امي و هوس الزواج

[مشكلتي]

عيدكم مبارك
جيتكم اليوم نحكي معاكم شوي ان شاء الله تنصحوني تهتموا لامري بالاك يبانلكم موضوع عادي و الا راني نبالغ فيه مي مأثر فيا لاني ما لقيتها حتى من جهة امي و هوس الزواج نععععماااااه محلاك يا الصغر كنت طفلة صغيرة تلعب تقرى الدنيا ديما زاهية الضحك و اللعب كبرت و كبر همها معاها كي نقلكم كبرت تحسابوا عجوزة ههههه 25سنة برك مي الاعين الكل مصوبة نحوي الحمد لله كملت قرايتي هزيت شهادتي تاع الماستر عندي عامين لقيت خدمت لا تشكر لا تذم مي الحمد الله على كل الحال كملتي كلش وينوا الراجل كيفاه ما تتخطبيش ايييه كبرتي مكان والوا بنات الصغار راهم يتزوجوا ولات امي تقولي كون غير ماقريتي نهايتك بيت راجلك الناس كل تسقسي الفاميلة عندهم غير انا في اي مناسبة حديث الساعة الناااس كل حاكمة في الحكاية اللي زاد عليا امي الله يحفظها ليا علابالي تحبني حابة تتهنا عليا مي حسب الوقت اللي رانا فيه و بحكم قريت شفت ناس حكولي خاصة الزواج وليت نديرلوا الف حساب باه ما نتسرعش و نندم لكن امي المهم حابتني نتزوج قتلي ما ندوملكش مريضة نخاف نخليك شكون بيك نست انوا الموت عندي والا عندها نست عندي ربي سبحانوا اللي خلق ما يضيع نست كلش بالمكتوب كنت مخطوبة واحد من الاقارب مي بالكلمة برك ما كتبش ربي عندها 3 سنين الحمد لله ربي هو اللي يسير في كلش ذرك همها الوحيد اني نتزوج كرهت منوا الموضوع حابين يخطبوني من الفاميلا واحد اخر ظروف تاعوا تاعبة شوي وزيد مشني مرتاحة علبالي الماديات مش كلش مي لازمة على الاقل خدمة ماعندوش خدمة باينة هو برك في دارهم قايم بيها المعيشة بالسيف لازم كل حاجة منها شوي وقتنا صعاب خايفة ساعات نقول المهم ترضى عليا امي مع اني مش قابلة تقولي بالاك عندك واحد راكي مديك الهواء تندمي انا ماعندي حتى حاجة علابالي ماعندي وين تديني ماكانش كيما الصح خايفة نزرب روحي نندم زواج العمر حرت و قلقت نحكي معاها النقاش يولي مشكلة كيفاه نتعامل معاها كيفاه نواجه المجتمع اللي غالط في تفكيروا الزواج بالمكتوب لوكان ربي ما يكتبش حاجة عادية من عند ربي ولا الموضوع المهم و الاهم؟؟؟؟

[kramnik]

عليك بالإستخارة

[HODHOD HADAHID]

امك عكس امي تماما
عندي اختي اكبر مني في عمرها 26 سنة كل وين يخطبها واحد تقوولها اخطيك مازلتي صغيرة تحسبي روحك بايرة

اختي قرات وكملت وضرك راهي خدامة بالمنصب تاعها الخمد لله لكن امي مزالت تشوفها صغيرة

اما على روحي تشوف في بيبي هههههههههههههههه وانا 23 سنة الحمد لله المسؤولية تعلمتها لما بديت نخدم نسؤولة على 30 تلميذ كل مرة سينو راني بقيت بيبي ههههههه

ربي يهدينا وان شاء الله يرزقنا الزوج الصالح

[ايمان نور الجزائر]

هادي احلام وامال كل أم تشوف بنتها في دارهااااا
وتتمانلها الخير
هيا علابالها بللي مكتوب مي ماشي حاباتك تشرطي او غيرو
على كل حال هاذ حال مجتمعنا يحير لكل حاجة
لي اعزب يقولو اتزوج والا متزوج يقولولو وين راهم دراري ولي مطلق علاش طلقت وهكاااااااا
يعني يلهو في روحهم بحياة الناس
وسعي خاطرك مع لميمة وقوليلها كي يكتب ربي ويجي لي يوالم ربي يسهل

[Hillin]

نسلفلك أمي لأيام؟
:]
كيما تبغي
تبغي نفليكسيلها امي تهدر معاها نضمنلك بلي تشونجيلها العقلية في ثانية
ههههههههههههههههههههه
عزيزتي بلغي امك انك راكي باغيا تعيشي هانية مع ليستاهل وقبل كلش بلمكتوب
لازم يكون الانسان لباغياتيه مسؤووووول ومش بعد سيمانة زعفانة او 6 شهر ولا عام توليلها تشكي وتبكي
الله يوفقك لما فيه خير
تحياتي

[Hillin]

نسلفلك أمي لأيام؟
:]
كيما تبغي
تبغي نفليكسيلها امي تهدر معاها نضمنلك بلي تشونجيلها العقلية في ثانية
ههههههههههههههههههههه
عزيزتي بلغي امك انك راكي باغيا تعيشي هانية مع ليستاهل وقبل كلش بلمكتوب
لازم يكون الانسان لباغياتيه مسؤووووول ومش بعد سيمانة زعفانة او 6 شهر ولا عام توليلها تشكي وتبكي
الله يوفقك لما فيه خير
تحياتي

[السي محمد]

انا كي قريت العنوان...حسبت ان امك هي المهووسة بالزواج هههه

===================
المهم و عمومًا الزواج مليح و في وقتنا مع تكاثر الفتن و الاغراءات راه اكثر من الواجب و بالنظر للصعوبات و التحديات يا سعدها اللي تتزوج ولكن مش اي زواج

يا سعدها اللي تتزوج بإنسان صالح يخاف ربي

و عندو خديمة صغيرة من الحلال توفر له الاساسيات و الضروريات

[nasser26]

أختي متتسرعيش خااااااااااااااصة الزواج متتسرعيش

25 مزالت الدنيا قدامك الان وين بديتي حياتك

حاولي تفهمي امك وتقنعيها انك ماشي مرتاجة لزواج كما هذا

انا راجل مي نقولك لي مراهوش خدام والله تتعبي معاه سيرتو الوضعية لي حكيتيها صدقيني مرانيش حابك تندمي من بعد

أصبري وتشرطي مدامك صغيرة مي في حدود وتان أكدي على الرجل الدين ولي يخاف ربي ويكون متربي حاجة أخرى كلها تهون

ربي يوفقك ويبعثلك مكتوب يهنيك انتي وكل وحدة في قلبها الزواج

امك كون جات قدامي والله نلومها على انها حابة تزوجك وخلاص ...ايه نقولهالك تزوجك وخلاص ...ردي بالك وراني نحكيلك من تجارب شفتهم من قدامي متغلطيش بليييييييييييز متغلطيش

متنسايش انتي خدامة وراجلك ماشي خدام ماشي ساهلة ..... الا ماشي من عندو هو من عند الناس ... ومن عند الناس توصل ليه ... يبداو المشاكل ....شكون الخاااااااسر ؟؟؟؟

[pomaria_aindefla]

نحن في نفس الكيس الله يجيبلك و يجيبلي معك حا ولد الحلال إن شاء الله

[salem1985]

السلام اختي الزواج مكتوب ولا شئ ياتي بدون سبب ولكن انصحك ان تفكري في مستقبلك بجدية فالزواج هو ستر للمراة والرجل ولكن لابدا من ان يكون توافق وكل واحد منهم يتحمل مسؤولياته لان الزواح حقوق وواجبات ولا بدا للوجل ان يوفر للمراة العيش الكريم بينما توفر له هي الاستقرار والسكينة اذا جاءك من ترضين دينه وخلقه ويكرمك فتزوجي واسعدي امك فهي تخاف ان تموت ولا تفرح بك وحتى لا يحدث لك مثلي وتندمين فكري في مستقبلك فانا عرضت علي فتيات ماشاء الله وقررن ان يصبرن معي حتى اجد العمل والبيت ولكن رفضت والان تزوجن واصبحن باولادهن اما انا فلدي عمل وبيت وكل من اتقدم لها ترفضني وها انا اعاني في صمت وابكي على زماني القديم ربي يهنيك اختي ويوفقك السلام

[wahiba02]

ان شاء الله ربي يفتح عليك

[رضاك ربي ارجو]

أمك عندها الحق مع العنوسة الي دايرة حالة

ان شاء الله يجيك مكتوبك في اقرب وقت

[صبرينة ام الفضل]

السلام عليكم.....يا اختي مادام قريتي وراكي تخدمي واش راكي تستناي ؟؟؟؟

صراحة الزمان تغير وكثرت الفتن ومضلاتها ....ودرك راهم 16 و 17 سنة هابلين على الزواج والرجال تقصد هذه الشريحة

بزاف بنات قراو معاي وكملو درك ندموا...وزيد اختي نحن النساء لسنا مثل الرجال فجسم المرأة ضعيف و

مهمة المرأة الاساسية هي الحمل والولادة والرضاعة ولما تخلت النساء عن دورهن كثر مرض السرطان ربي يعافينا

اختي مرضت في الرحم راحت طبيب نساء والله نصحها ولامها قاللها تزوجي

وحتى اطباء النساء يقولو احسن فترة حمل للانثى من 20 الى 35 سنة

وديري في بالك ان الرزق على ربي هو اللي ضامنو ..قادرة تدي واحد خدام من بعد يحاوزوه او تتغير ظروفه

خذوهم فقراء يغنهم الله...الصح لما يكون يصلي ويخاف ربي حتى لو تتعذبوا شوية مي الحال يتبدل

ودوام الحال من المحال...فقير اليوم غني الغد وغني اليوم فقير الغد

والله نعرف بنات راهم يقاسيو ..عندهم شهادات لكن بلا زواج ولا اولاد مندمين ولما كبروا يعودو يقولو معليش المهم راجل

واش عليه مشي خدام...

نصيحة من مشفقة محبة للخير لك

[hodahodahoda]

قل امك تدعيلك
القضية مقادير تاع ربي
ماترميش روحك و تندمي
اصبري يفرج عليك ربي

[salem1985]

موش الشباب الي موش حاب يتزوج النساء شايفين روحهم اكثر من 4 اشهر في المنتدى وكل وحدة ادعوا لي ربي يرزقني بزوج وكي نعرض عليهم روحي ولا وحدة قبلت خلاص واش رايح ندير ليكم انا خلاص كرهت العقلية هادي واش يخصني خدام بداري وماني معوق مابي والو خلاص ربي يزرقني وحدة قاورية ام انتم ما تستاهلونيش قعدو بايرين الشح فيكم

[maya1991]

اخي salem1985 ممكن تعطيلي اميلك حابة نقولك حاجة حبيت نبعثلك رسالة بصح ما قدرتش

[zineeddine721]

ماخاب من استخار
ربي يبعث اللطف
......................................زواج البنت محتم أكثر من الطفل لكن تفاصيله معقدة وتنحرف عن مسارهادائما



ربي ينعلك يا بليس

[hassendz]

موش الشباب الي موش حاب يتزوج النساء شايفين روحهم اكثر من 4 اشهر في المنتدى وكل وحدة ادعوا لي ربي يرزقني بزوج وكي نعرض عليهم روحي ولا وحدة قبلت خلاص واش رايح ندير ليكم انا خلاص كرهت العقلية هادي واش يخصني خدام بداري وماني معوق مابي والو خلاص ربي يزرقني وحدة قاورية ام انتم ما تستاهلونيش قعدو بايرين الشح فيكم

********************************
السلام عليكم و رحمة الله
اخي العزيز اريد أن أسألك سؤال بسيط؟ هل حقا تريد ان تخطب فتاة في المنتدى؟
لم افهم هاته التناقضات انت من جهة راك تقول خدام و سكن و ماشي معوق ووو من جهة اخرى تقول راني نعرض في روحي.

كاينة حاجة بسيطة تقدر ديرها شوف كاش بنت فاميلية روح اخطبها ثم اشترط عليها التسجيل في منتديات الجلفة بما انك تريدها عضوة في المنتديات.. حاجة ساهلة ماهلة.

و لله في خلقه شؤون