ارجوكم انصحوني

[مشكلتي]

السلام عليكم ورحمة الله وبركاته


كان قد خطبني شخص من قبل ورض ابي من اجل اختي الاكبر مني حيث قال لي لن تتزوجي حتى تتزوج هي
وكما قالهم بابا لالا والد واخ هذا الشخص قالولو حنا منوليوش لناس قالونا لالا
بصح هو مقليش هذي الهدرة كان هو يقرا في فرنسا قالي كما نولي نوليو نجي نخطبك مر عام على هذي حتى مرة من المرات قالي على الحقيقة تاقلمت مع الوضع وتاقلمت اني لن اتزوج حتى تتزوج اختي الاكبر مني على الرغم من كثرة خطابي

حتى مرة من المرات ارسل لي مايل وقالي بلي راه خطب رحدة
انا صراحة صدمت لاني كنت اراه سيكون زوجي وقلت له انه السبب لانه لم يخبرني بالحقيقة من الاول حيث جعلني اتعلق به

المهم مر على هذه القصة 4 سنوات ولديه عام ملي خطب

معندوش بزاف ملي بعثلي وقالي بلي هو مازال يحبني وخطب واحدة بنفس اسمي قالي باه مينسانيش وقالي نبقى نحبك حتى اخر يوم في حياتي وهو قالي ميقدرش يبطل منها لانها تقربلو
وانا صراحة عندها يومين فقط ملي قالي هذي الهدرة ورانا نحكيو غير بالمايل
ومانيش راضية على هذا الامر وراني نخمم في خطيبتو ونحس بلي راني نظلم فيها
وكون نلقى طريقة باه نوليو لبعضانا نديرها بصح هو قالي مستحيل
لاه راه يهدر معايا

[little smile]

ما دام هو خطب لاه راكي تهدري معاه
اقطعي علاقتك معاه

[أم شروفة]

عزيزتي هذا الرجل يلعب بيك ..اقطعي العلاقة لأنه اولا حراااااام وثانيا خطب خلاص لكن حاولي اقنعي باباك باللي كل واحد ومكتوبه وممكن أختك ما تتزوجش فما مصيرك انتي

[eBusiness]

صدق من قال "عشاق اخر زمن" !!!

[رثاآء]

علا راكي تهدري معاك الله يرحم والديك؟؟؟؟
مشي بوك قالك ما تتزوجيش حتى تتزوج اختك؟ اختك تزوجت بعد؟؟ باه راكي تهدري معاه وباغية توليله؟
يا بنت الناس هذا راه خااااطب خاافي ربي كيما تديري يندارلك!!
تبغيها على روحك تخطبي وخطيبك يهدر مع وحدة اخرى؟؟؟
لا حول ولا قوة إلا بالله الله يهديييكم

[بصمة قلم]

قالك نحبك قولو حبة تحكمك وما تلقالهاش دواء
يا اختي الله يهديك خمي بعقلك ، راكي تظلمي في روحك وتلمي في الذنوب بعلاقتك مع هذا الكائن
فيقي لعمرك قبل ما يفوت الحال،ما تامنيش الفيلم الهندي اللي دارهولك
اللي مايقدرش ينساك يدير المستحيل على جالك مش يخطب وحدة اسمها ا على اسمك
سبحان الله حتى الكذب تاع الحمقى تصدقوه
استغفري ربك من الشي اللي راكي تعملي فيه
وكائن كيما هذا كذاب ومخادع ما يستاهلش تجري وراه

[دعاء المحبوبة]

يا اختي راكي تظلمي في روحك برك
ما ليس لك، ليس لك ببساطة
(وهذه ليست حجة مقنعة ما قدرش ينسى هو حر عمرو لانسى، ولا حابة تبقاي على اتصال به شافقة عليه وعلى ذاكرته)

[oum imane]

أختي راكي تقولي انصحوني و انت عرفا 100% ركي غالطة وين راهي كرامتك هدا راه اجيب بيك الوقت راه خطب وحدة نتاع أصح نتاع أدار (خطيبتو) و عندو وحدة مسكينة نية كي يدخل لدار ميلقاش وش ادير اجيب بها الوقت حتى تجي لي تعمرلو حياتو هداك الوقت يتفكرك بزاف.
deja كدب عليك مقلكش وش دارهم قالوا normaement اكون راجل معاك أيشد فيك مشي اروح يخطب. حتى لوكان يرجعلك أتامنيه متخافيش بلي إدرلك كيما ره إدرلها هدا راجل sans principe
هو كمل قريتو أخطب انتي اقعدي شدي فراشي راح اجي راح ابدل رايو مرحش اخليك علابلك وين في الأحلام كي ترقدي

[naamane3]

واشنو هاذ العقلية مانزوجوش الصغيرة قبل الكبيرة
ولنفرض ان الله كتب للكبيرة عدم زواج
الصغيرة ايضا نعدموهتا بعدم الزواج
تفكير سلبي وتخلف في مضهر مؤدب
اما انت فتوكلي على الله واقبلي ممن يأتيكي خاطب
واقطعي وصالك بهذا الشخص
واعلمي ان لوكان فيه خير لك لرضيه الله لك

[sali-sali]

يا بنتي ابقاي تامني

مدام خطب غيرك .. مايحبكش ومكااااااااش منها تاع مايقدرش يبطل منها

راه يجيب بيك الوقت .. فيقي بعمرك .. خمي على روحك والوضع لي راكي فيك .. خطيبتو راهي مهنية من جيهتو

بففففففففف بالخف تامنو

[amina260]

علاه نتي تحبي لوكان راكي مخطوبة لشخص وتجي تحكي معاه فتاة اخرى ويقولها نحبلك وتوحشتك وووو علاش علاش كيما هاك كيما تفكري في نفسك فكري فيها
وكون جا يبغيك كيما راه يقولك يرجع يخطبك ونقطة الى السطر علاش يلعب فيها وخطبت اسمها كيفك يشري فيك بالكذب ذئااااااااب ربي يبعدهم علينا
حسبي الله ونعم الوكيل

[منير265]

نوضتيلي القرون مالقلق ... و كيفاه هذا تهدري معاااه ... يلزم تسبقي العقل على القلب و اخطيك من العاطفة تديك للهاوية حبسي علاقتك معاه و اتقي الله

[الفاتحة]

راكي ترخسي في روحك ، سريعا احفظي ماء وجهك واقطعي هذه العلاقة النتنة فانت الآن مجرد رخيسة لتمرير الوقت حتى يتزوج.

[first first]

اختي ..........قرات من بين كلماتك انك انسانة دات ضمير..........................وعجبتني كي قلتي خممت في خطيبتو.
طبعا .انت تتمناي توليلو...........................لكن راهو خاطب.................وزيد يقولك مستحيل.................................ومن بعدد مستحيل واش تزيدي تخممي................................واش حاب؟؟؟ حاب يدي خطيبتو......وانت مازال متعلق بيك ..............او يكونطاكتي فيك باطل...ماخاسر والو.

اجبدي روحك............................يبطل ويجيك....................ولايروح الله لايردو.
خمي بعقلك.........وقلبك حطيه في الكونجيلاتور............................واش لازم ديري او باين
ربي يهنيك اختي لعزيزة.

[مريم العدراء]

راكي خايفة يلا راكي تظلمي فيها ضحكتيني حنونة راكي تظلمي في روحك هو راه خطيبها وفات الحال

استغفري ربي ومين يجي مكتوبة ما يقدر يوقف قدامه حتى واحد

يا الحبيبة الرزق بيد ربي

[selin cobbra]

اختي خلاص راه ملك مراة اخرى ... انت لازمك تقطعي علاقتك بيه وربي يعوضك خير منو
الدنيا مكاتييب والمكتوب على الجبين لازم تشوفو لعين
هو ما كانش يحبك لانو كون كان يحبك مايسمح فيك ويبدلك بوحدة اخرى

[لمسة L]

ربي يهديك اختي ، لوكان من الاول كي مقبلش باباك راكي فهمتي روحك و عززتي روحك و علاه تبقاي للذل . غلي روحك يغليك ربي . انسايه و متعاوديش هذ العلاقات راهي حرام . اصبري لمكتوبك و ربي يفرج عليك

[غربة أهل السنّة]

السّلام عليكم ورحمة الله وبركاته
أوّلا أنصحك بالتّوقف عن الكلام مع هذا الشّخص لأنّه أجنبيّ عنكِ,,
وعليك أن تقنعي والدك بأنّ تفكيره خطأ, الزّواج رزق من الله تعالى ,, وماذا لو فضّلت أختك البقاء بلا زواج أو لم يأتها خاطب أصلا
هل تبقين بدون زواج ,, وخاصّة إذا كان الزّواج من أولويّاتك

غيّري رقم هاتفك وإيمايلك و اتّق الله ولا تتكلمي معه
فهو الآن قد خطب فتاة ستصبح زوجته وأم أولاده ( و يشوفها هي الصّح) أمّا أنت فالله وحده يعلم ما نظرته لكِ
لو كان يريدك حقّا لانتظرك و لحاول على الأقل إقناع والدك
لا أن يخطب فتاة و لها نفس إسمك
الله امستعان ,,, ما هذه الحال التّي وصلنا إليها
أعانك الله أختي

[مواطنة جزائرية]

ربي يهديك ياأختي اقطعي علاقتك فورا به

ربي يرزقك باللي يستاهلك

[رُوحْ أُنْثَىَ]

كان هو غالط
ومن بعد وليتي انتي المذنبة

هو يحكي ويبعث كما يحب
انتي الي ماتردي وبلوكيه
بركاك ماتكذبي على روحك
الي ناويها راه معاها قدام ربي وعبادوا

اخطيك من الخرطي انتاع يحبني ونحبك ومانقدر نخطبك

الله يهدي