسجيل



سلام عليكم


يتبع ...

[نعمة القدوس]

مرحبا مرة أخرى

راني جيت نكمّل رحلة العذاب اللي عشتها اليوم

بالصح والله مغامرة ملييحة

واين وصلنا ؟

هيه هيه تفكرت .. وصلنا كيما يتأكدولكم من الملف تاعكم
قلنا توقفوا عند لجنة التحكيم
وتعطيوهم الملف تاعكم يتأكدو منو ويحطوهولكم في أحد الأظرفة
ويوجهوكم لقاعة الانترنت

وايني قاعة الانترنت هادي ؟
يعني لا ماعرفتوش أسألوا برك
الغاشي كامل ينعتلكم
والله
ماخاب من استشار

المهم تروحوا منين قاعدين يسجلوا تاع الصيدلة وطب الاسنان
على ما آظن (والله نسيت)

المهم تلقاو أدراج ضيقين شوي
تطلعوا فيهم ومبعد تمشيوا بجهة اليمين ثم تلقاو طلعة نحو اليسار
تقابلكم فيها هادي قاعة الانترنت

تدخلوا فيها وحدكم
مايدخلوش معاكم الأولياء لأنها صغيرة والغاشي فيها
المهم تكملوا فيها لاشان تاع الكراسا
حتى تجي دالتكم باه تروحوا تسلكوا فيها حقوق التسجيل اللي هي بالمناسبة
200 دينار بالتمامم
واللي تتم في قاعة "الحجز" هكدا اسمها

كي تدخلوا كذلك تلقاوا لاشان تاع الكراسا ههههههههههه
تكمّلوها قاعدين حتى تجي دالتكم وتسلكوا حقوق التسجيل تاعكم

كي توصل دالتكم تروحوا تقعدوا عند الراجل في المكتب
تعطيوه أحد الأظرفة باه يهز منها المعلومات تاعكم ولا يقدر يسألكم فقط

المهم كي تسلكوا وتخلصوا يعطيكم الوصل تاع السلاك

هاهو الوصل اللي عطاوهولي
صورتوا كي كنت قاعدة نستنى

http://im81.gulfup.com/nxYHNm.gif

مبعد تخرجوا من قاعة الحجز هاديك وتروحوا لقاعة أخرى جاية منين كنتوا قاعدين مدايرين لاشان
ماعرفتش كيفاه نوصف المكان تاعها ولكن راكم تشوفوا إخوانكم يدخلوا ليها قبلكم
سما ماتخافوشش

حلّوا عينيكم مليييح وودنييكم
وماش رايحين تضييعوا
واسألوا ماتهابووشش !

كي تزيدوا تدخلوا لهاديك القاعة نفس الشي
لاشااان هههههههههه

المهم نوصفلكم القاعة هاديك شوي

جاية شويا كبيرة
كي تدخلوا تشوفوا قدامكم الكراسي المصفوفة اللي تقعدوا فيها
وفي الحواف تاع القاعة كاينين الميكروات
(الميكروات شاعلين للي يحب يستخرج بيان التوجيه
شفت بزاف من اللي خرجولهم البيان)

وكاين في آخر القاعة (على يساركم عندما تدخلون إليها)
مكاتب فيها الناس الذين ياخدوا عنكم الملفات
وكاين زوج يخدمولكم البطاقة (البادج)

على فكرة البادج هذا قاعد زي لاكارت شيفا ههههه
كي عطاوهالي حسييت بروحي كبرت هههههههههههههههههه

وأنتم تنتظرون دوركم
يجي واحد يقوللكم أعطيوني صورة تاعكم
أعطيوه صورة إضافية
يعني الصورة رقم 6 وماتعطيوهش واحدة من الملف
لأنو يخدملكم بيها البادج ويرجعهالكم
المهم اكتبوا فيها - وكل الصور الخمسة- اسمكم ولقبكم والرقم الغريب هاداك

واعطيوهالوا

كي توصل دالتكم عند المكاتب هادوك
روحوا واعطيوهم الملف

المهم الملاحظة اللي نقوللكم عليها هي حول "الأظرفة"
نظن قلتها من قبل
بالصح في الإعادة إفادة

لأنو يقولولك في البداية 2 أظرفة
ومبعد كي تروحوا لهاد المكتب يقولولك هات ظرف ثالث
أنا ماكانش عندي قالتلي ماعليش
بالصح اللي كان عندو حكمتو عليه
معناتها إذا قادرين تجيبو واحد ثالث جيبوه
واللي ماش قادر مايتعبش نفسو

الموظف اللي تعطيه الملف تاعك يقوم بترتيبه في الظرفين الكبيرين
الشي اللي شفيت عليه وقدرت نلاحظو هو أنهم


في الظرف 1

يحطوا :
- كشف النقاط الأصلي
- شهادة التوجيه
- 3 صور بالاك
- والأظرفة

في الظرف 2
يحطوا :
- نسخة مصادق عليها لكشف النقاط
- شهادة التوجيه
- الظرف الثالث
- 2 صور


ومبعد يقولولك أبقى تنتظر حتى تدي البادج تاعك
نبقاوا ننتظروا

ننتظروا ننتظروا حتى يعيطوا على اسامينا ونروحوا نجيبو البادج
في البداية بقينا واقفين
ومبعد بالاك غضناهم جابلونا الكراسا

مسكين واحد جاب الكرسي
سع أنا رحت قعدتلو فيه (حطيتو مع العمال وكي طلع راسو ضهر تلميذ هههههه)
المهم ماحبييتش ننوض (ماحبيتش نكمل في الاحساس بالتبهديلة)
خليتو هو اللي راح
وقف شوي ومبعد لقى بلاصة

نطلب السماح على الملأ هههههههه من هاد الانسان !

المهم
مبعد une fois تدي البادج تاعك يقولولك توجه للإدارة
l'administration
تزيدوا تطلعوا .. حنا دانا واحد الموظف
المهم اسألوا برك ينعتولكم واين

هذه صورة لمكان الإدارة
(لكان غلطت ولا حاجة صححولي)
http://im81.gulfup.com/YFcpLy.gif

تدخلولها تلقاو واحد الدخلة على اليمين
وكاين 3 مكاتب

واحد جاي على اليمين في غرفة منفصلة
جاي في غرفة اسمها "مكتب الانخراط المركزي" ولا حاجة قريبة لهاد الاسم

ومكتبين جايين فالغرفة الكبيرة

واحد جاي على اليمين ويتكون من 3 مكاتب
واحد للصيدلة وواحد لطب الاسنان وواحد للطب
والمكتب الثالث للضمان الاجتماعي

بالصح أنتوما تدخلوا أولا للمكتب اللي في الغرفة
تلقاو زوج مكاتب تاني

واحد مع الدخلة يتكون كذلك من 3 للتخصصات الثلاث
والآخر فيه زوج رجال يخدموا خدمة واحدة


المهم في المكتب الأول تقعدوا
وتمدولهم الملفين
يخدموا خدمتهم بيهم
والله ماشفيت واش داروا بيهم
لأنو المراة اللي هدرت معايا قالتلي أنت جيتي من قبل
قلتلها لالا
قالتلي سبحان الله .. حتى كنتي لابسة نفس اللبسة هههههههه
خوفتنييي !!!

من التخمام ماركزتش واش كانت تخدم
المهم كان راجل معاها مانعرف واش خرّج من الملفات ولا بالاك تأكد منهم ولا مانعرف عليه

المهم نشفى غير عطاتني ملف واحد وحكمت الآخر
قالتها تحكموه ؟
قالتلي هيه .. قوليلوا باي باي هههههههههههه

وعطاتني 2 صور اللي كانو في أحد الملفات باه نمدهم للرجال اللي في المكتب الثاني
ومبعد قالتلي باه نمضي في واحد السجل

مضيت ومضيتُ نحو المكتب الآخر
أين عطيتهم الصورتين ورقمي باه جبدوا واحد الكارطونة بيضا
ومبعد قصوا الصور تاعي باه تجي قد المكان المناسب لها ولصقوهم في الكارطونة
وهذاك الراجل يقوللي درك نحط الطابع فوق وجهك فالتصويرة هههههه
وأنا نقوللو نوورمال حط على روحك

ومبعد قاللي واش بيك خايفة
قلتلو مانيش خايفة


والله ماعلابالي أسكو كدبت ولا صح ماكنتش خايفة هههههههه

المهم الموظفين كامل يهدروا معاكم باه ماتخافوش
ويضحكوا معاكم .. نورمال خلاص !

مبعد يعطيكم الكارطونة وتخرجوا من الغرفة هاديك
وتروحوا للمكتب الثاني

هاهي الكارطونة
http://im81.gulfup.com/u9ONDM.gif

تمدوا الملف تاعكم للموظف (كانت مرأة)
وهي تتولى كتابة المعلومات على واحد الكارطونة صفراء بالنسبة لطلبة الطب
وبالاك وردية ولا برتقالية نسيت لطلبة طب الأسنان وخضراء بالاك لطلبة الصيدلة
وتلصق صورة مع الأوراق تاع الملف وصورة تحطها في المكان المخصص في الكارطونة

خلاصة : الكارطونة الصفراء هي الملف تاعكم
مطوية على النصف وفيها يحطوا الأوراق تاعكم

ومبعد خلاص
تنوضوا من عندها وتتوجهوا لآخر مكتب اللي هو تاع الضمان
تعطيوه الكارطونة البيضاء وورقة الضمان اللي هوما آخر الأوراق اللي يبقاو عندكم
ومبعد يقوللكم اكتبوا اسمكم وتاريخ الميلاد تاعكم والاختيار تاعكم في وحد القائمة
ومبعد نسيت واش دار
لأني كنت نشغل بالغاشي ههههههههههه (نقرعج)

آآه هييه

سكانا الكارطونات البيضاء تاعنا ورجعهملنا
ومبعد خلاص

قاللنا روحوا للونفي 2

هبطنا للونفي 2 هذا ولتم اكتشفنا أنو يتم دفع ملف المنحة
ولأنو ماكانش عندي الملف كاملا
اضطررت باه نروح نروّح

لذلك هنا تنتهي الرحلة تاعي معاكم

أهم ما نقوللكم هو أنو الراجل اللي يحكم الملف تاع المنحة قاعد يمد في أوراق فيهم النوامر
باه تحكموا الرونديفوات تاعكم
لأنو في هذاك الوقت كانت 12 ونص
وقاللنا باللي رايحين يعاودوا يحلّوا على الواحدة والنصف
بالاك علابيها يمد فالنوامر

وسألتوا لكان نلقدر نجيب ملف المنحة في أي وقت من الاسبوع هذا
قاللي نعم
قاللي أرواحي في أي وقت ادفعي الملف تاعك

وفقط

انتهينا من الكلام

نمتنى نكون أفدتكم ولو بالقليل

تحبوا تسألوا .. اتفضلوا
رايحة نجاوبكم بما أستطيع

وربي يوفقكم
وان شاء الله نلتقي قريبا هناك في الكلية =)

سلاممم

[رنيم الجزائر]

جزيت كل خير على مجهوداتك اختي نعمة

افدتينا كثرا بارك الله فيك

☺☺☺☺

[سارق الأحزان]

محجوووز ههه

مشكككورة على الموضووع

( مي ملييحة لي دااو معااهم الشهادة باش يسجلو بيها يعجبوووني )

[قابضة على الجمر]

بارك الله فيك نعمة لكن احكيلهم شويا على المعاناة باش ما يتشوكاوش مساكن .........انا كرهت الطب و قسنطينة و سيرتهم من التعب اللي شفتو اليوم

[biba_g]

رغم ان الموضوع غير موجه لي بتاتا الا انني قراته من الاول الى الاخر وكلي اهتمامْ هه..
.
..
موفقونْ

[DTInfo]

ماهي فائدة الموضوع؟ o_O

[biba_g]

ماهي فائدة الموضوع؟
بونسواغْ

1/ اللي مايعرفش وينْ يسجل كلش واضحْ
2/ اللي يسكن بعيد مش راح يتعب كي يوصلْ.
3/ اللي ناقصاتو وثيقة يديرها.
4/اللي خلعان تروحلو الخلعة.
5/ صاحبة الموضوع ناس ملاح بوجودها فقط تحس روحك لباسْ

..............الخْ

[سارق الأحزان]

ماهي فائدة الموضوع؟ o_o

باينة درت تخصص فلسفة

[قابضة على الجمر]

الموضوع يستفيد منه الاخوة ال=ين سيسجلون في الايام القادمة ماشاء الله الاخت اعطتهم تفاصيل تقلل عليهم التعب كثيييييرا

[إِلْيَآسُ اَلْمَكَآرِمْ]

هل وثيقة الاستمارة تملا بالعربية والفرنسية معا او بلغة واحدة فقط وان كانت باللغتين كيفاه الي يدير الي مايعرفش فرونسي ؟؟؟؟

[.زَيْنْ الْدِيِنْ.]

سلامــ ..
بصحتك ،، تهنيتي ،،،
ليوم كنت ف قسنطينة و جيت للشالي استرجعت ذكريات العام الماضي و اول يوم من رمضان :(
لمهم ،،
هاذيك قاعة المحاضرات اللي ضيفوكم فيها اسمها l'auditorium و راح يفتحوها غير للضياف هه أما المدرجات اللي راح تقراو فيهم ،، فماهمش بعاد بززاف علا هاذاك الدروج اللي فالدخلة خخخ ...
بالنسبة للغار الايمن ماننصحكش بيه ،، الايسر خير منو ،، فالشتاء و تعرفي علاه راني نقولك ههه ...
هاذيك la salle d'internet معرووفة باسم l'annexe .... ;)
ماحكيتيش عال cafette ... اللي جاية فالvirage اللي مع الدخلة ... و تحتها بعد جاي المطعم ;) ....
،، ليزا و الأبناء السبعة هههه ، ماشفتهمش اليوم مي ،، راح تشوفوهم باذن الله ،،
علا كل حآآآل شفتوو الشالي كيفاش داير ،، مي والله راح تفوتو فيه أيام رووعة
^___^

[قابضة على الجمر]

هل وثيقة الاستمارة تملا بالعربية والفرنسية معا او بلغة واحدة فقط وان كانت باللغتين كيفاه الي يدير الي مايعرفش فرونسي ؟؟؟؟

واحدة بالعربية و الاخرى بالفرنسية

[softy]

- (2) نسخ عن ورقة التوجيه التي تطبع من الموقع (لا يشترط أن تكون مصادق عليها)

اختي علاه زوج ماش وحدى برك للي نخرجوها ؟؟

[فوزان 96]

شكرا اخت نعمة القدوس على المعلومات الرائعة
انا شخصيا استفدت

[نعمة القدوس]

سامحوني إخوتي
غلطت حطيت راسي فوق المخدة
سع درك واين نضت

والله غلطت برك !


جزيت كل خير على مجهوداتك اختي نعمة

افدتينا كثرا بارك الله فيك

☺☺☺☺


مرحبا أختي رنيم

يسعدني مرورك على الموضوع
وتسعدني أكثر استفادتك

فالحمد لله تحقق جزء كبيير من الهدف وراء كتابة هذا الموضوع البسيط
ربي يوفقك

(مالا أنت تاني جاية لتم ؟ باه كاش نهار نتلاقااو)




محجوووز ههه

مشكككورة على الموضووع

( مي ملييحة لي دااو معااهم الشهادة باش يسجلو بيها يعجبوووني )



مرحبا بك أخي

ونشكرك على مرورك الطيب

( إيييه والله غلعونا لدرجة عدنا نجيبوا كلش معانا
بيني وبينك حتى أنا جبتها تحسبا
بالصح مادرت عليها فوتوكوبي لا والو جبتها برك هههههه )

=)




بارك الله فيك نعمة لكن احكيلهم شويا على المعاناة باش ما يتشوكاوش مساكن .........انا كرهت الطب و قسنطينة و سيرتهم من التعب اللي شفتو اليوم


وفيك بارك الله أختي مروة

والله من كتر التعب نسيت باه نحكي ههههه
وكي جينا نروحوا مالقيناش لي طاكسي
وبقات أختك واقفة
(كنت لابسة الطالون الله الله)
قريييب نضت نبكي !

ربي يستر مبعد كيفاه رايحة تصرالنا
بالصح ممكن بزاااف نطييبوا ونوالفوا وتعود حاجة نرومال

+
ماعليش أختي
اكرهي كلش أكرهي الغاشي أكرهي البلاصة أكرهي أي حاجة غير الطب
:1:






رغم ان الموضوع غير موجه لي بتاتا الا انني قراته من الاول الى الاخر وكلي اهتمامْ هه..
.
..
موفقونْ



يووووووو عبييير
مشكووورة جدا !

ربي يبارك فيك




ماهي فائدة الموضوع؟ o_o


نظن العضوة عبير أجابت وأحسنت الإجابة

شكرا على مرورك ^^

[gamepower]

هل التسجيل بالنسبة للمنحة و الإقامة أيضا في الشالي أم لفاك و أيهما نبدأ به أولا

[الجميلة انا]

بعبارة أخرى : تديروا لاشان بالكراسا هههههههههههه، ونخليهالكم مفاجأة
كي تروحوا تسجلوا تفهمووا


انا سجلت في جامعة عنابة و حنا زادا عملنا لاشان بالكراسا و الله وليت نضحك على روحي كيفاه درنا هاديك راي مفاجاة تع الصح ههه

[نَازِكْ]

السلام عليكم
استمتعت بالقراءة مالقري ميخصنيش هههه
المهم بصحتك نعمة وان شاء الله مزيدا من النجاحات في حياتك ومزيدا من مواضيعك أحب عفويتك في الكتابة حقا
و أيضا انا باذن الله غدا ذاهبة نسجلو في جامعة الجزائر 1 ونقراو في بن عكنون والله افدتني كثيرا جوزيت خيرا
يادرى واش راه يستنى فيا انا لازم اول حاجة تكون لجامعة شابة ههههه باش نريح

[نعمة القدوس]

هل وثيقة الاستمارة تملا بالعربية والفرنسية معا او بلغة واحدة فقط وان كانت باللغتين كيفاه الي يدير الي مايعرفش فرونسي ؟؟؟؟



نعم هي مقسومة على النصف
نصف بالعربية ونصف بالفرنسية
وماتخافش
معلومات معروفة عند الجميع

الاسم واللقب والجنس والعنوان واسم الأب وواش يعمل واسم الأم ولقبها والعمل تاعها
معدل البكالوريا والشعبة وتاريخ تاع البكالوريا وغيرها من المعلومات

ماتخافش خلاص
اللي ماتعرفش كيفاه تجاوب عليها
شوف اللي قدامك واش داروا
والله أنا شبعت أخطاء هههههه
بالصح نووورمال جدا

ولا نقوللك ؟

أي مازالت عندي استمارة زايدة
درك نكتبلك المعلومات المطلوبة بالفرنسية والعربية
ونشرحلك تاع الفرنسية كيفاه جاوبنا هكدا باه ترتااح كليا =)

المعلومات المذكورة في الاستمارة

اللقب - Nom en Lettre Capitale
الاسم - prénom en lettre capitale
تكتب اللقب تاعك بالحروف الكبيرة ماجيسكول

الجنس - sexe
تكتب أنثى أو ذكر
Féminin أو Masculin

تاريخ الميلاد - Date de naissance
مكان الميلاد - lieu de naissance
الجنسية - nationalité
فالجنسية نورمالمون تكتب Algerienne

العنوان - Adresse
الولاية - wilaya

اسم الأب - prenom du pere
مهنة الأب - profession du pere
لقب الأم - nom de la mere
اسم الأم - prenom de la mere
مهنة الأم - profession de la mere

هادو تحب تحضّرهم من قبل مع والديك لأنو أنا كون ماشي ماما هههههههههه
كون راني وليت نسأل فالغاشي
والاسامي كامل كي تكتبهم بالفرنسية عمرهم أون ماجيسكول

مبعد تلقى مستطيل فيه المعلومات التالية
رقم البكالوريا - N° du BAC
الشعبة - Moyenne du BAC
الشعبة بالفرنسية علوم تجريبية كتبت أنا sciences experimentals
التقدير - mention
تكتب bien ولا T.bien ولا Exelent (راني نفايل للغاشي ههههه وليا ههههه)
تاريخ الحصول على البكالوريا - Date d'obtention
تكتب Juin 2014
(أنا بهدلت بعمري كتبت في واحدة منهم 2Juillet 2014 ههههههه)
في (الولاية) - Lieu d'obtention (Wilaya)
تكتب الولاية تاعك

مبعد كاين مايلي

تاريخ أول تسجيل جامعي - Année de le premiere inscription universitaire
نورمالمون تكتب التاريخ تاع العام 2014
(أنا بالصح كتبت تاريخ العام الدراسي يعني كتبت 2014-2015)
قسنطينة في - Constantine Le
تكتب التاريخ تاع اليوم اللي رحت فيه
الامضاء - signature
تمضي أنت

في آخر الورقة كاين مستطيل آخر خاص بالإدارة ماتكتب فيه والو

وفقط

انتهى

ان شاء الله تكون الخلعة والخوف راحولك
بالتوفيق لك



واحدة بالعربية و الاخرى بالفرنسية



ننبهك برك أختي مروة
كلا الاستمارتين تكتبي فيهم بالعربية والفرنسية
يعني كل واحدة تعمريها باللغتين



- (2) نسخ عن ورقة التوجيه التي تطبع من الموقع (لا يشترط أن تكون مصادق عليها)

اختي علاه زوج ماش وحدى برك للي نخرجوها ؟؟


مناه كاين ملفين
كي تروح يعطيوك ظرفين كبيرين
لتما يتم الاحتفاظ بالملفين تاعك

ملف يتحط فيه كشف النقاط الأصلي معاه شهادة ميلاد وواحدة من ورقات التوجيه
والثاني تتحط فيه النسخة المصادف عليها من الكشف وورقة تاع التوجيه وكذلك شهادة ميلاد

هذا هو السبب

إذا لم تستخرج واحدة أخرى
ماعليه دير عليها فوطوكوبي وروح

بالتوفيق




شكرا اخت نعمة القدوس على المعلومات الرائعة
انا شخصيا استفدت


بارك الله فيك أخي محمد

ربي يوفقك

شكرا لك

[نعمة القدوس]

هل التسجيل بالنسبة للمنحة و الإقامة أيضا في الشالي أم لفاك و أيهما نبدأ به أولا



أظن كلشي لتم
والله أعلم

على الأقل تاع المنحة متأكدة باللي لتم
ربما تاع الإقامة مايكونش لتم وإنما في مقر الإقامة
ربما مانيش متأكدة

المهم الملف تاع المنحة كان آخر حاجة
كيما خلصنا التسجيل
بعتونا للونفي 2 فيه تدفعي الملف تاع المنحة
أنا الملف تاعي كان ناقص لذلك مابقيتش كملت
حتى نحضّر الملف تاعي كامل ونزيد نروح بإذن الله

بالتوفيق لك

[نعمة القدوس]

رايحة نزيد نكمّل نكتب البقية

[gamepower]

ممكن تضعي لنا ملف المنحة وجازاك الله خير

[أزهــار الربيــع]

جماعة حبيت نسقسيكم رقم شهادة الميلاد نلقاه فيها تحت الحالة المدنية؟؟

[نعمة القدوس]

ممكن تضعي لنا ملف المنحة وجازاك الله خير




في الحقيقة هو نفسه الملف الموجود في النت

من هاد الموضوع تقدري تلقايه

http://djelfa.info/vb/showthread.php?t=1627950

بالتوفيق لك

[salamii]

شكرا أختي على الرحلة و الله حسيت راني نفواياجي للجامعة ههههههههههههههه
مشكووورة

[نعمة القدوس]

سلامــ ..
بصحتك ،، تهنيتي ،،،
ليوم كنت ف قسنطينة و جيت للشالي استرجعت ذكريات العام الماضي و اول يوم من رمضان :(
لمهم ،،
هاذيك قاعة المحاضرات اللي ضيفوكم فيها اسمها l'auditorium و راح يفتحوها غير للضياف هه أما المدرجات اللي راح تقراو فيهم ،، فماهمش بعاد بززاف علا هاذاك الدروج اللي فالدخلة خخخ ...
بالنسبة للغار الايمن ماننصحكش بيه ،، الايسر خير منو ،، فالشتاء و تعرفي علاه راني نقولك ههه ...
هاذيك la salle d'internet معرووفة باسم l'annexe .... ;)
ماحكيتيش عال cafette ... اللي جاية فالvirage اللي مع الدخلة ... و تحتها بعد جاي المطعم ;) ....
،، ليزا و الأبناء السبعة هههه ، ماشفتهمش اليوم مي ،، راح تشوفوهم باذن الله ،،
علا كل حآآآل شفتوو الشالي كيفاش داير ،، مي والله راح تفوتو فيه أيام رووعة
^___^





مرحبا أخي زين الدين

سعيدة بمرورك على موضوعي

مانعرف علاه نحسك vip هههههههه
<<< ممكن لأنك فايتني بعام فالميدسين ههههههه

+

آآه للضيااففف برك ؟ معناتها من هذاك النهار مانزيدوش نشوفوها كيفاه زيها ؟
هههههههههههه
مااعليييشش ماعلييششش

+

آآه تمنييت كون ضربت دورة مع كاش واحدة تعرف الكلية
كون عرفت البلاصة مليح
خسارة خسارة !

++

معناتها الغار الأيمن ندير عليه كروا حمرا ؟ ههههههههههه

(( لا استطيع الانتظار باه يجي الشتا ونشوف يعينياا هههه ))

+++
وهاديك لانكس .. لتما نقراوا اعلام آلي ؟
شفت لداخل في قاعة الحجز حاطين سيديات تاع الميدسين
حبيت نسرق وااحد ههههههههه

++

ليزا والأقزام السبعة ؟ شكون هادي ؟ تبان انسانة ولا راني غالطة ؟

والله نتمنى كون تديرلنا موضوع مطول لتأهيل طلاب الطب تاع الشالي ههههههه
على الاقل كي ندخلوا شويا نكونوا داخصيين ههههه

+

نشكرك زين الدين على الرد
خاصة آخر جملة

ترد الرووح
لأني والله طابوا رجليا من المشيي
المزية برك ماطحتش ولا ههههه من كتر الطلعات والهبطات خفت نطييح ونجي متكركبة في الطريق ههههههههه

ربي يبارك فيك أخاانا
ومشكور على التوضيحات !

[نعمة القدوس]

جماعة حبيت نسقسيكم رقم شهادة الميلاد نلقاه فيها تحت الحالة المدنية؟؟




عذرا أختي

والله مافهمت سؤالك وماعرفتش نجاوبك عليه

[نعمة القدوس]

بعبارة أخرى : تديروا لاشان بالكراسا هههههههههههه، ونخليهالكم مفاجأة
كي تروحوا تسجلوا تفهمووا


انا سجلت في جامعة عنابة و حنا زادا عملنا لاشان بالكراسا و الله وليت نضحك على روحي كيفاه درنا هاديك راي مفاجاة تع الصح ههه




شفتي أختي ؟؟ ههههههههه
والله غير تضحكي تاع روحك !

على الأقل حاجة غريبة وممتعة هههههه غيرمن تقعدي في كرسي واحد تلصقي فيه للأبد ههههه

مشكووورة أختي على مرورك =)))

[نعمة القدوس]

السلام عليكم
استمتعت بالقراءة مالقري ميخصنيش هههه
المهم بصحتك نعمة وان شاء الله مزيدا من النجاحات في حياتك ومزيدا من مواضيعك أحب عفويتك في الكتابة حقا
و أيضا انا باذن الله غدا ذاهبة نسجلو في جامعة الجزائر 1 ونقراو في بن عكنون والله افدتني كثيرا جوزيت خيرا
يادرى واش راه يستنى فيا انا لازم اول حاجة تكون لجامعة شابة ههههه باش نريح


مرحبا سلمىىى

!!

مرووورك عطر والله

ماراكمش تشموا فالرييحة ؟
وأنا نقول منيين !!

+
بالتوفيق لك في التسجيلات
(وأنت تاني ديريلنا موضوع صغيرون أحكي فيه لاقدرتي)

وياخي جامعة بن عكنون هادي جديدة ولا لالا ؟
نورمالمون تكون مليحة

ولا شتا ماش مليحة
ماش خسارة في الطب ! يااخي ؟؟

[نعمة القدوس]

شكرا أختي على الرحلة و الله حسيت راني نفواياجي للجامعة ههههههههههههههه
مشكووورة

العفو .. مادرت والو

كي تكون استفدت أخي هذاك هو الأهم

ربي يبارك فيك

وشكرا لك على الرد

[أزهــار الربيــع]

عذرا أختي

والله مافهمت سؤالك وماعرفتش نجاوبك عليه




انا طب في عنابة ومين نديرو التسجيل في الموقع
كاينة خانة نكتبو فيها رقم شهادة الميلاد تاعنا .....لي نلقاوه في ورقة شهادة الميلاد
انا لقيت زوج ارقام ما فهمتش ويناه منهم :!!!
مانقدر شنشرح اكثر من هك :(

[نعمة القدوس]

انا طب في عنابة ومين نديرو التسجيل في الموقع
كاينة خانة نكتبو فيها رقم شهادة الميلاد تاعنا .....لي نلقاوه في ورقة شهادة الميلاد
انا لقيت زوج ارقام ما فهمتش ويناه منهم :!!!
مانقدر شنشرح اكثر من هك :(



درك واين كنت نشوف في شهادة الميلاد تاعي
وفهمت واش قلتي

أظن الرقم هو تاع الحالة المدنية
لأنو هو الرقم الوحيد الذي رأيته مناسبا

الرقم الثاني اللي تهدري عليه هو هذاك اللي جاي في الإطار
منين يذكروا باللي راهي صالحة لمدة سنة فقط ؟

لكان هيه .. راهو خاطيه المطلوب
على ما أظن

بالتوفيق

[أزهــار الربيــع]

درك واين كنت نشوف في شهادة الميلاد تاعي
وفهمت واش قلتي

أظن الرقم هو تاع الحالة المدنية
لأنو هو الرقم الوحيد الذي رأيته مناسبا

الرقم الثاني اللي تهدري عليه هو هذاك اللي جاي في الإطار
منين يذكروا باللي راهي صالحة لمدة سنة فقط ؟

لكان هيه .. راهو خاطيه المطلوب
على ما أظن

بالتوفيق



هذا هو قصدي
بارك الله فيك اختي نعمة القدوس
بالتوفيق

[نعمة القدوس]

عندي مشكل مع النت أخوتي

أردت أن أدرج الصور ولكن المشكل لم يحل

على العموم
غدا بإذن الله سأحاول إدراجها في أقرب وقت

[نعمة القدوس]

صباح الخييير !

لقد تمت إضافة الصور بنجاح

الحمد لله الآن صار الموضوع كاملا
ان شاء الله يكون ويبقى سندا لكل مقبل على التسجيل
سؤال هذه السنة أو الأعوام القادمة

وشكرا

[قابضة على الجمر]

[QUOTE=نعمة القدوس;3991397941]





ننبهك برك أختي مروة
كلا الاستمارتين تكتبي فيهم بالعربية والفرنسية
يعني كل واحدة تعمريها باللغتين



انا كتبت واحدة بالعربية و الاخرى بالفرنسية لاني سمعت السيدة هاديك الي تهدر في الميكرو بالفرونسي تقول هكا و تقول ماتعمروش كل واحدة باللغتين انت ممكن كنت قبلي ما قالولكمش المهم كي دفعتها قبلوها عادي و الله اعلم


[CENTER][COLOR=DimGray][FONT=traditional arabic][SIZE=4]

[نعمة القدوس]

انا كتبت واحدة بالعربية و الاخرى بالفرنسية لاني سمعت السيدة هاديك الي تهدر في الميكرو بالفرونسي تقول هكا و تقول ماتعمروش كل واحدة باللغتين انت ممكن كنت قبلي ما قالولكمش المهم كي دفعتها قبلوها عادي و الله اعلم



آه في هذه الحالة مالا كيما قلتي

المهم يقبل الملف وخلاص .. مايهمناش ههههه

ان شاء الله نلتقي في الكلية أختي

[ZINA DZ]

اهلا نعمة

انت في ولايتك و صرا فيك هكا
نحنا واش راح يصرا فينا ؟؟ هههـ

[نعمة القدوس]

اهلا نعمة
انت في ولايتك و صرا فيك هكا
نحنا واش راح يصرا فينا ؟؟ هههـ




ههههههههه شفتي أختي زينة !
والله أنا مانعرف نديير واالو هههه
ماما شبعت فيا تبهدايل
قالتلي أنت جايحة ههههه

الله غالب .. هذا هو القماش ههههه

++

والله ماتخافي
الجامعات فيها تنظيم رائع
مايصرالك والوو بإذن الله

راكي فحلة الله يبارك ماش كي حالتي ههههه

مشكوورة على مرورك

[hana 94]

السلام عيكم نحن في تيزي وزو طلبو منا التسجيل عن طريق الانترنت بخصوص المنحة و لكن لم استطع التسجيل
هل من مساعدة

[نعمة القدوس]

السلام عيكم نحن في تيزي وزو طلبو منا التسجيل عن طريق الانترنت بخصوص المنحة و لكن لم استطع التسجيل
هل من مساعدة



مرحبا أختي

كيفاه لم تستطيعي التسجيل ؟

عندك الموقع ؟
اعطيهولي نشوف
وقوليلي واش هو المشكل تاعك في التسجيل بالضبط

[سماح 2]

ههه موضوع فوور

انــــــا ضركــــــا وين سجلت وروحت لوول

+ ممنوع دخول الوالدين يدخل فقط الطــالب الي رايح يسجل في عنــــــابة

لا يوجد اكتظاظ كلش منظمْ ع الشعرة الحق يقـــــــــالْ

سلام

بالتوفيق لكـ نعمـــــــــــــــــــــةْْْْْْْْْْْْْْْْْْْْْْْْ =)

[نعمة القدوس]

ههه موضوع فوور

انــــــا ضركــــــا وين سجلت وروحت لوول

+ ممنوع دخول الوالدين يدخل فقط الطــالب الي رايح يسجل في عنــــــابة

لا يوجد اكتظاظ كلش منظمْ ع الشعرة الحق يقـــــــــالْ

سلام

بالتوفيق لكـ نعمـــــــــــــــــــــةْْْْْْْْْْْْْْْْْْْْْْْْ =)





مرحبا سماااح

أمممممم .. مليح ملييح التنظييم
هو الأهم في كلشش

بالصح كون غير خلاو الأولياء يدخلوا ههههه
بلا بييهم والو مايمشيي
بالصح ملييحة المسؤولية

صحة ليك التسجييل سمااحوووو
لقوبة لحاجة أخرى

مشكورة على المرور

[قابضة على الجمر]

آه في هذه الحالة مالا كيما قلتي

المهم يقبل الملف وخلاص .. مايهمناش ههههه

ان شاء الله نلتقي في الكلية أختي






هههههه على حساب الشوفة يقبلوا برك

+ ان شاء الله نتلاقاو ...صح انت ماتعرفينيش ما نشاركش بزاف في المنتدي لكن داااااائما متابعة و خاصة مواضيعك الرائعة خلاتني نتشوق باش نعرفك

التعرف عليك سيشرفني اختي نعمة
في امان الله

[نعمة القدوس]

هههههه على حساب الشوفة يقبلوا برك

+ ان شاء الله نتلاقاو ...صح انت ماتعرفينيش ما نشاركش بزاف في المنتدي لكن داااااائما متابعة و خاصة مواضيعك الرائعة خلاتني نتشوق باش نعرفك

التعرف عليك سيشرفني اختي نعمة
في امان الله





وأنا كذلك لي الشرف نتعرّف عليك أختاه
ان شاء الله لما تبدأ الدراسة نعملوا لقاء أنا وياك =)

[Anouàre Bechir]

السلام عليكم
انا سجلت اليوم عجبني التنظيم جاز يوم مليح و اجمد لله تعبنا مع الترونسبور ربي يكون فالعون
شكرا ليك
بالتوفيق

[نَازِكْ]

مرحبا سلمىىى

!!

مرووورك عطر والله

ماراكمش تشموا فالرييحة ؟
وأنا نقول منيين !!

+
بالتوفيق لك في التسجيلات
(وأنت تاني ديريلنا موضوع صغيرون أحكي فيه لاقدرتي)

وياخي جامعة بن عكنون هادي جديدة ولا لالا ؟
نورمالمون تكون مليحة

ولا شتا ماش مليحة
ماش خسارة في الطب ! يااخي ؟؟





الله يعزك نعمة
والله هداوين نضت مورماوليت والموضوع والله بزاف اصلا انا حاجة مصراتلي خارقة للعادة كيما نت نهار ممل جدا خرجت من الدار ع 6 تاع الصبح وصلنا مقبل 7 لقينا شوية الغاشي برك وعلى حساب الماتريكول تاع الطونوبيلات الولايات هما حنا البويرة وعين الدفلى و المدية ومنعرف شكون ثان سجلت وفادني موضوعك والله بزاااف حتى مسقسيتش كامل بزاف المهم المعاملة كانت هايلة وحد التقلاش هههه اعطاولنا في الاخير شهادة مدرسية و بطاقة الطالب و شهادة مدرسية وملف المنحة والاقامة حتى سبتمبر و مبعد اداوني نشوف الجامعة ختش وين سجلنا وين نقراو ماشي كيفكيف والله عجبتني كتن جديدة و الاقامة غير قدامها 10دقائق فقط مشيا ومبعد ولينا لدار وانتهى النهار وجوزيت خيرا اختي والله افادني موضوعك كثيرا https://fbcdn-sphotos-e-a.akamaihd.net/hphotos-ak-xaf1/t1.0-9/394497_397984513590145_1878718086_n.jpg
نسيت حاجة حنا ممدولناش الرقم الغريب ومدولنا ظرف واحد ومدرناش لاشان تاع الكراسة بصح كاين لجنة التحكيم ههههه وزاد ياو جامعتكم كبيرة الله يبارك حنا صغيرة وين سجلنا وكلش فما ممشيناش كامل بزاف
+توالمي دليلة سياحية هههه

[ملكة الامتياز]

[QUOترنت[/COLOR]

وايني قاعة الانترنت هادي ؟
يعني لا ماعرفتوش أسألوا برك
الغاشي كامل ينعتلكم
والله
ماخاب من استشار

المهم تروحوا منين قاعدين يسجلوا تاع الصيدلة وطب الاسنان
على ما آظن (والله نسيت)

المهم تلقاو أدراج ضيقين شوي
تطلعوا فيهم ومبعد تمشيوا بجهة اليمين ثم تلقاو طلعة نحو اليسار
تقابلكم فيها هادي قاعة الانترنت

تدخلوا فيها وحدكم
مايدخلوش معاكم الأولياء لأنها صغيرة والغاشي فيها
المهم تكملوا فيها لاشان تاع الكراسا
حتى تجي دالتكم باه تروحوا تسلكوا فيها حقوق التسجيل اللي هي بالمناسبة
200 دينار بالتمامم[/COLOR][/SIZE]
واللي تتم في قاعة "الحجز" هكدا اسمها

كي تدخلوا كذلك تلقاوا لاشان تاع الكراسا ههههههههههه
تكمّلوها قاعدين حتى تجي دالتكم وتسلكوا حقوق التسجيل تاعكم

كي توصل دالتكم تروحوا تقعدوا عند الراجل في المكتب
تعطيوه أحد الأظرفة باه يهز منها المعلومات تاعكم ولا يقدر يسألكم فقط

المهم كي تسلكوا وتخلصوا يعطيكم الوصل تاع السلاك

هاهو الوصل اللي عطاوهولي
صورتوا كي كنت قاعدة نستنى

http://im81.gulfup.com/nxYHNm.gif

مبعد تخرجوا من قاعة الحجز هاديك وتروحوا لقاعة أخرى جاية منين كنتوا قاعدين مدايرين لاشان
ماعرفتش كيفاه نوصف المكان تاعها ولكن راكم تشوفوا إخوانكم يدخلوا ليها قبلكم
سما ماتخافوشش

حلّوا عينيكم مليييح وودنييكم
وماش رايحين تضييعوا
واسألوا ماتهابووشش !

كي تزيدوا تدخلوا لهاديك القاعة نفس الشي
لاشااان هههههههههه

المهم نوصفلكم القاعة هاديك شوي

جاية شويا كبيرة
كي تدخلوا تشوفوا قدامكم الكراسي المصفوفة اللي تقعدوا فيها
وفي الحواف تاع القاعة كاينين الميكروات
(الميكروات شاعلين للي يحب يستخرج بيان التوجيه
شفت بزاف من اللي خرجولهم البيان)

وكاين في آخر القاعة (على يساركم عندما تدخلون إليها)
مكاتب فيها الناس الذين ياخدوا عنكم الملفات
وكاين زوج يخدمولكم البطاقة (البادج)

على فكرة البادج هذا قاعد زي لاكارت شيفا ههههه
كي عطاوهالي حسييت بروحي كبرت هههههههههههههههههه

وأنتم تنتظرون دوركم
يجي واحد يقوللكم أعطيوني صورة تاعكم
أعطيوه صورة إضافية
يعني الصورة رقم 6 وماتعطيوهش واحدة من الملف
لأنو يخدملكم بيها البادج ويرجعهالكم
المهم اكتبوا فيها - وكل الصور الخمسة- اسمكم ولقبكم والرقم الغريب هاداك

واعطيوهالوا

كي توصل دالتكم عند المكاتب هادوك
روحوا واعطيوهم الملف

المهم الملاحظة اللي نقوللكم عليها هي حول "الأظرفة"
نظن قلتها من قبل
بالصح في الإعادة إفادة

لأنو يقولولك في البداية 2 أظرفة
ومبعد كي تروحوا لهاد المكتب يقولولك هات ظرف ثالث
أنا ماكانش عندي قالتلي ماعليش
بالصح اللي كان عندو حكمتو عليه
معناتها إذا قادرين تجيبو واحد ثالث جيبوه
واللي ماش قادر مايتعبش نفسو

الموظف اللي تعطيه الملف تاعك يقوم بترتيبه في الظرفين الكبيرين
الشي اللي شفيت عليه وقدرت نلاحظو هو أنهم


[/SIZE][/FONT][/COLOR]في الظرف 1

يحطوا :
- كشف النقاط الأصلي
- شهادة التوجيه
- 3 صور بالاك
- والأظرفة

في الظرف 2
يحطوا :
- نسخة مصادق عليها لكشف النقاط
- شهادة التوجيه
- الظرف الثالث
- 2 صور


ومبعد يقولولك أبقى تنتظر حتى تدي البادج تاعك
نبقاوا ننتظروا

ننتظروا ننتظروا حتى يعيطوا على اسامينا ونروحوا نجيبو البادج
في البداية بقينا واقفين
ومبعد بالاك غضناهم جابلونا الكراسا

مسكين واحد جاب الكرسي
سع أنا رحت قعدتلو فيه (حطيتو مع العمال وكي طلع راسو ضهر تلميذ هههههه)
المهم ماحبييتش ننوض (ماحبيتش نكمل في الاحساس بالتبهديلة)
خليتو هو اللي راح
وقف شوي ومبعد لقى بلاصة

نطلب السماح على الملأ هههههههه من هاد الانسان !

المهم
مبعد une fois تدي البادج تاعك يقولولك توجه للإدارة
l'administration
تزيدوا تطلعوا .. حنا دانا واحد الموظف
المهم اسألوا برك ينعتولكم واين

هذه صورة لمكان الإدارة
(لكان غلطت ولا حاجة صححولي)
http://im81.gulfup.com/YFcpLy.gif

تدخلولها تلقاو واحد الدخلة على اليمين
وكاين 3 مكاتب

واحد جاي على اليمين في غرفة منفصلة
جاي في غرفة اسمها "مكتب الانخراط المركزي" ولا حاجة قريبة لهاد الاسم

ومكتبين جايين فالغرفة الكبيرة

واحد جاي على اليمين ويتكون من 3 مكاتب
واحد للصيدلة وواحد لطب الاسنان وواحد للطب
والمكتب الثالث للضمان الاجتماعي

بالصح أنتوما تدخلوا أولا للمكتب اللي في الغرفة
تلقاو زوج مكاتب تاني

واحد مع الدخلة يتكون كذلك من 3 للتخصصات الثلاث
والآخر فيه زوج رجال يخدموا خدمة واحدة


المهم في المكتب الأول تقعدوا
وتمدولهم الملفين
يخدموا خدمتهم بيهم
والله ماشفيت واش داروا بيهم
لأنو المراة اللي هدرت معايا قالتلي أنت جيتي من قبل
قلتلها لالا
قالتلي سبحان الله .. حتى كنتي لابسة نفس اللبسة هههههههه
خوفتنييي !!!

من التخمام ماركزتش واش كانت تخدم
المهم كان راجل معاها مانعرف واش خرّج من الملفات ولا بالاك تأكد منهم ولا مانعرف عليه

المهم نشفى غير عطاتني ملف واحد وحكمت الآخر
قالتها تحكموه ؟
قالتلي هيه .. قوليلوا باي باي هههههههههههه

وعطاتني 2 صور اللي كانو في أحد الملفات باه نمدهم للرجال اللي في المكتب الثاني
ومبعد قالتلي باه نمضي في واحد السجل

مضيت ومضيتُ نحو المكتب الآخر
أين عطيتهم الصورتين ورقمي باه جبدوا واحد الكارطونة بيضا
ومبعد قصوا الصور تاعي باه تجي قد المكان المناسب لها ولصقوهم في الكارطونة
وهذاك الراجل يقوللي درك نحط الطابع فوق وجهك فالتصويرة هههههه
وأنا نقوللو نوورمال حط على روحك

ومبعد قاللي واش بيك خايفة
قلتلو مانيش خايفة


والله ماعلابالي أسكو كدبت ولا صح ماكنتش خايفة هههههههه

المهم الموظفين كامل يهدروا معاكم باه ماتخافوش
ويضحكوا معاكم .. نورمال خلاص !

مبعد يعطيكم الكارطونة وتخرجوا من الغرفة هاديك
وتروحوا للمكتب الثاني

هاهي الكارطونة
http://im81.gulfup.com/u9ONDM.gif

تمدوا الملف تاعكم للموظف (كانت مرأة)
وهي تتولى كتابة المعلومات على واحد الكارطونة صفراء بالنسبة لطلبة الطب
وبالاك وردية ولا برتقالية نسيت لطلبة طب الأسنان وخضراء بالاك لطلبة الصيدلة
وتلصق صورة مع الأوراق تاع الملف وصورة تحطها في المكان المخصص في الكارطونة

خلاصة : الكارطونة الصفراء هي الملف تاعكم
مطوية على النصف وفيها يحطوا الأوراق تاعكم

ومبعد خلاص
تنوضوا من عندها وتتوجهوا لآخر مكتب اللي هو تاع الضمان
تعطيوه الكارطونة البيضاء وورقة الضمان اللي هوما آخر الأوراق اللي يبقاو عندكم
ومبعد يقوللكم اكتبوا اسمكم وتاريخ الميلاد تاعكم والاختيار تاعكم في وحد القائمة
ومبعد نسيت واش دار
لأني كنت نشغل بالغاشي ههههههههههه (نقرعج)

آآه هييه

سكانا الكارطونات البيضاء تاعنا ورجعهملنا
ومبعد خلاص

قاللنا روحوا للونفي 2

هبطنا للونفي 2 هذا ولتم اكتشفنا أنو يتم دفع ملف المنحة
ولأنو ماكانش عندي الملف كاملا
اضطررت باه نروح نروّح

لذلك هنا تنتهي الرحلة تاعي معاكم

أهم ما نقوللكم هو أنو الراجل اللي يحكم الملف تاع المنحة قاعد يمد في أوراق فيهم النوامر
باه تحكموا الرونديفوات تاعكم
لأنو في هذاك الوقت كانت 12 ونص
وقاللنا باللي رايحين يعاودوا يحلّوا على الواحدة والنصف
بالاك علابيها يمد فالنوامر
والله تقول رحتي تجاهدي....اطلع من اهبط من استنى انا سجلت في مدرسة عليا 10 دقائق كملت كلش سلكت دفعت كلش وروحت

وسألتوا لكان نلقدر نجيب ملف المنحة في أي وقت من الاسبوع هذا
قاللي نعم
قاللي أرواحي في أي وقت ادفعي الملف تاعك

وفقط

انتهينا من الكلام

نمتنى نكون أفدتكم ولو بالقليل

تحبوا تسألوا .. اتفضلوا
رايحة نجاوبكم بما أستطيع

وربي يوفقكم
وان شاء الله نلتقي قريبا هناك في الكلية =)

سلاممم


[/CENTER][/QUOTE]

[Amany Queen]

salam ,

Mercii Bcp khté , malgré chui une étudianté à l'ens Mais j'ai lu tous ce que t'as écrit wlh
:)

3awenti bzzf naas , baraka Allahu Fiik =)

[فوزان 96]

قريت كل حاجة كتبتيها و ان شاء الله كل حرف كتبتيه يجازيك عليه ربي

[mac_tnis]

شعارنا : وين تصيب الكراسة دير لاشان ههههههههههه

[romi rosa]

مع اني لا علاقة بالموضوع هههه ولكن قريتو حرف بحرف ..اكيد راكي فدتي الاعضاء الاخرين ربي يجازيك
اما عني فقد سجلت في جامعة الجزائر- طب-
موفقة ان شاء الله

[نعمة القدوس]

السلام عليكم
انا سجلت اليوم عجبني التنظيم جاز يوم مليح و اجمد لله تعبنا مع الترونسبور ربي يكون فالعون
شكرا ليك
بالتوفيق



وعليكم السلام ورحمة الله
مرحبا بزميلتي الثانية في الكلية -ان شاء الله-

الحمد لله اللي عجبك التنظيم
والترونسبور رانا كامل تعبنا فيه
(أنا اللي زعما نسكن في قسنطينة وطيّبوووني ههههه
يامابالك اللي يسكن خارج الولاية !)

بالصح كي توليوا في الاقامة
تعودوا ماتتعبوش بزاففف
وزيد حنا والفنا الكسل في رمضان علابييها زادت علينا الحالة ههههه
كي نوليوا نقراووا نولييوا نوالفوا بالريتم

المهمم
ان شاء الله نتلاقااو قريبا أختي
ياخي أنت تاني في قسنطينة !

ربي يبارك فيك على المرور

[نعمة القدوس]

الله يعزك نعمة
والله هداوين نضت مورماوليت والموضوع والله بزاف اصلا انا حاجة مصراتلي خارقة للعادة كيما نت نهار ممل جدا خرجت من الدار ع 6 تاع الصبح وصلنا مقبل 7 لقينا شوية الغاشي برك وعلى حساب الماتريكول تاع الطونوبيلات الولايات هما حنا البويرة وعين الدفلى و المدية ومنعرف شكون ثان سجلت وفادني موضوعك والله بزاااف حتى مسقسيتش كامل بزاف المهم المعاملة كانت هايلة وحد التقلاش هههه اعطاولنا في الاخير شهادة مدرسية و بطاقة الطالب و شهادة مدرسية وملف المنحة والاقامة حتى سبتمبر و مبعد اداوني نشوف الجامعة ختش وين سجلنا وين نقراو ماشي كيفكيف والله عجبتني كتن جديدة و الاقامة غير قدامها 10دقائق فقط مشيا ومبعد ولينا لدار وانتهى النهار وجوزيت خيرا اختي والله افادني موضوعك كثيرا https://fbcdn-sphotos-e-a.akamaihd.net/hphotos-ak-xaf1/t1.0-9/394497_397984513590145_1878718086_n.jpg
نسيت حاجة حنا ممدولناش الرقم الغريب ومدولنا ظرف واحد ومدرناش لاشان تاع الكراسة بصح كاين لجنة التحكيم ههههه وزاد ياو جامعتكم كبيرة الله يبارك حنا صغيرة وين سجلنا وكلش فما ممشيناش كامل بزاف
+توالمي دليلة سياحية هههه



أهلا سلمى !

هادي هي الجامعة تاعكممم ؟

+

إيييه عندك الزهر كي عادت الإقامة قريبة
الحمد لله
(حنا تاني الإقامة عندنا قريبة إذا ماخلاوناش نقراو في الشالي
وبعتونا للجامعة الجديدة، مع أنو ماعندي ماندير بالإقامة
بالصح تبقى أقرب ليا أنا تاني هههههه)

المهمم

راكي تقريبا كتبتي موضوع !
كون كملتيها ضغطتي على أضف موضوع جديبد وخلاص هههههه

هيا كلشي مبارك عليك زينوونة
والحمد لله فاتت على خير
ربي يوفقك

+++
(دليلة سياحية ؟ والله ماتدري
بالاك تلقاايني كاش نهار في كاش بلاصة
نكركر ورايا العباد ونكدب عليهم شوي
ههههههه)

[نعمة القدوس]

salam ,

mercii bcp khté , malgré chui une étudianté à l'ens mais j'ai lu tous ce que t'as écrit wlh
:)

3awenti bzzf naas , baraka allahu fiik =)





وعليكم السسلام ورحمة الله أختي

هههههههه
فرحتييني كي قلتي باللي راكي قريتي كلش
يااخي ماتعبتييش برك ؟ (علابالي نهدر بزاففف)
وتاني ماقلقتييش !!!

+
ربي يبارك فيك على الرد
مشكورة

[نعمة القدوس]

قريت كل حاجة كتبتيها و ان شاء الله كل حرف كتبتيه يجازيك عليه ربي




آميين يا رب العالميين !

(مادابيا أخي .. حتى أنا كتبت بزاففف ههههه)

+
ان شاء الله تكون استفدت

[نعمة القدوس]

شعارنا : وين تصيب الكراسة دير لاشان ههههههههههه




http://s2.postimage.org/p0r2ooo4/yoyo20.gif

أنت وحدك أنييس !
ضحكتني من أعماق قلبي

[نعمة القدوس]

مع اني لا علاقة بالموضوع هههه ولكن قريتو حرف بحرف ..اكيد راكي فدتي الاعضاء الاخرين ربي يجازيك
اما عني فقد سجلت في جامعة الجزائر- طب-
موفقة ان شاء الله



ربي يبارك فيك أختي رميسة

يا زميلتي في المهنة -مستقبلا ههه-

(تقدري تهدري على كيفية التسجيل في جامعتكم إذا حبيتي)

مشكورة على الرد

[أمينة بوعوينة]

الأمر مــآيعنينيش بصـــــــــــــــــــح ... يعجز اللــســآن عن التعبير

بارك الله فيك

عمل ممتـآز متقن 200% ... ربي يجــآزيك كل الخيييييييييييييييير

ربي يحفظك ... سيكون لكِ شأن عظيم بإذن الله ... يــآدكتورة المســتقبل ...

[نعمة القدوس]

الأمر مــآيعنينيش بصـــــــــــــــــــح ... يعجز اللــســآن عن التعبير

بارك الله فيك

عمل ممتـآز متقن 200% ... ربي يجــآزيك كل الخيييييييييييييييير

ربي يحفظك ... سيكون لكِ شأن عظيم بإذن الله ... يــآدكتورة المســتقبل ...







حشمتييني أختييي !

ربي يباارك فيك

(ان شاء الله برك يستفيد الغاشي)

ومرورك أفادنيي أنا
ربي يعطييك كل الخيير
صديقتيي =)))

[biba_g]

سلام عليكمْ دليلة...http://www.lakii.com/vb/smile/17-78.gif (http://www.lakii.com/vb/smiles/index.php)
..
موضوعكْ راه مداير le buzz

راكي زدتِ عدلتيهْ مليحْ.....معلوماتْ دقيقة...ربي يجازيكْ.

.

[القرآن حياتي]

س
لام نعومة موضوعك مميز موفقة غاليتي احمم طبيبتما المتميزة س

[نعمة القدوس]

سلام عليكمْ دليلة...http://www.lakii.com/vb/smile/17-78.gif (http://www.lakii.com/vb/smiles/index.php)
..
موضوعكْ راه مداير le buzz

راكي زدتِ عدلتيهْ مليحْ.....معلوماتْ دقيقة...ربي يجازيكْ.

.






وعليكم السلامم هههههه

http://s2.postimage.org/p29nf4ys/yoyo46.gif

إييييه .. راكم حشمتووني
أحمم أحمممم

(البارح بتت معاه باه كملت الصور
وخاصة الخرائط
خايفة نكون غالطة فيهمم ههههه)

شكرا على الرد عبيير

أنا دليلة وأنت طلاّعة المورال ههه

[نعمة القدوس]

س
لام نعومة موضوعك مميز موفقة غاليتي احمم طبيبتما المتميزة س


وعليكم السلام أختاه

ربي يباارك فيكك

=)))

(اليوم يوم التحششامم)

[مُﭔﭥسـّمہ دائمًا ツ]

كل هذه الاجراءات المرهقة وزيد السخانة t_t
انا كنت اعتقد انني مررت بيوم متعب لكن مقارنة بما تصيفين لا شئ
اليوم سجلت في جامعة الجزائر عطاولنا استمارة واحدة عمرناها وروحنا للجنة تفقد الملف وروحنا لمدرج اخر زادوا تاكدوا ناس ثانيين وفي المدرج الثالث في لجنة كبيرة وشاشات كمبيوتر انتظرنا شوي وعطاونا البطاقة

ماشاء الله موضوع رائع صديقتي واكيد عاونتي بزاف وخاصة اللي يسكنوا بعيد بارك الله فيك وجعله في ميزان حسناتك

[أمينة بوعوينة]

حشمتييني أختييي !

ربي يباارك فيك

(ان شاء الله برك يستفيد الغاشي)

ومرورك أفادنيي أنا
ربي يعطييك كل الخيير
صديقتيي =)))




والله مــآ دّيــريهــآ ههههههههههههه

وفيك بارك الله

أكيد استــفــآدوآ

وإيــآكي ياررررررب

:) :)

[بلال امير الشرق]

كم عدد الطلبة لهاته السنة !!

[Anouàre Bechir]

وعليكم السلام ورحمة الله
مرحبا بزميلتي الثانية في الكلية -ان شاء الله-

الحمد لله اللي عجبك التنظيم
والترونسبور رانا كامل تعبنا فيه
(أنا اللي زعما نسكن في قسنطينة وطيّبوووني ههههه
يامابالك اللي يسكن خارج الولاية !)

بالصح كي توليوا في الاقامة
تعودوا ماتتعبوش بزاففف
وزيد حنا والفنا الكسل في رمضان علابييها زادت علينا الحالة ههههه
كي نوليوا نقراووا نولييوا نوالفوا بالريتم

المهمم
ان شاء الله نتلاقااو قريبا أختي
ياخي أنت تاني في قسنطينة !

ربي يبارك فيك على المرور





لاا انا من ام البواقي
الله يسلمك ختي ان شاء الله نتشرف بلقائك في القرييييييب
بالتوفيييييق لينا كامل ان شاء الله و بارك الله فيك على المعلومات الواااااافية :19:

[softy]

اخت نعمة
ماعلابالكش اذا طلبو شهادة صدرية وعامة
فملف الاقاامة

[قابضة على الجمر]

ربما الاخت نعمة لم تسجل في الاقامة ......لكن انا سجلت و لم يطلبوا الشهادتين لكن ممكن من بعد يطلبوهم

[ZINA DZ]

سلاااام

نعمة سحبتي هذي الورقة يلي يقولولها هههــ


تعهد الأب بإستخلاص المصالح المالية ؟؟

من وين يطلعوها :confused:

باين عليا راني فحلة و نعرف

[Amany Queen]

وعليكم السسلام ورحمة الله أختي

هههههههه
فرحتييني كي قلتي باللي راكي قريتي كلش
يااخي ماتعبتييش برك ؟ (علابالي نهدر بزاففف)
وتاني ماقلقتييش !!!

+
ربي يبارك فيك على الرد
مشكورة





Nn absolument , t'as su comment faire les visiteurs veulent continuer la lecture , t'es intélligente Pas bavarde :rolleyes: Ne3Mah , et voilà une Félicitation Pr vs :mh31: :19:
j' vs souhaite une trés bonne journée :cool:

[نَازِكْ]

أهلا سلمى !

هادي هي الجامعة تاعكممم ؟

+

إيييه عندك الزهر كي عادت الإقامة قريبة
الحمد لله
(حنا تاني الإقامة عندنا قريبة إذا ماخلاوناش نقراو في الشالي
وبعتونا للجامعة الجديدة، مع أنو ماعندي ماندير بالإقامة
بالصح تبقى أقرب ليا أنا تاني هههههه)

المهمم

راكي تقريبا كتبتي موضوع !
كون كملتيها ضغطتي على أضف موضوع جديبد وخلاص هههههه

هيا كلشي مبارك عليك زينوونة
والحمد لله فاتت على خير
ربي يوفقك

+++
(دليلة سياحية ؟ والله ماتدري
بالاك تلقاايني كاش نهار في كاش بلاصة
نكركر ورايا العباد ونكدب عليهم شوي
ههههههه)





نعم هذيك هي الجامعة الجديدة احسن من القديمة تاع درقانة
و شوفي في تظاهرة قسنطينة عاصمة الثقافة دبري خدمة والله توالمي قوليلهم عندي الاكسبريونس واذا طلبوا شهود راني نجي
و يبارك فيك ختيتي وجوزيت عنا خيرا

[سارق الأحزان]

يا نتي تحبي تكتبي بزااف
يا تسجاال نتااعكم طوييل هههه

[Amany Queen]

يا نتي تحبي تكتبي بزااف
يا تسجاال نتااعكم طوييل هههه
Mdrrrr , balak fi zoudj :19:

[romi rosa]

ربي يبارك فيك أختي رميسة

يا زميلتي في المهنة -مستقبلا ههه-

(تقدري تهدري على كيفية التسجيل في جامعتكم إذا حبيتي)

مشكورة على الرد




وفيك بركة يا صديقتي هههه
التسجيل في جامعتنا كان مثلما ذكرت الاخت انتصار 1995 لا توجد تفاصيل كثيرة والامر الجيد فيه انني ما درتش la chaine كيما انتي بزاف هههه الحمد لله .....ننتظر مواضيعك المميزة بفارغ الصبر ...بوركت

[نَازِكْ]

وفيك بركة يا صديقتي هههه
التسجيل في جامعتنا كان مثلما ذكرت الاخت انتصار 1995 لا توجد تفاصيل كثيرة والامر الجيد فيه انني ما درتش la chaine كيما انتي بزاف هههه الحمد لله .....ننتظر مواضيعك المميزة بفارغ الصبر ...بوركت
ايه شفتي ممل جدا حتى كملت في 15 دقيقة برك هههه وزاد مكاش بزاف الدورات وخسارة مكانش لا شان ان شاء الله يكون عام مليح وبالاك نتلاقاو

[Amany Queen]

لا توجد تفاصيل كثيرة والامر الجيد فيه انني ما درتش la chaine كيما انتي بزاف هههه الحمد لله
salam ,

désolée


Mais , tu veut dire ' ma3ndkomch lkrasa ' Mdr

Theniiti khté , rabi ykemlk Nchlh:19:

[romi rosa]

salam ,

désolée


Mais , tu veut dire ' ma3ndkomch lkrasa ' Mdr

Theniiti khté , rabi ykemlk Nchlh:19:


hhhhh صح تهنيت مي كاينين كراسا منهم وعليهم اصلا دخلونا للمدرج مي الغاشي مكاش بزاف سلكتلها ههه شكرا لك موفقة باذن الله

[romi rosa]

ايه شفتي ممل جدا حتى كملت في 15 دقيقة برك هههه وزاد مكاش بزاف الدورات وخسارة مكانش لا شان ان شاء الله يكون عام مليح وبالاك نتلاقاو

صح كان يوم عادي جدا لا جديد يذكر ...المهم خلال الدراسة تكون الاجواء مختلفة ان شاء الله ....امنيتي ان اتعرف عليك باذن الله

[Amany Queen]

hhhhh صح تهنيت مي كاينين كراسا منهم وعليهم اصلا دخلونا للمدرج مي الغاشي مكاش بزاف سلكتلها ههه شكرا لك موفقة باذن الله

hhhh Ohhh je Voix ,
MezHara ellah Ybarekk ;)
Qu'Allah te Protége:19:

[romi rosa]

hhhh Ohhh je Voix ,
MezHara ellah Ybarekk ;)
Qu'Allah te Protége:19:


amine...merci :D

[حافظ القرآن]

شكرا أختي نعمة ، ماخليتينا ما نقولو :1::1: الموضوع شااامل

الحمد لله أنا سجلت اليوم و تهنيت ، المهم .. اللي عجبني في التسجيل هو التنظيم ثم التنظيم ... .و ما ننساش الطلبة اللي لقيتهم معايا في الطب ، و انا عيني غير في كشوف النقاط و المعدلات الفووووور .
ربي يوفقنا كامل و يجعلنا أمهر الأطباء .

[chouchou1994]

Wekta nroho nouvelle nkamelo?

[نعمة القدوس]

شكرا أصدقائي على مروركم
آسفة لن أستطيع الرد عليكم واحدا واحدا حتى إذا حللت مشكل النت في جهازي
آسفة جدا

[منــآلــ]

اهليييييييين نعمة مبرووووك البــــآك والطبـ
انا درت صيدلــة في سطيــف وندير تحويل لقسنطييـــنة وان شاء الله يكون لنا لقاااء
بارك الله فيييك على كل هذا الشرح مي واااااااااو الدنيا مخربــطة بزآآآآفـ تما انا كي سجلتـ في سطيفـ والله بالاك 15 دقيقة مافاتتش والوثائق اقــل بكثير ورحنا ل 2 مدرجــات فقط والتخلاط تع الادارة وهذاك الرقم ماكانش ههههه رحمة ربي
ربي يوفقكمـ أجمعييين :) :) :)

[nasro bourbia]

انا تانا طب الاسنان عشت نفس الحاله تاع الاخت جين من سكيكدة مع بابا رحت لنوفال قالولي ل الشالي ساعة و انا نلهط علا الشالي كوصل للفاك زعما لقيتها تشبه لكولش ابار فاك تا ميدسين لمهم كيما قالت الاخت نفس الخطوات درتهم و عطاوني بطاقة و قالولي تقرا في فوبور قلتلهم ماشي هادا فوبور قالولي هادي يقراو فيها غير ميدسين نتوما و تاع الصيدلة تقراو في فوبور مين باب القنطرة من المستشفي حدا باتيمات تاع بيكاسو طبعا انا مفهمت والو و معمبالي في والو كاش قسنطيني ربي يعيشو يفهمني راني حاصل ربي يعيشكم واحد يفهمني و شكرااا

[nasro bourbia]

عدرا نسيت نشكر الاخت علي العمل المتقن تاعها نشاء الله في ميزان حسناتك ربي يوفقك و يوفقنا كامل كاين عام طويل و صعيب يسنا فينا انا من ناس ل يخمو بزاف ربي يستور نشالله خير و بالنسبة للمعدلات كاين النوعية بزاف الله يبارك (علما انا حبت الباك ب 15.77) و نتوما شحال ؟؟؟؟؟