زوجي

[مشكلتي]

السلام عليكم
عندي عام متزوجة و سانفجر من تصرفات الزوجي
نسكن وحدنا , يخرج من السابعة ز لا يدخل الا على السادسة لشرب قهوة
و يعاود الخروج و لا يدخل حتى الساعة 10 لكي يبقى مع اصدقاؤو
تعبت من اتظاره لكي اخذ قفة الخضار للطهي متاخرا
و انا اعمل , فهمتو بالعقلانية انو عيب يخليني و هذا الشيء من اول اسبوع زواج
ما سمعليش تعبت من تصرفاتوو لي و كاني حيوانة لا يتكلم معي الا اذا كان يريد حقوقه انا تعبت
حكيت مع امو , دابزت معاه رجع لعقلو 10 ايام و عاود رجع لنفس العقلية
قوتلو صحا اخرج و لكن المصروف اصرفلي على الاقل مرة في الاسبوع , تعبت من الجوع و الخزانة الفارغة من مواد التنظيف و الثلاجة الفارغة من كل غذاء
هدرت مع ابي, جا هدر معاه و العقاب كان انو جاب امو قعدت معايا و هو راح قعد في دار ابوه زعما زعفان مني
هذاي مش معيشة
قولولي واش لازم نجير معاه كرهتو و كرهت الزواج
هل يحق لي الطلاق في هذه الحالة ؟
اهلي بعيدون عني و لا يعرفون ما يحدث لي

[أم محمد الهادي]

لا تتسرعي بالطلاق تكلمي معه فهميه الا ماحبش يفهم خليه بلا عشا وغدا

[أم شروفة]

قولي له يخليلك الدراهم وأنتي اخرجي اصرفي لوحدك.وإن لم يرضى نحي الدراهم من عندو بلا ما يفيق.واصرفي لوحدك.لا تتطلقي مسالة وقت وتنجبي طفل إن شاء الله راح يملي عليك حياتك .ما أسهل كلمة الطلاق عندك يا طفلة

[la perle rima]

ربي يفرج عليك ان شاء الله في هاد الدنيا حتى وواحد ماصابها كيما يبغي تمنيت نشوف واحد عايش و لاباس عليه و ميشكي من والو الدنيا رجعت غير هم و مشاكل يا ربي تفرج علينا

[منير265]

راني راح نتعقد من الزواج بسبب قسم مشكلتي في منتديات الجلفة هههه
على العموم ... دائما فكرة الطلاق موجوووووووودة و لكنها صعبة و خطيرة جدااا اتركيها اخر حل ... بالنسبة لزوجك ما فهمتش انا هذا مش خدام ؟؟ و يلزم يراعي شعورك و يفهمك علاه الناس رجعت تفكر هاك ؟؟ الله يهدي ما خلق
ماعليش عاودي جيبيلو يماه و صمطي عليه و حاولي تكوني ذكية باش ماتخليهش يتخلى عليك بزاف ... يبانلي هذا عندو التفكير تع بكري و الناس الكبار ... ربما تربيته كانت خاطئة ... على العموم مادام أمه يسمعلها و تقدر تأثر و انت متفاهمة معاها نقدر نقول عندك حل تقدري تركزي دائما عليه

[- بصمة خير -]

ما علابليش لاه المشكل اللي يصرا أول حل هو الطلاق لمــــــــــــــــاذا ؟؟؟
http://www.djelfa.info/vb/showthread.php?t=1602227
عندك الانترنت تقدري تحوسي و تقراي و تفهمي الراجل كيفاه يفكر و حتى
تبحثي على حلول و ليس الذهاب لاسهل الحلول الطلاق
يتبع

[oumhana]

الله يهديه اختي متتسرعيش في الطلاق يا لطيف منو بصح نادي لباباك يجي وديرولو جماعة و حطوه عند حدو مزال مفاقش بلي عندو مسؤوليه .وزيد مشي يعطيك الدراهم و انت تقضي non je suis désolée il faut qu'il participe مجابكش باه تولي شعيب لخديم لازم يفهم بلي انت مرتو بكل ما تحمله هذه الكلمه من معنى.لازم تقولي للباباك خاطر هو عيط لماماه و نت قاعده dogui wa trougui وسي خونا يتعيزب مع صحابو وحاطلك العمده معاك.الله يهدي مخلق اختي بلاكي على صحتك راه الزعاف يدير .

[أم عبد الكريم]

ربي يفرج عليك انا مفهمتش علاش يجيبو بنات الناس من بعد يمرمدوهم يبعدها على اهلها و ناسها ومن بعد يخليها للوحدة القاتلة و الجوع و الميزيرية
دكي تحتاجي حاجة كلمي امو ولا باباه و قوليلو يجيبلك حتان يكرهو منك و يهدرو معاه قادر يتبدل ربي يعينك

[حمودية]

مدام انك عاملة اشري كسكروط برة و كوليه و خليه بلا طعام............اي استعملي معاه الحيلة

[la perle rima]

راني راح نتعقد من الزواج بسبب قسم مشكلتي في منتديات الجلفة هههه
على العموم ... دائما فكرة الطلاق موجوووووووودة و لكنها صعبة و خطيرة جدااا اتركيها اخر حل ... بالنسبة لزوجك ما فهمتش انا هذا مش خدام ؟؟ و يلزم يراعي شعورك و يفهمك علاه الناس رجعت تفكر هاك ؟؟ الله يهدي ما خلق
ماعليش عاودي جيبيلو يماه و صمطي عليه و حاولي تكوني ذكية باش ماتخليهش يتخلى عليك بزاف ... يبانلي هذا عندو التفكير تع بكري و الناس الكبار ... ربما تربيته كانت خاطئة ... على العموم مادام أمه يسمعلها و تقدر تأثر و انت متفاهمة معاها نقدر نقول عندك حل تقدري تركزي دائما عليه

ههههههههه ضحكتني حنا رانا نعاونوهم و نعطوهم الحلول المشكل تخاف لا يجي نهار و احنا نجو هنا نشكو من الزواج الله لا يقدر ربي يفرج عليهم ان شاء الله و الله ماشي ساهلة تبدا حياة جديدة و متوالمكش صعيبة بزاف

[yako02]

الله يهدي ما خلقعلابالكم انا كرهت الزواج و رجال من تجارب و مشاكل لي يطيحو فيهم المتزوجين كي يتزوجو يبدلو كامل العقلية تقول مشي هاوما لي كانو فرحانين في شهر الاول سبحان الله اتقو الله في النساء ان نفضل نبقى عازبة و نعيش تعيسعة مع رجل ميعرفش واش معناها زواج و بناء اسرة

الله يصبرك اختي و حاولي تتفاهمي معاه لانو واحد كيما هذا مينفعش معاه العنف
بالتوفيق

[أناييس الربيع]

اختي الاسباب مجهولة لتصرف هذا الزوج

ولكن من الواضح "أن من يصرف في البيت "هو أساس المشكل

وأما عن السهر فهذا يعود اليك بالدرجة الاولى حاولي كسبه أكثر

وأما الطلاق ليس لعب كلما نمر بمشكل نفكر فيه

ألف بنت تتمنى تتزوج وتبني أسرة ونتوما تزوجتم ولست أدري ماتريدون أكثر

وضعي نصب عينيك أن الشيطان أعلى وسام عنده "التفريق بين المرء وزوج"

قومي بصلاتك والدعاء وناقشي مع زوجك قضية "من يصرف بالبيت"

ووفقك الله وأصلح شؤونك

[ام ياسين187]

يا اختي ووعلاش الطلاق ...قوليلو عطيني دراهم لمصروف مين تجي من لخدمة شري وواش تستحقي كولي وشربي إلى جاء روطار رقدي خليه باش يعرف قيمتك

[ام ايمان16]

اذاكان مايصرفش عليك وعلى الدار وانتي خدامة اشري كيما قاتلك كسكروط وخليه بلاماكلة اطا ماحبش يصرف على الدار وماعطالكش الدراهم باش تشري مستلزمات البيت

[منير265]

ههههههههه ضحكتني حنا رانا نعاونوهم و نعطوهم الحلول المشكل تخاف لا يجي نهار و احنا نجو هنا نشكو من الزواج الله لا يقدر ربي يفرج عليهم ان شاء الله و الله ماشي ساهلة تبدا حياة جديدة و متوالمكش صعيبة بزاف

صدقيني يا اختي انت و لي ردت بعدك .... هذا الأمر لي خلاني نأجل الفكرة و راني خااااااااااااااااااااايف من اتخاذ القرار

الصعب و للاسف في المجتمع الجزائري تنقصه الثقافة الزوجية و نورمالمو قبل الزواج الزوجين يديرو ستاج خاص و يتكونو

مليح و يفهمو واش معناها الزواج ... لأن أغلبهم يعتقدون الزواج عبارة عن جماع و رومنسية كيما المسلسلات التركية و

نساو المسؤولية و اتخاذ القرارات و المواقف ... لذا تجدهم كي تتطفر كاامل يهرب من مسؤوليته أو يدير أمور خطيرة ... لأنه

للاسف ليس كفؤ و انبهر من الواقع المررر ........

يا إخواني راني نحكي هاك و انا سليباتير و ربي يقدرني في الحياة الزوجية و الله راني خاااااااااايف هههه

أعتذر لأني خرجت عن الموضوع و نتمنى حتى ردي هذا يكون له فائدة للأخت التي طرحت مشكلتها و ربي يجيب الخير

[la perle rima]

صدقيني يا اختي انت و لي ردت بعدك .... هذا الأمر لي خلاني نأجل الفكرة و راني خااااااااااااااااااااايف من اتخاذ القرار

الصعب و للاسف في المجتمع الجزائري تنقصه الثقافة الزوجية و نورمالمو قبل الزواج الزوجين يديرو ستاج خاص و يتكونو

مليح و يفهمو واش معناها الزواج ... لأن أغلبهم يعتقدون الزواج عبارة عن جماع و رومنسية كيما المسلسلات التركية و

نساو المسؤولية و اتخاذ القرارات و المواقف ... لذا تجدهم كي تتطفر كاامل يهرب من مسؤوليته أو يدير أمور خطيرة ... لأنه

للاسف ليس كفؤ و انبهر من الواقع المررر ........

يا إخواني راني نحكي هاك و انا سليباتير و ربي يقدرني في الحياة الزوجية و الله راني خاااااااااايف هههه

أعتذر لأني خرجت عن الموضوع و نتمنى حتى ردي هذا يكون له فائدة للأخت التي طرحت مشكلتها و ربي يجيب الخير

اخي منير صحيح انو المشاكل كترث بصح هادو اللي راهم يطرحو مشاكلهم احنا فرصة لينا باش نستفادوا منهم و نتفداو الشيء اللي يخلي الحياة الزوجية تعيسة ملازمش تخاف تتردد بلاك بصح تخاف لا توكل على ربي و ربي ما فيه غير الخير احنا رانا وحدنا و ماناش مهنييين هادي هي الدنيا كل واحد و مكتوبه نتمناو الخير لينا و ليهم

[chooochooo]

رقيلو في قرعة تع ماء بالاك يهديه ربي و يرجع نورمال

[عبد الله 22]

حاولي تغير سلوكه بالحكمة والصبر لا بالطلاق لأن كل إنسان والعادة التي تحكمه حاولي أن تغيرها بهدوء بالتوفيق والله يصبرك

[bioblida]

انا فهمت من الاخوة انك عاملة و زوجك يتحاشى القيام بواجباته من الانفاق الوضع واضح يا عزرزتي راهوا يحوسك انتي تصرفي على الدار و انا نقولك ردي بالك تغلطي هكا غلطة تبدايها تقولي نحل المشكل و ندير مزية تصيبي روحك تخدمي على الراجل زيري يدك و لما يولي انسان صالح اذا حبيتي تعاونيه ذاك الشي شغلك و الحل كيما قالو البعض عيطي لباباك يهدر معاه في حضور ابوه و اذا قراصت وصلوها لامام اذا كان فيه ذرة ايمان راح يستحي على عرضو و اذا صبتي فيه ريحة الطمع و البخل و سوء العشرة يا اختي غير استخيري صحيح المطلقة مايرحمهاش المجتمع بصح صحتك و دينك اولى و انتي اللي تقدري تحطيه في ميزان و تقدري صدقيني اعرف من مرت بتجربة قريبة من مشكلتك و الحل جاء من المولى بعد الدعاء لكن ناكدلك بلي كلمة ابوك راح تشكل رادع ولو ماتلاحظيهش

يا بنات بالاكوم يجي النهار و تتخاسروا مع اهلكم على جال راجل اللحم اذا فاح مايرفدوه غير اماليه
الله يخلينا ابائنا سندنا و نور عينينا

[first first]

اختي .انا نضن بلي راجل والف مايقعدش في الدار ....والف برا بزاف.............يعني الدار اوتال.كيما اغلبية الجزايريين....................وزيد مايتولهش وماعلابالوش بمسؤوليات الدار.............................وهاد الشي اكيد راهو تعبك بزاف ......لكن اختي...................اصبري.....وبشوية بشوية بلاك يهديه ربي.......الزن على الودان قالوها المصاروة عندو فائدة...............كي تخص حاجة ولهيه....كي تحتاجي حاجة.كاين اخيراع اسمو هاتف نقال..عيطيلو وقلقيه يجيبهالك...................المهم انتي سينيالي البروبلام في واقتو بلا زعاف وبلا ماتنتظري يتنفد في الحال..................نضن هكا بشوية بشوية يتبرمج السي خونا ويعود يتوله وحدو.

ويا اختي لكان ماتبدلش.................غير اصبري......................هادي العقلية راهي متواجدة بكثرة...ونضن راكي قلقانة كي عدتي وحدك وجديدة..نهار تعمر دارك بالولاد وتوالفي تعودي ماتركزيش على هادو المشاكل.

واخر نصيحة...........كلمة الطلاق............غير نحيها من قاموسك........راكي جديدة وماشي مع اول مشكل ولا نقص تفري للطلاق...............محسوب كي تطلقي رايحة تعيشي باية.؟؟؟؟؟ .نصيحة اخرى.المشكل راهو ماشي كبير بزاف .......من راي حلوه بيناتكم مادخلى حتى واحد من اهلك خصوصا.
ربي يهديك ويهديه ويسعدكم دنيا واخرة.

[pomaria_aindefla]

زوجك ليس بيتوتي أي ليس عائلي و أنا أظن أنه ليس مسؤول