المساعد الشخصي الرقمي

مشاهدة النسخة كاملة : الدزيريات راهي دايرة فيا حالة


جوجو13
2014-07-14, 19:56
السلام عليكم واش راكم
رانا في المنتصف نتاع شهر رمضان راه فات ومحسيناش بيه ربي يتقبل منا ومنكم
امالا راكم مع قاطو العيد انا الحق راني عاد مبديتش مي كاين انواع حلويات ميخرجوليش ملاح يعني يجيو يابسين وكي ندوقهم عندكم في الجزائر دوق يهبل وطراوة العجينة انا كي يجي العيد نقول لخويا يسكن في الجزائر يجيبلنا القاطو نتاعكم راهو بنين حنا شاطرين غي في القريوش والمقروط ههههههههه راكم عرفتو منين انا من تلمسان المهم القاطو الي يجيني يابس هو الدزيريات والتشاراك المسكر احنا نقولولو كابوغزال ياريت تعطيوني وصفة الدزيريات الي تجي طرية باش منقولش لخويا يجيبلنا منها وياريت وصفة مختلفة راني جربت وصفات الدزيريات ومراهيش تجيني طرية وحاجة تانية راني كي نعسلها نعسلها مليح مليح مي من بعد تنشف ومتجيش قاع ولا القنيدلات والكابوغزال خلوني هاد المرة نخلعهم بدزيريات يكونو طريين هههههههه وصح رمضانكم وصح فطوركم

omrahim5
2014-07-14, 22:47
سلام اختاه ان شاء الله تكوني مليحة. عن تجربة اعتمدي العجينة السحرية لام اماني في لعرايش و التشاراك والله متعه هشة لدرجة حتى وان احتفظتي بيها مدة .وربي يعاونك

جوجو13
2014-07-14, 23:04
سلام اختاه ان شاء الله تكوني مليحة. عن تجربة اعتمدي العجينة السحرية لام اماني في لعرايش و التشاراك والله متعه هشة لدرجة حتى وان احتفظتي بيها مدة .وربي يعاونك

شكرا اختي راني كتبت الوصفة ان شاء الله نجربها شكرا

أم محمد ريان
2014-07-15, 00:41
والله انا تاني كيما انتي
أيا اعطيني مقادير القريوش والمقروض هههههه نتعلم منك

جوجو13
2014-07-16, 19:35
والله انا تاني كيما انتي
أيا اعطيني مقادير القريوش والمقروض هههههه نتعلم منك

ايه نعطيك الوصفة وعلاه لالا
القريوش
1كغ فرينة /2خماراة الحلوى /1بيضة /نصف رطل زبدة / ملعقة صغيرة خميرة العجين/كاس نتاع لتاي فيه نص ماء زهر ونص خل
ديري الفرينة والزيدة بسي العجينة لمايقبط في اليد يعني ينقبدلك في يدك ديري الخمارة والخميرة في شوية نتاع الماؤ دافي وزيدي البيضة وماء الزهر والخل ولميه بماء دافي حتى تلمي العجينة وخليه يرتاح في شكارة لمدة 30د
وحلي العجينة بالحلال شوية وديريها في المشينة رقم 4و6 لثلاث مرات وهي والمشينة نتاعك اناا عطيتك رقم نتاغ المشينة نتاعنا المهم ماشي رقيق بزاف يعني مارقيقة ماخشينة وشكلي شكل القريوش حنا نقولو نخبلو العجينة وقليه ومن بعد عسليه تم تم وديريلو الجلجلان
اما المقروط
3غرافي سميد متوسط /1غرفية سمن ولا زبدة دايبة/شوية قرفة وشوية كبابة /تمر
نديرو السميد والسمن ولا الزبدة والقرفة والكبابة وتخلطي مليح ولمي غي بشوية باالماء مديريش قاع العجينة
نجيو للعجينة التمر ديري التمر يتبخر من بغد ديريلو كبابة وقرفة وشوية سكر وخلطيه بشوبة زيت
ايا جبدي العجينة وديري في وسطها التمر وشكلي حربوش وسقميه بالمول نتاع المقروظ وقسيه مقيرطات واقليه من بغد عسليه مباشرة
هذو الوصفات نتاع امي العزيزة ربي يخليهالي ديما معتمدة الطريقة في كل مناسبة

روسيكادا
2014-07-16, 21:47
صح فطوركم

اهلا بناس تلمسان

هجيرة1
2014-08-22, 09:23
والله انا تاني نفس الاستفسار

ام الهضاب
2014-08-22, 10:02
جربي دزيريات فلة فود وصفاتها رائعة هاهو الرابط
http://www.djelfa.info/vb/showthread.php?t=1280350

jojo dj
2014-08-22, 10:15
انا مرة في سميرة شفت شاف قالت سر فالدزيريات فالتعسال وهو انك تقعريها بالابرة من التحت وهي سخونة راح تتشرب العسل مليح ونظن فالجزائر يكثرو zeste de citron w la vanille. Les deux ydirouhom