خطيبي تغير معي

[مشكلتي]

السلام عليكم
انا فتاة 21 سنة عشت اروع قصة حب و الحمد لله درنا الخطبة و الفاتحة مع انو خطيبي صغير في العمر اكبر مني بعام برك ( 22 سنة ( بصح كنت نحس اكبر لانو رزين و فحل و خدام و الاهم متدين
بابا في الاول تردد قالي واحد تخرج جديد لازملو وقت باش يوجد روحو بصح انا تمسكت بيه و هو بقا رايح جاي عليه حتى وافق
المهم في الاول قبل الخطبة و حتى في الشهر الاول تع الخطبة كنا روووووعة جامي يعدي نهار ما يسقسيش عليا و يبعتلي ميساج متهلي فيا و كلمة سامحيني ديما على سانو بسبب و بلا سبب ,, كنت نحس روحي اسعد وحدة في الدنيا و كنت نعبرلو على حبي خصوصا بعد متا عملنا الفاتحة لانو زوجي شرعا امام الله و لكن يشهد ربي انو علاقتنا بقات دايما بالاحترام و لا انا و لا هو زدنا في الهدرة
المهم مشكلتي انو تبدل معايا ولا عادي كي يعدي نهار و ما يسقسيش وليت نبعث ميساج 3 ; 4 سوايع باش يرجع و كل مرة حجة راني خدام. كنت نلعب بالون بعد ما كان الميساك يرجع في اقل من 3 دقائق
يقولي الساعة الفلانية نعيط ايييييييه لا قال 4 نعرفها 6 و لا قال 8 نعرفها 10 راح يهبلنييي
حكيت معاه قتلو وش هاد التغيير وعلاش وليتي قاسي معايا هك قالي انتي برك حساسة فوق اللازم
تعدي ايامات نحب نرجعلو وش يدير فيا مثلا يعيطلي نخليه قداه من مرة باش نرجع بصح كي جيت نخمم لقيت بلي ماهوش حل
هو يمكر و انا نرجع وش يدير وين رايحين ?? راني نخمم في فترة الخطوبة اللي راح تكون 3 سنين حتى نكمل قرايتي و يوجد روحو هو لانا راح نبداو من الصفر ,,, هادو شهور صرا هك مالا بعد 3 سنين كيفاش ????
راح تقولولي نقصي من الهدرة و الله نحكيو مرة في النهار و برك ,, تصورو وقت القراية كنت نقعد مع بنات مش حتى مخطوبات تيليفون ما يحبسش : الو تغديتي ? الو لاباس ? و انا ما علابالوش خلاص بيا و الله ماني غايرة بصح حاسة انو عاد مهملني
ساعات نقول كي كنت بكري مش مقيماتو بزاف كان يجري ورايا صح نحترمو مي ما كنتش نحوس عليه بزاف كان يهبل عليا و يحبني اكثر

قولولي وش ندير ? مش قادرة نستوعب بانو ولينا هك بعد ما كنا اكثر من الروعة !!! زعما مازال صغير صح على تحمل المسؤولي? هو كي رفض بابا قتل رووووحو باش لقا خدمة و عاود رجع حتى قبل
افكار بزاف في راسي و ما لقيت ما نعمل راني حكيتلكم جزء من المعاناة و الله ما عاد مهتم بيا كيما بكري تغير 180 °

[غزة في قلبي]

الله يصلح الاحوال بيناتكم و يجمعكم على خير
حاولي معرفة السبب لتغيره لربما هناك امر ما يقلقه

[amina260]

الله يهنيكويريح بالك ويجمعكم على خير

[bellaluna]

يا أختي إنت إخترتي رجل من سنك و في بداية المشوار و الدنيا صعيبة لازمها جهد و شقاء و تعب يعني الدنيا موش كان حب و غرام..
لازمك تصبر لين يكوّن روحو و ربي يهنيكم..

[fayolla]

ربما هذا التغيير راجع لاختلاف طريقة التفكير بين الجنسين فقط اسالي نفسك سؤالا واحدا هل ما عشته هو حقا ##حب ## كما اسميته لان لاهتمام نتيجة وليس مطلب اسال الله لك التوفيق و سداد الراي لان الاختيار في قضية من هذا النوع يحتاج لاشواط من التفكير فليكن الله في العون

[ranou gigi]

يابنتي كبري عقلك عمرك شفتي انسان مايتغيرش اي انسان لما تعرفيه في الاول اكيد مع الوقت كي تعرفيه مليح راح تشوفي بلي نظرتك ليه تغيرت
و انتم ماشاء الله كبار و راح تتزوجوا و لازم تنسي ايامات المراهقة و ربي اهنيكم يارب

[فريال العلمية]

اختي متقلقيش روحك كيما يقول المثل دوام الحال من المحال
انتوما حبيتو بعضاكم و الحمد لله راهو خطبك يعني يحبك هو تاني و متمسخرش بيك و العمر ماشي مقياس
انا على حساب هدرتك حسيت بلي يحبك و بالاك راهو عندو كاش ظروف برك حاولي تتقربي منو بلاك يحكيلك
ربي يهنيكم و يجمع شملكم و تسكنو تحت سقف واحد كي ليو
ادعيلي نجيب الباك يا اختي

[oum anas 69]

ههههههه أسمحيلي حنونة و الله ضحكتيني ... نتي برك لي راكي تقلقي في روحك هو لاباس عليه
فقط هو إنتقل إلى مرحلة أخرى من الحياة يعني بكري كان يجري موراك وهبل و قريب قتل روحو باش تطيحي في شباكو و ضرك كي قبلتي بيه أرتاح و تهنى و تنفس باش يريح شوية يعني بمعنى آخر ضمن عليك بلي راح تولي ليه
ياأختي ننصحك عمرك ماتزيري راجلك خليلو متنفس شوية ماكيش أنتي كل حياتو بل أنتي جزء من حياته لأنو عندو نفسه و عائلته و أصحابه و أحبابه و خدمتو ووووووووو
و الراجل بطبيعته يحب الحرية و مايحب حتى واحد يقيدو وأنتي لازمك شوية تثقلي روحك و ديري لروحك شوية عز و ماتقعديش تحاولي فيه و نهار كامل ونتي دايراتو في بالك... عيشي حياتك عادي أتعلمي طبخ أخدمي جهازك بيديك وشغلي روحك بكل ماهومفيد باش تعقبي وقتك و ماتخليش الشيطان يوسوسلك حتى يفرقكم .. هاهو ماهوش يعبرك .. هاهو ماوش مقيمك .. مايعيطلكش .. مابعثلكش ميساج .. وأووووووب تلقاي روحك مرضتي بالوسواس يالطيف
كيما وصيتك ماتزيريش الراجل حتى يمل و يطير من يديك
أكثري من الدعاء و ربي يجمعكم على خير

[first first]

راي قريب من راي ام انس..........براي الان خطبك .....يعني انتقل من ىمرحلة لمرحلة.......الان راهو مطمئن بانو نالك.
ثانيا ..قلتي ولا يخدم.....يعني راهو مشغول بالنسبة لقبل.
وثانيا.....مايغروكش صحاباتك......زعما يعيطلها يقولها تغدتي؟؟؟؟؟؟؟؟؟؟؟ا ..والحقيقة جامي سمعت وحدة مزوجة عيطلها راجلها قالها تغديتي ولا لا.......لكان عيط سور يسقسي واشي هو الغدا........يعني الخرطي تاع البنات غير نحيه من بالك....وانت رايحة تزوجي.لازمك تتعلمي شوية واقعية.........................انتوما تعزو بعضاكم.حاجة مليحة وربي يدومها.......ونصيحتي .كبري عقلك وخممي بواقعية باش دوم لمعزة.....................وماتخليش شيطان يدخل بيناتكم...........................دوك الحلال لازم تحافظو عليه.
...............يااختي.....................حطي في بالك بلي مادام خطبك .ومازال خاطبك.راهو يعزك..................وماتسنايش يعيطلك صباح وعشية....مناه كاين ناس عمليين ومايقعدوش.قادر قالك نعيط على 4 .صارتلو حاجة .جاه تلاقا صحابو.....حتاجو باباه...........الخ .انتظر حتى اصبح متفرغ وعيطلك .عادي.
واخيرا....................لربما كثرة تعلقك به خلاتك تحاسبيه على كل صغيرة وكبيرة.يعني كي ماعيطش على 4 سو من 4 ل 6 وانت تخممي.

ماتقلقيش روحك اختي..........................ومادامك عندك3سنين قبل الزواج....حاولي تهيي نفسك لمسؤولية اسمها اسرة وزواج.هكا دوم سعادتك.
Bon courage

[bello angel]

يا اختى انا عشت نفس حكايتك بادق تفاصيلها لكن في الاخير قنعت روحي بلي راهو خيرني نقاسمو حياتو و يحبني و بلي نقص اهتمامو لانو قبل كان يجر ي باه ما نضيعش من ايدو بصح درك راه تهنا بلي وليت حلالو
هادا شي نورمال متقلقيش روحك حنونة ربي يهنيييييييييييك

[لحن الحياة.]

:1::1::1::1::1::1::1::1::1::1:

هاهم لبنات لقولك الحل
ارواحي لقسم الكروشي و ابداي توجدي فجهازك تنساي وبالعكس تولي انتي ما عندكش لوقت باش تهدري و تستمتعي معنا
نستناوك اوكييييييييييي

[الوردةالجورية]

اختي انا انجاوبك انشاء الله اني مريت بنفس المرحلة انتاعك هو كي كان مشتق كلمة حي كان ايدير المستحيل باش ايخاي قلبك يرقاق اعليه ويخليك اتحبيه وتعودي اتعبريلو اعلا حبك وبعد ما اعدتي اتعبريلو اتغير هذا السبب اختي حاولي ماتعبريش لانو بعد الزواج يصماط كلش من الاحسن مطوليش فترة الخطوبة لاانها رايحة ا تسمط كلش لاحبيتي تقري ا ذا خلاك تقري عندو معليش اما انك اطولي من الاحسن لا
وهذا اختي عن تجرية وانا اقسم بالله علي ذلك ياختي حاولتي ايدري قيمة لنفسك لانك بالشوية رايحة تسمحي فاي شيء وتقولي معليش الحب مافيهش كرامة وهذا راجلي لكن لا لازم ايكون حدود ولي عودة انشاء الله

[صَمْـتْــــ~]

السلام عليكم
انا فتاة 21 سنة عشت اروع قصة حب و الحمد لله درنا الخطبة و الفاتحة مع انو خطيبي صغير في العمر اكبر مني بعام برك ( 22 سنة ( بصح كنت نحس اكبر لانو رزين و فحل و خدام و الاهم متدين
بابا في الاول تردد قالي واحد تخرج جديد لازملو وقت باش يوجد روحو بصح انا تمسكت بيه و هو بقا رايح جاي عليه حتى وافق
المهم في الاول قبل الخطبة و حتى في الشهر الاول تع الخطبة كنا روووووعة جامي يعدي نهار ما يسقسيش عليا و يبعتلي ميساج متهلي فيا و كلمة سامحيني ديما على سانو بسبب و بلا سبب ,, كنت نحس روحي اسعد وحدة في الدنيا و كنت نعبرلو على حبي خصوصا بعد متا عملنا الفاتحة لانو زوجي شرعا امام الله و لكن يشهد ربي انو علاقتنا بقات دايما بالاحترام و لا انا و لا هو زدنا في الهدرة
المهم مشكلتي انو تبدل معايا ولا عادي كي يعدي نهار و ما يسقسيش وليت نبعث ميساج 3 ; 4 سوايع باش يرجع و كل مرة حجة راني خدام. كنت نلعب بالون بعد ما كان الميساك يرجع في اقل من 3 دقائق
يقولي الساعة الفلانية نعيط ايييييييه لا قال 4 نعرفها 6 و لا قال 8 نعرفها 10 راح يهبلنييي
حكيت معاه قتلو وش هاد التغيير وعلاش وليتي قاسي معايا هك قالي انتي برك حساسة فوق اللازم
تعدي ايامات نحب نرجعلو وش يدير فيا مثلا يعيطلي نخليه قداه من مرة باش نرجع بصح كي جيت نخمم لقيت بلي ماهوش حل
هو يمكر و انا نرجع وش يدير وين رايحين ?? راني نخمم في فترة الخطوبة اللي راح تكون 3 سنين حتى نكمل قرايتي و يوجد روحو هو لانا راح نبداو من الصفر ,,, هادو شهور صرا هك مالا بعد 3 سنين كيفاش ????
راح تقولولي نقصي من الهدرة و الله نحكيو مرة في النهار و برك ,, تصورو وقت القراية كنت نقعد مع بنات مش حتى مخطوبات تيليفون ما يحبسش : الو تغديتي ? الو لاباس ? و انا ما علابالوش خلاص بيا و الله ماني غايرة بصح حاسة انو عاد مهملني
ساعات نقول كي كنت بكري مش مقيماتو بزاف كان يجري ورايا صح نحترمو مي ما كنتش نحوس عليه بزاف كان يهبل عليا و يحبني اكثر

قولولي وش ندير ? مش قادرة نستوعب بانو ولينا هك بعد ما كنا اكثر من الروعة !!! زعما مازال صغير صح على تحمل المسؤولي? هو كي رفض بابا قتل رووووحو باش لقا خدمة و عاود رجع حتى قبل
افكار بزاف في راسي و ما لقيت ما نعمل راني حكيتلكم جزء من المعاناة و الله ما عاد مهتم بيا كيما بكري تغير 180 °
السّلام عليكم ورحمة الله وبركاته

أختاه الأمر ليس بالحجم الذي رسمتِهِ فاستبقي ثقتكِ بزوجِك وكوني عونا له في التّهيئة والجدّ من أجل تحقيقِ حياةٍ كريمة لكما -بعونٍ من الله-

المعلوم فاضلتي أنّ أولى سنوات الحبّ يكلّلها الحماس الزّائد في تقرّب الطرفين لبعضهما..خاصّة قبل حدوث المراد (أي الخِطبة)
حيث يبذل كلّ طرف جهده لإيصال صورة لائقة عنه وقد يتفنّن حتى في تبليغ مشاعره..

وبحالتك ذكرتِ أنكما قبل الخطبة كنتما أكثر قربا، ولأنّ الخِطبة تمّت وقُرئت فاتحتكما فما حدث هو أنّ تفكير زوجكِ وقفَ على فكرة أنّكِ له -إن شاء الله طبعا- وأنّه سيجد الوقت الكافي للتعبيرِ لكِ عن حبّه بعد الزّواج والظّاهر أنّ اهتمامه الآن في كيفيّة تعبيد الطّريق لزواجكما ولتوفير متطلّبات حياتكما
فلا يجب أن تشغليه عن ذلك لأنّه الأنفع لكما للتمكن من بناء بيتٍ متينة أسسه.

فكّري بهذا الشّكل وسوف تستشعرين راحةً كبيرة واعملي على دفعه لذلك..
وأشعريه أنّك تساندين خَطوَه ولا تنساقي خلف زخارف الأمور من (رسائل غراميّة) يسهل إطفاء تأثيرِها
إن قابلكم أوّل مشكل من مشاكل الحياة اليوميّة (لا قدّرها الله)

عليكِ أختاه أن تظهري له في صورة المرأة الواعية الصّبورة والمخلِصة..
فإن تجاهلته ساوره الشكّ وقد لا يجد أحدا ينصحه فيتسرّع في الحكم عليكِ.

أيّتها الكريمة ما يهمّ هو ما بعد الزّواج لأنه (كلّ شيءٍ للطّرفين) ولن تنجح حياة الزّوجين إن لم يكونا على قدر مسؤوليّة الزّواج.

وفقكما الله ويسّر أموركما وجمع بينكما على خير.

[naamane3]

شفتي عندما يأكل شخص ما طارطة بيتزا في آخر وقت المساء
ثم عندما يرجع الى البيت يجد عشاءا شهيا طيبا فلا يستطيع ان يأكله
هكذا حالك مع خطيبك عشتما قصة حب ولحضات جميله في غير وقتها
فلما جاء وقتها لم يحد ما يفعله فنتج عنه قلة الاهتمام
وهذا ما تشتكبن منه وللأسف ليس له حل
انصحك بالتوبة على ما فرطت ثم كثرة الاستغفار
عسي ان يتجدد في قلبه الحب الحلال

[doba]

الله يصلح الاحوال بيناتكم و يجمعكم على خير

[محــــــ النقاب بــــة]

السلام عليكم و رحمة الله و بركاته

سلمت يمينكم first first ... صَفْـوَةُ النّفْـسْ~ ....oum anas

انتي عشتي فترة الخطوبة قبل وقتها // يعني كي كان يجري موراك حسب قولك // ...

و حتى لو ما عشتيهاش يا فاضلة ... كان رايح يدللك فترة و يبدى يتغير لأنو يعلم انو زوجتو واعية ...الحياة مش كلها حب و غزل ..

راهي مسؤولية جايتكم .... و هو يخمم ما بعد الزواج .... لازم يوفرلك كل المتطلبات باش يعيش معاك اجمل الأيام ...

انت فقط اثبتيلو بلي راكي فاهماتو ... و ما تفرضيش عليه قيود حتى لا يؤول الامر الى خصومات تافهة ....

فقط ننصحك ما بين الخطبة و الزواج إستغلي وقتك بتعلم أي حاجة تساعدك على ان تكون أسرة مثالية ....

و الزوجة الذكية هي الي يزيد بحبها زوجها بعد الزواج مش في فترة الخطبة ....

موفقة يا طيبة .

ملاحظة: إياك من تقنية ارجاع الصاع صاعين: إذا هو ما هزش عليك ما تهزيش عليه انتي تاني إنتقاما ..؟؟؟؟؟؟. و لا نثقل روحي عليه

راهو زوجك ما ثقلي روحك ما تخفي روحك. ابقاي كما انتي كيما حبك اول مرة ... فقط زيدي انك انتقلت من مرحلة فتاة مراهقة الى

المرأة الشابة ^^

[بلسم غرام2018]

الله يصلح الاحوال بيناتكم و يجمعكم على خير

[عنابة أبوها]

والله عادي اختي راكي تقولي بللي يعيطلك مرة في اليوم واش بغيتي وزيدي انت على حساب كلامك مازلت تعيشي المراهقة لازم تكبري مخك وهو تغيره امر عادي ولازمه مايبقاش غير يكلم فيك ويرسلك لي ميساج لازم يشوف روحو يشوف خدمته يضمن مستقبلك انت وهو وخليه يجمع روحو وربي يهنيك اختى

[VIVI]

ya khti ana radjel w tani kot khateb wa7d kifkif lage kifkoum w men ba3d sra haka el machakil radjel dima 3andou hmoum w machakil hada khtibek sa3fih ghi b chwia w nti b rou7ek choufi hada taghyir wach sebtou w 3lach haka w mn galbi rabi yhanikoum w yfara7koum

[boudov]

الله يصلح الحال
انا في راي شوفي واحد طايق على روحو كبير او مالك عقلوا من 30-35 سنة وزوجي
اخطيك من الخرطي تاع الحب والمحبوب راه غير لعب تاع ذراري مول العشريين راه غير فرخ يلعب. زيد سقسي تلقاي لبنات اكل دارو خطيب وحبيب نتيجهم وبعدها راح اللعب .
هذا ليس مجرد راي بل اكثر من نصيحة ليك والمثالك