شجرة القارص

[lina18258]

السلام عليكم ورحمة الله وبركاته
عندي استفسار وان شاء الله نلقى الافادة عندكم عندنا شجرة قارص في المنزل وعندها سنين مزروعة العام الاول كي زرعناها دارت 6 حبات قارص صفرين وشبان يعني كي علمت المرة الاولى ومن داك العام ما دارتش القارص وما عرفناش علاه كانت مين داك دير النوار مي يطيح وما يثمرش ادا تقدروا تقولولي واش نعملها باه تبدا دير القارص اكون ممنونة
بارك الله فيكم

[Maria dadi]

معنديش فكرة اخت

[lina18258]

بارك الله فيك على الرد

[نورةسعاد]

اختى اناء ايضا عندى شجرت قارص منذو ثلاث سنوات ولدت العام الاول حبتين ومن بعد ولت تنور وترمى النوار قلولنا القارص من انواع الحوامض تثمر بعد خمسة سنوات وانتى متنسيش اتدريلها الحديد فى التربة علب الطماطم او تشريلها الحديد الخاص بالاشجار هاذى معلوماتى
عن القارص ان شاء الله يزيدو ايفيدوك الاخوى

[lina18258]

الله يعطيك الصحة على الرد اختي ان شاء اله راني نحطلها الحديد

[source de vie]

balak le climat massa3dhache wela rahi exposé lrih

[kamel.13]

ديرلها الصدأ تاع الحديد تجيبه من علب الطماطم أو اي شئ في الصدأ في مرحلة متقدمة ، دير دائرة باش يتجمع فيها الماء وضع تحت التراب هذا الصدأ ، النتيجة مضمونة 1000ب 100 بإدن الله.

[أبو ماهر]

الحل هو في اجابة kamel.13 و نورةسعاد طريقة انعاش التربة بالحديد مجربة وناجحة 100/100ويعني نسبة الحديد في التربة عندك ناقصة
استعملي بقاية العلب القديمة (الصداء)اوجلب(شوت) الحديد المرمي عند اللحام (السودور) ودفنه تحت التربة

[& هبة الرحمن &]

بارك الله فيكم