اريد الطلاق

[مشكلتي]

السلام عليكم
عني سنة ونصف زواج ولست مقتنعة بزوجي هو طيب ويحاول وفير كل احتياجاتي ولكنه فقير
كلما ارى اخوته اغر منهم واح مدير بنك والاخر يكمل راسته في المانيا والثالث مهندس معماري
صحيح طيب ولكن عندما اقارنه باخوته اندم على الزواج به اشعر انه اقل منهم في المستوى
اريده اكمال تعليمه مثلهم لكن هو يرى نفسه كبير 34 سنة
اظل ابكي وندمانة اني زوجتو واغار من اخوته كلهم اغنياء الا هو لا يملك شيء لا بيت لا سيارة لا رصيد في البنك والله ماعندو والو
نفكر في الطلاق بجدية ولكن معامللته لي جيدة يعاملني كملكة ويعمل المستحيل لاسعادي
لكن اكيفاقتنع به اريده ذو مستوى وذو دخل عالي اريد العيش مثل زوجات اخوته اخجل بمستواه فهو مستواه اولى ثانوي
والله سوف اجن
هل انفصل منه لانني اكتشفت انني اخطات في الاختيار ليس هو الرجل الذي كنت احلم به
كنت احلم برجل غني ذو مستوى علمي طيب لا اعرف ماذا افعل
حملت واجهضت الحمدلله اشعر ان الله اراد الاجهاض كي ننفصل بسلام
والله سخفت ندي الدار تكون عندي داري وحدي والله رايحة نهبل

[ام قصي04]

هو لي لازم يندم كي تزوج بانسانة مادية ماهيش راضية بقسمتها وكون تزوجتي بواحد غني ما يقدركش ويضربك ولا أخلاقو ماشي مليحة يعجبك الحال المهم غني نقلك اطلقي اطلقي كشما تدي شايب غني ولا ارجعي لدار باباك واحد ميزوج بيك ولا طامعة تعاودي تزوجي بفارس الاحلام جون وغني ياخي عباد ياخي نسيتي ربي الفقير يرجعو غني وفي دقيقة الغني يرجع فقير بصح مافيكش الخير كون جا عندو وطاحة بيه انتي اول وحدة تتخلاي عليه قلي اعوذ بالله من نفس طماعة

[doba]

والله راح تندمي يا مادية وربي ماراح يباركلك خلاص
حسبنا الله ونعما الوكيل

[saam83]

الله يهديك اكتري من الا ستغفار ولي العقلك الزوج الصالح افضل الارزاق .

[orchid violet]

و الله ربي يهديك يا اختي ...واش بغيتي اكتر كن هكا ...الراجل يعاملك باحسن معاملة و طيب ..و.و.و.و.و. راكي محظوظة بيه ...حتى تمنبت نكون في بلاصتك .
حسبيا الله و نعم الوكيل ..نقول متلا راح تطلبي الطلاق و طلقت ..واش راح تستفيدي ..زعمه تعاودي تزوجي ..ما شكيتش ..و تجيبي واحد عندو الدراهم ..سبحان الله ..مئة واحدة تتمنى تكون في بلاصتك و انت ما قتنعتبش واش عطاك ربي ....نصيحة روحي عاودي حساباتك الراجل بدينو و اخلاقو ماشي بدراهمو ...ولي شبعانة في دار باباها ..........

[" أبو عبود"]

والله ضحكتيني علاش انت كنت عايشة في قصر المرادية ولا في البيت لاابيض وهو لي خلاك فقيرة؟ انت اصلا شكون باين فقيرة وزوالية ومع ذلك تحلمي برجل غني ومتعلم شكون لي قبل بوحدة فقيرة واصلا انت واش هو مستواك؟
فوق لروحك واحمدي ربي لي عطاك راجل متهلي فيك ودايرلك قيمة وسقصي لي تزوجو الاغنياء واش راه صاير فيهم اصلا الاغلبية مش متزوجات راجلها ما عندوش وقت ليها..اذا حبيتي تطلقي تقدري لكن الاكيد ربي يوسع عليه ويتزوج وحدة اجمل منك واصغر منك واغنى منك لان الظاهر ان الله تعالى اراد به خيرا انك تطلقي

[hodayena]

الدراهم يجو ورحو انت معندكش القناعة حتى لو تولي غنية دائما تبقاي تخزري في يد غير وتعجبك الي عند غيرك نورمالمو هو يندم ويطلب الطلاق انتي الي لازم تخمي ديري صنعة في يدك لهي بيها روحك وتستفادي وتفيدي بيتك وراجل وتلهي عقلك

[haytoo82]

يا اختي اسمحيلي راكي غلطانة مليون بالمئة في البدايه عارفة مستواه علاه وافقتي ياك ما خباوش عليك زيد علاه تقارني في روحك بسلفاتك واخوان زوجك الي يقارن عمرو لا يريح اليوم نقارن بسلفتي غدوة باختي وراجلها وبعدها بصاحبتي هاك عمرك لا تريحي المهم المراة تدي راجل يقدرها ويعرف قيمتها هداك الاساس وما يبخلش عليها باللي عندو السعادة عمرها لا كانت في دراهم حنونة السعادة راحة بال زيد كيما قالت صاحبتي ندي راجل على قدو يعود طول يشوف فيا فوق مستواه ويحاول يسعدني ومانديش واحد بدراهمو يلعبها عليا ويعفس عليا ورانا قع لا سكنة لا سيارة لا تحواس ونورمال المهم العشرة الزينة وخلاص وزوجك يخاف فيك ربي يااختي النسا راها خلات لرجالهم الجمل بما حمل قاعلى المعاملة السيئة ولا الخيانة فكرررررررررري مليح

[جويرية الإيمان]

لا حول و لا قوة إلا بالله

واش بيك يا ختي رايحة تكفري ؟؟؟

ماشي انت لي تزوجت ربي سبحانو هو لي كتبلك هذا الزواج

و علاواش نادمة ؟ كي تزوجتي رجل فقير ؟ و علاش كنت قادرة تتزوجي راجل غني بإرادتك و لا بإرادة رب العالمين ؟!!!!!!!

سبحان الله

يقول الله تعالى :"و أَنكِحُوا الْأَيَامَىٰ مِنكُمْ وَالصَّالِحِينَ مِنْ عِبَادِكُمْ وَإِمَائِكُمْ ۚ إِن يَكُونُوا فُقَرَاءَ يُغْنِهِمُ اللَّهُ مِن فَضْلِهِ ۗ وَاللَّهُ وَاسِعٌ عَلِيمٌ"

يا بنتي شوفي لروحك برك و ما تشوفيش للناس و اقنعي بواش عندك خير ما يروحلك كلش

ألعني الشيطان راه هو لي معشش في مخك و يعمرلك في راسك و انت درتيه صديقك الصدوق و هو الكاذب الكذاب

الوسواس الخناس .

توبي لرب العالمين و استغفري و ربي يهديك إن شاء الله

و شدي في راجلك الطيب و اصبري و الفقر ماشي عيب

و يا ختي رانا كامل عايشين قدنا قد حالنا و حامدين ربي و شاكرينو

[meriem mimi46]

الدراهم ماشي هوما كلش يا اختي مهم اهنا و اوكان تدي واحد عنده دراهم اكيييييييييد يتزوج بالثانية الله يهدييييييك و يثقل موازينك

[رجاها 22]

السلام عليكم
من كلامك إنسانة مادية بامتياز
بما انك تحوسي على كل الشروط علاه تزوجتي بيه في الاول عارفة روحك تغيري وتحبي لفشوش كان عليك من الاول تستناي راجل مرفه و مانعرف كيف رايحا تكون حياتك معاه ربما عذاب من نوع اخر متقدريش تتحمليه
اللي راكي فيه ماهو الا ابتلاء من عند ربي يمتحن فيه صبرك
ماكيش مقتنعة و راضية بالنعمة اللي مدها لك ربي و اللي هي زوجك اللي وصفتيهونا يحاول ديما يرضيك ويخليك سعيدة و انت تقارني فيه مع خاوتو
عيب انك تخمي في الطلاق لمجرد هد السبب التافه
الفترات الصعبة تفوت
انظري لزواجك من منظور اخر بعيدا عن الماديات أكيد تلقاي السعادة حاولي تتاقلمي معها و تقتنعي بها
ممكن بفضل صبرك ربي يرزقكم
وادا كان على الدراسة زيدي حاولي معاه و ممكن يساعدك احد من اهلك او أهله
صلي و استغفري و ادعي ربي يفرج عليكم و يغفر لك
كاين اللي يحوسو بالشمعة على رجال طيبين مثل زوجك يشروهم بالدراهم لو تصحلهم
الدراهم ماشي كل شيئ كاين أمور اخرى تلقاي فيها السعادة كيما هد الزوج اعرفي قيمت واش عطاك ربي برك
وربي يفرج عليك

[أمل الحياه&]

الكلمة الطيبة صدقة
والنصيحة تؤخد بالكلام الطيب ...وترد بقسوته
مررت بالردود ....استغربت من التعليقات القاسية ..التي تهدف لنصح صاحبة المشكلة التي تعاني بصدق
نحن هنا لنآزرها وننصحها ونقدم لها ما يريح نفسيتها المتعبة ...وما دامت بيننا فأكيد أنها لم تجد في الخارج من ينصت إليها ويحس بها ويقنعها بالعدول عن فكرتها
لذا إخواني فلنعالج المشكلة بروية وحكمة دون تهجم على المشتكية ليكون لنا أجرا وثوابا في إصلاح النفوس وتهدئتها
ارجعوا إلى موضوع الأخ عمر : ترفقوا من فضلكم

هده كلمتي ولي عودة بإذن الله لصاحبة المشكلة

[عبد الله 22]

والله لحظة صدق واحد لن تشتريها بأموال الدنيا لا أحد ينكر أن الاجواء و المقارنة والغيرة بين ا زوجات الأخوة قد تخلق ضغط لكن مشكلتك المطروحة مادية ولن تضمني مطلقا بالزوج من غني إن كان غني هل سيكون ذو أخلاق ،بصرحة زوجك مسكين لأنه مرتبط بك لكن في الاخير كل واحد مسؤول عن اختياراته لعل الله يريد به خير عند فرقك له حاولي أن تغير الوضع من خلال تحفيز زوجك من كل الجوانب التي تظني أن فيها نقص أو أقل من طموحك

[عبد الله 22]

الكلمة الطيبة صدقة
والنصيحة تؤخد بالكلام الطيب ...وترد بقسوته
مررت بالردود ....استغربت من التعليقات القاسية ..التي تهدف لنصح صاحبة المشكلة التي تعاني بصدق
نحن هنا لنآزرها وننصحها ونقدم لها ما يريح نفسيتها المتعبة ...وما دامت بيننا فأكيد أنها لم تجد في الخارج من ينصت إليها ويحس بها ويقنعها بالعدول عن فكرتها
لذا إخواني فلنعالج المشكلة بروية وحكمة دون تهجم على المشتكية ليكون لنا أجرا وثوابا في إصلاح النفوس وتهدئتها
ارجعوا إلى موضوع الأخ عمر : ترفقوا من فضلكم

هده كلمتي ولي عودة بإذن الله لصاحبة المشكلة

بارك الله فيك على الرد الجميل هذه من أكثر المشلكة الموجودة في هذا القسم لأسف شكرا أخي على النصيحة لناصحين

[رجاها 22]

الكلمة الطيبة صدقة
والنصيحة تؤخد بالكلام الطيب ...وترد بقسوته
مررت بالردود ....استغربت من التعليقات القاسية ..التي تهدف لنصح صاحبة المشكلة التي تعاني بصدق
نحن هنا لنآزرها وننصحها ونقدم لها ما يريح نفسيتها المتعبة ...وما دامت بيننا فأكيد أنها لم تجد في الخارج من ينصت إليها ويحس بها ويقنعها بالعدول عن فكرتها
لذا إخواني فلنعالج المشكلة بروية وحكمة دون تهجم على المشتكية ليكون لنا أجرا وثوابا في إصلاح النفوس وتهدئتها
ارجعوا إلى موضوع الأخ عمر : ترفقوا من فضلكم

هده كلمتي ولي عودة بإذن الله لصاحبة المشكلة السلام عليكم
سواء كنت رايتي من اللي تعليقاتهم قاسية اولا

اردت اضافة شيئ فقط
النصح لما يكون بلطافة زائدة لا فائدة منه لازم الواحد يبين وين الخطأ و يحس بيه صاحب المشكلة
الأخت أكيد نفسيتها تعبانة لكن بعض القسوة لابد منهار أوافقك في الرأي ان بعض التعاليق لاذعة و غير مناسبة لكن ان شاء الله الأخت تفيق مع نفسها و تحس بغلطتها و تعاود تكتب وتخبرنا انها تراجعت عن فكرة الطلاق نهائيا

تقبلي مروري بود أختي

[نورة مروان]

الله يهديك مالقيت واش نقول

[sara 97]

اظن ان الشيطان يحاول اغوائك فتجنبيه
لا يكوون همك امواال وتوكلي على الله
دام هوا عمل ويتعب على ارضائك عندكي تخليه لانو نادار رايحه تلقي كيما هك
وعلى الاموال الله يرزق من يشاء بغير حساب كاين لي عندوو دراهم بلا عقل وكاين لي عندوو عقل بل دراهم
نصحيه بمشرووع صغير يديروو تنجحوو بيه وطلعووا فووق وادعي ربك يرزقكم

وزيد امواال دنياا تززول لا محاله ربي يرزقنا الجنه فالاخرة

[○•ميسون•○]

لا حول و لا قوة الا بالله

حتى الفقر أصبح عيبا؟؟ سبحان الله

الآلاف من الزوجات تتمنى زوجا صالحا حتى و لو كان فقيرا

الفقر موش عيب أختي و هاذا تفكير غالط لانو الفايدة في الهناء

و الرسمي انه متهلي فيك و دايرلك قيمة و مخليك سعيدة

و الله غير نعرف رجالا فقراء كل يوم يضربو زوجاتهم و يسبوهم و زوجاتهم لم يطلبوا الطلاق بتاتا

فيقي لعمرك و استغفري مولاك

[hicham43002]

مجرد سؤال فلنفرض انك تطلقتي فهل ستضمنين انك ستعيدين الزواج مع شخص غني خاصة بعد ما سمع ان سبب طلاقك مادي بحت وانك من النوع المادي يا اختي انك في نعمة يجب ان تحمدي الله عليها فمن كان في نعمة ولم يشكر خرج منها دون ان يشعر

[~~نهال~~]

لالا اختي لا مش لهذه الدرجة
ماتشوفيش الناس كيفاه يقولك نلقى شخص طيب و لو ماعندوش فرنك؟
زعما هوما شفتي امورهم المنزلية كيفااه مدايرة؟. ممكن قاري و كلش عندو و تلقايه يعاملها مش مليح
الفقر اختي جامي كان عيب
بالعكس هنا تبدين انك ايممانك بدا يضعف
هو يساعدك و مليح معاك
الكلمة الطيبة مفتاح الزواج السعيد
الفقر جامي كان عيب
و حطي في بالك انو ربي هو الرزاق
و انو دوام الحال من المحال
و كل واحد خلقو ربي لحاجا ممكن هوما عطاهم العلم و انشغلوا بيه و نساو اخلاقهم و زوجك عطاه ربي الطيبة
علاه الرسول عليه الصلاة و السلام كان غني؟ طيبة الرسول عليه الصلاة و السلام جعلت جميع المة الاسلامية تشتاق لرؤيته
لقيتي زوج صالح يكون معاك وقت الشدة لازم توقفي معاه و ادعيلو
ربي قادر على كل شيء
في يوم و ليلة قادر يقلب الفقر لغنى
* الم يجدك يتيما فآوى و ووجدك ضالا فهدى و وجدك عائلا فاغنى *
تسمعي صوت الديك قولي اللهم اني اسالك من فضلك العظيم و ادعي و استغفري
* انه كان غفارا يرسل السماء عليكم مدرارا*
حطي ثقتك بربي و ثقتك بزوجك
و لو تتركيه تأكدي رح تندمي حياتك كاملة
كأنك لم تتصفحي المواضيع الموجودة هنا
شوفي حالة بنات اخرى او شباب تولي تقولي مشكلي مايساويش ظفر مشكلتهم
يكون زوجك وش يكون فقير مريض
مادامو يخدم و يحاول يسد حاجياتك اياك و تخليه و انتي ثاني اوقفي معاه
الطيبة ماتجيش بالقراية
كاين قاريين تلقاهم نافخين رواحهم كي الدجاجة و هوما الداخل هواء و كاين تلقايه جاهل و كريم مع الناس
اياك تخليه
اذا خليتيه مانسمحلكش
رغم اني مانعرفكش

[mounia 85]

وعلاش ضمنتي باللي عايشين خير منك والله الغنا عمرو ما يجيب الهنا ...انا وحدة من الناس دخل زوجي متوسط وعايشين الحمد لله واخت زوجي ماشاء الله راجلها لاباس بيه بصح هي تغير مني تشري كيما قشي وتجي عندي غير باش تشوف واش شرينا جديد حتى مرة راجلها قال لراجلي اختك راحا تهبلني بيكم ام شراو ام جابو ...يعني يمكن نسا خاوتو راهم غايرين منك كي يشوفو راجلك يحبك ويتمناو يكونو كيفك..ونزيدك اغلبية الرجال اللي عندهم المال عينيهم زايغين احمدي ربي اللي راجلك فقير ويحبك والله غير غاضني راجلك وطريقة تفكيرك غالطة

[~~ نَــدَى الــرَّيــحَ ـــــآن ~~]

بالشوية على المخلوقة رجعوها لعقلها لكن بالتي هي احسن

اختي الغنى و الفقر كله بيد الله سبحانه و تعالى
انظري الى الجانب الممتلئ من الكاس و انتي وين شايفة سلافاتك كيفاش يعاملو فيهم رجالهم
اكيدر اكي تشوفي في الظاهر فقط

احمدي ربي و متنسايش لي يقر بنعمة ربي سبحانو يزيدو

اللهم اذا كنتي فعلا مش قانعة هاذيك حاجتك ثم نقلك روحي لدار باباك
النسا عازبات و مش لاقيين رجال حتان تلقاي انتي المطلقة

خممي بعقلك و متشوفيش للمظاهر

[دعاء المحبوبة]

ربي يكون في عونه- زوجك-، ويرزقه الزوجة الصالحة التي تقدر ظروفه، وتكون عونا له.
ربي يصلح الأحوال

[الجواهر]

لا يعرف الانسان قيمة الشيء الا حين يفقده
ستعرفين قيمة زوجك لو فقدته و انا ادعو الله ان يهديك فالسعادة لا تشترى بالمال
و الرزق من عند الله .. و سترزقين من حيث لا تحتسبين
و اخيرا .. من يضمن لك الزواج الثاني ؟؟؟؟؟؟؟؟؟؟؟؟؟؟؟؟؟؟
و يكون الزواج من غني ؟؟
واغلب الاغنياء يفضلون البكر و ليس امراة مطلقة ؟؟

[hamzagolf6]

لا حول و لا قوة إلا بالله