مساعدة لوجه الله

[مشكلتي]

الــــــــــسلام عليكم كيف حالكم اتمنى ان اجد حلا لمشكلتي في هذا القسم انا بنت ادرس في الثانوي الحمد لله كل صديقاتي يحبوني يعني بمعنى الكلمة يقولو يستراحولي لكن ما عنديش صديقة مفضلة عادي صداقات صطحية فقط لكن في المدة الاخيرة اصبحت مملة سواء في المدرسة ام في الفايسبوك ما نلقى ما نحكي دائما ساكتة ما نلقاش موضوع نحكي فيه هوما ولاو يفكرو بلي ما نشتيش نهدر معاهم وبلي راني متكبة نتمني تقتارحو عليا وش من مواضع نحكي فيهم ونكسب صديقات لانو كانت عندي صديقة مقربة او مفضلة لكن افترقنا لهذا السبب قاتلي نتي وحدة متخلقة وكلنا نحبوك بصح ديما سكاتة لا جديد لا والو من فضلكم الحل في اقرب وقت

[حمـ السلام ـمة]

الــــــــــسلام عليكم كيف حالكم اتمنى ان اجد حلا لمشكلتي في هذا القسم انا بنت ادرس في الثانوي الحمد لله كل صديقاتي يحبوني يعني بمعنى الكلمة يقولو يستراحولي لكن ما عنديش صديقة مفضلة عادي صداقات صطحية فقط لكن في المدة الاخيرة اصبحت مملة سواء في المدرسة ام في الفايسبوك ما نلقى ما نحكي دائما ساكتة ما نلقاش موضوع نحكي فيه هوما ولاو يفكرو بلي ما نشتيش نهدر معاهم وبلي راني متكبة نتمني تقتارحو عليا وش من مواضع نحكي فيهم ونكسب صديقات لانو كانت عندي صديقة مقربة او مفضلة لكن افترقنا لهذا السبب قاتلي نتي وحدة متخلقة وكلنا نحبوك بصح ديما سكاتة لا جديد لا والو من فضلكم الحل في اقرب وقت

حبيبتي ماشي لازم تهدري
و كثرة الصداقات ماشي مليحة
شاركي في المواضيع القيمة
الفايس بوك انضمي لصفحات دينية او علمية و ثقافية ووو و قومي بمشاركة كل ما تقرئينه مع الصديقات
هكذا تكسبي الأجر

أنا عندي فايس بوك و كذا و ما نحبش نهدر فيه
نحب نقرأ فقط و رغم هذا نلقى روحي ما قريت والو
لانو كل يوم تجيني مئات المعلومات الرائعة و اللي عندي في الفايس يعجبهم واش نتشارك معاهم ..مرات يردوا و مرات جام تكفي

الكلام ماشي ضروري حبيبتي
مرات نندم على الكلام
لكن السكوت ما تندميش عليه

اللي يهدر بزاف يغلط بزاااااف

ابقي كما انت و من احبتك ستحبك كما انت

ربي يسعدك يا قمري

[miss manar]

هادي حالتنا كامل ولينا كامل سامطين وساكتين تقول خلاصو المواضيع

ولا هاديك الطفلة لي خلاتك على جال ماعندكش مواضيع ( لو كان جا عندها هي مواضيع ؟!!! )

المهم الصداقة مش كيما هكذا ( لازم تحكي معايا ولا لازم تكوني دمك خفيف ولا لازم يكون عندك ديما الجديد ولا مكان لاه ؟؟؟؟

هادي ماشي صداقة

نهار تكوني تحكي مع صحبتك الصح المواضيع تجي وحدها ساعة منك وساعة منها

انا في الفيس بوك يوم مليح وشهر سامط هادا روتين الفيس بوك dont worry

[samara lara]

أختـــــــــــي كثرة الصداقات ليست جيدة فبالنسبة لي امـلك فقط صديقتان مقربتان لي


و الأخريات كلهن يحبوبنني و لكنني اتجنب كثرة الحديث معهم



المهم يجب ان تختاري الصديقة المناسبة لـك و ان لا تكثري الصداقات

و الصداقـة ليست مجرد كـلام "" تقرعيج "" مثلا كما قلتي يقلن لك "" معندكش الجديد ""


الصــديق الجيد لا يتخلى عن صديقه لأتفه الاسباب

[ام امـــــــنــــــة]

يا بنتي فكرتيني بصديقة ليا كانت طباعها كيما تاعك ,, مي الحمد لله انا جامي جرحتها وجامي قلتلها علاه ماتحكيش بالعكس كنت انا الي نجبد معاها لحكايات اذا المشكل ماش فيك المشكل في الي مصاحبتهم حسب مافهمت منك انهم من النوعية الي كي تفوت وحدة يعلقو وكي تصرا حاجة في القسم يلعبوها ,, وغيرها وغيرها انا شخصيا كنت نتجب هذا النوع من البنات لانو اغلب الاحيان يكون حديثهم بصوت عالي ويكون ضحكهم بصوت عالي لا احترام ولا تربية مالة يا لفحلة اتولهي لقرايتك برك واخطيك منهم راهم حابين يفسدوك يا بنتي

[ولد حمد الباتني]

الحل نتاعك نحي من بالك بلي ماعندكش مواضيع تحكي فيهم وراكي ساكوتية
هاكي حكيتي فالموضوع هذا مليح وفهمتينا وعبرتي مليح
كي اديري فبالك بلي ماعندكش موضوع تحكي فيه ولا مواضيع صح تتعقدي بالشوي وتولي مام عندك كي ديري فبالك يروحولك ولا تجي تحكي تحشمي ولا مانعرف
المهم أحكي عادي كيما تحكي فداركم احكي بلا ماديري فبالك بلي ماكانش مواضيع
الي يحكيو خير منك
احكي على لقراية على الباك على اللبسة على الأساتذة والمواضيع حكاية تجيب حكاية تلقاي روحك تحكي في مواضيع بزااااف
والكلمة الي ماتخليكش تحكي هي كلمة ط كاش جديد "
تقوليها ولا يقولوهالك خلاص تتبلوكاي ...

[وهج الحياة]

لا حل ولهم يحزنون اذا كان الكلام من فضة السكوت من ذهب ؟هل ترين انك مملة ؟انت قرري ماهي شخصيتك وانت من تعرفين الانسب ،جميل الانسان ان يكون له اصدقاء ويدردش معاهم لكن في شيئ مليح وليس الغيبة والنميمة من بين هذه المواضيع يكفي انك تغوصي معاهم في الحديث كان تبدي رايك في الوقت المناسب ازاء قضية ما انت ادرى بنوعية صديقاتك اذا كن يفضلن ذلك ،،الحياة من تقترح المواضيع ،وحتى لا تفهمي غلط سلمي على صديقاتك بطريقة مرحبة تشعرهن بانك سعيدة للقائهن وبادري بالسؤال عن احوالهم وكفى فكلمة بكلمة يخلق الموضوع ،،،،،،ننننبالتوفيق

[الصديق قروف]

السلام عليكم
هدا مشكل عندي ثاني
لاكن انا معلبليش بيهم منحبش نحكي على الناس و داكرتي ضعيفة ( منجبدش الحكايات )
وراهي حاجة مليحة كل ماقل كلامنا قل الكدب
وانتي كفتاة ماش مليح يكون عندك صدقات بزاف

[أم تغاريد]

كثير من الفتيات تغيرن بصحبة فتيات المسجد وصرن اجتماعيات يحسنّ الحديث في شتّى المواضيع
نصيحتي لك أختي أن تغيري نظرتك الى نفسك يمكنك باذن الله ان تكوني متحدثة ماهرة مع الوقت حاولي ابتداء ان تشاركيهن احاديثهن ولو بالقليل ثم خلال الحديث ابدي رأيك في أمر ما او اطرحي موضوعا للنقاش
ولا تقلقي ربما ضفط الدراسة جعلك هكذا صامتة
وفقك الله لكل خير

[knives66]

احكيلهم على ارهاب و دباب وليبيا

والله صعيب تلقي موضوع تناقشي فيه بصح شوي واش قلوا ادخلي معاهم

احكي وخلاص ناقشيهم في موضوع لراهم يحكوا فيه

[angel crystal]

يا اختي تهنيتي من وجع الراس

[naamane3]

اذا كانو يحكيو في مواضيع مفيدة
اما اذا كانت مواضيعهم غير تمنشير في خلق الله فالسكوت احسن
المهم ثقفي نفسك خاصة في امور الدين
ومن بعد تلقاي روحك تهدري في كل المواضيع

[منار المنتدى]

وعليكم السلام ورحمة الله وبركاته
أنا لا أرى أنك تعانين من مشكلة كبيرة.
فالأمر عبارة عن خيبة ظن زميلاتك بعد أن كنّ ينتظرن أن يجدنك كثيرة الحديث.
و هذا الأمر لا يجب أن يهزّ ثقتك في نفسك. فقلّة تحدّثك ليس عيبا في حد ذاته و لكن العيب فيما تتحدثين فيه.
استمري على ما أنت عليه. فمن شاءت من زميلاتك أن تبقى إلى جانبك و إلاّ فاتركيهنّ و شأنهنّ.
فسيأتي اليوم الذي يدركن أن صمتك حكمة
أتمنى لك التوفيق في حياتك و النجاح في حياتك الاجتماعية
أختك نوارة

[la perle rima]

هل تكلمت مع والديك في هذا الموضوع ؟؟

[NiHaL Az]

انت فتاة هادئة و لا تحبين كثرة الكلام وهذا هو الشيئ الممتاز في البنت ما تعمريش راسك بيهم و انشاء الله تلقاي صديقة تفهمك تقبلي مروري

[chooochooo]

اديها من عندي
ما كانش صديق في هاذا العصر الكل يغدر