مشكلة غريبة عويصة

[مشكلتي]

السلام عليكم يا أحبابي

اليوم قررت اروي لكم قصتي ايها اعزائي اعضاء المنتدى على امل ان تساعدوني في ايجاد حل ولو اني اشك

ايام الثانوية قبل 6 سنوات وقعت في حب فتاة احلامي ولا ابالغ ان قلت أنها أجمل فتاة رأيتها في حياتي وهي ليست من مدينتي كانت داخلية المهم حب من أول شوفة كما يقال، لم أجرئ على مصارحتها، مر العام الأول في سلام ثم أتت السنة الثانية لم احتمل حيث أنني كنت دائم التفكير بها، فبعتلها ابن خالتها التي كانت تدرس معي قلتها روحي لX قوليها Y معجب بك هههههه جاء الرد سريعا في اليوم الموالي راهي تقولك خاطيني هاذ الامور المهم مرت الأيام وأنا نرقد بيها ونصحى بيها وهي ماشي مقيتني خلاص تخرجنا من الثانوية والحمد لله.

في يوم من الأيام قبل الدخول للجامعة تلاقيت بأحد صحاباتها الانتيم وريحنا حكينا وكان اغلب الحديث عن فتاة احلامي وفي الاخير قبلت تعطيني النيميرو ديالها وانا كي البهلول رحت عيطتها ههههه وهناك وقعت الصاعقة شبعتني رخس :D المهم لم يزدني هذا إلا إصرارا بصفتي فتى طائش ومفرفش وكي هبلتها مدت النيميرو ديالي لخاوتها اللي ولاو يعيطولي وطبعا بدون أن أحكي لم ما دار في المكالمات من سب وشتم وتهديد وهناك لا أصارحكم حلاتلي اللعبة، وليت أنا نعيطلهم ونحررررررررش بيهم ونجيب بيهم الوقت خصوصا كان عندي جيزي contorl فيها 300 دقيقة مجانا كنت نخلصها فيهم
هبلتهم مساكن............. لدرجة أن خوها كنت نعطليو بلفظ "نسيبي" ؟؟؟؟؟



المهم، أعرف جيدا أنني أنا اللي تبليتهم لكن المشكلة ليست هناك الآن وأنا على وشك التخرج أريد دخول البيت من الباب وليس من التاقة لأنني لم استطع نسيانها ابدا ابدا ابدا رغم مرور كل هذه المدة لهذا أريد التقدم لخطبتها،

لكن!!!!!!!! ومع ما ذكرته في القصة كيف سأفعل هذا، الفاميلية راهم حالفين فيا خخخخخ

هل يمكن أن يكون لهذه المشكلة حل؟ :)

[ريان 7]

رويت القصة بطريقة طريفة رغم أن الفحوى خطير
على أية حال يبدو أنك طائش لدرجة بعيدة , و ربما عليك التريث قليلا حتى تعقل أكثر ثم فكر بالزواج .
لكن إن كنت مصرا فلا أخفيك سرا احتمال قبولهم بك ضئيل جدا و ربما منعدم .
الأفضل أن تعتذر منهم و تطوي صفحة الجنون إلى اجل مسمى .

[الداعي الى الحق]

انت شخص غير مسؤول
انا متاكد بانك لاتعرف ماهو زواج
كيف لك ان تطلب من صديقتها ان تعطي لم رقم هده الفتاة
وكيف لهده صديقة ان تعطي لك رقم بدون ان تستادن منها
وكيف لك ان تتصل ببنت هي لا ترغب في مكالمتك
وكيف لك ان تتصل باخواتهم وتكلمهم بهده السخرية
انت لم تحترم هده ولا عائلتها وتسخر بيهم
حقيقة لااستطيع ان اواصل الكتابة
لانني لااتحمل ان اكلم اشخاص لا يعرفون الادب

[إكليل]

أنت لم تحترمها لا هي و لا عائلتها فكيف ستقبل الإرتباط بك

[الملتزمة بالدين]

السلام عليكم
رأيي اهو ان تبعث لعائلتها تطلب السماح عما بدر منك وتنسى قصتها .
صديقات اخر زمن

[منير265]

بصراحة نقولك واش راهم يفكرووو
لوكان يبقى غير هو في الكرة الارضية ما نقبلوش بيه ... و عندهم الحق ... و انت بروحك و ربي يهديك و ماحقش عليك دير عفسة كيما هذي نورمالمو كيما تشوف لختك شوف لبنت الناس ربي يهديك ان شاء الله و باش تقول تديها ابدا تحاول تنسى الأمر يبانلي شبه شبه شبه مستحييييل و عندهم الحق في ذلك

[la perle rima]

السلام عليكم لم تقل لنا كم عمرك و كم عمرها ان امكن اكيد السن يهم في قضية مثل هذه

[amine9mm]

يقبلو بيك اخي اقدب منصب مليح وعمر الشكارة وشري سيارة وروح اخطب

نقلهالك يعطوهالك وانت تعاير فيهم ياك اك فاهم العقلية شعب يحب الدورو

[la perle rima]

يقبلو بيك اخي اقدب منصب مليح وعمر الشكارة وشري سيارة وروح اخطب

نقلهالك يعطوهالك وانت تعاير فيهم ياك اك فاهم العقلية شعب يحب الدورو

لوكان جيت في بلاصتهم تقبل انت ؟؟؟؟؟؟؟؟؟

[صمت الوجود]

ليست بمشكلة وانت الان تعمل فينا مثل ماعملت في اخوانها .

ربي يهديك ويرزقك الصلاح قبل الزوجة

[ولد حمد الباتني]

أنا قريت موضوعك وراني نغلي تقلقت
واحد يعيطلي ويديرونجيني ويتبع في ختي ويقلي نسيبك
سترك ربي ماقتلوكش
لوكان جيت أنا خوها راني محكوم عليا ب30 سنة حبس نافذ بتهمة الإختطاف والقتل العمدي مع التنكيل بالجثة ....

[amine9mm]

لوكان جيت في بلاصتهم تقبل انت ؟؟؟؟؟؟؟؟؟

بكل اختصار شعب ما يحبش الزوالي

[حوت العنبر]

اعتقد ان فيه اسرار في قصتك لم تخبرنا بها :sdf: ولهدا الفتاة اعطت هاتفها لاخوتها
ربما طلبت منها اشياء محرمة غصبا عنها مثل - تخرج معاها - بالعنف .. لان الفتاة ماتخبر اهلها الا للضرورة القصوى وليس لمجرد ان شاب طلب رقم هاتفها

راك خلطتلها جد باباها
لو تجيب عمك عبد العزيز بوتفليقة بحنكته السياسية ولا يستطيع فكها لك ..
ومبالك نحن !!!!!!!!!!!!

الخوف كل الخوف لو تتصل باهلها وتقوللهم نجي نخطب وربما سيقولون لك ok حبيبنا تعال وننسى الماضي ,ولما تروح تخطب يمسكوك ويشبعوك ( قزول ) وياخدوك عن اقرب مركز شرطة ,خاصة اد كان عندهم معريفة مع ضابط :1:راح يكبرولك القصة اكثر مما هي كبيرة

نصيحة من خوك انسى امر الفتاة وخيرها في غيرها ,احسن من انك تتمرمد في اقسام الشرطة وتصل قضيتك لوكيل الجمهورية الدي لن يرحمك .. خاصة لما يشوفو اتصالاتك ورسائلك عند مؤسسة الاتصالات
يعني 5 سنوات سجن تاخدهم وانت تضحك خاصة مع القوانين الجديدة
الحمد لله انك وضعت هدا الموضوع قبل ماتكمل والحمد لله لم يتقدمو بشكوى ضدك لحد الساعة ..
احمد ربك وابتعد عن المشاكل

[حوت العنبر]

يقبلو بيك اخي اقدب منصب مليح وعمر الشكارة وشري سيارة وروح اخطب

نقلهالك يعطوهالك وانت تعاير فيهم ياك اك فاهم العقلية شعب يحب الدورو


الوقت هدا لي عندو دورو يسوا ثورو

المجتمع يقيمو ويقادرو صاحب المال او صاحب المسؤولية
اما لي ماعندو والو يحس روحو - حشرة -
يعيش نملة في حفرة ويموت نملة في حفرة
حتى بسيكولوجيا الانسان يقيم ويحترم الي عندو المال والمنصب

[om_hadil]

انت إنسان مريض.... اذهب الى طبيب نفساني

[oumhana]

الله يكون في العون و ما تدري البيوت أسرار بلاك يمدوهالك إذا تعقلت شوي كاين ناس كانو صغار دارو ديgات قد السخط و كناب عليهم ربي وتعقلو راهم دايرين دياروعندهم ولاد ما شاء الله انا نقول إذا عزمت فتوكل على الله.بصح بلاطوايش

[abdoustar]

روح اكبر شويا




و من بعد اهدر ةعلى الزواج

[○•ميسون•○]

هههههههههه سردت الحكاية بطريقة طريفة هههههه صراحتك مليحة
لكني منضنش عارفينك نتا شكون اساسا
بدل نيمروك و تقدم لخطبتها احسن

[أميرة العلوم]

انا نقلك اذا راك تحبها صح و الله حرام الشي لي درتو فيها

مي اذا كانو هوما ما يعرفوكش اعتذر منها و منهم و اطلب يدها

و هكذا ممكن تصلح الامور


خاوتي الدورو مش كلشي

[no name rix]

ههههههه والله ضحكتني بزاف وراني نضحك وحدي
الله يكون معاك أخي ان كنت تريد الزواج منها فابعث أختك أو امك أو احد من العائلة
أما ان كنت التكلم عبر الهاتف كالشباب الذي ألقاه في الليل في الشارع يتكلم بصوت حنين وخافت
فأقول لك أنك تضيع الوقت وبعيد عن الله
الله يكون في عونك ان كنت تريد خيراااااااا

[دروب التابعين]

ياويلك اياك ان تفعل هذا

أما ان كنت التكلم عبر الهاتف كالشباب الذي ألقاه في الليل في الشارع يتكلم بصوت حنين وخافت


رد بالك من الصوت الحنين الخافت في الليل
لان الاشباح ستاكلك

[العهد الرائع]

انا كفتاة لو نعرف انو زوجي دار فيا هاك انا و عايلتي كون طلقت فما بالك قبل الزواج
يا اخي مع كل احترامي لكن تصرفاتك هاذي تدل على انك مازال ما تقدر تفتح دار
خلي الطفلة يدوها الي يستاهلوها و يحترموها هي و عايلتها
تقبل مروري

[djihed]

بلاك راهم نساو عليك بدل نومرو تاعك وبدل لعقلية وتوكل على ربي

[ايمان العرب]

السلام عليكم
ربي يسهلك يا اخ لكن لا تنسى الاستخارة
عادي جدا لا تعقد الامور ياك معظم الشباب يمرون بفترة طيش لكن الان اثبت لهم انك رجل جدير بالمسؤولية