مشكلتي

[مشكلتي]

السلام عليكم ورحمة الله

بدايه انا شاب عندي 30 سنة أعزب , نخدم في صيدليه

قبل عام اخي الي قل مني صاحب 25 سنه تزوج وكانت الشروط الموروثه
تتزوج يعني دارك وحدك ومسؤوليتك تتحملها انت

لكن هذا الاخ رجع بعد 3 اشهر يحمل شهادة الفشل في تسير اسرة
وبعد محاورات ومحاورات كلمني الوالد وقالي اخوك محتاجك وانت راك خدام ومكاينش الي
تخدم عليهم
عليك الدار وهو يصرف على اهله !
المهم كرينالو الدار وسلكناها لـ 6 اشهر مدفوعه بيها بالغاز الكهرباء ....
يعني عليه يصرف
بعد هذا معجبوش الحال
قالك الصرفان ميكفينيش والخدمه تاعي ماشي دايمه
قاتلي الوالده عاون خوك انت شهريتك ممتازة مدلو ومبعد تحاسبوا
ومدينالو كل شهر مليون وقلت العوض من عند ربي

المهم مشات الحياة وقبل شهر غبت يومين فقط يعني اقل من 48 ساعه
ورجعت لقيت اخي وزوجته في الدار مع كامل العفش

ولقيت اهلي بالاب بالام
:
خوك راح يسكن عندنا نديبانيوه حتى يلقى خدمه والسلام
مقلناش
قلت ربي يهني
بصح لكم ي الاخوة ان تتخيلوا
دار بـ 5 غرف وماشي هذيك الواسعه يعني اذا اتفتح الباب الي برى كل الغرف تبان + حوش صغير


والغرف مقسمه كالتالي
وحدة تاعي
وحدة تاع الشايب
وحدة تاع العزوز ووزوج خواتاتي
وحدة صالو
والاخرى حكمها خويا
................................
كلما دخلت تفاجات بزوجة اخي في وجهي ’ نقعد في الغرفه غير صوتها الي واضح ’ نقعد في الصالو مرت خويا
والمشكل ني خمار ني سترة ع الذرعين ني صوت مكتوم والحال هذا ميرضاهش حتى واحد


المهم هدرت للوالدة وقلتلها متصلحش
الراجل الكرا مكملوش وخلا الدار هكذاك
الصريف ميصرفش
الخدمه يضال برى ويقول مكانش
ومرتو متحشمش
وانا عادي العفيس عليا
صدقوني يا الاحباب انا والمحبوس كيف كيف
حتى اني ركبت كل التجهيزات في الغرفه تلفاز مكيف ... بصح حالتي ما يعلمها غير ربي


الوالدة سكتت وبعد ايام جابتلي الحل

انت تخرج تكري حتى يلقى خوك حل لانك قادر وميخصك حتى حاجه
وشهر رمضان وقت الفطور ارواح

بالله عليكم كاني منيش ولدهم خلاص
والقرارات الي عداو عليها كامل العايله الي تزوج يخرج وله المسؤوليه تلغات في لحظه

المهم هدرت مع الوالد و الوالده بلي

راني خارج باذن الله وحتى الفطور ربي يخلي المطاعم وبالهنا
عندكم حق الزيارة مرة كل جمعه بعد الصلاه


وش رايكم ؟

بالنسبه للي يقول تزوج وعلاش عايش هكذا ؟
لو لقيت بنت الحلال منفرطش وربي يوفق

[نورسين.داية]

سلام عليكم

أشارك في هذا القسم و أنا على قناعة برأي
لكن في مشكلتك من هذا النوع يصعب حلها .....إلا من دوي خبرة و رزانة لأنه يوجد في الوسط الوالدين .................و رضا الوالدين أولى من رفضك لإعالة شقيقك المتكل عليك و على والديه ................
أخي مسألة الكراء بالنسبة لك نفقات زائدة ....بالمقابل الأخ تزوج ...و عليه تحمل نتائج قراره ....هو انه تزوج دون أن يحسب حساب كيفية تغطية مصاريف دلك الزواج ..............في آخر المطاف كان على حسابك أنت
و الصراحة شخيا هذا ما اكرهه في حياتي هو اني اتحمل نتائج أعمال غيري ....
بالتالي نصيحتي هي الكراء إتقاء لأي مشكل مستقبلي مع زوجة الأخ كونها غير محتشمة في المنزل ....و حتى مع الأخ حفاظا على العلاقة العائلية و رضا والديك عنك ................وفقك الله أخي

[ranou gigi]

اه ياأخي مشكلة صح حلك حتى انت تشوف حياتك و تستقر و تتزوج كيما قالولك و بنات الحلال ياسر شكون الي قالك مكانش انت توكل على ربي و ان شاء الله الي كاتبة ليك راح تكون من نصيبك
و كيف كيف ماتنساش عائلتك مهما كان تبقى عائلتك و لازم تراعي الظروف

[كلمة و ابتسامة]

ربي يوفقك و يعينك خويا

[ام محمد أدم]

الحل هو تحوس على بنت الحلال و تستقر
نتا راك تصرف على عايلة بلا ماراك متزوج
مالا روح اتزوج هاكا خوك مايزيدش يعول عليك و يتحمل مسؤوليتو
و ماتقولش ماكانش بنات بنات الحلال كاينين غير هما فتش تلقا
ربي يسهلك امورك و يفرج عليك

[cherry blossom]

السلام عليكم

يا أخي الأمور ماتتحلش هكذا , خوك هذا راهو كبير نورمالمو يخدم ويصرف على روحو وعلى عايلتو , انت اصلا غلطت كي مديتلو دراهم , معليش تعاونو مي مش تبقى تصرف عليه حتى انت عندك حياتك
اما انو تخرج تكري وتعيش كي المغترب و رمضان تفطر فالمطعم هادي ماجاياش خلاص
الحل تهدرو معاه انت والوالد بالعقلية ولا بالقباحة , يحدم على روحو ويكري دار ويعيش هو ومرتو مش يتزوج ويبقى حاصل في راسكم هكدا ما فراتش
وربي يوفقك

[abdelhamid24]

السلام عليكم
سمحلي اخي راه صاريلك كي حاسي مسعود بالنسبة ليهم ما يكملوش منك حتى تنشف
و نهار اللي تقطع عليهم يلوموك غي انتى.
مشكلتك من صنعك .اين موقعك من العائلة.افرض نفسك منطقك ...مصلحتك اخي
طاعت الوالدين من طاعة الله صح.لكن في المعروف و المعروف هو الحق و حقك اخي راه ضايع و يزيد يضيع اذا كملت بهذه الطريقة
اخوك قفز على روحه -بمنطق هذا المجتمع -وحط كل العائلة في الامر الواقع. وانت اللي تدفع تحت مسمى المساعفة ثم طاعة الوالدين
الوالدين هذا ابنهم ما يفرطوش فيه .لكنك الحلقة الضعيفة في المعادلة
راك تلم باش تتزوج ؟....
فكر اخي وستجد المخرج بدون مشاكل كبيرة
حاول تكون بخيل .لا تحاول ان تكون بطلا .حسس من حولك انه ايضا لك مشاكل تحتاج لحل .

اذا غيرت تفكيرك غيرت واقعك

اخي لازم تبقى في البيت .هذا حقك و اسمحلي -زوجة اخوك هي اللي لازم تحشم-ماشي انت
المؤمن القوي خير من المؤمن الضعيف. كون قوي اخي يكون ربي معاك

اسمحلي اخي اذا كثرت عليك ولكن في عالمنا هذا ناس الملاح ياكلللللللللوه

[zahra96]

اخي صراحتا انا لا ادخل هذا القسم كثيرا وادخله عندما اكون على وشك الدخول في حالة ياس لكي اجد مشاكل تفوق مشاكلي بكثير فانسي كل مشاكلي واصبح افكر في مشاكل غيري واحاول مساعدتهم على تخطيها
مشكلتك قسمت قلبي ليس شقين فقط بل الاف القطع المتناثرة من جهة والديك اللذان وجب عليك طاعتهما وعدم عصيانهما والبحث دائما على رضاهما ومن جهة اخرى اخوك الغير مسؤول على هوى ما حدثتنا وشعورك بانك غير مرغوب في عائلتك ..........
المهم اخي ماهذا الى اختبار من الرحمان واسال الله ان تنجح في هذا الامتحان وتكون من الصلحين الفائزين اتمنى ان تكون زيارتك لوالديك اكثر من يوم واحد في الاسبوع لا تنقطع عنهما ابدا اما اخوك ايضا فلى تقطع صلتك به وكن قريبا منه وان شاء الله تكون من الناجحيت
واخيرا لا انا ولاغيري سيساعدك اله وحده من يساعدك تقرب من الله ودعوه في كل وقت واقرا القران وربي يفرج عليك ان شاء الله

[الجواهر]

اكري و اتهنى و ابحث عن زوجة

[bellaluna]

نصيحة لا تخرج من منزل والديك إلاّ لعش الزوجية و إن كان هناك شخص عليه ان يخجل من نفسه فأخاك و زوجته..
عش حياتك طبيعي و تصرّف طبيعي و استهلّ رمضان بالبركة و دعاء الخير من الوالدين و مصاريف المنزل عليك أن تراجع حساباتك مع والدك لأنّ ما تعيشه الان هو استغلال مجحف في حقك و لا تنسى أنّك لليوم لم تتزوج و ليس لك منزل فإن كانت كلّ مداخيلك تُصرف على أخ عاطل عن العمل فمتى ستبني مستقبلك ؟

[Wassim France]

اكري و اتهنى و ابحث عن زوجة

الكلام ساهل
عمبالك ارواح واتزوج وارواح والقى زوجة في الوقت هدا
بصح نتوما البنات ماتحسوش الي يحس بيه الراجل

[ham.za]

ههههههههخ نفس حالتي سبحان الله
وكان حلي هو الكرا والحمد لله رغم المعاناة

[الناصر لدين الله]

أعانك الله أخي الكريم
وهذه المشكلة في رأيي لها أحد حلين
الأول أن تصبر وتكري على روحك
والثاني أن يضطلع الوالدان بمسؤوليتهما تجاه هذا الابن ويواجهانه بما يلزم القيام به بكل قسوة وحزم، لأن القسوة هنا في صالح الابن من حيث لا يدري، بأن يتحمل مسؤوليته الكاملة تجاه زوجت: عملا وإيجارا واستقلالية.

[عبد الله 22]

تزوج بأسرع وقت ممكن

[naamane3]

راك باين نا س ملاح ونية
ونيتك باذن الله تسلكك
وتبقالك حاجة وحدة وهي
دعاوى الوالدين

[دلال 30]

السلام عليكم:
اخي كل اقتراحات الاخوة كانت مقنعة... لكن انت ماخفتش انو بزواجك راح يكون عندك عائلتين؟؟؟ يعني تصرف ع عايلتك الي هي انت وزوجتك من جهة.. وتصرف على والديك وخوك ومرتو من جهة ثانية.... اعتقد انو حل الزواج لوحدو مش كافي.... قبل ماتتزوج لازمك توضع حد لخوك بالمفاهمة اكيييد وتحسسو بمسؤوليتو تجاه نفسو وزوجتو...... مجرد راي والله اعلم

[faraday_dz]

أنا اظن ان الخطأ في تربية اخيك
انه تربى على الاتكالية
اقتراحي حاول تحاور و الديك بالتي هي احسن ديروا ضغط لهذا الاخ لكي يتحمل مسؤوليته و تعاودو ترجعوه راجل
لانو حسب الكلام لقاها خابزة و تخيل يجيب الاولاد
نتا تقريهم
مرتو تمرض نتا داويها
والله المستعان

[هكذا سأبقى]

َ
السلآم عليكم ورحمة الله وبركاته
،ِ

لا تخلو الحيآة من المشكلات ..

ولتعلم أخي أن كل واحد منا قابل مئات الأبواب المغلقة ولم ييأس ,, فكل باب مغلق برحمة الله لابد أن ينفتح ..

فقط لا تتعامل مع المشكلة بحساسية مفرطة ، ولتدرك أن المشاكل جزء من نسيج الحيآة ..

لا تقف مكتوف الأيدي و تنتظر النتيجه .. حدد موقفك .... أعلم انه من حقك أن تعترض فالمال مالك وانت المتضرر الوحيد
في هذه المشكلة

وقد ساعدت أخاك بمآ فيه الكفآية ..وقد آن الوقت ليتحمل المسؤولية فهو ليس بعآجز ما دام قد قرر الزواج فهو قآدر على تحمل أعبائه

اذا واصلت مساعدته فانت تدفعه للتهاون أكثر ..

ليس زواجك هو الحل الوحيد ..قد يؤدي تسرعك إلى تأزم الوضع أكثر .. أو خلق مشاكل جديدة أنت في غنى عنهآ ..

لابد من استخدام الحوار الهادئ المتزن حال المواجهة ،

والتعبير عن وجهة النظر الشخصية إزاء المشكلة بطريقة هادئة بناءة بعيداً عن الانفعالات المدمرة .خصوصا أن والديك طرف في المشكلة

وطاعتهما واجبة .. ولو اننا نعلم أن قرارهما كان مجحفا في حقك..

حاول أن تقنعهمآ أنك إذا توقفت عن الانفاق على اخيك سيدفعه ذلك للتحرك ومحاولة العمل لينفق على نفسه وزوجته ..

في الوقت الحالي لا بأس ان تتنازل.. فأحسن حل ان تقوم بالكراء .. مع بر الوالدين وعدم قطع صلتك بهمآ ...

بالله عليكم كاني منيش ولدهم خلاص

انت مخطئ ..أخي ..

..تصرفهمآ نابع من ثقتهمآ بك من جهة وخوفهما على الحيآة العائلية لأخيك من جهة أخرى .. لو كنت أنت الذي تعاني لتصرفا بنفس الطريقة

هكذا هي عواطف الوالدين ..تجدهم يحبون الغائب حتى يعود..والمريض حتى يشفى ..وفي حالتك انت يقفون مع المحتاج حتى يقف على قدميه ..


عليك تحمل الأشواك التي قد تدوسها ربما يكون بلاء من ربك

ولا تيأس

فكلما أحب الله عبدا ً إبتلاه ..

فقط ..خذ بالاسباب و توكل على الله فهو حسبك ..


يفرجها ربي :)

[رثاآء]

لا حول ولا قوة إلا بالله
خوك هذا قالهم رقدو وانانغطيكم
علابالك وانا بصدد قراءةموضوعك احسست بدمي يغلي فمابالك انت صاحب المشكلة
أخي لا تتنازل عن حقك فأنت أولى بالبقاء في منزلك والديك
وبالنسبة لخوك اهدر معاه وقوله "الرجلة ماجاتش في الزواج!!" الرجلة في تحمل المسؤولية
وكيفاش هادي انت تكريله؟ وتصرف عليه من الفوق؟والله إيلا غاية خويا راك غار الدراهم بالنسبة ليهم
ووالديك للأسف راهم غير يزيدو يقلشو فيه هادي يقولوهاتربية القطن
منذنعومة أظافره وهوما يديروله اللي راه باغيه وهذي مشي مليحة
المهم نولو للحل
الوالدين يبقو والدين بصح ما تخرجش من الدار ابقى فيها مسمار جحا وقول للوالدة المصروف اللي تجيبه انت ينصرف على والديك وخواتاتك
ووصي البنات خواتك هوما يستعملوا الوسائل اللي تجيبها مشي مرت خوك..هاديك راجلها يلتهى بيها
وما تصرفش دورو حمر على خوك قوله روح اخدم ولا اطلب ولا الله يسهل عليه
يا حسرااااه على الزمان اللي وصلناله...
خوك تنطبق عليه راقدة وتمونجي
ولالة مولاتي تاني غيركيفه قدرةولقات غطاها وزيدلها الحشمة ماكانش والخيمار الله ينوب ماجاتش حتى كيالنسا اللي يبوسيورجالهم على الخدمة
الله يهدي ما خلق!!
كان الله في عونك أخي إعذروني على تكلمي بالعامية لكن والله تعصبت وكأنني أعيش مشكلته
قوي قلبك وخليك رجل قرارات يعني أفعال

[doba]

walh ya akhi nta nass mlah weld hlallle matkhafch rabi rah ykoun m3ak w rah ya3tik el 9wa w saber w rah ymdelk bent hlallle tayba courage ya hbibi barek w rabiii sahlk w m3akk

[مليحة العرب]

و عليكم السلام ....
استغفر الله يا ربي ... يا رب فرّج علينا يا رب
تزوّج و اخرج عليهم و زورهم من الشهر للشهر ..
دورك نقولك علاه ..
هاد العائلة بكاملها والفت تتكل عليك ...المفروض الاب يحكم الولد صاحب ال 25 سنة " المراهق " يقوله شوف كي تتزوج ما نقبلكش هنا تحت اي ظرف من الظروف يعلمه المسؤولية مشي يحطوهم تحت جناحاتهم و يبقو يندبو للناس ها راه غابني ها ما لقاش السكنة ها شهريته قليلة .. عمر بن الخطاب رضي الله عنه يقول لا يقعدن أحدكم عن طلب الرزق ويقول: اللهم ارزقني فقد علمتم أن السماء لا تمطر ذهبا ولا فضة
حلّوله العينين و بقيت انت بلا شخصية و لا رأي مع احترامي للوالدين هذا مشي حل هذا راكم تفنينو فيه و مازال ما جاب دراري و نزيدكم حاجة البيوت الجزائرية اللي الولد ساكن عند والديه معظمهم الوالدين يصرفو على هاد العائلة من مرت الابن حتى الدراري ..
هادي قاع مشي حالة اللي رانا لاحقينلها و الله لازم الاب يكون حازم في هذه الامور ..
دير حياتك و تزوج و بعّد كون ما ياكلهش البحر خوك ..
و مرت خوك المفروض تعرف قدرها و المفروض تحشم على روحها و من راجلها بالصح القلب ميّت كي تدير ؟؟؟؟؟

حتى لوقتاه تقعد تفورني عليه ؟؟؟ و من بعد شهر شهرين المراة راها حامل ووجد 5 ملايين تع لوبيتال .....
حسبي الله و نعم الوكيل