زوجي يريد طردي 2

[مشكلتي]

السلام عليكم ,, أنا صاحبة المشكلة http://www.djelfa.info/vb/showthread.php?t=1596204
مشكلتي قائمة إلى حد الان بالعكس راهي تتفاقم يوم بعد يوم , بعد وش صرا المرة لي فاتت مخبرتش أهلي بالموضوع قلت لعل تتعدل الأحوال بلا ما نكبر المشكل أكثر .. المهم قعد زوجي غضبان عليا كأنني أنا الجانية و مع ذلك قلت معليش نتنازل المرة هادي نصالحو , صدقوني رغم وش دار التمستلو اعذار و وليت أنا لي نرضي فيه " ليس ضعف شخصية لكني دفعت باللتي هي أحسن " تصالحنا و اعتذرلي على وش دار و قالي كي نغضب نولي مانعرفش وش ندير ووش نقول...و فاتت لحكاية
بعد أيام صرالي موقف معاه راني مصدومة منو ,, دخلو أهلو "كي العادة" للغرفة ديالي و هو لي ناداهم و بداو يبحثو على غرض معين كان احتاجو زوجي " بطلب منه" و كأنني غير موجودة أصلا ؟؟؟ يعني سبحان الله يبحثو في غرفتي و في أغراضي و كأنني غير موجودة و هو لي سمحلهم ... صراحة الدم غلا في عروقي لكنني ماتكلمتش لأني عارفة بلي راح يبهدلني قدامهم لهذا سكتت ,, بعد ما خرجو قفلت على روحي الباب من الغيظ .. هو كي سمع الباب تغلق رجعلي و انفجر فيا طبعا " وش بيك تخبطي علينا " " نتي ماراكيش حاملة دارنا " و يعيط عليا بكل قوة " والله نحرقك كي تجرأتي عليهم " حسيت عينيه راح يخرجو فيا
أنا صراحة خرجت عن وعيي و ليت نصرخ و قتلو " تفكيرك مش نورمال " و طبعا أول مانطقت طاح فيا يجبدلي في شعري و ضربني بكف بكل قوته,,,,, و قاللي اخرجي عليا " كي العادة" مانحتاجكش هنا و أنا " كي العادة" قعدت فالدار و مارحتش لأهلي لأنه الوالد تاعي صعيب و مستحيل يقبل نرجعلو بعد ما مد يدو عليا و بعد ماخرجني هو من دارو ,
فهموني وش ندير معاه الانسان هاذا؟؟؟؟؟ هل من المروءة مايفعله هذا الرجل ؟؟ هل تعلقه بأهله يجلعه يعاملني هكذا؟؟ قلبي تعمر منو ومارانيش حاملة نشوفو لأنه يصر على إهانتي في كل مرة
عجزت على التفكير السليم ...أفيدوني أرجوكم .. ماذا أفعل ؟؟؟؟؟؟؟؟؟؟؟

[أم محمد الهادي]

السلام عليكم لا حول ولا قوة ال بالله اختي الغالية اخبري امك بالموضوع وهي سوف ترشدك

[la perle rima]

ربي يفرج عليك ان شاء الله و يهدي زوجك و تعيشو حياة سعيدة معرقتش واش نصحك من الأفضل ندعيلك اقل شيء نديره

[أم شروفة]

اظن زوجك عصبي جدا.وكذلك اختي اللي تسكن في بيت العايلة لازم تتوقع أي شيئ .عادي . ممكن من حسن نية فتشو في أغراضك.هذا الموقف .تعرضتلو مليون مرة.. رجال اخر زمن كلمة واحدة تنوضو وموقف واحد يقلك روحي الى دار باباك.لذا عزيزتي. قرري إما أن تعيشي معاه وتنزعي الحساسيات بينكما.وتوقعي انه بكل موقف راح يحدث في حياتك راح يضربك .وإما الطلاق .وأظن لو كنت في مكانك راح اخبر اهلي.لأني أتحمل أي شيئ إلا أنه يضربني

[7anine 87]

ربي يصلح الاحوال اختى ما لقيت مانقول يمكن كون جيت فى بلاصتك نقول لدارنا لانى مستحيل نسمحلو يضربني هكا ويهينى بلا سبب مقنع اختى هو عاود ضربك يعنى ماشي ويتمادى انا نشوف انو دخلى اهلك خير لان فى هدا الحالة الكبار يحلوها كيما هو اهلو عزاز عليه انتى تانة عندك اهل وانتى عزيزة عليهم

[زبدة ذايبة]

يا أختاه كل مايحدث لك ليس طبيعيا صدقيني وأنا لاأجد الدافع من وراء هذا التصرف هو إلا أمرين اثنين لاثالث لهما :

أولا : أن زوجك قد تزوج منك ثم ندم على هذا الزواج وبالتالي أنت لاتناسبينه

ثانيا أن يكون زوجك مسحووووووووور وليس في طبيعته أو ذو مرض نفسي أو عصبي.

ما من امرأة ترضى بأن تهان وتضرب على أمور هي من المسلمات في الحياة الزوجية

أنت يا أختاه لاترين من المشكلة إلا هذا الزوج ولاتنظرين إلى نفسك إطلاقا. أنظري إلى معاناتك أنت وليس إلى مايجب أن يكون هو.

الزواج مودة ورحمة ثم ثقة فإذا ذهبت هذه الأمور فعلى الزواج السلام "فإمساك بمعروف أو تسريح بإحسان"
اتخشي مطلقا من الطلاق-وأنا لاأحرضك عليه إطلاقا- فمثل مايقول إخواننا المصريين : اللي خاف من العفريت يطلعلوا"
كوني قوية قوية قوية قوية قوية ...... فضعفك هو الذي يجعله ويجعل أسرته تتسلط عليك

خلق الله الرجل والمرأة شرع لهما الزواج كما أحل لهما الطلاق ومافي داعي أن تحبي هذا الرجل أكثر مما يستحق لأنه وببساطة مايستاهلش تدي الضرب والإهانة منو على جال باب غرفة نومك أحدث صوتا فأي سجن تعيشين فيه.

فيقي لروحك يا أختي قبل مايخلاص عليك في مستشفى الأمراض العقلية

[سجل أنا جزائري]

يا أختي في رأيي أحكي مع الوالدة و هي بدورها تحكي لوالدك مشكلتك و وضعك

و خليه هو يتصرف مع زوجك حتى يضع النقاط على الحروف معاه بطريقة سلمية فإن أبى و اصر على اهناتك فوالدك أكيد سيتخذ القرار المناسب لك فأن رأى معيشتك معه سيسبب لك ضرر فأكيد لن يعارض روجوعك الى بيت والدك

الزواج رحمة و مودة مش عنف و ضرب حتى وان حدث سوء تفاهم بينكم حسب كلامك ردة فعله غير مبرر تماما و خاصة أنتم في أشهر الاولى من زواجكم

[امال مارية]

السلام عليكم يا اختي ربي يفرج عليك و يهدي زوجك شوفي الصابر ينال في الدنيا و الاخرة ادا كنت عارفة طبعك صبورة ريحي معاه ما يدير فيها والو وتربحي تجيبي وليدات وادا ما راكيش صبورة روحي دار باباك

[بيزة الشاوية]

أنا نصيحتي لك كلمي أهلك زاد حقرك كي ضربك المرة الاولى حتي يحطو حد لهذا التصرف التافه منه و هذا حقك الغرفة مملكتك أنا نسكن مع أهله بالرغم من عدة مشكلات و تحكمهم فيه إلا أنهم ما يدخلوش لغرفتي و يعملو كما قلت أول مرة نسمع بيها

[catyem]

اختي ربي يكون معاك لان السكن مع بيت العائلة راهو صعيب و الزواج في بدايته يكون اصعب لان كل واحد يحاول يفرض رايه و شخصيته و هو حاب ابين انه كلمته مسموعة قدام دارهم
المهم هو انك نتي تحبي هذا الراجل و لا لا اذا ايه و مراكيش حبا تطلقي حاولي قدر المستطاع تتجنبي انو يضربك لانه الا والف اولي غير كلمة و يضربك و قدام الناس و كي يدير حوايج معجبوكش كي تكوني مليحة معاه قوليلو مثلا علاش مقتليش انا نحوسلك على هذيك الحاجة راني علابالي وين كانت,,,,,
راكي عروسة جديدة حاولي تفوتي وقت مليح راهي حاجة متبقى على حالها و تولي تندمي على الوقت اللي فات خلي دارهم يشريولو حوايجو و نتي كي تخرجي اشريلو كي يدخلو لشومبرا انتي روحي للصالو وسعي خاطرك معاه

اما الا نتي راكي كارهة منو هزي حوايجك و عيطي لداركم و حكيلهم كلش

[التواتي الونشريسي]

أختي الفاضلة، إختاري الأوقات التي يكون فيها هادئا وحاولي أن تذكريه بالله عز وجل وبما أوصى به النبي صلى الله عليه وسلم الرجال بنسائهم...أصلحي ما بينك وبين الله يصلح الله ما بينك وبين زوجك وأهله...إلجئي إلى الله بقلب صادق و ألحي في الدعاء وسترين بإذن الله كيف تستقيم الأمور...كل ما نعانيه من سلوكيات خاطئة هو بسبب بعدنا عن ديننا...العودة العودة إلى الله نساء ورجالا بارك الله فيكم

[أم شروفة]

الان برك شفت قداش عندك متزوجة شهرين فقط ويضربك ؟؟هاذا مش طبيعي اختي قوليها الى أبوكي والله لو كنت انا ما نحصل روحي مع واحد مثل هذا.حاولي أنك تاكلي حبوب منع الحمل.خصك انك ترتبطي مع واحد مثل هذا.وتطلقي وعاودي حياتك وما تحزنيش علية لانه ما يستاهلش

[hizia_h]

والله ندعيلك ربي يفرج عليك ويهديه ماعليك الا بالصبر قدر المستطاع ولما توصلي لمرحلة وين متقدريش تتحملي ساعتها استشيري اهلك لانو تكوني درتي لي عليك وصبرتي عليه

[منير265]

لا حول ولا قوة الا بالله .... هذا كااامل بعد شهور معدودة فقط ؟؟

حسب رأيي الشخصي يلزم تتصرفي و بلا تسامح لأنه كل ما تسامحي كل ما يتفاقم الامر و تتعقد القضية .. و الحل الأنسب :

شوف فاميلتك و بالاخص يماك و خواتاتك كبار ان وجدن مع عقلاء فاميلتو و كبارات و الكبار يكونو يفهمو مليح مش بعقلية تع بكري

صارحيهم و يلزم يديرولكم حل و يعرفو كل التفاصيل و يفهمو ..... ربي يعينك راح ندعيلك من قلبي ختي بحول الله ربي يصبرك ان شاء الله اصبري الفرج يجي

[ام ايمان16]

لا حول ولا قوة ال بالله

اختي ان كنتي راضية باهانة زوجك وضربك لك واستحقار اهله لك فابقي ساكته واكتفي بالبكاء؟؟؟؟؟؟؟؟
اختي لازم عليك تنفضي الغبار على روحك وتخبري اهلك وتشاوريهم على الاقل يقولولك كيفاش تتصرفي قبل مايتدخلو هوما في وسط المشكل؟؟واذا كان لازم يتدخلو يدخلو ضرك خير من تتطور الامور الى اسوء ؟(مع انو طورت الى اسوء ووصلت للضرب وانتي مازالك عروس؟؟؟؟؟
لازم تخلي زوجك يحس بللي ماكيش خايفة تخبري اهلك بللي ضربك ؟لانو لو يحس بللي راكي خايفة راه يتمادى في ذلك ويستمر في اهانتك وضربك كل ماسمحت له الفرصة ويقول في نفسو((ضرك نضربها وتسكت وتقبل كي العادة وماتدير والو خطراكش جايحة)))تحبي ختي يقول عليك هكذا؟؟؟؟؟
هاذا باين من النوع الجاير لي مايخافش ربي في زوجتو حتى ولو غلطت في حقو وفي حق اهلو ليست هذي هي الطريقة لتصحيح الخطا؟فالضرب ليس من شيم الرجال ابدا فهو يحقرك بتصرفه هذا ؟

هل كنتي مكرهة على هاذا الزواج؟هل زوجك كان مكره عليك؟
الحياة بينكم يبدو انها لاتطاق ولامجال للتفاهم ابدا
يبدو ان زوجك يرفض اي فرصة للتفاهم وتوضيح الامور بينكم؟
ربما يكون مسحور يوم عرسه بحيث اصبح لايطيق اي كلمة منك؟
اكثري من الدعاء الكثير بالهداية والاستغفار الكثير في اليوم خصوصا في غياب زوجك وارقي غرفتك وان استطعتي ارقي ماء وواسقي زوجك منه



ربي يصلح احوالك ويهديك للقرار السليم


ا

[حمودية]

ربي يفرج عليك......................

[حمودية]

اتخذي ماتريه مناسب قبل ان تنجبي منه اولاد

[oumhana]

الله يهديه اختي urgent urgent tres urgent خبري داركم هذا تصرف غير عادي لازم باباك يعرف قبل ما يدير فيك بدعة هذا السيد مشي نورمال بلاك عندو كاش مرض و مقالولكش ناس خداعين يا لطيف .قولي للباباك قد ما يكون باباك واعر مشي كما الإهانه لراكي تتعرضيلها الله يرحم والديك عيطي لباباك و احكيلو لكش.حتي فاميلتو مشي متأصلين كفاه يفتشو في حوايجك و نت تشوفي لوكان جاو متأصلين كهو يطلب منهم لحاجه يقولولو شوف مع مرتك هكذا يوالف ويولي يتكل عليك بصح على حسابي هاذو مشي صافيين.حسبنا الله ونعم الوكيل .حسبنا الله ونعم الوكيل حسبنا الله ونعم الوكيل.يحسبو بنات الناس لعبه .عطي للباباك ولا بد للقيد أن ينكسر سبحان الله.

[رحيل 100]

في هذه المشكلة اتساءل:هل الاهل عارفون بما يحدث و لازالوا يلتزمون الحياد ان لم يكن التواطؤ؟؟؟؟؟
امر آخر : الاستشارة تكون اولا من الله لأنه المطلع على ما هو كائن و ما سيكون و سيلهمك الصواب ,و عليه عليك بالاستخارة
ايضا : اكثري من الاستغفار و لآلاف المرات في اليوم فللاستغفار مفعول عجيب ولصلاة الثلث الاخيرمن الليل كذلك
و : اقرأي القرآن في الماء الذي يشربه لتعرفي ان كان هذا طبعه ام ان الرجل في غير وعيه
واخيرا لا تسمحي له بضربك على الاطلاق و دعي الامر لأهلك خاصة و انتي حديثة عهد بالزواج ( ما تولفيهش يضربك ,انتي جديدة ودار هاكذا لو كان تقدامي كيفاش )
اعطيك مثلا عن طريقة التعامل مع الاهل و بلباقة و ذكاء تضربين كل العصافير بحجر واحد لأن الانفعال يجلب الانفعال و يكون الشيطان في ذروة نشاطه
المثال هو : بحكم عملي كمعلمة : يدخل المدير للقسم بلا قرع للباب و بإندفاع وانا لم يعجبني الامر و اعرف طبعه العصبي و انني ان تكلمت معه فلن تنتهي الامور على خير . فتجنبا للبلبلة و لفت الانتباه .تحينت فرصة قدومه وقمت بتأنيب تلميذ عندي لعدم قرعه الباب و قلت له ستكون عندك عادة عندما تكبر و سيقول الناس بأنك مش متربي .كل هذا و المدير يسمع و من يومها لم يعد الى الدخول بدون استئذان
هذه تجربة بسيطة لعلك تقيسين عليها في تعاملك مستقبلا
المهم اختي اضيف امر آخر هذه ليست نهاية العالم و لازم تنحي من بالك فكرة فارس الاحلام و الملكة و المسلسلات التركية والاحلام الوردية ووووو لأن الواقع امر آخر خاصة الواقع الجزائري
شيء آخر انتي لست مخطئة فلا تلومي نفسك انما استنفذي كل فرصك معه لكي لا تندمي لاحقا ان قررت البقاء او الانفصال
و الاهم الاهم هو صحتك حتى انسان ما يستاهل تنهاري من اجلو و لا تجيبيها في صحتك على خاطرو
ارجو ان اكون افدتك و لو قليلا و عذرا على الاطالة ربي يفرج عليك ان شاء الله

[loufa]

السلام عليكم
اذا قيمتي روحك يقيموك الناس وإذا حقرتيها يحقروك
صحيح الزواج في بدايته صعب خصوصا مع دار العائلة لكن هذا ليس مبرر ليضربك كان يكفي خزرة منو انتي ولفتيه خلاص
قولي لامك واباك ربي يعيشهملك هوما يديرولك القيمة والعزة وكل حاجة في بلاصتها
أضيف لك بين قوسين كنتي قادرة بطريقة ذكية تخبريه انك متحبيش اللي يقيس لك حوايجك او يدخل غرفتك لأنك احيانا تتركين أغراض خاصة وتخجلين من أهله مثلا وطبعا بهدوء ًفالوقت المناسب
لكن بما انه حدث ما كان خلاص لا تتنازلي وخلي الكبار يفهموه ان وراءك أهل يخافون عليك